DILONGI 47
NKUNGA 103 Bakulutu Ba Kimvuka—Nkhayilu Wu Yave
Zikhomba zi Babakala—Muidi mu Kuvanga Mangolo Muingi Muba Bakulutu ba Kimvuka?
“Boti khomba wu dibakala widi mu kuvanga mangolo muingi kuba nkulutu wu kimvuka, buna widi mu kutomba mambu mamboti.”—1 TI. 3:1.
MAMBU TUANLONGUKA
Zikhadulu zintombulu muingi khomba yi dibakala kaba nkulutu wu kimvuka.
1-2. Mbi bintombulu muingi kuba nkulutu wu kimvuka?
BOTI widi nsadisi wu bakulutu, ngie wulenda nunga kuba nkulutu wu kimvuka. Boti mawu widi mu kuyindula, buna widi mu kutomba “mambu mamboti.”—1 Ti. 3:1.
2 Mbi bintombulu muingi kuba nkulutu wu kimvuka? Vantombulu kutuama ntuala mu kisalu ki kusamuna, ki kulonga, kukindisa zikhomba ayi kuba kifuani kimboti mu kimvuka mu mambu wuntuba ayi wumvanga. Diawu Kibibila kintedila bakulutu ba kimvuka “minkhailu mi batu.”—Efe. 4:8.
3. Buidi wulenda bela nkulutu wu kimvuka? (1 Timoti 3:1-7; Titu 1:5-9)
3 Buidi wulenda bela nkulutu wu kimvuka? Vasintombulu ko to kuzaba kuvanga mambu muingi kuba wufuana mu kuba nkulutu wu kimvuka. Mu nza boti ngie zebi kuvanga mambu mawombo, wulenda baka kisalu. Vayi muingi kuba nkulutu wu kimvuka, ngie fueti zaba kulonga ayi kusamuna. Mvandi fueti kuna zikhadulu bantubila mu 1 Timoti 3:1-7 ayi Titu 1:5-9. (Tanga.) muingi kuba nkulutu wu kimvuka. Mu dilongi adidi, tunkuiza longuka mambu matatu mantombulu muingi kuba nkulutu wu kimvuka: Kuba wuzabakana mu mavanga mamboti mu kimvuka ayi kuidi batu bankaka; Kuba kifuani kimboti mu kuba mfumu dikanda ayi kuba wukubama mu kusadila zikhomba mu kimvuka.
BA WUZABAKANA MU MAVANGA MAMBOTI
4. Mbi binsundula kuba “mutu wukhambulu tsembolo”?
4 Muingi wuba nkulutu wu kimvuka, ngie fueti ba mutu “wukhambulu tsembolo” mawu mansundula kuba wuzabakana mu zikhadulu zimboti. Mvandi,“batu bankaka bafueti ta kibangi kimboti matedi ngie.” Batu bakhambu sadilanga Yave, balenda kuvueza mu kibila ki mambu wunkikininanga vayi bika kuvana kibila muingi ba kuvunina mambu. (Dani. 6:4, 5) Wukiyuvusa, ‘Minu yidi wuzabakana kuidi zikhomba zi kimvuka ayi kuidi bankaka mu kuba zikhadulu zimboti?’
5. Buidi wulenda monisina ti “wunzolanga mamboti”?
5 Boti ngie “wunzolanga mamboti,” buna wala tomba kumona mamboti kuidi bankaka ayi wala banyunganga mu zikhadulu ziawu zimboti. Mvandi ngie wala kuangalala mu kuvanga mamoso mantombulu muingi kusadisa bankaka. (1 Te. 2:8) Kibila mbi zikhadulu aziozio zididi nkinza kuidi bakulutu ba kimvuka? Kibila bawu bansadilanga thangu’awu muingi kukindisa zikhomba mu kimvuka ayi kukieba biyeku biawu. (1 Pet. 5:1-3) Mayangi mankuizilanga mu kusadila bankaka, malutidi kena mosokua mambu balenda vanga.—Mav. 20:35.
6. Buidi wulenda monisina ti widi mutu “wunyambanga” bankaka? (Ebeleo 13:2, 16; tala mvandi foto.)
6 Ngie wulenda monisa ti widi mutu “wunyambanga” bankaka, mu kuba vangila mamboti kubunda mvandi, baneni bakhambulu bakundi baku bafikama. (1 Pet. 4:9) Dibakala dimueka wutubila abubu matedi kuyamba bankaka: “Muelu wu nzo’aku—ayi ntim’aku—wufueti banga wuzibuka kuidi zinzenza.” Wukiyuvusa, ‘Minu yidi wuzabakana mutu wunzolanga kuyamba zinzenza?’ (Tanga Ebeleo 13:2, 16.) Monisa mamboti kuidi zinzenza zioso: Dedi, kuidi zikhomba bakhambulu beni mbakulu, kuidi zikhomba bankuiza vanga malongi mu kimvuka ayi kuidi zikhomba bakivananga muingi kukindisa zikhomba—dedi minkengididi mi bimvuka.—Ngene. 18:2-8; Zinga. 3:27; Luk. 14:13, 14; Mav. 16:15; Lom. 12:13.
Bakuela bamueka badi mu kumonisa mamboti, mu kuyamba nkengididi wu kimvuka ayi nkazi’andi (Tala lutangu 6)
7. Buidi nkulutu wu kimvuka kafueti monisina ti “kasi ko khunya zimbongo”?
7 “Kalendi ba ko khunya zimbongo.” Mansundula kubika tsikika mayindu mu biuma bi kinsuni. Kheti widi kiphumbulu voti kisina, ngie wulenda tula zitsatu zi Kintinu va theti mu luzingu luaku. (Mat. 6:33) Diawu, sadila thangu’aku, mangolo maku ayi mambu mankaka mu kusadila Yave, kukieba dikanda diaku ayi kusadila kimvuka. (Mat. 6:24; 1 Yoa. 2:15-17) Wukiyuvusa: ‘Buidi yintadilanga zimbongo? Yinkuangalalanga mu kubaka biuma bifuana? Voti yintsikikanga thalu mu zimbongo mu kutomba kubaka biuma biwombo?’—1 Ti. 6:6, 17-19.
8. Mu ziphila mbi wulenda monisina ti “widi zikhadulu zimboti” ayi “wuzebi kukiyala”?
8 Ngie kuba “zikhadulu zimboti” ayi “kuzaba ku kiyala,” ngie wala zaba bu kunatina luzingu luaku. Mawu mansundula kubika kuviokisa kitesu mu kudia, kunua, kuvuata ayi kusola buboti mambu wumviokisila thangu. Ngie wulendi landakana ko phila batu bakhambu sadilanga Yave, bannatinanga luzingu luawu. (Luk. 21:34; Tia. 4:4) Ngie “wunuanga ko beni malavu” mawu mansundula ti wisi ko wuzabakana banga kikolu mbungu. Wukiyuvusa, ‘Phila yinnatinanga luzingu luama, lummonisa ti yidi zikhadulu zimboti ayi yizebi kukiyala?’
9. Mbi binsundula kuba mutu widi “nduenga” ayi wukhambulu “divunza”?
9 Mutu widi “nduenga,” wumbakanga makani mu kutadila minsua mi Kibibila. Ngie wunyindulanga matedi buidi malongi ma Kibibila ma kusadisilanga mu kadika makani wumbaka? Ngie wufika bakanga ko makani. Vayi wuntombanga zithuadusulu zioso zintombulu. (Zinga. 18:13) Ngie kuvanga mawu, buna wala baka makani madi nguizani na luzolo lu Yave. Ngie widi mutu wukhambulu“divunza,” wumvitilanga mu thangu, wuzabakana mutu wu lufiatu ayi wunlandakananga zithuadusulu zi kimvuka. Zikhadulu aziozio ziala kusadisa, kuba wuzabakana mutu wumboti. Buabu tuentubila zikhadulu zi Kibibila, fumu dikanda kafueti ba muingi kaba kifuani kimboti.
BA FUMU YIMBOTI YI DIKANDA
10. Buidi fumu dikanda kafueti ‘tuadisila buboti dikanda diandi’?
10 Boti ngie widi nnuni ayi wuntomba kuba nkulutu wu kimvuka, zaba ti vantombulu dikanda diaku diba zikhadulu zimboti. Ngie “fueti tuadisa buboti dikanda” diaku. Mansundula kuba wuzabakana fumu wu dikanda widi luzolo ayi wumbakanga makani mamboti. Mvandi kafueti ba kifuani kimboti, mu mambu moso ma kiphevi. Kibila mbi? Mvuala Polo wuyuvula: “Boti dibakala kasinnunga ko kutuadisa buboti dikanda diandi buna buidi kalenda nungina kukieba kimvuka ki Nzambi?”—1 Ti. 3:5.
11-12. Kibila mbi zikhadulu zi bana zididi nkinza boti khomba wuntomba kuba nkulutu wu kimvuka? (Tala foto.)
11 Boti ngie widi fumu dikanda, “bana baku bafueti ba batu bantumukinanga mu bukiedika.” Ngie fueti kuba longa ayi kuba kubika mu luzolo. Kibila ngie ntomba bawu babaka mayangi mu luzingu dedi bo bana banzodilanga. Ngie kuba kubika buboti, bawu bala ba bana bantumukinanga, badi lukinzu ayi badi zikhadulu zimboti. Kubotula kuandi amomo, ngie mvaku fueti vanga mamoso wunnunga muingi kusadisa bana baku, kukuna kinkundi kimboti na Yave, kuzingila mu minsua mi Kibibila ayi kukonzuka mu kiphevi muingi kubotama.
12 “Bana bandi bafueti ba bakuikama ayi bakhambu zabakana mu mavanga mambi ayi mu ntu ngolo.” Boti muana bevola disumu dingolo, bukiedika ti tata kalenda ba wufuana muingi kuba nkulutu wu kimvuka? Boti tata kasa kubika ko buboti bana bandi ayi kuba semba, ḿba nandi kalendi tambula ko kiyeku ki kuba nkulutu wu kimvuka.—Tala Kibanga ki Nsungi kilumbu 15 Ngonda Yikumi, mvu 1996, tsielu 21, lutangu 6-7.
Fumu dikanda wunkubika bana bandi mu mambu mawombo maviakana matedi kimvuka (Tala lutangu 11)
SADILA KIMVUKA
13. Buidi wulenda monisina ti widi mutu wukhambu tombanga bankaka ‘bavangila mambu mu phil’aku’?
13 Zikhomba bammonisanga zikhadulu zidi mu Kibibila, nkinza beni badi mu kimvuka. Mutu wuntuadisanga ndembama katombanga ko “mambu mavangimina mu phil’andi.” Boti wuntomba kuba wu zabakana, mutu wukhambu vangilanga mambu mu phil’aku, fueti kuwa bankaka ayi kuvua nkinza mayindu mawu. Dedi, mu lukutukunu ngie widi wukubama muingi kubuela mioko makani ma bankaka boti mawu masinlevula ko minsiku voti minsua mi Kibibila? “Mutu wukhambulu lungundayi” kakuikanga ko bankaka bavangila mambu mu phil’andi. Nandi wunkikininanga malongi bankaka ba kumvana. (Ngene. 13:8, 9; Zinga. 15:22) Kasi ko “nkua ziphaka” voti “kafika fuemanga ko.” Mawu mansundula ti ngie wunkinzikanga bankaka voti wuyambilanga ko yawu. Nkua ndembama mawu mansundula kutuama ntuala muingi kutuadisa ndembama kheti mu mambu maphasi. (Tia. 3:17, 18) Ngie kukolukila mu phila yimboti, mankuiza sadisa bankaka kuba bavumbama kubunda mvandi zimbeni zitu.—Minkongu 8:1-3; Zinga. 20:3; 25:15; Mat. 5:23, 24.
14. Mbi bintombulu kuidi “mutu wubotimizi mvangi” muingi kaba nkulutu wu kimvuka?
14 Boti khomba wuntomba kuba nkulutu wu kimvuka, “kalendi ba ko mutu wubotimizi vangi.” Kheti vasintombulu ko kuviokisa mimvu miwombo tona wubotama, vayi vantombulu kukonzuka mu kiphevi. Ava wuba nkulutu wu kimvuka, ngie fueti monisa dedi Yesu ti widi mutu wu kikululanga ayi wunkuangalalanga mu kiosokua kiyeku wunkuiza tambula mu kimvuka ki Yave. (Mat. 20:23; Fil. 2:5-8) Mutu “wukuikama” wunzingilanga mu phila yinkuangidika Yave ayi wunlandakananga zithuadusulu ba tuvananga mu nzila kimvuka kiandi.—1 Ti. 4:15.
15. Muingi mutu kaba nkulutu wu kimvuka, kafueti ba wupisuka mu kulonga? Sudikisa
15 Kibibila kintuba ti mutu wuntomba kutambula kiyeku “kafueti ba mutu zebi kulonga.” Mawu mansundula ti nandi kafueti ba mutu wupisuka mu kulonga? Ndamba. Kheti bakulutu bawombo basi ko bapisuka mu kulonga, vayi badi bapisuka mu kisalu ki kusamuna ayi mu kisalu ki kukindisa zikhomba. (Tala “Bazebi Kulonga” nota mu 1 Timoti 3:2; dedikisa 1 Kolintu 12:28, 29 ayi Efeso 4:11.) Kheti bobo, bawu bafueti vanga mangolo muingi kupisuka mu kulonga. Buidi balenda vangila mawu?
16. Buidi wulenda buela pisukila mu kulonga? (Tala mvandi foto.)
16 “Kafueti ba wukuikama mu diambu di Nzambi.” Muingi wuba nlongisi wupisuka, fueti ba lufiatu ti mambu wuntuba, wunlonga ayi malongi wumvana zikhomba, mafueti ba nguizani na Kibibila. Mvandi fueti ba nlonguki wumboti wu Kibibila ayi wu bilongulu bitu. (Zinga. 15:28; 16:23) Bo wunlonguka, sonika mambu mankinza bebakila ndandu. Ayi bo wunlonga, vanga mangolo muingi kunyikuna mintima mi batu ba kukuwa. Ngie wulenda luta ba nlongisi wupisuka, mu kudindanga lusalusu kuidi bakulutu bankaka ba kimvuka bapisuka. (1 Ti. 5:17) Bakulutu ba kimvuka ‘bafueti . . . kindisanga’ zikhomba ziawu. Mvandi khumbu zinkaka bafueti vananga malongi voti kuba“semba” vayi bafueti vangila mawu mu luzolo. Ngie kumonisanga mamboti, luzolo ayi kusadilanga Diambu di Nzambi bo wunlonga, ngie wala baka ndandu mu kulandakana kifuani ki Nlongisi Wulutidi, Yesu.—Mat. 11:28-30; 2 Ti. 2:24.
Nsadisi wu bakulutu wunsadila luaku kadi lu kusadila Kibibila, muingi kukindisa khomba bo kadi va kimueka na nkulutu wu kimvuka wupisuka. Nandi mvandi, widi mu kukubama mu kiyeku kiandi mu kuyitala mu lumuenu (Tala lutangu 16)
TATAMANA KUSADILA BANKAKA
17. (a) Mbi bilenda sadisa minsadisi mi bakulutu kutatamana kusadila bankaka? (b) Mbi bakulutu bafueti fiongunina bo bantomba kusola khomba muingi kaba nkulutu wu kimvuka? (Tala quadro yintuba: “ Tubanga Kiedika bo Lumfiongunina Zikhadulu zi Bankaka.”)
17 Bo bamfiongunina zikhadulu zitombulu muingi kuba nkulutu wu kimvuka, minsadisi miwombo mi bakulutu bakimuenanga ti basi ko bafuana. Vayi tebuka moyo ti, ni Yave, ni kimvuka kiandi bantomba ngie wumonisa zikhadulu aziozio mu phila yivedila. (1 Pet. 2:21) Ayi phevi yinlongo yi Yave yawu yala kusadisa kukuna zikhadulu aziozio. (Fil. 2:13) Vadi khadulu wufueti luta vangila mangolo? Sambila kuidi Yave matedi yawu. Fiongunina matedi khadulu beni ayi dinda lusalusu kuidi bakulutu mu phila wulenda buela pisukila.
18. Makani mbi minsadisi mi bakulutu bafueti baka?
18 Befu boso kubunda mvandi bakulutu ba kimvuka, tufueti tatamana kukuna zikhadulu tuma longuka mu dilongi adidi. (Fil. 3:16) Ngie widi nsadisi wu bakulutu? Tatamana kukonzuka mu kiphevi! Dinda kuidi Yave ka kukubika ayi ka kusadisa kubalula mambu mantombulu, muingi wunsadila ayi kusadila kimvuka. (Yesa. 64:8) Bika Yave ka kusakumuna bo wumvanga mangolo muingi kuba nkulutu wu kimvuka.
NKUNGA 101 Tusala mu Kithuadi na Zikhomba
