MU thangu yikhulu, nkebi wu nzo waba kiebanga nzo voti busina bu mutu wunkaka. Kikuma bi kiebeleo ayi ki kingeleko “nkebi wu nzo” khumbu zinkaka kilenda sundula wumueka mu mimvika mfumu nzo kaba solanga muingi katuadisa ayi kakieba biabioso kavuidi.

Yosefi wumueka mu bana ba Yakobi, wuba mvika ku Ngipiti, vayi wuyiza ba nkebi wu nzo mfumu’andi Potifali. Kibibila kintuba ti, ‘Potifali wuyekula biabioso bi kavua mu mioko mi Yosefi.’ (Ngenesi 39:2-6) Kuntuala bo Yosefi kayiza ba mfumu ku Ngipiti, nandi wusola mutu wunkaka muingi kakiebanga nzo’andi.—Ngenesi 44:4.

Mu bilumbu bi Yesu, batu baba vuanga mi ntoto, baba kalanga mu mavula maba beni kinanu na bibuangu beni. Diawu baba biekilanga minkebi muingi kukengidila bisalu bimvangama va kitini kiandi ki ntoto.

Nani wuba wufuana muingi kuba nkebi? Nsoniki wumueka muisi Loma wuzinga mu sekulu yitheti bantedilanga Columela wutuba: Mutu bansola muingi kukieba nzo voti kukengidila bisalu, kafueti ba mutu “wulonguka buboti kuvanga kisalu”. Vaba tombulu mutu wunkuiza “tuadisa bisadi bioso binkaka bi nzo mu kukhambu ku buphunya”. Nandi wubuela: “Ayi malutidi maba tombulu mu nandi maba, kabika kikinina mambu kakhambu zaba kuvanga vayi kafueti ba wukubama muingi kubuela kulonguka.”

Diambu di Nzambi dinfuanikisa kisalu nkebi wu nzo kaba vanganga muingi kudedikisa mambu mammonikanga mu kimvuka ki Baklisto. Buka, mvuala Petelo wukindisa baklisto kusadila mangolo batambula kuidi Nzambi muingi “[kusadisa] batu bankaka, banga nkebi wumboti wu nlemvu wu Nzambi.”—1 Petelo 4:10.

Yesu mvandi wusadila kifuani ki nkebi wu nzo mu kinongo kidi mu Luka 16:1-8. Mvandi, mu mbikudulu yintubila matedi bidimbu bimmonisa ti nandi matona kuyala buka Ntinu, Yesu wukamba minlandikini miandi ti wala bieka ‘nnanga wukuikama’ voti “kidiela.” Kiyeku ki kisadi akioki kidi kuvana bidia bi kiphevi kuidi bisadi bi Klisto mu thangu ayiyi yitsuka. (Matai 24:45-47; Luka 12:42) Tuidi beni mayangi mu kuba mu khati batu bantambulanga bilongulu kisadi akioki kikuikama kankubikanga ayi binkabuluanga mu nza yimvimba.