Mambu madi mu Deutelonomi 22:25-27, masinsikimina ko to mu fotu yi dibakala, kibila mu mambu amomo dibakala nandi waba banga fotu. Nsiku widi mu matangu amomo, wunsikimina mu kukakula nkieto mu fotu balenda kumvana. Tuemfiongunina mawu buboti.

Lutangu 23, 24, luntubila matedi dibakala wumbundana nyitu ku ‘divula’ na nkieto wembelama kukuela. Mu kuvanga mawu, nandi wuba fotu mu kitsuza kibila nkieto wembelama kukuela baba kuntadilanga banga nkieto wukuela. Mambu mbi maba monikanga kuidi nkieto? Matangu mammonisa ti nkieto beni kasa tenduka ko. Boti nandi wutenduka, khanu bankaka banyuwa ayi bansadisa. ‘Nkieto mu kukhambu tenduka’, mvandi waba banga fotu mu kitsuza kubika kuandi to dibakala.—Deutelonomi 22:23, 24.

Vayi nsiku beni mvandi waba tubilanga mawu mu phila yinkaka: ‘Vayi boti dibakala be kue bata ku nsitu nkieto wambelama kukuela, ayi wukumbuila muingi kubundana yandi nyitu, buna dibakala bebundana yandi nyitu, nandi to fueti fua. Bika kuvanga ni kiuma kuidi nkieto. Nkieto kasa vola ko disumu di kafueti vondulu. Mambu beni madi dedi mueka banga dibakala wumbuila wadi yandi ayi wu kumvonda. Kibila nandi be kue mbata ku nsitu, ayi nkieto wembelama kukuela betenduka vayi vasa ba ko ni mutu muingi kunsadisa.’—Deutelonomi 22:25-27.

Mu phila ayoyi, mimfundisi baba kikininanga ti nkieto kasi ko fotu. Mu phila mbi? Baba yindulanga ti nandi ‘betenduka vayi vasa ba ko ni mutu muingi kunsadisa.’ Diawu nandi kasa vanga ko kitsuza. Vayi dibakala, nandi wuba banga fotu mu kitsuza, kibila nandi ‘bekuika nkieto wembelama kukuela muingi kabudana yandi nyitu’.

Diawu, kheti nsiku wunsikimina mu kukakula nkieto mu fotu balenda kumvana, matangu madi masulama mu kutuba ti dibakala nandi widi fotu mu kukuika nkieto kubundana yandi nyitu. Bukiedika mimfundisi baba ‘fionguninanga diambu beni boti didi dikiedika’ ayi baba bakanga makani madi nguizani na zithuadusulu Nzambi kavutukila kuvana khumbu ziwombo.—Deutelonomi 13:14; 17:4; Esodu 20:14.