Mu mimvu mima vioka, zikhomba ziwombo zi babakala ayi zi bakietu bayenda mu zitsi zidi nkadu mua mbakulu muingi kutomba luzingu. Vayi bawombo mu bawu badi mu kuvutuka mu zitsi ziawu babutukila. Mu kibila ki luzolo bakeli mu Yave ayi kuidi batu, bawu badi mu kuvutuka ayi kukuenda mu bibuandi bidi tsatu yi minsamuni. (Matai 22:37-39) Bikaku mbi zikhomba beni baviokila ayi lusakumunu mbi badi mu kutambula? Muingi tubaka mimvutu, tunkuiza luta tubila tsi Camarões yidi ku Africa.

Mu mvu 1998, Khomba bantedilanga Onésime wubotuka ku tsi’andi kabutukila ku Camarões ayi wuyenda kuezingila ku tsi yinkaka. Nandi wuzingila kuna 14 di mimvu. Kilumbu kinkaka mu lukutukunu, nandi wuyuwa kifuani nlongisi katubila kitedi kisalu ki kusamuna kinyikuna beni mabanza mandi. Nlongi wutuba: “Yindulabu bakundi buadi bama kuenda kuloba, wunkaka widi mu kubaka zifu ziwombo va kibuangu kadi mu kulobila, vayi wunkaka kasimbaka ko. Bukiedika kuandi ti no wukhambu baka kasinkuiza fikama ko vake nkundi’andi muingi mvandi kabaka zifu?”

Kifuani akiokio kinyikuna mabanza ma Onésime. Kibila nandi wukitadila buka nlobi wukhambu baka zifu. Diawu nandi kabakila makani ma kuvutuka kuna muingi kusala na zikhomba va kimueka. Vayi vaba mua mambu maba kumvanga kukuazuka. Ḿba nandi waba kuyikuvusanga: ‘Mu 14 di mimvu yima zingila ku tsi yinkaka, bukiedika kuandi ti yinkuiza bue kolama ku tsi yibutukila? Vayi mbi nandi kavanga? Nandi wuyenda theti kuna mu zingonda zisambanu muingi kumona ti mambu mankuenda buboti. Bosi mu mvu 2012 nandi wunata biuma biandi bioso ayi wuvutuka ku Camarões.

Onésime wutuba: “Diba diambu diphasi kuidi minu kubue kolama muinya ayi luzingu luphasi ku Camarões. Mu zikhutukunu, diba mvandi diambu diphasi kubue kolama kukala mu bikundu bi mabaya. Onésime wubue tuba mu mayangi: “Vayi kutsikika mayindu mami mu mambu baba longanga mu zikhutukunu, malembe malembe minu yitona kuzimbakana bikundu bimboti tuba kalanga ku tsi yiba.”

Mu mvu 2013, yaya Onésime wukuela khomba Géraldine, mvandi wuzingilanga vua di mimvu ku France, vayi wuvutuka ku tsi’andi kabutukila ku Camarões. Lusakumunu mbi babaka mu kutula Kintinu ki Nzambi va theti mu luzingu luawu? Onésime wutuba: “Befu tubaka lusakumunu lu kukota mu Kikola ki Minsamuni mi Kintinu ayi mu thangu ayiyi tuidi mu kusadila ku Beteli. Mu mvu wubedi 20 di minlonguki mi Kibibila mu kimvuka kitu babotimizi. Bubu yilenda tuba ti yidi va kibuangu kifuana muingi ‘kulobila.’” (Malako 1:17, 18) Géraldine wubue tuba: “Yitambula lusakumunu mu phila yikhambu yindudilanga.”

Khomba yinkietu bantedilanga Judith wuyenda kuezingila ku Estados Unidos. Vayi nandi waba yindulanga  beni kubuela kukivana mu kisalu ki kusamuna. Nandi wutuba: “Zikhumbu zioso yaba kuendanga ku tsi’ami ku Camarões muingi kuetala dikanda, mu kuvutuka yaba dilanga beni mu kubika batu bawombo baba longukanga yami Kibibila.” Vayi kheti bobo, khomba Judith waba banga beni divuda boti kafueti vutuka ku Camarões. Kibila nandi wuba kisalu kimboti ku Estados Unidos baba kumfutanga zimbongo zifueni muingi kabaka bu kukiebila buvinya bu tat’andi ku Camarões. Vayi nandi wufiatila mu Yave ayi wuvutuka ku Camarões. Yaya Judith wutuba ti disa ba ko diambu diluelu kubika luzingu lumboti kaba ku Estados Unidos. Nandi wusambila kuidi Yave muingi kansadisa kubue kolama ku tsi’andi ayi Yave wusadila nkengididi wu bimvuka ayi nkazi’andi muingi bankindisa.

Yaya Judith wutuba: “Mu mimvu mitatu mima vioka, yima mona mayangi ma kusadisa batu banna, minu yintadilanga buka bana bami ba kiphevi.” Judith wutona kusala banga ntuami ntuala wufilua. Bubu, nandi ayi nnuni’andi, Sam-Castel, badi mu kukengidila bimvuka. Vayi mambu mbi mamonikina tat’andi? Nandi ayi dikanda diandi babakula nzo mbuku yimueka, banunga kupasula tat’andi mu khambu kufuta ni lubongo lumueka. Ayi mayangi kuzaba ti mamoso mavioka buboti.

Khomba mueka bantedilanga Victor wuyenda ku Canadá muingi kuekota kikola kinangama. Vayi bo kayiza tanga Kibanga ki Nsungi kitubila matedi kikola kinangama, nandi wuyindula beni mu mawu. Diawu kabakila makani ma kubika kikola kinangama, ayi kukota kikola kinkaka kitedi bisalu bi mioko. Ya Victor wutuba: “Mawu matsadisa kufika baka kisalu ayi kuvanga kisalu kinkaka minu yaba tomba beni kuvanga mu mimvu miwombo kumbusa, kuba ntuami ntuala.” Bosi ya Victor wuyiza kuela na Caroline ayi bawu bayenda kuekangala ku Camarões. Bo bayenda kue tala Beteli, kuawu khomba yimueka kaba kindisila boti kuba bavutuka ku Camarões muingi kubuela samuna kuidi tsatu. Victor wutuba: “Tusa ba ko kibila ki kumanga vutuka kuna ayi mvandi ni kiuma kiabasa tutula ko nkaku, kibila tuaba nata luzingu lukhambu kikhafi, diawu tukikinina kuvutuka ku Camarões.” Kheti Caroline kasa ba ko buvinya bumboti vayi kheti bobo bawu bayenda.

Bo bamona ti batu bawombo baba vua nkinza kiedika, Victor ayi Caroline bakota mu kisalu ki ntuami ntuala. Mu mua thangu, bawu banunga kudukisa zitsatu ziawu mu mua zimbongo baba. Vayi muingi batatamana mu kisalu ki ntuami ntuala ku Camarões, bawu bavutuka theti ku Canadá mu mua zingonda muingi kukona zimbongo. Lusakumunu mbi bawu batambula? Bawu babaka luaku lu kukota kikola ki Minsamuni mi Kintinu, kuba mintuami mintuala mifilu ayi bubu bansalanga mu dingumba dintunganga zinzo zi Kintinu. Victor wutuba: “Kubika biabioso kumbusa kutu sadisanga kumona lusadusu lu Yave mu phila tunkhambu yindudilanga.”

Mu mvu 2002, Alain, nlonguki wumueka wu kikola kinangama, wutanga mua nkanda widi mu bilongulu bitu wuntuba Matoko—Buidi Munkuiza Sadila Luzingu Luinu? Mawu mansadisa kubaka makani mankaka. Mu mvu 2006, nandi wukota kikola bubu tuntedilanga Kikola ki Minsamuni mi Kintinu ayi bamfila ku Camarões tsi kabutukila.

Ku Camarões, Alain wubaka kisalu kaba bakilanga mua zimbongo. Buviokila thangu, nandi wubaka luaku lu kisalu kinlenda mvana zimbongo ziwombo, vayi wuvisa ti na kuyivana mu kisalu beni, muna kasinkuiza baka ko thangu yiwombo muingi kubasikanga mu kisalu ki kusamuna. Diawu, bo bantumisa muingi kuba ntuami ntuala wufilu, nandi wukikana mu nzaki. Kheti mfumu kisalu  wunkanikisa kumbuela zimbongo ziwombo, vayi Alain wutatamana mu makani kaba. Buviokila thangu Alain wukuelana ayi Stéphanie, wuzingila ku França mimvu miwombo. Mambu mbi bamonikina bo bayenda ku Camarões?

Stéphanie wutuba: “Va thonono buvinya buami busa ba ko bumboti ayi yiba monanga nyitu kudedumuka, vayi yibaka mbukulu yi mboti ayi yibeluka.” Bawu babaka lusakumunu luwombo mu lukuikumunu luawu. Alain wutuba: “Bo tuyenda ku buala bumueka bu kinanu bantedilanga Katé, befu tubaka minlonguki miwombo mi Kibibila. Befu tutatamana kuba longila mu telefoni ayi buviokila thangu minlonguki miodi babotama ayi dingumba divangama va buala beni.” Stéphanie wubue tuba: “Vasi ko kiuma kilenda kutuvana mayangi malutidi kena, kusadisa batu muingi bakivana kuidi Yave. Kusadila akuku kutuvananga beni luaku lu kusadisa batu bawombo.” Bubu, Stéphanie widi mu kubuela mioko Alain mu kisalu ki kukengidila bimvuka.

Gisèle wubotama bo kaba vanga kikola kinangama ku Itália. Vayi nandi waba kuitukanga beni mu luzingu lukhambu kikhafi lu bakuela baba mintuami ntuala ayi baba longukanga yandi Kibibila baba natanga. Ayi nandi waba tomba kulandakana kifuani kiawu mu kubuela kukivana mu kisalu ki kusamuna. Diawu, Gisèle kabakila makani ma kuba ntuami ntuala bo kamanisa kikola.

Gisèle waba tomba kuvanga mawombo mu kisalu ki Yave, vayi nandi waba kuazuka beni mu mambu mankaka. Nandi wutuba :“Vaba tombulu minu kubika dikanda diama, bakundi ayi mamoso yaba vanganga ku Itália.” Kheti bobo, mu Ngonda Yintanu mvu 2016, Gisèle wununga kuvutuka ku Camarões. Vavioka mua thangu, nandi wukuelana na Léonce ayi Filiali yi Camarões wuba fila ku divula dimueka bantedilanga Ayos diba tsatu yi minsamuni mi Kintinu.

Buidi bubela luzingu luawu ku Ayos? Gisèle wutuba: “Khumbu zinkaka kuabasa banga ko minda mu zisabala ziwombo ayi tuabasa nunganga ko kukarega zitelefoni zitu. Diawu ziaba belanga zizibama thangu yiwombo. Minu yilonguka kulambila mu bisuadi ayi tuaba kuetekanga nlangu va builu mu burweta mu kusadila zilanterna.” Buidi banungina? Gisèle wutuba: “Phevi yi Yave yitusadisa beni kukindama, khindusulu ayi lusadusu lu dikanda ayi bakundi mu kimvuka lutu sadisa kununga mambu maphasi.”

Bukiedika ti Gisèle widi mayangi bo kavutuka ku tsi kabutukila? Ngete! Widi beni mayangi! Nandi wutuba: “Tuviokila mu mambu mawombo maphasi ayi tuba beni mu kiunda, vayi bo tununga mambu amomo, nnuni’ama ayi minu tuvisa ti tuvanga mambu tuaba tomba kuvanga. Befu tuluta fiatila Yave ayi kikundi kitu ayi nandi kiluta ba kingolo.” Léonce ayi Gisèle bakota kikola ki Minsamuni mi Kintinu, ayi bubu badi mintuami ntuala mifilu.

Dedi bo minlobi bamviokilanga mu bikaku biwombo muingi kubaka zifu, bawombo bamvutukanga ku tsi babutukila bamviokilanga mu mambu mawombo muingi kusadisa batu batidi kukuwa zitsangu zi Kintinu. Bukiedika, Yave wala tebukila moyo kisalu ayi luzolo zikhomba aziozio bammonisanga mu dizina diandi. (Nehe. 5:19; Ebe. 6:10) Boti ngie wunkalanga ku tsi yinkaka ayi wunzaba ti ku tsi wubutukila kuidi tsatu yi minsamuni mi Kintinu, ngie wala ba wukubama muingi kuvutuka? Ngie kuvanga mawu, wala tambula lusakumunu luwombo.—Zinga. 10:22.