DILONGI 45
NKUNGA 138 Kitoku ki Minlengi mi Phembi
Longuka mu Mambu Matsuka ma Babakala Bakuikama
‘Bakana ko kuidi biboba tulenda bakila nduenga ayi kuzinga beni kutuadisanga ko phisulu?’—YOBI 12:12.
MAMBU TUANLONGUKA
Kutumukina Yave Nzambi, kuntuadisanga lusakumunu bubu ayi luzingu lu mvu ka mvu mu bilumbu binkuiza kuntuala.
1. Mbi tulenda longuka mu zikhomba zi yonzuka?
BEFU boso tuntomba thuadusulu muingi tubaka makani mankinza. Tulenda bakila thuadusulu beni mu nzila bakulutu ba kimvuka ayi zikhomba zinkaka ziyonzuka mu kiphevi. Kheti bawu ba tulutidi mu phunga, tulendi yindula ko ti malongi mawu masiala ko nkinza. Yave wuntomba tulonguka mu kifuani kiawu. Bawu bama luta zinga mimvu miwombu kena befu, bazebi mambu mawombu ma kuvanga, badi phisulu ayi nduenga.—Yobi 12:12.
2. Mbi tunkuiza longuka mu dilongi adidi?
2 Mu thangu yikhulu, Yave wusadila bisadi biandi bikuikama muingi kukindisa ayi kutuadisa dikabu diandi. Dedi, Mose, Davidi ayi mvuala Yoane. Bawu bazinga mu thangu yiviakana ayi baviokila mu mambu maviakana mu luzingu. Bo baba belama kufua, bawu baba vananga malongi manduenga kuidi matoku. Kadika kisadi akiokio kikuikama, kitubila matedi nkinza wu kutumukina Nzambi. Yave wubika muingi mambu amomo manduenga, matuka nati mu bilumbu bitu. Kheti tukidi matoku voti bakulutu, tulenda baka ndandu mu kufiongunina malongi amomo. (Lom. 15:4; 2 Ti. 3:16) Mu dilongi adidi, tunkuiza tubila mambu matsuka babakala abobo bakuikama batuba ayi mbi tulenda longuka mu mawu.
‘NGIE WALA ZINGA THANGU YIWOMBO’
3. Biyeku mbi Mose kaba?
3 Mose wuba wukuikama mu Yave. Nandi wuba mbikudi, mfundisi ayi ntuadisi. Mose wuviokila mu mambu mawombu mu luzingu! Nandi wukula basi Isaeli mu buvika ku Ngipiti ayi wumona mangitukulu mawombu Yave kavanga. Yave wunsadila muingi kusonika zibuku zitanu zitheti zi Kibibila, mvandi buku yi Yobi, Minkunga 90 ayi ḿba Minkunga 91.
4. Banani Mose kakindisa ayi kibila mbi?
4 Bo kaba belema kufua, Mose wuba 120 di mimvu. Nandi wukutikisa dikabu di Isaeli muingi kuba tebula moyo mambu bamona ayi baviokila. Bawombu mu batu bayuwa mambu amomo masuka, bamona bidimbu ayi mangitukulu Yave kavanga ku Ngipiti. (Esodu 7:3, 4) Bawu bamona bo Yave kakabula ḿbu wubenga ayi bo kabunga Falawo ayi masodi mandi. (Esodu 14:29-31) Mvandi bamona phila Yave kaba kiebila bo baba kuthandu. (Deute. 8:3, 4) Bo baba belama kukota ku Ntoto Yave kaba Kanikisa, Mose wusadila luaku alolo lusuka muingi kukindisa dikabu. a
5. Khindusulu mbi mambu masuka Mose katuba madi mu Deutelonomi 30:19, 20 mavana kuidi basi Isaeli?
5 Mbi Mose katuba? (Tanga Deutelonomi 30:19, 20.) Dikabu di Isaeli baba kivuvu ki mambu mamboti maba kuiza kuntuala. Mu lusakumunu lu Yave, basi Isaeli baba luaku lu kuzinga mimvu miwombu ku ntoto Yave kaba kanikisa. Wawu wuba ntoto wumboti ayi wuba beni mbozi. Mose wuba sudikisa matedi ntoto beni bo katuba: ‘Ntoto widi mavula manneni ayi mamboti mo wukhambu tunga. Na zinzo ziwala mu biuma bimboti bio wukhambu sala, bisima bio wukhambu sika, vinu ayi olive bio wukhambu vata.’—Deute. 6:10, 11.
6. Kibila mbi Yave kabikila basi Asilia ayi basi Babiloni kununga dikabu di Isaeli?
6 Mose wulubula bana ba Isaeli ti muingi batatamana kuzinga mu ntoto awowo wumboti, vaba tombulu bawu kutumukina zithumu zi Yave. Mose wuba kamba ‘basola luzingu,’ mu kukuwa Yave ayi ‘kukuikama mu nandi.’ Vayi kiadi kuzaba ti bana ba Isaeli basa tumukina ko Yave. Buviokila thangu, Yave wubika muingi basi Asilia ayi basi Babiloni baba nunga ayi baba nata ku buvika.—2 Minti. 17:6-8, 13, 14; 2 Lusa. 36:15-17, 20.
7. Mbi tulenda longuka mu mambu masuka Mose katuba? (Tala fikula.)
7 Mbi mawu ma tutulonga? Kutumukina, kuala vukisa luzingu luitu. Dedi bana ba Isaeli baba nduka kukota ku Ntoto baba Kanikisa, befu mvitu tuambelama kukota mu nza yimona Yave ka tukanikisa, ko tuala mona ntoto kuba paladizu. (Yesa. 35:1; Luk. 23:43) Satana ayi ziphevi zimbi, bala bungua. (Nzai. 20:2, 3) Binganga bi luvunu, bialasa bue vukumuna ko batu. (Nzai. 17:16) Zimfumu zi luyalu balasa bue kuamisa ko batu. (Nzai. 19:19, 20) Ku paladizu, kualasa zinga ko batu bakhambu tumukinanga. (Minku. 37:10, 11) Batu mu nza yimvimba bala tumukina zithumu zisonga zi Yave, zintuadisanga kithuadi ayi ndembama. Bawu bala monisa luzolo ayi bala fiatilanga bankaka. (Yesa. 11:9) Tumvingilanga thangu ayoyo mu mayangi. Mvandi befu kutumukina Yave, tuala tatamana kuzinga ku paladizu kubika to mu mua khama di mimvu, vayi mu thangu zioso.—Minku. 37:29; Yoa. 3:16.
Befu kutumukina Yave, tuala zinga ku paladizu va ntoto kubika mu mua thangu vayi mu mvu ka mvu (Tala lutangu 7)
8. Buidi lukanu lu kuzinga mvu ka mvu lusadisila khomba widi mu kisalu ki misioni? (Yuda 20, 21)
8 Befu kutatamana kuyindulanga mu lukanu lu kuzinga mvu ka mvu Yave ka tukanikisa, tuala tatamana bakuikama mu nandi mu mosokua mambu maphasi tulenda viokila. (Tanga Yuda 20, 21.) Lukanu alolo, lulenda tusadisa kunuana nzingu mu mambu tuidi balebakana. Khomba mueka ku África widi mu kisalu ki misioni mu mimvu miwombu, waba monanga phuila yi kuvanga mambu manyogisa Yave. Nandi wuvisa ti na kumanga kutumukina Yave, kalasa zinga ko ku paladizu. Nandi wutuba: “Mawu matsadisa kutatamana kunuana nzingu matedi mambu yaba viokila mu kusambilanga kuidi Yave. Mu lusalusu lu Yave minu yinunga mambu amomo.”
‘NGIE WALA BAKA NDANDU’
9. Mambu mbi Davidi kaviokila mu luzingu?
9 Davidi wuba ntinu wumboti. Nandi wuba nyimbidi, disodi dipisuka ayi mbikudi. Nandi wuviokila mu mambu mawombu maphasi. Dedi, mu mimvu miwombu, nandi waba kue tinanga kibila Ntinu Sauli waba tomba kumvonda. Bosi bo kayiza ba ntinu, Davidi wubue tina muingi kuvukisa luzingu luandi mu kibila ki muan’andi Abisaloni waba tomba kuvokuna kintinu kiandi. Kheti mu ziphasi kaviokila ayi mu zinzimbala kavanga, Davidi wutatamana wukuikama mu Nzambi nati kutsuka luzingu luandi. Yave wutuba ti Davidi, wuba ‘mutu wunkuangidikanga [ntim’andi].’ Bukiedika, tufueti landakana kifuani ki Davidi!—Mav. 13:22; 1 Minti. 15:5.
10. Kibila mbi Davidi kavanina malongi kuidi muan’andi Salomo?
10 Tala malongi Davidi kavana muan’andi Salomo, wumvinginina mu luyalu. Yave wusola Salomo muingi katunga tempelo ayi katatamana kutuadisa mbuongimini yikiedika. (1 Lusa. 22:5) Kiba kiyeku kiphasi, diawu vaba tombulu lusalusu lu Yave muingi kununga kutuadisa dikabu. Mambu mbi Davidi kakamba Salomo? Ndoku tumona.
11. Dedi bummonisina 1 Mintinu 2:2, 3, malongi mbi Davidi kavana Salomo ayi mbi bimonika bo Salomo kaba tumukinanga mawu? (Tala mvandi fikula.)
11 Mbi Davidi katuba? (Tanga 1 Mintinu 2:2, 3.) Davidi wukamba muan’andi ti na kutumukina Yave, nandi wala baka ndandu mu luzingu. Ayi mu mimvu miwombu, Yave wusakumuna Salomo mu kumvana biuma biwombu bimboti. (1 Lusa. 29:23-25) Nandi wutunga tempelo ayi wusonika zibuku zinkaka zi Kibibila. Wuyiza ba wuzabakana mu kibila ki nduenga ayi busina buandi. (1 Minti. 4:34) Vayi Davidi wukamba Salomo ti nandi wala baka to ndandu, na kutumukina to Yave Nzambi. Kiadi ayi kiunda kuzaba ti kuntuala, Salomo wuyiza buongimina zinzambi zinkaka. Yave kasa zola ko mambu Salomo kavanga, diawu kabikila kubue mvana nduenga muingi kuyadila dikabu mu phila yimboti ayi yisonga.—1 Minti. 11:9, 10; 12:4.
Mambu masuka Davidi kakamba Salomo, malenda tusadisa kumona ti befu kutumukina Yave, nandi wala tuvana nduenga muingi kubaka makani mamboti (Tala lutangu 11-12) b
12. Mbi tulenda longuka mu mambu Davidi katuba?
12 Mbi tulenda longuka mu mawu? Kutumukina kuntuadisanga ndandu. (Minku. 1:1-3) Yave kasa kanikisa ko kutuvana busina voti kuba bazabakana dedi bo Salomo kabela. Vayi befu kuntumukina, nandi wala tuvana nduenga muingi tubaka makani mamboti. (Zinga. 2:6, 7; Tia. 1:5) Minsua miandi milenda tutuadisa mu matedi kusola kisalu, kikola, zimbongo ayi mambu ma kuviokisila thangu. Mvandi, mi tusadisanga kubaka mayangi va dikanda. (Zinga. 2:10, 11) Befu kulandakana minsua miandi, tuala kieba kikundi kitu ayi nandi ayi tuala baka luzingu lu mvu ka mvu.
13. Mbi bisadisa Carmen kubaka makani manduenga?
13 Yaya Carmen wunkalanga ku Mozambique, waba yindulanga ti kuvanga faculdade, kuawu kuala kunsadisa kubaka luzingu lumboti. Diawu kasodila curso yi Arquitetura. Nandi wusonika: “Yizola mambu yaba longuka, vayi vaba tombulu kuviokisanga thangu yiwombu ku kikola kibila yaba kotanga 7:30 ayi kubasikila 18:00. Diba diambu diphasi kukuendanga mu zikhutukunu ayi kikundi kiama na Yave, kitona kudekuka. Yiyiza visa ti yaba sadila zimfumu wadi.” (Mat. 6:24) Nandi wusambila matedi mambu amomo ayi wufiongunina mu bilongulu bitu. Nandi wubue tuba: “Malongi baphana kuidi zikhomba ziyonzuka mu kiphevi ayi kuidi mam’ami, matsadisa kubaka makani ma kubotuka ku faculdade ayi kusadila Yave mu kisalu ki thangu ka thangu. Mawu matsadisa kubaka makani mamboti mu luzingu ayi yinyonganga ko mu mawu.”
14. Malongi mbi mankinza Mose ayi Davidi bavana?
14 Mose ayi Davidi baba zolanga beni Yave ayi bazaba nkinza wu kuntumukina. Diawu bakindisila bankaka balandakana kifuani kiawu ayi batatamana bakuikama mu Yave Nzambi. Bawu mvawu baba lubula ti baboso bambikanga kusadila Yave, balasa baka ko lunungu ayi lusakumunu kaba kanikisa. Malongi mawu makidi nkinza nati bubu. Bo vavioka mimvu miwombu kisadi kinkaka ki Yave, wumonisa nkinza wu kutatamana wukuikama mu Nzambi.
“VASI KO KIBILA KINKAKA KINLUTA KUTHUADISANGA MAYANGI”
15. Mambu mbi mvuala Yoane kamona mu luzingu luandi?
15 Yesu waba zolanga beni mvuala Yoane. (Mat. 10:2; Yoa. 19:26) Yoane wulandakana Yesu mu kisalu kiandi ki kusamuna, wumona mangitukulu kavanga ayi wuba yandi va kimueka mu thangu ziphasi. Nandi wumona bo bavonda Yesu ayi bo kavulubuka. Wumona kimvuka ki Baklistu mu sekulu yitheti kukonzuka ayi zitsangu zimboti ‘kusamunu kuidi batu boso va ntoto.’—Kolo. 1:23.
16. Ndandu mbi tumbakanga mu minkanda mi Yoane?
16 Kutsuka luzingu luandi, mvuala Yoane wubaka luaku lu kusonika Diambu di Nzambi. Nandi wumona ‘bimona mesu bitedi Yesu Klistu.’ (Nzai. 1:1) Yoane wusonika buku yinnata dizina diandi ayi zibuku zinkaka zitatu zi Kibibila. Mu nkanda wuntatu, nandi wufila wawu kuidi Ngaio no Yoane katadila muana wu kiphevi. (3 Yoa. 1) Ayi ḿba vaba zikhomba ziwombu Yoane kaba tadilanga banga bana ba kiphevi. Mambu dibakala adiodio dikuikama kasonika, makindisa minlandikini mioso mi Yesu nati mu bilumbu bitu.
17. Dedi bummonisina 3 Yoane 4, mambu mbi mantuadisanga mayangi?
17 Mbi Yoane kasonika? (Tanga 3 Yoane 4.) Yoane wusonika matedi mayangi tumbakanga mu kutumukina Nzambi. Mu thangu Yoane kasonika minkanda miandi mitatu, batu bankaka baba longanga mambu ma luvunu, maba tuadisanga kithatu mu kimvuka. Vayi kheti bobo, batu bankaka batatamana “kudiatila mu kiedika.” Bawu batatamana kutumukina Yave ayi “kudiatila mu zithumu ziandi.” (2 Yoa. 4, 6) Baklistu abobo bakuikama, batuadisa mayangi kubika to kuidi Yoane vayi mvandi kuidi Yave.—Zinga. 27:11.
18. Mbi tulenda longuka mu mambu mvuala Yoane katuba?
18 Mbi tulenda longuka mu mawu? Lukuikumunu luntuadisanga mayangi. (1 Yoa. 5:3) Dedi, befu tumbanga mu mayangi mu kuzaba ti tuidi mu kukuangidika Yave. Nandi wumbanga mu mayangi bo tuntumukina zithumu ziandi mu kubika kuvanga mambu mambi. (Zinga. 23:15) Zimbasi mvandi ku diyilu, bankuangalalanga. (Luk. 15:10) Mvitu tunkuangalalanga bo tummona khomba wuntatamana wukuikama, bulutidi bo kamviokila mu ziphasi voti mu zithotolo. (2 Te. 1:4) Ayi bo nza yi Satana yala bungua, befu tuala kuangalala mu kutatamana bakuikama mu Yave.
19. Mbi yaya Rachel katuba matedi kulonga kiedika kuidi bankaka? (Tala mvandi foto.)
19 Befu tumbanga beni mu mayangi bulutidi bo tunzabikisa bankaka kiedika. Rachel wunkalanga ku Congo Democratico wutuba ti luidi luaku lunneni kulonga bankaka matedi Yave Nzambi. Nandi wusadisa batu bawombu kusadila Yave. Nandi wutuba: “Yisi ko bu kusudikisila mayangi yimbanga mu kumona batu yilonga kukonzuka mu kiphevi, kuzola Yave, kumfiatila ayi kubalula nzingulu’awu muingi kunkuangidika. Mayangi amomo, malutidi kena mosokua mangolo voti mambu yivanga muingi kuba longa matedi Yave.”
Befu tuala baka mayangi bo tunlonga bankaka kuzola ayi kutumukina Yave (Tala lutangu 19)
BAKA NDANDU MU MAMBU MATSUKA MA BABAKALA BAKUIKAMA
20. Mambu mbi tuidi badedakana na Mose, Davidi ayi Yoane?
20 Mose, Davidi ayi Yoane bazinga mu zithangu ziviakana ayi baviokila mu mambu maviakana. Vayi vadi mambu tuidi badedakana ayi bawu. Dedi bawu, befu mvitu tunsadilanga Nzambi yikiedika, tunsambilanga kuidi Nandi, tu kumfiatilanga ayi tunlandakananga zithuadusulu ziandi. Dedi babakala abobo, befu tuidi lufiatu ti Yave wunsakumunanga batu ba kuntumukinanga.
21. Lusakumunu mbi batu banlandakananga malongi ma bisadi abiobio bikuikama bala tambula?
21 Befu tunlandakananga mambu amomo masuka babakala abobo bakuikama batuba mu kutumukina Yave. Befu kuvanga mawu, tuala baka ‘ndandu’ mu mamoso tumvanga ayi tuala zinga mvu ka mvu. (Deute. 30:20) Mvandi tuala baka mayangi ma kukuangidika Tat’itu yi luzolo, no wundukisanga zikhanu zioso ka tukanikisa mu phila tukhambu yindudila.—Efe. 3:20.
NKUNGA 129 Tufueti Kuikamanu
a Nduka basi Isaeli boso bamona mangitukulu mu ḿbu wubenga, basa kota ko ku Ntoto Yave kaba Kanikisa. (Zinta. 14:22, 23) Yave wutuba ti babakala boso baba 20 di mimvu nati kuntuala, bala fuila ku thandu. (Zinta. 14:29) Vayi, Yosua, Kalebi, bo bakhambu ba 20 di mimvu ayi bawombu mu nkuna wu Levi, basa fua ko. Bawu basabuka Muila Yolidani ayi bakota ku ntoto Yave kaba kanikisa.—Deute. 1:24-40.
b MAMBU MADI MU ZIFOTO: Khonzu lukietu: Davidi wumvana malongi masuka kuidi muan’andi Salomo. Khonzu lubakala: Zikhomba bambaka ndandu mu mambu badi mu kulonguka mu Kikola ki Mintuami Ntuala.
