NGIE wumvanganga mangolo muingi kuvanga ndongukulu’aku yi Kibibila kadika sabala ayi mu phila yimboti? Ḿba befu bawombo tununganga ko kuvanga mawu. Yindula mu mambu ma luelu tumvanganga, dedi kukobila ayi kusukula bikhutu. Mawu mantombuluanga mangolo mawombu ayi thangu, vayi bo tummana kuvanga mawu, tumbanga mu mayangi. Mawu malenda monika mu ndongukulu yi Kibibila. (Efe. 5:26) Mona mua mambu malenda kusadisa:

• Vanga thuadusulu. Ndongukulu yi Kibibila yidi mu khati “mambu malutidi nkinza” Baklistu balendi lenza ko. (Fil. 1:10) Muingi ku kusadisa kulandakana thuadusulu beni, buidi wummuena, kubabika yawu vama wulenda fika yimuena dedi, mu kibaka voti va geleira? Ove ngie wulenda tula alarme mu telefone ava thangu yifuana yo wunkuiza longukila.

• Sola thangu ayi kibuangu kifuana. Ngie wunluta sikikanga mayindu bo wunlonguka mu thangu yiwombu voti mu thangu yikhufi? Sikika thangu yifuana mu ngie. Ngie zebi mambu malutidi nkinza. Diawu vanga thuadusulu’aku mu kutadila mambu amomo. Buidi wummuena kuvanga ndongukulu’aku mu 10 di minutu? Kheti mu 10 di minutu wulongukila, wulenda longuka mambu mawombo. Ḿba thangu beni wutsikika ya kufuana, ngie wala tomba kubuela longuka.—Fil. 2:13.

• Sola mambu wunkuiza longuka ava kilumbu ki ndongukulu. Ngie kuyindula mambu wunkuiza longuka muna thangu beni, wisinkuiza ‘sadila ko buboti thangu’aku.’ (Efe. 5:16) Buidi wummuena kusonika mambu wunkuiza longuka? Dedi boti kiuvu voti diambu wukhambu visa buboti, sonika diawu. Ayi kutsuka yi kadika ndongukulu, ngie wulenda sonika mambu mankaka wuntomba kulonguka.

• Balula mambu boti vantombulu. Kulongukanga kadika sabala, diawu diambu dilutidi nkinza. Muingi wununga kuvanga mawu, dedikisa—thangu, kilumbu, bilokula bikua fueti viokisa ayi mbi wunkuiza longuka.

Bukiedika, tumbakanga ndandu mu kulonguka kadika sabala. Mawu matusadisanga kuvangila mambu mu nduenga, ma tukindisanga ayi ma tufikikanga kuidi Yave.—Yosua 1:8.