Ndamba, kibila ni Kibibila ni binongu bi batu bisimmonisa ko ti akiokio kiba kifu ki baklisto mu thangu beni.

Vayi phila zitsekudulu ziwombo zi Kibibila zinsekudilanga lutangu alolo, mawu mamvanganga batu bawombo kuyindula ti mu bilumbu bi mvuala Polo, baklisto baba kifu ki kubotama mu dizina di bafua. Dedi, tala phila tsekudulu yimueka basekudila lutangu beni: “Boti kualasa ba ko luvulubukusu, mambu mbi mala monikina kuidi bo bambotama mu kibila ki bafua?”

Vayi, tala matuba batu buadi bamfionguninanga binongu bi Kibibila mu matedi lutangu alolo. Dedi, doutor yi Teologia Gregory Lockwood, wutuba ti “kubotama mu kibila ki batu bafua,” yidi phila yimueka yi kubotimina bakhambu tubila ni vama va mueka mu Kibibila.” Bobuawu mvandi, Nlongisi bantedilanga Gordon D. Fee wutuba: “Vasi ko binongu batu basonika mu thama voti binongu bi Kibibila bintubila phila ayoyi yi kubotimina. Ayi matangu masonimina mu Kingeleku, masintuba ko ni diambu dimueka mu mawu; ayi muisi ko ni kivisa kimueka kimmonisa ti, baklisto mu sekulu yitheti ayi binganga binkaka biyiza monika mu zisekulu zilanda bavanga mawu.”

Kibibila kintuba ti minlandikini mi Yesu bafueti ‘kitula batu ba zitsi zioso minlonguki miandi, kuba botika . . . , kuba longa bakieba mambu moso’ nandi katuma. (Matai 28:19, 20) Befu tuzebi ti ava mutu kaba nlandikini wu Yesu wubotama, theti kafueti longuka kutumamana Yave ayi Muan’andi Yesu. Vayi mutu wufua kalendi bue vanga ko mambu amomo. Mvandi baklisto badi bamoyo balendi vanga ko mawu va mvingi’andi.—Mpovi 9:5, 10; Yoa. 4:1; 1 Koli. 1:14-16.

Buabu mbi mvuala Polo kaba tomba kutuba?

Batu bawombo ku divula di Kolinto babasa kikininanga ko mu luvulubukusu lu bafua. (1 Koli. 15:12) Diawu mvuala Polo kaba tomba kuba sadisa kuvisa ti, mayindu mawu masa ba ko masulama. Nandi wuba kamba ti ‘waba tulanga kadika kilumbu moyo’andi va kingela.’ Vayi kheti bobo, nandi wuba lufiatu ti kheti fuidi kuandi, wala vulubuka mu nyitu yi kiphevi dedi bo Yesu kavulubukila.—1 Koli. 15:30-32, 42-44.

Vaba tombulu muingi basi Kolinto kuvisa ti kuba baklisto basolo, maba sundula ti bafueti kindama mu mambu maphasi kadika kilumbu ayi kuba wukubama muingi kufua ava bavulubuka mu nyitu yi kiphevi. Bo “babotama mu Klisto Yesu” baba tombila mvandi “kubotama mu lufua luandi.” (Loma 6:3) Mawu mansundula ti dedi Yesu, baklisto basolo bafueti botama, voti kuviokila mu zikhuamukusu ziwombo mu luzingu nate ku lufua. Bosi, buawu balenda vulubukila mu luzingu lu kiphevi ku diyilu.

Mimvu miodi mivioka bo Yesu kabotama, buawu kakambila bapostolo bandi mambu amama: ‘Benu mvinu luala botama mu mbotumunu minu yidi mu kubotimina.’ (Malako 10:38, 39) Bo Yesu kutuba mambu amomo, nandi kabasa botama ko mu nlangu. Vayi nandi waba tomba kutuba ti kafueti kikinina kufua muingi kumonisa lukuikunu luandi kuidi Nzambi. Diawu mvuala Polo kasonikina baklisto basolo ti ‘bafueti tovuka va kimueka na Klisto muingi bawu mvawu babaka nkembo Klisto kabaka.’ (Loma 8:16, 17; 2 Koli. 4:17) Mawu maba sundula ti bawu mvawu bafueti fua theti mu kinsuni muingi kuvulubuka mu kiphevi.

Mu kutadila mamoso tuma tubila, ayiyi yawu phila yisulama tulenda sekudila mambu mvuala Polo katuba: “Boti buawu, buna mbi batu badi mu kubotama bala vanga boti makani mawu madi ma kufua? Boti bafua balasa vulubuka ko, buna kibila mbi badi mu kubotimina mu kibila akiokio?”