DILONGI 44
NKUNGA 33 Vana Yave Zitu Biaku
Buidi Wulenda Kindimina mu Mambu Mambi?
“Ka wubika mambu mambi ma kununga, vayi tatamana kununga mambi mu kuvanga mamboti.”—LOM. 12:21.
MAMBU TUANLONGUKA
Mbi wulenda vanga boti bakuvangila mambu makhambulu masonga?
1-2. Buidi tumbelanga bo batuvangila mambu mambi?
YESU wutubila kinongo ki mfuizi mueka wudinda kuidi mfundisi muingi kannungisa vantuala mbeni’andi. Minlongisi mi Yesu bavisa buboti mambu mfuizi kaba viokila, kibila bawombo mu thangu beni baba kuba vangilanga mambu makhambulu masonga. (Luk. 18:1-5) Bubu mvitu, tulenda visa buidi nkietu awowo kamuena kibila khumbu zinkaka tumviokilanga mu mambu makhambulu masonga.
2 Bubu nza tuidi mu kuzingila yidi beni luvasanu ayi buimi. Diawu tulendi kuituka ko bo batuvangila mambu makhambulu masonga. (Mpovi 5:8) Vayi tunluta banga mu kiunda boti khomba mu kimvuka betuvangila diambu dimbi. Zikhomba zitu basi ko zimbeni zitu, vayi mammonikinanga kibila tuidi batu bamasumu. Tulenda longuka buidi Yesu kakindimina mu mambu makhambulu masonga bamvangila kuidi bankua mambi. Diawu boti tummonisanga mvibudulu kuidi batu batuvangila mambu makhambulu masonga, buna tufueti luta monisa mvibudulu kuidi zikhomba zitu zi kiphevi. Buidi Yave kammuenanga bo batuvangila mambu mambi, kuba kuandi kuidi batu bankaka voti kuidi zikhomba zitu mu kimvuka? Bukiedika ti nandi wumvuanga nkinza mambu tummonikinanga?
3. Mbi Yave kantomba ba tuvangila ayi kibila mbi?
3 Yave wuntombanga batuvangila mamboti. ‘Nandi wunzolanga busonga.’ (Minku. 37:28) Yesu wukanikisa ti Yave ‘wala vanga mambu masonga’ mu thangu yifuana. (Luk. 18:7, 8) Nkadu wunkhambu, nandi wunkuiza manisa ziphasi ayi mambu moso makhambulu masonga—Minku. 72:1, 2.
4. Lusalusu mbi Yave katuvananga?
4 Tumvingilanga thangu Yave kala manisa mambu moso mambi. Vayi kheti bobo, nandi wutusadisanga bo bankaka ba tuvangila mambu mambi. (2 Pet. 3:13) Dedi, nandi wu tulonganga mambu tufueti vanga, bo batuvangila mambu makhambulu masonga muingi kubika kutodisa mambu. Mu nzila kifuani ki Muan’andi ayi malongi mabongulu mu Kibibila, Yave wu tumonisa phila tulenda nungina mambu makhambulu masonga.
ZABA MAKUVANGA BO BAKUVANGILA MAMBU MAKHAMBULU MASONGA
5. Kibila mbi tufueti bela keba keba bo tumviokila mu mambu makhambulu masonga?
5 Tumbanga beni mu kiunda mu kibila ki mambu makhambulu masonga. (Mpovi 7:7) Bisadi bikuikama bi Yave, dedi Yobi ayi Abakuki mvawu baba mu kiunda. (Yobi 6:2, 3; Haba. 1:1-3) Kheti disi ko diambu dimbi kuba mu kiunda, tufueti ba keba keba muingi mayindu amomo mabika kutu nata kuvanga diambu dimbi.
6. Mbi tulenda longuka mu kifuani ki Abisaloni? (Tala mvandi fikula.)
6 Thangu zinkaka bo tumviokila mu mambu mambi, tulenda tomba kuludika mambu beni mu phil’itu. Kuvangila mambu mu phila ayoyo, kulenda buela kutu tuadisa ziphasi. Tala kifuani ki Abisaloni muana Ntinu Davidi. Nandi wuba beni mu kiunda bo Amoni wubutuka yawu tata mueka, kakuika Tamali kabundana yandi nyitu. Mu kutadila nsiku wu Mose, Amoni khanu bamvonda mu mambu kavanga. (Levi. 20:17) Kheti disa ba ko diambu dimbi Abisaloni kuba mu nganzi, vayi nandi wuvanga diambu dimbi bo kavonda Amoni.—2 Samu. 13:20-23, 28, 29.
Abisaloni kasa kukiyala ko bo bakuika khomb’andi Tamali kubundana nyitu (Tala lutangu 6)
7. Buidi mayindu mambi mabina vukumunina wumueka mu bisadi bi Yave?
7 Bo tummona luzingu lu batu bamvanganga mambu mambi kukuenda buboti, tulenda yindula! Disi ko diambu dinkinza kuvanga mambu masulama. Wumueka mu bisadi bi Yave wumona bankua mambi kuvanga mambu makhambulu masonga kuidi batu bamboti. Vayi kheti bobo, luzingu luawu luaba monikina buka ti lunkuenda buboti. Diawu katubila: ‘Abobo badi bankua mambi bakhambu kuazukanga.’ (Minku. 73:12) Nandi mvandi wuyiza ba beni mu kiunda, mu kibila ki mambu mambi mabina kumvanga kumanisa lufiatu luandi mu Yave. Diawu katubila: ‘Bo yaba tomba kuvisa mambu moso amomo, yiyiza ba phuda.’ (Minku. 73:14, 16) Kuntuala nandi wuyiza bue tuba: ‘Minu yibina vukumuka, nkadu wukhambu khanu yisialubuka.’ (Minku. 73:2) Khomba mueka bantedilanga Alberto mvandi wuviokila mu mambu maphila ayoyo.
8. Buidi yaya Alberto kabela mu mambu kamonikina?
8 Yaya Alberto bamvunina mambu ti, nandi wuyiba zimbongo zi kimvuka. Mu kibila akiokio, kasa bue tatamana ko kuba nkulutu wu kimvuka. Ayi nduka zikhomba zioso bazaba mambu beni, basa bue kumfiatilanga ko. Nandi wutuba: “Yinyonga beni mu mambu mamonika ayi yiba mu nganzi.” Mu kubika mayindu amomo manyala, nandi wubika kubue landakananga zikhutukunu mu mimvu mitanu. Kifuani akiokio kimmonisa mambu malenda monika, befu kubika mambu makhambulu masonga ma tutuadisa.
LANDAKANA KIFUANI KI YESU BO WUMVIOKILA MU MAMBU MAMBI
9. Mambu mbi Yesu kaviokila? (Tala mvandi fikula.)
9 Yesu wutuvana kifuani kimboti tulenda landakana bo tumviokila mu mambu mambi. Basi dikanda diandi ayi batu bankaka, bamvangila mambu mambi. Dedi, basi dikanda diandi bo bakhambu ba kiminu mu nandi bankamba ti malawuka. Zimfumu zi binganga bankamba ti nandi wuba kithuadi na ziphevi zimbi. Ayi masodi ma basi Loma bansakinina, bambula ayi bamvonda. (Mala. 3:21, 22; 14:55; 15:16-20, 35-37) Kheti mu mambu moso amomo Yesu kaviokila, nandi kasa vutudila ko mambi. Mbi tulenda longuka mu kifuani kiandi?
Yesu wu tubikila kifuani kilutidi, mu phila yikunungina mambu makhambulu masonga (Tala lutangu 9-10)
10. Buidi Yesu kakindimina mu mambu mambi? (1 Petelo 2:21-23)
10 Tanga 1 Petelo 2:21-23. a Yesu wutubikila kifuani kimboti tulenda landakana bo batu bankaka batuvangila mambu mambi. Nandi wuzaba thangu yi kukoluka ayi yikuvuena sui. (Mat. 26:62-64) Kheti bo bankaka baba tubanga mambu mambi matedi nandi, Yesu kasa tuba ko ni diambu. (Mat. 11:19) Mu thangu kaba luaku lu kukoluka, nandi kasa wonina ko zimbeni ziandi voti kuba vutudila mambi. Nandi waba zabanga ku kiyala kibila “waba fiatilanga mu Mutu no wumfundisilanga mu busonga.” Yesu wuzaba ti Yave waba monanga mambu moso mambi baba kumvangilanga. Nandi wuba lufiatu ti, Yave wala manisa mambu moso mambi mu thangu yifuana.
11. Mu ziphila mbi tufueti yadila mambu tunkoluka? (Tala mvandi foto.)
11 Befu tulenda landakana kifuani ki Yesu, mu kukiyala muingi kuzaba mambu tuntuba bo batuvangila mambu mambi. Khumbu zinkaka, vantombulu kuvuena sui muingi tubika todisa mambu. (Mpovi 3:7; Tia. 1:19, 20) Vayi khumbu zinkaka, vantombuluanga kukoluka bo tumviokila mu mambu amomo voti bo vantombulu kukakidila kiedika. (Mav. 6:1, 2) Diawu bo tumbaka makani ma kukoluka, tufueti vangila mawu mu lukinzu.—1 Pet. 3:15. b
Bo tumviokila mu mambu makhambulu masonga, tufueti landakana kifuani ki Yesu mu kuzaba thangu mbi ayi buidi tufueti kolukila (Tala lutangu 11-12)
12. Buidi tulenda fiatila mu “Mutu no wumfundisilanga mu busonga”?
12 Befu tulenda landakana kifuani ki Yesu, mu kufiatila mu “Mutu no wumfundisilanga mu busonga.” Bo batu bankaka batuvangila mambu makhambulu masonga, tulenda ba lufiatu ti Yave zebi mambu mabe monika. Lufiatu alolo, lulenda tusadisa kukindama mu mambu amomo, kibila tuzebi ti Yave wala ludika mambu mu thangu yifuana. Befu kumfiatila ayi kubika mamoso mu mioko miandi, tualasa tatamana ko kuba mu nganzi. Kibila mabanza amomo, malenda ku tuvanga kubaka makani makhambu fuana, kumanisa mayangi mitu ayi kutulula kikundi kitu na Yave.—Minku. 37:8.
13. Mbi bilenda kutusadisa kutatamana kununga mambu mambi?
13 Befu tulendi nunga ko, kulandakana kifuani ki Yesu mu phila yivedila. Kibila khumbu zinkaka tulenda tuba voti kuvanga diambu tulenda nyongina kuntuala. (Tia. 3:2) Khumbu zinkaka mambu mambi ba tuvangilanga, malenda ku tutuadisa kiunda ayi kukhambu kuma zimbakana mu luzingu luitu loso. Vayi muingi wutatamana kununga mabanza amomo, ba lufiatu ti Yave zebi. Ayi Yesu wuviokila mu mambu maphila ayoyo, wumvisanga mabanza maku. (Ebe. 4:15, 16) Kubotula kuandi kifuani kivedila ki Yesu, Yave wu tuvananga malongi mabongulu mu Kibibila ma tusadisanga kununga mambu mambi. Buabu tuemmona matangu muadi ma Kibibila madi mu buku yi Loma malenda kutusadisa.
“BIKANU KULUNDILANGA BANKAKA NGANZI”
14. Kibila mbi tulendi ‘lundila ko bankaka nganzi’? (Loma 12:19)
14 Tanga Loma 12:19. Mvuala Polo, wulubula Baklistu ti ‘Yave nandi widi nsua wu kulunda nganzi.’ Befu tumbikanga nganzi mu mioku mi Yave, mu kubika nandi kavanga mambu masonga mu phil’andi ayi mu thangu’andi. Yaya John wuviokila mu mambu makhambulu masonga wutuba: “Yivanga mangolo muingi yibika dedikisa mambu mu phil’ama. Loma 12:19 yitsadisa kuvibidila mu Yave”.
15. Kibila mbi tufueti bikila Yave kadedikisa mambu mitu?
15 Befu tumbakanga ndandu bo tumbika Yave kadedikisa mambu. Befu kuvanga mawu, tualasa viokila ko mu kiunda ki kutomba kudedikisa mambu mu phil’itu. Yave wutusadisanga, diawu ka tukambila ‘tuvibidila mu nandi kibila wala manisa mamoso.’ Befu kufiatila ti Yave, nandi wala fundisa batu bamvangilanga bankaka mambu mambi tuala bika mamoso mu mioku miandi. Kibila tuidi lufiatu ti nandi wala ludika mambu beni mu phila yilutidi. Mawu masadisa John, tube tubila kumbusa. Nandi wutuba: “Minu kuvibidila mu Yave, nandi wala luta dedikisa mambu mu phila yilutidi.”
“TATAMANA KUNUNGA MAMBI MU KUVANGA MAMBOTI”
16-17. Buidi nsambu wutusadisilanga “kutatamana kununga mambi mu kuvanga mamboti”? (Loma 12:21)
16 Tanga Loma 12:21. Polo mvandi wulubula Baklistu muingi “batatamana kununga mambi mu kuvanga mamboti.” Mu dilongi kavanga kumbata mongo, Yesu wutuba: “Tataman’anu kuzola zimbeni zinu ayi natanganu batu ba mukuamisanga mu minsambu.” (Mat. 5:44) Mawu mvandi Yesu kavanga. Ḿba tulenda yindula mu ziphasi kaviokila bo bambanda va dikunzi kuidi masodi ma basi Loma. Tulendi nunga ko kuvisa ziphasi Yesu kaviokila.
17 Yesu wutatamana kumonisa luzolo ayi lukuikumunu kuidi Yave kheti mu ziphasi kaviokila. Nandi kasa singa ko masodi bambanda. Vayi nandi wudinda: “A Tata, wuba lemvukila, kibila basa zaba ko mambu badi mu kuvanga.” (Luk. 23:34) Bo tunsambila kuidi Yave muingi kasadisa batu ba tuvangilanga mambu mambi, mawu ma tusadisanga kuba bavumbama ayi kudekula nganzi tuidi. Mvandi ma tusadisanga kubalula phila tu batadilanga.
18. Buidi nsambu wusadisila Alberto ayi John kununga mambu makhambulu masonga?
18 Nsambu wusadisa zikhomba wadi tube tubila kumbusa, kununga mambu makhambulu masonga baviokila. Alberto wutuba: “Yinata mu minsambu zikhomba baphangila mambu mambi. Yidinda kuidi Yave muingi katsadisa kununga mambu maphasi yaba viokila.” Mayangi kuzaba ti Alberto wuvutuka kubue sadila Yave mu lukuikumunu. John wutuba: “Khumbu ziwombo yaba natanga mu nsambu khomba wundueka ntima. Minsambu beni mitsadisa kunlemvukila, kubika kumfundisa ayi kubaka ndembama.”
19. Mbi tufueti vanga bo tukhidi zingila mu nza yi satana? (1 Petelo 3:8, 9)
19 Bo tukidi zingila mu nza yi satana, tuala tatamana kuviokila mu mambu makhambulu masonga. Mosokua mambu tulenda viokila, tufueti tatamana kudinda kuidi Yave muingi katusadisa. Mvandi tulenda landakana kifuani ki Yesu, mu phila nandi kanungina mambu makhambulu masonga ayi kutatamana kusadila minsua mi Kibibila. Befu kuvanga mawu tulenda ba lufiatu ti, tuala tambula lusakumunu lu Yave.—Tanga 1 Petelo 3:8, 9.
NKUNGA 38 Yave Wala Kuvana Mangolo
a Mu buku yitheti yi Petelo kapu 2 ayi 3, Petelo wutubila mambu Baklistu mu sekulu yitheti baviokila, kuidi zimfumu zi bisalu ayi banuni bawu baba khambu sadilanga Yave.—1 Pet. 2:18-20; 3:1-6, 8, 9.
b Tala video mu jw.org yintuba: Landakana Nzila yi Kubakila Ndembama va dikanda.
