DILONGI 45
Buidi Tulenda Sadisila Bankaka Kutumamana Nsiku wu Klisto?
“Yendanu, lukitula batu ba zitsi zioso minlonguki. . . , luba longanga bakieba mambu moso amama Minu [yilutuma].” —MATAI 28:19, 20.
NKUNGA 89 Yuwa, Tumamana, ayi Baka Lusakumunu
MAMBU TUANLONGUKA *
1. Dedi bummonisina Matai 28:18-20, lutumu mbi Yesu kavana?
BO Yesu kavulubuka nandi wumonika kuidi minlandikini miandi baba bakutakana ku Ngalili. Nandi wubakamba diambu dimueka dikinza. Diambu mbi? Mvutu widi mu Matai 28:18-20.—Tanga.
2. Biuvu mbi tunkuiza baka mimvutu mu dilongi adidi?
2 Lutumu Yesu kavana lu kuvanga minlonguki, bisadi bi Nzambi mvandi bubu bafueti landakana luawu. Diawu tuentubila biuvu bitatu bitedi lutumu Yesu ka tuvana. Kitheti, kubika kuandi kiyeku ki kulonga zithumu zi Nzambi kuidi minlonguki mi mona, mbi binkaka tufueti vanga? Kimuadi, buidi minsamuni mioso mu kimvuka, balenda buedila mioko mu ndionzukulu yi kiphevi yi minlonguki mi Kibibila? Kintatu, buidi tulenda sadisila batu bavonga mu kiphevi, bavutuka kubue vanga kisalu ki kuvanga minlonguki?
WUBA LONGA BATUMAMANA
3. Mambu mbi mankinza Yesu katuba mu lutumu luandi?
3 Zithuadusulu zi Yesu zidi zisulama. Befu tufueti longa batu mambu nandi katuma. Vayi tubika zimbakana diambu adidi dinkinza. Yesu kasa tuba ko: ‘Wuba longa mambu moso yima kumu tuma.’ Vayi nandi wutuba: ‘Wuba longa muingi batumamana mambu amama yima kumu tuma.’ Muingi tusadila lutumu alolo bo tunlonguka na minlonguki mitu, tubika to kuba longa vayi kuba sadisa kuzingila mu mambu banlonguka mu luzingu luawu. (Mava. 8:31) Kibila mbi tufueti vangila mawu?
4. Mbi binsundula kukieba lutumu? Fuanikisa
4 Kikuma “kukieba” lutumu kinsundula kutumamana. Muingi kutuma mutu wunkaka kukieba voti katumamana mambu Yesu katuma, yindula mu kifuani akiki. Buidi nlongisi wu kikola kinlongisanga batu kudiatisa makalu, kanlongilanga nlonguki kulandakana minsiku mintuadisanga batu bandiasa makalu mu nzila? Theti, nlongisi wuba longisanga minsiku mintuadisanga makalu mu nzila, mvandi bidimbu bantulanga mu nzila ayi tsundu biawu bidi. Vayi muingi minlonguki batumamana minsiku beni, nlongisi wubue vanganga diambu dinkaka. Nandi wunkalanga va khonzo nlonguki mu thangu kandiatisa dikalu mu nzila, muingi kansadisa malembe malembe kutumamana mambu kabe longuka. Mbi tulenda longuka mu kifuani akiokio?
5. (a) Dedi bummoninisa Yoane 14:15 ayi 1 Yoane 2:3, mbi tufueti longa minlonguki mitu muingi bavanga? (b) Vana bifuani bimmonisa buidi tulenda tuadisila minlonguki mitu.
5 Mu thangu tunlonga Kibibila kuidi bankaka, befu tunlonganga mambu Nzambi kantomba tuba longa. Vayi vadi diambu dinkaka tufueti vanga. Tufueti longa minlonguki mitu mi Kibibila, kusadila mambu badi mu kulonguka mu luzingu luawu. (Tanga Yoane 14:15; 1 Yoane 2:3.) Dedi, tulenda monisa minlonguki mi Kibibila buidi balenda sadila minsua mi Kibibila, bo badi ku kikola, ku kisalu voti mu bisavu bamviokisila thangu. Mvandi wulenda zabikisa kuidi minlonguki miaku buidi kusadila minsua mi Kibibila mi kukiebila mu mambu maphasi voti ma kusadisila kubaka makani mamboti mu luzingu. Ayi bo tunlonguka yawu, buboti beni kudindanga phevi yinlongo yi Yave muingi yiba tuadisa.—Yoa. 16:13.
6. Mbi binsundula kulonga bankaka kukieba zithumu zi Yesu?
6 Mbi binsundula kulonga bankaka kukieba zithumu zi Yesu? Mansundula kusadisa minlonguki mitu mi Kibibila kuba phuila yi kuba minsamuni. Kibila bawombo mu bawu, diyindu di kulonga bankaka diba tulanga beni boma. Diawu tufueti ba mvibudulu muingi bawu bavisa buboti mambu tuba longa, manyikuna mintima miawu ayi basadila mawu mu luzingu luawu. Mu phila mbi tufueti kuba longila muingi kubuela phil’awu yi kulonga bankaka?
7. Buidi tulenda sadisila nlonguki kuba phuila yi kusamuna mambu kadi mu kulonguka kuidi bankaka?
7 Tulenda kuvula minlonguki mitu mi Kibibila biuvu dedi abibi: “Buidi kukikinina tsangu yi Kintinu yibaludila luzingu luawu mu phila yimboti? Mu mbuenu’aku, nkinza beni bankaka kuzaba zitsangu beni? Mbi wulenda vanga muingi kuba sadisa?” (Zinga. 3:27; Matai 9:37, 38) Monisa kuidi longuki’aku mua minkanda midi mu khati Bilongulu tunsadilanga muingi Kulonga, ayi bika nandi kasola mua minkanda mio kammona ti basi dikanda, bakundi ayi bansalanga yandi balenda vua nkinza. Bosi nkubika mu kummonisa phila kalenda vanina mua minkanda beni kuidi bankaka mu diela. Vayi kheti bobo mu thangu nlonguk’itu kala ba nsamuni wukhambu botama, vala tombulu kuba va khonzu’andi muingi kuntuadisa.—Mpo. 4:9, 10; Luka 6:40.
BUIDI KIMVUKA KIOSO KILENDA SADISILA MINLONGUKI KUKONZUKA MU KIPHEVI
8. Kibila mbi minlonguki mitu bafueti bela luzolo mu Nzambi ayi mu batu? (Tala quadro yintuba: “ Sadisa Minlonguki Babuela Luzolo Luawu mu Nzambi”)
8 Zaba ti Yesu wu tukamba tulonga bankaka ‘bakieba mambu moso katu tuma’. Mu khati mambu beni Yesu katubila muingi tulonga bankaka, muidi mvandi minsiku mimiodi milutidi nkinza—kuzola Nzambi ayi kuzola wadi yaku. Ayi minsiku beni, midi kithuadi mu matedi kulonga bankaka ayi kuvanga minlonguki. (Matai 22:37-39) Buidi madidi kithuadi? Luzolo mu Nzambi ayi mu batu, kiawu kibila kitheti ki tuvanganga kusamuna. Minlonguki minkaka, diyindu di kubasika mu kisalu ki kusamuna diba vananga beni boma. Vayi mu lusalusu lu Yave, malembe malembe bannunganga. (Minku. 18:1-3; Zinga. 29:25) Quadro yidi mu dilongi adidi, yimmonisa buidi tulenda sadisila minlonguki mitu kubuela luzolo luawu mu Nzambi. Mvandi, buidi kimvuka kioso kilenda sadisila minlonguki bamonisa luzolo luawu kuidi bankaka?
9. Mu kifuani kidi mu lutangu, mu phila mbi nlonguki kadi mu kulongukila mambu mankinza?
9 Bue yindulabu mu kifuani ki nlonguki wu dikalu. Bo nlongisi kadi mu kudiasa dikalu ayi nlonguki widi va khonzu’andi, mu phila mbi kadi mu kulongukila? Bo kankuwa mambu nlonguki’andi kadi mu kunkamba ayi bo kammona phila batu bankaka badi mu kudiatisila makalu. Dedi, nlongisi kalenda kummonisa buidi mutu wunkaka kadi mu kunatina dikalu mu phila yimboti mu kulandana minsiku midi mu nzila. Voti kalenda mona mu thangu nlongisi kandinda mu lukinzu muingi mutu wunkaka kazimisa minda mi dikalu diandi mu diambu bankaka bamona buboti nzila. Mambu amomo nlonguki kammona, mawu mvandi kala vanga mu thangu kala diatisanga dikalu naveka.
10. Mbi bilenda sadisa minlonguki mi Kibibila fika konzuka mu kiphevi?
10 Bobuawu mvandi bo mutu kantona kulonguka Kibibila, nandi wuntonanga kudiata mu nzila yinnata mu luzingu lu mvu ka mvu. Ayi mawombo kanlongukanga kubika to kuidi nlongisi’andi vayi mu kutala bifuani bimboti bi bisadi binkaka bi Yave. Buabu mbi bilenda sadisa minlonguki mi Kibibila kufika konzuka mu kiphevi? Mu kulandakana zikhutukunu zitu. Kibila mbi? Kibila malongi ma Kibibila banlonganga mu zikhutukunu zitu malenda kuba sadisa kubuela luzabu luawu mu Diambu di Nzambi, kukindisa kiminu kiawu ayi kubuela luzolo luawu mu Nzambi. (Mava. 15:30-32) Mu zikhutukunu muawu mvandi nlongisi kalenda zabikisila nlonguki’andi kuidi zikhomba zinkaka zi kimvuka. Ḿba nlonguki kalenda longuka mambu mankinza mu kifuani ki zikhomba beni. Mvandi nlonguki wala mona kivisa ki luzolo lukiedika. Tuentubila mua bifuani.
11. Bifuani mbi nlonguki kalenda mona mu kimvuka ayi buidi mawu malenda nyikunina ntim’andi?
11 Dedi, bo nlonguki wu Kibibila wunkiebanga bana naveka kammona khomba yinkietu mu kimvuka wunkiebanga bana mvandi naveka, mawu mankuiza nyikuna ntima wu nlonguki bo kammona khomba ayoyi kamvanga mangolo mawombo muingi kukuendanga mu zikhutukunu na bana bandi. Mvandi bo nlonguki widi mu kuvanga mangolo ma kubika kunua zitsunga kamvanga bukundi na khomba mu kimvuka wuba kifu akiokio, khomba beni wunkuiza nsadisa kumona buidi luzolo mu Yave lunsadisila kununga kifu akiokio ayi buidi lukunsadisilanga kutumamana minsiku miandi. (2 Koli. 7:1; Fili. 4:13) Bo kankuwa kinongo ki luzingu lu khomba ayoyi, mawu mankuiza nyikuna ntim’andi. Ayi bulutidi wunkuiza ba lufiatu bo khomba ka kunkamba: “Ngie mvaku wulenda nunga!” Bo nlonguki wunkaka mu kimvuka kammona khomba widi kikhupa phila kannatinanga luzingu luandi, nlonguki kalenda tomba kuzaba kibila mbi luzingu luandi luididi beni mayangi.
12. Kibila mbi tulenda tubila ti, kadika mutu mu kimvuka widi kiyeku ki kusadisa minlonguki mi Kibibila?
12 Bo minlonguki mi Kibibila banzaba zikhomba ziwombo mu kimvuka badi bakuikama, bawu banlongukanga mbi binsudula kukieba zithumu zi Yesu, kuzola Nzambi ayi kuzola batu bankaka. (Yoa. 13:35; 1 Tim. 4:12) Mvandi dedi bo tube tubila kumbusa, nlonguki wu Kibibila kalenda longuka mu kulandakana kifuani ki minsamuni minkaka banunga kuviokila mu mambu maphasi nandi kadi mu kuviokila. Ayi bo kammona ti zikhomba beni banunga, nandi mvandi wunkuiza ba lufiatu ti kalenda nunga kubalula nzingulu’andi muingi kuba nlandikini wu Klisto. (Deute. 30:11) Kadika mutu mu kimvuka kalenda buela mioko mu phila yiviakana muingi kusadisa minlonguki mi Kibibila kukonzuka mu kiphevi. (Matai 5:16) Buabu, mangolo mbi ngie widi mu kuvanga muingi kukindisa minlonguki mi Kibibla bankuizanga mu zikhutukunu?
SADISA BO BAVONGA MU KIPHEVI BAVUTUKA KUBUE SAMUNA
13-14. Buidi Yesu katadila bapostolo mu mambu bavanga?
13 Tutidi kusadisa zikhomba zitu zi babakala ayi zi bakietu muingi bavutuka kutumukina lutumu lu Yesu lu kuvanga minlonguki. Phila Yesu katadila bapostolo bo baba bavonga mu kiphevi, yitumonisa buidi tufueti tadila zikhomba badi bavonga bubu mu kiphevi.
14 Mu kilumbu kitsuka ki Yesu va ntoto, bapostolo bandi boso ‘banyekula ayi bantina.’ (Malako 14:50; Yoa. 16:32) Vayi buidi Yesu katadila bapostolo mu mambu bawu bavanga? Mua thangu bo Yesu kavulubuka, nandi wukamba minlonguki miandi minkaka: ‘Bikanu kumona boma, vayi yendanu ayi kambanu zikhomba ziami ti minu yivulubukizi.’ (Matai 28:10a) Tummona ti Yesu kheti mu mambu bapostolo bamvangila, nandi kasa babanda ko mbusa. Vayi wutatamana kuba tedila “zikhomba ziami.” Yesu wulandakana kifuani ki Yave mu kuba mona kiadi ayi kuba lemvukila.—2 Minti. 13:23.
15. Buidi tuntadilanga batu bavonga mu kiphevi?
15 Bobuawu mvandi, befu tumvuanga nkinza baboso bavonga mu kiphevi. Bawu badi zikhomba zitu zi bakietu ayi zi babakala ayi tuba zolanga beni. Mvandi befu tuntebukanga moyo kisalu kioso ki luzolo bawu bavanga kumbusa. Dedi bankaka basadila Yave mu mimvu miwombo. (Ebe. 6:10) Befu tutidi bawu bavutuka! (Luka 15:4-7) Mu kulandakana kifuani ki Yesu, mu phila mbi tulenda monisina luzolo luitu mu bawu?
16. Buidi tulenda monisina luzolo kuidi zikhomba badi bavonga mu kiphevi?
16 Wuba tumisa mu luzolo. Phila yimueka Yesu kakindisila bapostolo bandi baba bavonga mu kiphevi, yidi mu kuba tumisa muingi baba mu lukutukunu. (Matai 28:10b; 1 Koli. 15:6) Bobuawu mvandi bubu, tulenda kindisa zikhomba bavonga mu kiphevi muingi batona kulandakana zikhutukunu boti batoniniabu ko kuvanga mawu. Vayi khumbu zinkaka vantombulanga kuba tumisa khumbu ziwombo muingi bawu biza mu zikhutukunu. Bukiedika Yesu wuyangalala bo kamona ti bapostolo bayiza bo nandi kaba tumisa.— Dedikisa na mambu madi mu Matai 28:16 ayi Luka 15:6.
17. Buidi tulenda yambila zikhomba badi bavonga mu kiphevi mu thangu bankuiza ku Nzo Kintinu?
17 Wuba yamba mu luzolo. Yesu wuyamba buboti bapostolo bandi mu thangu kadengana yawu ayi nandi wutuama ntuala mu kukoluka yawu. (Matai 28:18) Buidi tulenda yambila zikhomba badi bavonga mu kiphevi mu thangu bankuiza ku Nzo Kintinu? Befu tufueti tuama ntuala mu kuba yamba mu luzolo. Va thonono ḿba tulenda kuyikuvusa mambu mbi yinkuiza nkamba? Vayi buboti beni kubika kuba kamba mambu malenda kuba bika mu kiunda. Vayi tulenda bakamba ti tuidi beni mu mayangi mu kuba mona.
18. Buidi tulenda vumbikila mabanza ma minsamuni bavonga mu kiphevi?
18 Wuba kindisa. Minlonguki mi Yesu ḿba baba mona nkadu boma mu kiyeku batambula ki kusamuna zitsangu mu nza yimvimba. Vayi Yesu wuvumbika mabanza mawu bo kaba Kamba: ‘Minu yinkuinza ba yinu bilumbu bioso.’ (Matai 28:20) Bukiedika ti mambu amomo maba sadisa? Ngete. Kibila mua thangu to yivioka, ‘bawu bakivana mu kusamuna zitsangu zimboti’. (Mava. 5:42) Zikhomba badi bavonga mu kiphevi, bantombanga tuba kindisa. Khumbu zinkaka bawu bambanga mua boma mu kuyindula ti bafueti bevutuka kubue samuna. Vayi tulenda vumbika mabanza mawu mu kuba kamba ti tunkuiza ba yawu mu kisalu ki kusamuna ayi bo bawu bankubama tulenda basika yawu mu kisalu ki kusamuna. Bukiedika, bawu bala kuangalala beni mu lusalusu bala tambula mu thangu bala vutuka kubue samuna. Befu kutebukanga moyo ti minsamuni bavonga mu kiphevi badi zikhomba zitu, befu tuala bakindisa ayi kimvuka kioso kiala baka ndandu.
TUTIDI KUMANISA KISALU TUTAMBULA
19. Mbi tutidi kuvanga, ayi kibila mbi?
19 Nati thangu mbi tuala tatamana kuvanga minlonguki? Nati kutsukulu nza ayiyi. (Matai 28:20; tala Glossário, “Tsukulu nza ayiyi.”) Bukiedika ti tuala nunga kumanisa kisalu akiokio Yesu katuvana? Ngete. Kibila tuidi bakubama muingi kuvanga kisalu beni! Tunsadilanga thangu’itu, mangolo mitu ayi biabioso tuidi muingi kutomba “baboso bakubama muingi kutambula luzingu lu mvu ka mvu.” (Mava. 13:48) Bo tumvanga mawu tuidi mu kulandakana kifuani ki Yesu. Nandi wutuba: “Kuvanga luzolo lu mutu wu thuma ayi kumanisa kiawu biawu bidia biama.” (Yoa. 4:34; 17:4) Ayi mawu mvandi befu tuntomba. Tutidi kumanisa kisalu tutambula. (Yoa. 20:21) Ayi tuntomba bankaka kubunda mvandi baboso bavonga mu kiphevi basala yitu kisalu beni.—Matai 24:13.
20. Dedi bummonisina Filipi 4:13, kibila mbi tulenda bela lufiatu ti tuala nunga kumanisa kisalu Yesu katuvana?
20 Bukiedika ti khumbu zinkaka tummonanga phasi kutumamana nsiku wu Yesu. Vayi tuisinvanga ko kisalu beni befu veka. Yesu wukanikisa ti wunkuiza ba yitu. Tumvanganga kisalu ki kuvanga minlonguki banga “Bisadi binsalanga va kimueka na Nzambi” ayi “Yesu va khonzu’itu.” (1 Koli. 3:9; 2 Koli. 2:17) Diawu tulenda nunga kumanisa kiawu. Luaku lunneni beni tuidi mu kuvanga kisalu akiokio ayi kusadisa bankaka mvandi kuvanga kiawu!—Tanga Filipi 4:13
NKUNGA 79 Wuba Longa Baba Bakuikama
^ Lut. 5 Yesu wukamba minlandikini miandi muingi bavanga minlonguki ayi kuba longa muingi bakieba mambu moso kaba tuma. Dilongi adidi, dinkuiza tumonisa buidi tulenda landikinina zithuadusulu Yesu kavana. Mambu mankaka madi mu dilongi adidi, mabongolo mu Kibanga ki Nsungi kilumbu 1, Ngonda Yisambuadi, mvu 2004 tsielo 14-19.
^ Lut. 66 MAMBU MADI MU ZIFUKULA: Khomba yinkietu wumvana ndongukulu yi Kibibila, wunsudikisa mambu nlonguki kafueti vanga muingi kubuela luzolo luandi mu Nzambi. Buviokila thangu nlonguki wusadila mambu kalonguka kuidi nlongisi’andi.
