DILONGI 44
Kuna Kinkundi Kingolo na Zikhomba ava Tsukulu yi Nza Yiza
‘Nkundi wukiedika wummonisanga luzolo thangu zioso.’ —ZINGANA 17:17.
NKUNGA 101 Tusala mu Kithuadi na zikhomba
MAMBU TUANLONGUKA a
Mu thangu “ziphasi zingolo”, tuala tomba bakundi bamboti (Tala lutangu 2) c
1-2. Dedi bummonisina 1 Petelo 4:7, 8, mbi biala tusadisa kukindama mu thangu ziphasi?
KADIKA kilumbu kimvioka, tuidi mu kue fikamanga mu “bilumbu bitsuka” bi nza ayiyi. Diawu tulenda viokila mu mambu mawombo ma phasi. (2 Timoteo 3:1) Dedi, bo basola ntinu wunkaka ku tsi mueka yi Africa, batu bawombo badasuka ayi batona kunuana bawu na bawu. Mu zingonda zisambanu luzingu lu zikhomba zitu luba va kingela mu kibila ki mambu amomo. Mbi biba sadisa kukindama mu thangu beni? Bawombo mu bawu bayenda mu zinzo zi zikhomba zinkaka baba kalanga mu bibuangu biba nsika. Khomba mueka wutuba: “Yiyangalala beni mu kuba va kimueka na bakundi bama mu thangu yi ziphasi. Tuba luaku lu kukindasana befu na befu”.
2 Bo “ziphasi zingolo” ziala tona, befu mvitu tuala kuangalala mu kuba va khonzo yi bakundi ba tuzolanga. (Nzaikusu 7:14) Diawu, ayiyi yawu thangu tufueti kindisa kikundi kitu na zikhomba. (Tanga 1 Petelo 4:7, 8.) Mambu mawombo tulenda longuka mu kifuani ki mbikudi Yelemia. Mu lusalusu lu bakundi bandi, nandi wununga kuvuka mu thangu yi ziphasi ava mbungulu yi divula di Yelusalemi. b Buidi tulenda landikinina kifuani kiandi?
LONGUKA MU KIFUANI KI YELEMIA
3. (a) Kibila mbi Yelemia katombila kutatukila batu bankaka? (b) Mbi Yelemia kaba zabikisanga kuidi Baluki, ayi mambu mbi mayiza monika?
3 Mu 40 di mimvu, Yelemia wuzinga va khati batu bakhambu ba lukuikumunu mu Nzambi. Mu bawu, vaba mvandi ḿba basi dikanda ba divula di Anatoti, ayi batu bankaka baba zinganga yandi va nsengi. (Yelemia 11:21; 12:6) Kheti bobo Yelemia kasa yifiatila ko naveka. Vayi nandi waba zabikisanga Baluki nsoniki’andi mabanza mandi moso. Ayi wutuzabikisa mvandi mawu mu nzila Kibibila. (Yelemia 8:21; 9:1; 20:14-18; 45:1 ) Ḿba bo Baluki kaba sonika mambu moso mamonika mu luzingu lu Yelemia, baba buadi balonguka kumonisa luzolo ayi lukinzu bawu na bawu.—Yelemia 20:1, 2; 26:7-11.
4. Kiyeku mbi Yave kavana Yelemia? Ayi buidi kiyeku beni kikindisila kikundi kiandi na Baluki?
4 Mu mimvu miwombo Yelemia wulubula mu kibakala basi Isaeli matedi mbungulu yi Yelusalemi. (Yelemia 25:3) Vayi, Yave wuba vana luaku lu tsuka muingi babalula mavanga mawu. Diawu katumina Yelemia kasonika nkanda muingi kulubula batu. (Yelemia 36:1-4) Bo Yelemia ayi Baluki basala va kimueka mu zingonda ziwombo mu kiyeku Nzambi kaba vana, bawu baba kolukanga mambu maba kindisanga kiminu kiawu.
5. Buidi Baluki kamonisina ti wuba nkundi wumboti kuidi Yelemia?
5 Bo bamana kusonika nkanda beni, Yelemia wuvana wawu kuidi nkundi’andi Baluki muingi katanga wawu va ntuala dikabu dioso. (Yelemia 36:5, 6) Kheti kiyeku beni kiba kiphasi, vayi Baluki wuvanga kiawu mu kibakala. Ḿba Yelemia wuyangalala beni kumona nkundi’andi Baluki bo kakota ku khati Tempelo ayi kutangila dikabu nkanda bamvana. (Yelemia 36:8-10) Zimfumu zi basi Yuda bo bayuwa mambu Baluki kavanga, diawu bantedila muingi katanga nkanda beni va ntual’awu mu mbembo yinangama. (Yelemia 36:14, 15) Bosi, bawu batumisa ntinu Yoyakimi muingi kayuwa mambu Yelemia katuba. Vayi mu lukinzu zimfumu bakamba Baluki: “Luenda luaswama, ngeye ye Yelemia, [ka lu zabikisa] muntu [kuma muidi]”. (Yelemia 36:16-19) Diawu diba dilongi dimboti baba vana!
6. Mbi Yelemia ayi Baluki bavanga mu thangu ntinu kavika nkanda wutheti?
6 Ntinu Yoyakimi wudasuka beni bo kayuwa mambu Yelemia katuba. Diawu kavikila nkanda beni ayi wutuma bakangisa Yelemia ayi Baluki. Vayi Yelemia kasa mona ko boma. Nandi wubonga nkanda wunkaka ayi wutona kubue kamba Baluki kasonika tsangu yifumina kuidi Yave. Baluki wusonika “mambu mamo [maba] mu nkanda wantete Yoyakimi, ntinu a Yuda [kavika]”—Yelemia 36:26-28, 32.
7. Mambu mbi mamonika mu thangu Yelemia ayi Baluki basala va kimueka?
7 Batu bamviokilanga mu mambu maphasi va kimueka, bankuiza banga bakundi bafikama. Mu thangu Yelemia ayi Baluki babue sala va kimueka muingi kubue sonika nkanda ntinu Yoyakimi kavika, ḿba bawu babuela vanasana lukinzu mu kibila ki zikhadulu zimboti kadika mutu mu bawu kaba. Mbi tulenda longuka mu kifuani ki bisadi abiobio bikuikama?
ZABIKISA MABANZA MA TSI NTIM’AKU KUIDI BAKUNDI BAKU
8. Kibila mbi tulenda muena phasi kuzabikisa mabanza ma tsi ntim’itu kuidi bankaka? Vayi kibila mbi tufueti vangila mangolo mu kukhambu vonga?
8 Wummonanga phasi kuzabikisa mabanza ma tsi ntim’aku kuidi bankaka? Ḿba mammonikanga kibila vadi mutu wu kulueka ntima mu bilumbu bivioka kumbusa. (Zingana 18:19, 24) Voti tulenda yindula ti tuisi ko thangu ove mangolo ma kuvangila bakundi. Vayi, tubika vonga. Boti tutidi zikhomba batusadisa mu thangu tumviokila mu ziphasi, tufueti kuba kamba mayindu ayi mabanza mitu. Ayiyi yidi phila yilutidi tulenda vangila bakundi bakiedika.—1 Petelo 1:22.
9. (a) Buidi Yesu kamonisina ti wuba lufiatu mu bakundi bandi? (b) Buidi kuzabikisa bankaka mabanza mitu kulenda kindisila kinkundi tuidi na bawu? Vana kifuani.
9 Yesu wuba lufiatu mu bakundi bandi, diawu kaba kuba zabikisilanga mabanza ayi mayindu mandi. (Yoane 15:15) Buidi tulenda landikinina kifuani kiandi? Mu kuzabikisa bankaka mayangi mitu, kiunda kitu ayi mambu ma tutatisa. Yuwa buboti mu thangu mutu kankoluka yaku, ḿba wulenda bakula mayindu, mabanza ayi makani muidi madedakana. Tala kifuani ki khomba bantedilanga Cindy widi 29 di mimvu. Nandi wuyiza ba nkundi wu khomba yimueka widi ntuami ntuala bantedilanga Marie-Louise, widi 67 di mimvu. Baba buadi bambasikanga mu kisalu ki kusamuna kadika kinna va meni, ayi bankolukanga matedi mambu mawombo. Cindy wutuba: “Yinzolanga kukoluka na bakundi bama mambu mankinza, kibila mawu makutsadisanga kuba zaba buboti.” Dedi, nti muingi wuyonzuka tufueti ku wulembanga nlangu, buawu buididi mvandi kinkundi kitu na bankaka. Bo tuntuama ntuala mu kuba zabikisa mabanza, mayindu mitu ayi kuba kuwa bo bankoluka, buawu kikundi kitu ayi bawu kiala luta konzukila.—Zingana 27:9.
SADILANU VA KIMUEKA
Bakundi bamboti bansalanga va kimueka mu kisalu ki kusamuna, bakilemvukilanga mu ntima woso ayi bansadisanga zikhomba ziawu mu thangu bamviokila mu mambu maphasi (Tala lutangu 10)
10. Dedi buntubila Zingana 27:17, mambu mbi malenda monika mu thangu tunsala va kimueka na zikhomba zitu?
10 Yelemia ayi Baluki bayiza ba bukundi bungolo bo baba sadilanga va kimueka. Bobuawu mvandi, bo tunsala va kimueka na zikhomba zitu ayi tummona zikhadulu ziawu zimboti, buawu tuala luta kuba zaba ayi kuba zola. (Tanga Zingana 27:17.) Dedi, yindula mambu mammonikanga bo widi mu kusala mu kisalu ki kusamuna na nkundi’aku. Bo wummona phila kantubila matedi Yave ayi zikhanu ziandi mu lufiatu, ḿba luzolo ngie widi mu nandi lumbuelamanga.
11-12. Vana kifuani kimmonisa buidi kisalu ki kusamuna kinkindisilanga kinkundi kitu.
11 Mona bifuani biodi bimmonisa buidi kisalu ki kusamuna kilenda kindisila kinkundi kitu. Adeline, khomba mueka widi 23 di mimvu, wudinda kuidi nkundi’andi Candice, muingi basadila ku kibuangu kidi beni tsatu. Adeline wutuba: “Befu tuaba tomba kubuela luzolo ayi kifuza mu kisalu ki kusamuna. Befu babuadi khindusulu yi kiphevi tuaba tomba.” Ndandu mbi babaka bo basala va kimueka? Adeline wutuba: “Kadika kilumbu ava tuleka, befu tuaba kolukanga matedi mabanza mitu, phila tube bakila khindusulu mu masolo tube vanga mu kisalu ki kusamuna ayi phila Yave kabe tutuadisila mu kisalu ki kusamuna. Masolo beni maba tukindisanga ayi maba tusadisanga kuzabasana buboti.”
12 Laïla ayi Marianne, badi zikhomba ziwadi bakhambu kuela bankalanga ku France. Bawu babaka makani ma kukuenda kue longa zisabala zitanu ku Bangui, divula dimueka didi ku Africa. Laïla wutuba: “Minu ayi Marianne tuviokila mu mambu maphasi vayi kumonisa luzolo ayi kuzabikisa mabanza mitu kuawu kukindisa kinkundi kitu. Yibakula ti Marianne wuba fika kolamanga mu mambu ma mona, ayi waba zolanga batu va kizunga tuaba samuninanga ayi wuba beni kifuza. Mawu mavanga luzolo luama mu nandi kubuelama.” Vasintombulu ko theti kukuenda ku tsi yinkaka muingi ngiewu wubaka ndandu yi phila ayoyi. Vayi sadila luaku loso widi muingi wusala va kimueka mu kisalu ki kusamuna na zikhomba zi kimvuka kiaku. Mawu mala kusadisa wuba zaba buboti ayi kukindisa kinkundi kiaku na bawu.
TSIKIKA MAYINDU MAKU MU ZIKHADULU ZIMBOTI AYI ZABA KULEMVUKILA
13. Mambu mbi malenda monika befu kusala va kimueka na bakundi bitu?
13 Khumbu zinkaka, bo tunsala va kimueka na bakundi bitu, tulenda mona kubika to zikhadulu ziawu zimboti vayi mvandi zinzimbala ziawu. Mbi bilenda kutu sadisa kutadila bakundi bitu mu phila yimboti? Bue yindula kifuani ki Yelemia. Mbi binsadisa kabika kutsikika mayindu mu zinzimbala zi bankaka?
14. Mbi Yelemia kalonguka matedi Yave, ayi buidi mawu mansadisila?
14 Kubotula kuandi buku yinnata dizina diandi, ḿba Yelemia wusonika zibuku zinkaka zi Kibibila dedi buku Yitheti ayi Yimuadi yi Mintinu. Kiyeku beni kisadisa Yelemia kumona phila Yave kammonisinanga nlemvu kuidi bankua masumu. Dedi, nandi wuzaba kinongo ki ntinu Akabi. Kheti wuvanga mambu mawombo mambi, bo Akabi kanyonga mu mawu, Yave kasa bunga ko dikanda diandi mu thangu kaba wumonyo. (1 Mintinu 21:27-29) Yelemia mvandi wuzaba kinongo ki Manase, ntinu wuluta vanga mambu mambi kuvioka ntinu Akabi. Vayi bo kanyongina masumu mandi, Yave wunlemvukila.(2 Mintinu 21:16, 17; 2 Lusansu 33:10-13) Binongo abiobi, bisadisa Yelemia kulandakana kifuani ki Yave, mu kumonisa mvibudulu ayi nlemvu kuidi bakundi bandi.—Minkunga 103:8, 9.
15. Buidi Yelemia kalandikinina kifuani ki mvibudulu yi Yave bo Baluki katona kuvuvuka?
15 Yindula phila Yelemia kasadisila Baluki. Khumbu yimueka bo Baluki katona kuvuvuka mu kiyeku kabe vanganga, Yelemia kasa fika kunkuekula ko. Vayi wusadisa Baluki kusamuna tsangu yimboti yifumina kuidi Nzambi mu phila yisulama. (Yelemia 45:1-5) Malongi mbi tulenda longuka mu kinongo akioki?
Bakundi bakiedika bakilemvukilanga mu ntima woso (Tala lutangu 16)
16. Dedi bummonisina Zingana 17:9, mbi tufueti vanga muingi kikundi kitu kitatamana kuba kikinda?
16 Tulendi vingila ko zikhomba bavangila mambu mu phila yi vedila. Diawu bo tumvanga kinkundi na mutu, tufueti vanga mangolo muingi kiawu kitatamana. Boti nkund’itu bevanga nzimbala, tulenda kunsembila mu luzolo, vayi tufueti kunkamba kiedika kidi mu Diambu di Nzambi. (Minkunga 141:5) Mvandi boti nkundi be tuvangila diambu dibe lueka ntim’itu, tufueti kunlemvukila. Ayi bo tube kunlemvukila tufueti vanga mangolo muingi kuzimbakana mawu ayi kubika kubue kuntebulanga mawu moyo. (Tanga Zingana 17:9.) Nkinza beni mu bilumbu abibi bitsuka, kutsikika mayindu mitu mu zikhadulu zimboti zi zikhomba zitu kubika kuandi zinzimbala ziawu! Kuvanga mawu kuala buela kindisa kinkundi kitu. Ayi bo ziphasi zingolo ziala tona, befu tuala tomba lusalusu lu bakundi bitu.
MONISA LUZOLO LUKUIKAMA
17. Buidi Yelemia kamonisina kuba nkundi wukiedika mu thangu ziphasi?
17 Yelemia wumonisa kuba nkundi wukiedika mu thangu yi ziphasi. Ebedi-Meleki, wuvukisa Yelemia muingi kabika kufuila mu dibulu diwonguka diwala matetchi voti mayanga bantibula. Mu kibila akioki, Ebedi-Meleki wuba boma bu kufuila mu mioko mi zimfumu. Bo kazaba mawu, Yelemia kasa viasa ko mioko mu kuyindula ti nkundi’andi wunkuiza nunga mambu amomo naveka. Kheti wuba mu buloku, Yelemia wusadisa nkundi’andi. Nandi wubomba nkundi’andi Ebedi-Meleki, mu kunkamba lukanu Yave kaba mu nandi.—Yelemia 38:7-13; 39:15-18.
Bakundi bamboti bansadisanga zikhomba zinkaka bamviokila mu tsatu (Tala lutangu 18)
18. Dedi bummonisina Zingana 17:17, mbi tulenda vanga boti nkund’itu widi mu kuviokila mu ziphasi?
18 Bubu zikhomba ziwombo badi mu kuviokila mu mambu mawombo maphasi. Bawombo bamviokila mu bivuka, zinikununu zi ntoto ayi tutanga tulembu. Bankaka badi mu kutovuka mu kibila ki mambu batu bantuadisanga, buka mimvita, zinzala ayi mankaka. Bo mambu amomo mammonikina zikhomba zitu, boti tuidi luaku tulenda kuba yamba mu zinzo zitu. Bankaka badi luaku lu kusadisa mu kuvana zimbongo. Kiuma kimueka befu boso tulenda vanga kidi, kudinda Yave mu nsambu muingi kasadisa zikhomba zitu. Bo tunkuwa ti khomb’itu widi mu kiunda, ḿba mu thangu beni tuzabanga ko ma kutuba ayi ma kuvanga. Vayi tulenda vanga mawombo. Buka, tulenda botula thangu muingi kukala va kimueka na nkund’itu. Tulenda kuwa mu mvibudulu mu thangu kankoluka. Tulenda kuntangila matangu ma Kibibila tunzolanga muingi kumbomba. (Yesaya 50:4) Diambu dilutidi nkinza, didi kuba va khonzu bakundi bitu mu thangu bantomba lusalusu luitu.—Tanga Zingana 17:17.
19. Kibila mbi tufueti buela kindisila kinkundi na zikhomba zitu bubu?
19 Tufueti baka makani ma kukindisa kikundi kitu na zikhomba. Kibila mbi? Kibila zimbeni zitu, bala sadila mambu ma luvunu muingi kutula kithatu va khat’itu. Bala tomba kutu vasa muingi tubika buela mioko zikhomba zitu. Vayi mangolo mawu mala ba mabobo. Zimbeni zitu balasa nunga ko kumanisa luzolo tuidi. Vasi ko kiuma kilenda tulula kinkundi kitu. Tuala tatamana kuba bukundi kubika to ku tsukulu nza ayiyi, vayi nati ku paladizu!
NKUNGA 24 Yiza ku Mongo wu Yave
a Bo tsukulu yi nza yidi mu kufikama, tufueti buela kindisa kikundi kitu na zikhomba zitu mu kimvuka. Mu dilongi adidi, tunkuiza mona mbi tulenda longuka mu kifuani ki Yelemia. Mvandi tunkuiza tubila buidi kukindisa kikundi kitu na zikhomba bubu, kuala tusadisa mu thangu tuala viokila mu ziphasi.
b Mambu madi mu buku yi Yelemia masi ko masonama mu phila malandisinina.
c DIAMBU DIDI MU FIKULA: Foto ayiyi yimmonisa mambu malenda monika mu bilumbu binkuiza mu thangu yi “ziphasi zingolo.” Zikhomba ziwombo zi bakieto ayi babakala badi bakutakana mu nsika ku kibuangu kilutidi zangama ki kibanga banlundilanga biuma. Kheti badi mu thangu ziphasi, bawu bankuangalala mu kuba va kimueka na bankaka. Ndandasana yi zifoto zimmonisa ti zikhomba aziozi, ava ziphasi zingolo kutona bawu bakuna kinkundi kingolo bawu na bawu
