Ngie wutengi buboti malongi ma Kibanga ki Nsungi ma mvu awuwu? Boti buawu, mona boti wulenda vana mimvutu mi biuvu abibi:

Ngie Wunkinzikanga Bakietu Dedi Yave?

Nandi wuntadilanga bakietu mu khambu luvasanu, dedi bo kantadilanga babakala. Yave wunkuwanga bakietu, wumvuanga nkinza mabanza mawu ayi mambu ma kuba kuazula. Ayi wuba fiatilanga mu kisalu kiandi bamvanganga.—w24.01, tsielu 15-16.

Buidi tulenda sadila mambu madi mu Efeso 5:​7, mantuba: “Bikanu kuba yawu kithuadi”?

Mvuala Polo wutulubula muingi tubika ba kithuadi na batu balenda tuvanga kumona phasi kutumukina zithumu zi Yave. Kithuadi beni kilenda ba na batu bantubananga yitu mu internet.—w24.03, tsielu 22-23.

Mbi Tufueti Vanga Befu Kukuwa Binongo bi Luvunu?

Tufueti ba keba keba mu zitsangu zikhambulu bivisa tuntambulanga kuidi bakundi, voti kuidi batu tukhambu zaba bammonisanga ti ba tuvuanga nkinza vayi babalukila kimvuka.—w24.04, tsielu 12.

Mbi tuzebi ayi tukhambu zaba matedi buidi Yave kala fundisila Ntinu Salomo, batu bafua mu mavula ma Sodoma ayi Ngomola ayi bafua mu khuka minlangu?

Tusa zaba ko mu bukiedika boti Yave kalasa vulubula ko batu abobo. Vayi tuzebi ti nandi widi bivisa bioso ayi widi nkua kiadi.—w24.05, tsielu 3-4.

Mbi binsundula Nzambi kuba ‘dimanya’ ditu? (Deute. 32:4)

Befu tulenda tomba lusalusu kuidi Yave. Nandi widi mutu wu lufiatu ayi wundukisanga zikhanu ziandi. Nandi kabalulanga ko kimutu kiandi ayi zikhanu ziandi.—w24.06, tsielu 26-28.

Mbi Bilenda Kusadisa Kukolama bo Wumbaluka Kimvuka Kinkaka?

Fiatila mu Yave, nandi wala kusadisa dedi bo kasadisila bisadi biandi mu thangu yikhulu. Bika kudedikisa kimvuka kio wuba. Buela kukivana mu kimvuka widi ayi vanga bakundi bamona.—w24.07, tsielu 26-28.

Malongi mbi tulenda longukuka mu bifuani bitatu bantubila mu Matai kapu 25?

Kifuani ki mamemi ayi zikhombo kintubila nkinza wu kiminu ayi lukuikumunu. Kifuani ki bakietu bakhambu zaba dibakala baba nduenga ayi bakhambu ba nduenga kintubila nkinza wu kuba bakotuka. Ayi kifuani ki zitalentu kintubila nkinza wu kuzola kusala.—w24.09, tsielu 20-24.

Buidi bubela kukula ku khotolo yi tempelo yi Salomo?

Zitsekudulu zinkaka zintuba ti khotolo yiba “120 yi zikovado,” mu ntela zinsundula 53 di zimetro. Vayi Tsekudulu yi Nza Yimona yi Kibibila Kinlongo, yitubila matedi tempelo yi Salomo mu phila ayiyi: “Ntela wuba 20 di zikovado.”—w24.10, tsielu 31.

Mbi binsundula nsadisi wu bakulutu kuba “nkietu mueka to”? (1 Ti. 3:12)

Mansundula ti kafueti kuela nkietu mueka to ayi kalendi vanga ko kitsuza. Mvandi kalendi zinina ko bakietu bankaka.—w24.11, tsielu 19.

Kibila mbi tulenda tubila ti Yoane 6:53 yisintubila ko thuadusulu yitedi Bidia bi Mfumu va Masika ma Builu?

Yoane 6:53 Yintubila nkinza wu kudia nsunyi wu Yesu ayi kunua menga mandi. Yesu wutuba mambu amomo mu mvu 32 T.K., ku Ngalili kuidi basi Yuda baba tombulu kukuna kiminu mu nandi. Vayi, matedi Bidia bi Mfumu va Masika ma Builu, Yesu wusikika thuadusulu ayoyo bo vavioka mvu mueka ku Yelusalemi. Mu mambu amomo Yesu waba tubila batu bala yala yandi ku diyilu.—w24.12, tsielu 10-11.