Yibutuka mu mvu 1927, ku divula di Chicago, E.U.A. Tat’ami ayi mam’ami babuta bana batanu—Jetha, Don, minu, Karl ayi Joy. Befu boso tuba bakubama muingi kusadila Yave mu ntima woso. Jetha wukota Kikola ki Ngiliadi ki turma yimmuadi mu mvu 1943. Don, Karl ayi Joy bayenda ku Beteli yi Brooklyn, Nova Iorque mu mimvu 1944, 1947 ayi 1951. Kifuani kiawu kimboti ayi kifuani ki matata mami, kitsadisa beni.

Tat’ami ayi mam’ami baba zolanga Nzambi, kutanga Kibibila ayi baba longanga bana bawu mambu baba tanganga. Lufiatu lu tat’ami mu binganga lumana, mu kibila ki mambu kamona bo kaba mu busodi ku Europa mu mvita wutheti wu nza yimvimba. Mam’ami wuvutula beni matondo bo tat’ami kavutuka wumoyo. Nandi wunkamba: “Karl, ndoku mu nzo nzambi.” Tat’ami wunkamba: “Minu ya kunata kuna, vayi yisinkota ko.” Diawu mam’ami kanyuvudila: “Kibila mbi?” Tat’ami wutuba: “Mu thangu mvita, minu yaba monanga mimpelu miwombu baba kinganga kimueka, vayi baba buelanga mioku mangumba maviakana mu kusakumuna masodi ayi mata mawu.”

Bo mam’ami kaba mu nzo nzambi, Zimbangi wadi zi Yave bayiza ku nzo’itu. Bawu bavana tat’itu zibuku wadi Light ayi buku yi Nzaikusu. Tat’ami wuvua nkinza zibuku beni, diawu ka zitambudila. Bo mam’ami kamona zibuku beni, nandi wutona ku zitanga. Ayi kilumbu kimueka, mam’ami wumona ndubu mu jornal yaba tumisa batu bavua nkinza, babaka ndongukulu yi Kibibila mu zibuku aziozio. Nandi wubaka makani ma kukuenda. Bo katuka, nkietu mueka wuzibula muelu wuba na ntindu zibuku beni mu mioku. Diawu mam’ami kanyuvudila, “Ngie widi mu kulonguka zibuku azizi akuku?” Nandi wutambudila “Ngete, kota.” Mu sabala yilanda, mam’ami wunata bana bandi. Ayi befu tutona kukuendanga kadika sabala.

Mu lukutukunu lumueka, ntuadisi wundinda muingi yitanga lutangu lu Minkunga 144:​15, luaba tuba ti batu bambuongiminanga Yave, badi beni mayangi. Yizola beni lutangu alolo ayi matangu muadi mankaka dedi—1 Timoti 1:11 luntuba ti “Yave widi Nzambi yi mayangi” ayi Efeso 5:​1, yimmonisa ti “tufueti landakana kifuani ki Nzambi.” Yivisa phuila yi  kuvanga malutidi kuidi Mvangi’ami ayi kumvutudilanga matondo mu luaku kaphana—lu kulonguka mambu amomo mankinza matuadisa luzingu luama.

Kimvuka kifikama, kiba 32 di zi Quilômetro ku Chicago. Befu tuaba landakananga zikhutukunu ayi yiyonzuka mu kiphevi. Kilumbu kimueka, ntuadisi wusola Jetha muingi kavana mvutu. Diawu bo yiyuwa mvutu kavana, minu yituba: ‘Ah minu yizebi mambu amomo. Khanu yiba nanguna koku muingi kuvana mvutu!’ Tona mu kilumbu beni, yitona kuvana mimvutu mu bikuma biami veka. Bulutidi, minu ayi zikhomba ziami tuyonzuka mu kiphevi. Yibotama mu mvu 1941.

Yintebuka moyo mambu mamonika mu lukutukunu lu mavula lu vangama mu mvu 1942 ku Cleveland, Ohio. Kuvioka 50 di bibuangu balandakana lukutukunu alolo mu telephone ku Estados Unidos. Dikanda ditu balandakana lukutukunu alolo ku kibuangu kinkaka zikhomba bakubika. Bo Mvita Wummuadi wu Nza waba koba, zikhuamusu kuidi Zimbangi zi Yave zibuelama. Va builu, yimona mangumba ma zikhomba babika minda mi makalu mitatama. Baboso babaka makani ti kadika dikalu mu fueni ba mutu wumueka wunkuiza kengidila yi builu. Va kumonika diambu, zikhomba baba tatikanga minda miawu mi makalu, muingi kufoka ayi kubuzina mutu wuntomba kuba vanga bubi. Mu phila ayoyo, bankaka baba dumanga muingi kunsadisa. Minu yiyindula, ‘Dikabu di Yave badi bakubama mu mambu moso!’ Mawu maphanga kuba wuvumbama ayi kulala buboti mu khambu boma.

Mu mimvu milanda, yiyindula mu mambu mamonika mu lukutukunu alolo. Ayi yivisa ti mam’ami, kasa ba ko mu boma. Nandi wutula lufiatu luandi mu Yave ayi mu kimvuka kiandi. Yilendi zimbakana ko kifuani kiandi kimboti.

Mua thangu ava lukutukunu alolo, mam’ami wuyiza ba ntuami ntuala. Diawu, mu lukutukunu beni, nandi waba sonikanga mambu moso kalonguka maba tubila kisalu ki thangu ka thangu. Bo tuaba vutuka ku nzo, nandi wutuba: “Yintomba kutatamana mu kisalu ki thangu ka thangu, vayi yalasa nunga ko kuvanga mawu mu kibila ki kukieba nzo.” Diawu kayuvudila boti befu tulenda kumbuela mioku. Befu tutuba, ngete. Diawu kavanina kadika mutu mu befu kiyeku ki kudiodisanga kivinga kimueka voti bia biodi mu kadika meni ava kunua kafi. Bo tuaba basikanga mu kikola, nandi waba fionguninanga boti nzo yidi yidiodila ayi waba vutukanga mu kisalu ki kusamuna. Mam’itu wuba nkietu wuba biyeku biwombu, vayi waba kiebanga buboti bana bandi. Bo tuaba vitilanga ku nzo muingi kudia, nandi waba banga va khonzu’itu. Ayi bilumbu binkaka bo tuaba banga mu kikola, befu tuaba basikanga yandi mu kisalu ki kusamuna. Mawu ma tusadisa kuvisa tsundu yi kuba ntuami ntuala.

Minu yiyiza ba ntuami ntuala, bo yiba 16 di mimvu. Kheti tat’ami kasa fika ba ko Mbangi yi Yave, vayi waba vuanga nkinza kisalu kiami ki kusamuna. Builu bumueka, minu yinkamba ti kheti mu mangolo moso yivanga mu kubasika mu kisalu ki kusamuna, minu yisa dengana ko mutu waba tomba kulonguka Kibibila. Bosi yiyuvula tat’ami, papa, “Ngie widi wukubama muingi kulonguka yami Kibibila?” Nandi wuyindula mu mua minutu mu mambu yinkamba ayi wuthambudila: “Yisimmona ko kibila mbi yilendi  longukila ko yaku.” Diawu tat’ami, nandi wuba nlonguki wutheti wu Kibibila yibaka. Alolo luba luaku lunneni!

Befu tulonguka buku “The Truth Shall Make You Free.” Bo tuaba tatamana kulonguka, minu yivisa ti tat’ami waba kutsadisa kuba nlonguki ayi nlongisi wupisuka. Dedi, builu bumueka bo tumana kutanga lutangu lumueka, nandi wukhamba: “Minu yidi mu kumona mambu buku ayiyi yintuba. Vayi buidi yilenda zabila ti buku beni yintuba kiedika?” Minu yisa ba ko wukubama muingi kumvana mvutu. Diawu yinkambila: “Minu yinkuiza fiongunina ayi mu ndongukulu yinkuiza, yala kuvana mvutu.” Ayi mawu yivanga. Minu yibakula matangu maba kindisa diyindu tuaba tubila. Tona mu thangu ayoyo, minu yitona kukubamanga buboti mu kadika ndongukulu. Mawu matsadisa kuluta konzuka mu kiphevi ayi tat’ami mvandi. Nandi wusadila mambu moso kaba longuka ayi wubotama mu mvu 1952.

Yibotuka ku nzo matata mami bo yiba 17 di mimvu. Jetha a wukota mu kisalu ki misioni, ayi Don, wuyenda ku Beteli. Bawu babuadi, baba zolanga biyeku biawu ayi mawu makhindisa beni. Yiwesa nkanda muingi kukuenda ku Beteli ayi kukota Kikola ki Ngiliadi ayi yibika mamoso mu mioku mi Yave. Mambu mbi mamonika? Bathumisa muingi kukuenda ku Beteli mu mvu 1946.

Mu mimvu miwombu, yitambula biyeku biviakana ku Beteli bitsadisa kulonguka mambu mawombu. Mu 75 di mimvu yeka ku Beteli, yilonguka kusumba biuma dikanda di Beteli baba tomba ayi kufila biuma binkinza mu bibuangu binkaka. Bulutidi, minu yinzolanga beni bidia bi kiphevi tuntambulanga ku Beteli mu mbuongimini yimeni ayi malongi mankaka ma Kibibila.

Mvandi yilonguka beni mu kifuani ki khomb’ami yi kilezi Karl, wuyiza ku Beteli mu mvu 1947. Nandi wuba nlonguki ayi wunlongisi wumboti wu Kibibila. Khumbu mueka minu yindinda lusalusu mu kiyeku yiba. Yisudikisa kuidi Karl ti yikubika bilongulu biwombu vayi yisa zaba ko kilongulu mbi yifueti sadila. Nandi wutsadisa kubaka mvutu bo kakhamba: “Joel, mbi ntu diambu wu dilongi diaku wuntuba?” Minu yivisa mbi kaba tomba kutuba. Vabe tombulu minu kusadila to bilongulu biaba sudikisa ntu diambu yinkuiza vanga, kubika kuandi kusadila bilongulu binkaka. Yizimbakananga ko dilongi adiodio.

Muingi kubaka mayangi ku Beteli, vantombuluanga kuba kifuza mu kisalu ki kusamuna ayi mawu mantuadisanga ndandu mu kubaka bifuani bi khindusulu. Yintebuka moyo mu kifuani kimonika mu builu bumueka bo yituka ku Nova Iorque. Khomba mueka ayi minu, tukokuta muelu wu nkietu mueka  wukikinina Kibanga ki Nsungi ayi Despertai! tunzabikisa mazina mitu ayi tunkamba, “Builu abubu tuidi mu kusadisa batu kulonguka mambu makhindusulu matedi Kibibila.” Nandi wutambudila: “Bo muidi mu kutubila matedi Kibibila kotanu.” Befu tutanga ayi tutubila matangu mawombu mantubila Kintinu ki Nzambi ayi nza yimona yinkuiza. Mawu manyikuna mabanza ma nkietu beni ayi nandi wutumisa bankaka va dikanda diandi muingi baba yitu mu sabala yilanda. Nandi ayi nnuni’andi kuntuala, bayiza ba bisadi bikuikama bi Yave.

Minu yiviokisa 10 di mimvu muingi kutomba nkietu wufuana wu kukuela. Mbi bitsadisa kubakula nkietu beni? Yisambila matedi mambu amomo ayi yikiyuvusa, ‘Mbi yinkuiza vanga bo tunkuiza kuelana?’

Mu lukutukunu lu mavula lu mvu 1953 luvangimina ku Estádio yi Yankee, yizaba khomba mueka bantedilanga Mary Aniol. Nandi ayi Jetha baba mu turma yimmuadi yi Kikola ki Ngiliadi. Ayi Mary waba salanga va kimueka na khomb’ami Jetha mu kisalu ki misioni. Mu mayangi Mary wukhamba matedi kiyeku kiandi ki misioni ku Caribe ayi minlonguki mi Kibibila kaba tuadisanga kuna mu mimvu miwombu. Bo tuzabasana, yivisa ti befu tuba makani mamueka ma kiphevi. Luzolo tuba befu babuadi lubuelama ayi tukuelana mu Ngonda Yinna mvu 1955. Mu ziphila ziwombu Mary wumonisa ti nandi wuba phuila yi kusadila Yave ayi wuba kifuani kimboti muingi yilandakana. Nandi wuba mayangi mu kioso kua kiyeku kaba tambulanga. Nandi wusala mu ntima woso muingi kusadisa bankaka ayi waba tulanga zitsatu zi Kintinu va theti mu luzingu luandi. (Mat. 6:33) Tusala mu kisalu ki kukengidila mu mimvu mitatu ayi mvu 1958, ba tutumisa muingi kusadila ku Beteli.

Yilonguka beni mu kifuani ki Mary. Dedi, va thonono dikuela ditu, befu tubaka makani ma kutanganga va kimueka 15 di matangu ma ki Kibibila. Bo tuaba mananga kutanga, tuaba tubilanga buidi tulenda sadila mambu tuma tanga mu luzingu luitu. Khumbu ziwombu, Mary waba tubilanga matedi mambu kalonguka mu Kikola ki Ngiliadi ayi mu kisalu kiandi ki misioni. Mambu amomo, matsadisa kubuela pisuka mu kulonga ayi kukindisa zikhomba zi bakietu.—Zinga. 25:11.

Nkazi’ami wu luzolo Mary wufua mvu 2013. Ayi minu yimvingila mu mayangi thangu tuala dengana mu nza yimona! Vayi bo thangu beni yibubu yitukizi’abu ko, yidi wukubama muingi kutatamana kulonguka ayi kufiatila mu Yave, mu ntim’ami woso. (Zinga. 3:​5, 6) Yimbakanga beni mbombolo ayi mayangi mu kuyindula mambu dikabu di Yave bala vanga mu nza yimona. Kubunda mvandi kulonguka mambu mamona matedi Nlongis’itu Wulutidi! Yisi ko bu kuvutudila matondo, mu mamboti moso Yave ka kuphangilanga mu kundongisa ayi mu mamboti yikhambu fuana mu kutambula.