Mvuala Polo wusonikina Timoti wuba mvandi nkulutu kimvuka mambu amama: “Minu yikudinda va ntuala Nzambi, va ntuala Yesu Klistu ayi va ntuala zimbasi zisolu, muingi wulandakana zithuadusulu azizi mu khambu luvasanu voti mu khambu tala bizizi.”—1 Ti. 5:21.

Muingi kutusadisa kuzaba banani zimbasi aziozio, theti tuentubila zimbasi bakhambulu mu dingumba adiodio. Bawu basi ko mu dingumba di 144.000. Kibila bo Polo kasonikina mambu amomo kuidi Timoti, buna luvulubukusu lu Baklistu basolu lutoniniabu ko. Bawu basi ko bapostolo ayi Baklistu bankaka basolu kibila nati thangu ayoyo, buna babediabu ko bivangu bi kiphevi.—1 Ko. 15:​50-54; 1 Te. 4:​13-17; 1 Yoa. 3:2.

Mvandi ‘zimbasi aziozio zisolu,’ basi ko bo basola kuba kukhonzu Satana, bo babayisa Nzambi mu thangu khuka minlangu ayi bayiza ba ziphevi zimbi. (Ngene. 6:2; Luk. 8:​30, 31; 2 Pet. 2:4) Kuntuala bala kuba tula mu buloko mu 1.000 di mimvu.—Yud. 6; Nzai. 20:​1-3, 10.

“Zimbasi zisolu” Polo katubila, ḿba zidi zimbasi zibuela mioko ‘Yave ayi Yesu’ Klistu.

Vadi mafunda na mafunda ma zimbasi. (Ebe. 12:​22, 23) Tulendi yindula ko ti zimbasi aziozio badi kiyeku kimueka. (Nzai. 14:​17, 18) Dedi, Yave wudinda mbasi yimueka muingi kavonda 185.000 di masodi ma Asilia. (2 Minti. 19:35) Ayi zimbasi ziwombo batambula biyeku, dedi bankaka “bala vasa mu Kintinu kiandi baboso bamvanganga bankaka kusumuka ayi banlevulanga minsiku.” (Mat. 13:​39-41) Bankaka batambula kiyeku ‘muingi bakutikisa batu bandi kasola’ muingi kukuenda ku diyilu. (Mat. 24:31) Ayi bankaka batambula kiyeku ‘muingi ku tukieba mu mambu moso.’—Minku. 91:11; Mat. 18:10; dedikisa mawu na Matai 4:11; Luka 22:43.

“Zimbasi zisolu” bantubila mu 1 Timoti 5:​21, ḿba badi zimbasi batambula kiyeku kinkinza mu dikabu di Nzambi. Mu matangu mankaka, mvuala Polo wuvana malongi matedi bakulutu ba kimvuka muingi kukeba buboti biyeku biawu ayi zikhomba mu kimvuka bafueti kuba kinzika. Diawu vantombulu bakulutu ba kimvuka kukieba buboti biyeku biawu ‘mukhambu monisa luvasanu’ ayi balendi baka ko makani voti kufundisila mu phila yikhambu fuana.’ Mu kusala “vantadisi Nzambi, Yesu Klisto ayi zimbasi zisolu”, diawu bafueti landikinina dilongi dinkinza mvuala Polo kavana. Zimbasi zinkaka badi kiyeku ki kukeba kimvuka, dedi bankaka bankebanga bisadi bi Nzambi, ba tusadisanga mu kisalu ki kusamuna ayi bankaka bamvananga kipholo kuidi Yave.—Mat. 18:10; Nzai. 14:6.