Ngie wutanga buboti malongi ma Kibanga ki Nsungi ma mvu 2020? Boti ngete, buna ngie wulenda vana mimvutu mi biuvu binlanda:

Buidi tufueti tadila baklisto basolo?

Befu tuba tondanga mu kiminu kiawu; vayi disi ko diambu dimboti kunangika beni zikhomba, kheti widi wusolo. Tumbanga keba keba muingi kubila landakana ndiatulu’awu voti phil’awu yi kukolukila. (Yuda 16, nota.) Phila yimueka yidi mu khambu kuvulanga buidi baba sodila.—w20.01, tsielu 29.

Mbi biku vana lufiatu ti Yave wuku vuanga nkinza?

Kibibila kimmonisa ti Yave wuku zaba ava wubutuka. Nandi wunkuwanga minsambu ngie wumvanganga. Yave zebi mambu madi mu ntim’aku, ayi mambu widi mu kuyindula. (1 Lusa. 28:9; Zinga. 27:11) Nandi wu kutumisa muingi wumfikama.—w20.02, tsielu 12.

Bifuani mbi bi tusadisa kuvisa thangu yi kukoluka ayi yi kuvuena sui?

Tunkolukanga mu thangu tunlonga bankaka matedi Yave. Befu kumona khomba wentona kuvekuka muingi kuvanga mambu mambi. Bakulutu ba kimvuka bankolukanga mu thangu bansemba khomba. Vayi tutubanga ko buidi Zimbangi zi Yave bamvagilanga kisalu ki kusamuna ayi bisalu binkaka mu zitsi bakandimina kisalu kitu. Tutubanga ko mambu ma kimvuka, bankaka bakhambulu nsua wu kuzaba.—w20.03, tsielu 20-21.

Disuasana mbi didi mindedeka bantubila mu mbikudulu yi Yoeli kapu 2 ayi midi mu Nzaikusu yi Yoane kapu 9?

Yoeli 2:20-29 yintuba ti Nzambi wala batatula kinanu ayi wala bafundisa. Bosi wukanikisa ku kulumuna phevi’andi yinlongo. Miawu minsundula nkangu wu masodi ma basi Babiloni makota ayi matulula divula dioso di Yelusalemi. Mindedeka bantubila Nzaikusu 9:1-11 minsundula baklisto basolua mu pheve yinlongo yi Yave, bansamunanga mu kibakala tsangu yi lufundusu, yawu yimvanganga bankua mambi kukuazuka.—w20.04, tsielu 3-6.

Nani ntinu wu norte bubu?

Rússia ayi zitsi zidi ku khonzo’andi. Bannuanisanga dikabu di Nzambi, kukandimina kisalu kitu ayi bammonisanga ti banlendanga Zimbangi zi Yave. Ntinu wu norte ayi wu sude bannuananga muingi kumonisa nani lutidi lulendu.—w20.05, tsielu 13.

Zikhadulu bantubila mu Ngalatia 5:22, 23, ziawu to zidi mu “mbutu wu phevi”?

Ndamba. Phevi yinlongo yitu sadisanga kukuna zikhadulu zinkaka zimboti, Dedi busonga. (Efe. 5:8, 9)—w20.06, tsielu 17.

Ntambu mbi widi, mu kutulanga mambu matedi ngie veka mu zikhondi mayo?

Zifoto ayi mambu mankaka ntulanga mu zikhondi mayo malenda vanga batu kuyindula ti ngie wukinangikanga, ayi wisi ko mutu wu kikululanga.—w20.07, tsielu 6-7.

Mbi baklisto bubu balenda longuka mu kifuani ki minlobi mi zifu?

Minlobi mipisuka, banlobilanga mu bibuangu ayi mu thangu balenda fika bakila zifu. Bansadilanga bisadulu bifuana. Bansalanga mu kibakala kheti bo thangu yisi ko yimboti. Mawu befu mvitu tufueti vanga mu kisalu ki kusamuna.—w20.09, tsielu 5.

Mu ziphila mbi tulenda sadisila minlonguki mitu mi Kibibila kubuela luzolo luawu mu Nzambi?

Wuba kindisa kutanga Kibibila ayi kuyindula mambu bantanga. Ayi wuba longisa kusambila.—w20.11, tsielu 4.

Banani bantubila mu lutangu alulu: ‘Mu Klisto baboso bala tambula luzingu’?—1 Koli. 15:22.

Mvuala Polo kasa tuba ko ti batu boso bala vulubuka. Vayi waba tubila matedi baklisto basolo, batu ‘babieku banlongo mu kithuadi na Yesu Klisto.’ (1 Koli. 1:2; 15:18)—w20.12, tsielu 5-6.

Mbi baklisto basolo bala vanga bo ‘bala tambula zinyitu zimona mu thangu tulumbeta yitsuka yela kuwakana’?—1 Koli. 15:51-53.

Bawu bala sala va kimueka na Klisto mu kungengidila batu na nkawu wu kisengu. (Nzai. 2:26, 27)—w20.12, tsielu 12-13.