1-2. (a) Kibila mbi mvuala Polo katubila ti luzolo yawu khadulu “yilutidi”? (b) Biuvu mbi tunkuiza baka mimvutu?

 BO MVUALA Polo katubila matedi kiminu, kivuvu ayi luzolo, nandi wumanisina dilongi diandi mu kutuba: “Luzolo, yawu khadulu yilutidi.” (1 Koli. 13:13) Kibila mbi Polo katubila mambu amomo? Mu bilumbu binkuiza, valasa tombulu ko kuba kiminu mu zikhanu zi Nzambi matedi nza yimona voti kutedimina zikhanu ziandi zisalama. Kibila nati thangu ayoyo, buna ziawu zimana salama. Vayi befu tuala tatamana kumonisa luzolo mu Yave ayi mu batu. Ayi luzolo luitu mu bawu, luala tatamana kukonzuka mvu ka mvu.

² Befu tuala tatamana kumonisa luzolo. Buabu tunkuiza baka mimvutu mi biuvu bitatu. Kitheti, kibila mbi tufueti monisina luzolo befu na befu? Buidi bu kumonisina luzolo befu na befu? Buidi tulenda tatiminina kukindisa luzolo luitu befu na befu?

3. Bibila mbi tuidi muingi kumonisa luzolo befu na befu?

³ Kibila mbi didi diambu dinkinza kumonisanga luzolo befu na befu? Luzolo luidi kidimbu ki Baklistu bakiedika. Yesu wukamba minlandikini miandi: “Mu phila ayoyo baboso bala zaba ti muidi minlandikini miami benu kuzolasana benu na benu.” (Yoa. 13:35) Kumonisa luzolo befu na befu, luawu  lunkuiza kindisa kithuadi kitu. Mvuala Polo wutuba ti luzolo, “luawu luntuadisanga kithuadi kikiedika.” (Kolo. 3:14) Vadi mvandi kibila kinkaka kinkinza tufueti monisina luzolo befu na befu. Mvuala Yoane wusonikina kuidi zikhomba ziandi: “Mutu wunzolanga Nzambi, kafueti zola mvandi khomb’andi.” (1 Yoa. 4:21) Bo tummonisa luzolo befu na befu, buna tuidi mu kumonisa luzolo kuidi Nzambi.

4-5. Vana kifuani kimmonisa ti luzolo luitu mu Nzambi, luidi kithuadi na luzolo tummonisanga befu na befu.

⁴ Buidi luzolo tuidi mu Nzambi luididi kithuadi na luzolo tummonisanga kuidi zikhomba zitu? Muingi kusudikisa mawu, tala kithuadi kidi ntima na binama binkaka binyitu. Bo dotolu kamfiongunina phila menga mankumbila mu zitsila zi koko, nandi kalenda visa phila ntim’itu widi mu kusadila. Mbi tulenda longuka mu kifuani akiokio?

⁵ Dedi bo dotolu kalenda nungina kuvisa buidi ntimi’itu widi mu kusadila, mu kutala phila menga mankumbila mu zitsila zi koko, befu mvitu tulenda zaba matedi luzolo luitu mu Nzambi, bo tumfiongunina luzolo tummonisanga kuidi zikhomba zitu. Befu kumona ti luzolo tuidi mu zikhomba zitu luidi lulebakana, mawu mammonisa ti luzolo luitu mu Nzambi, mvandi luidi lulebakana. Vayi, befu kutatamana kumonisa luzolo kuidi zikhomba zitu, buna tulenda ba lufiatu ti luzolo luitu mu Nzambi luidi lungolo.

6. Kibila mbi tufueti vangila dioso diambu boti luzolo luitu mu zikhomba luidi mu kudekuka? (1 Yoane 4:​7-9, 11)

⁶ Tufueti vanga dioso diambu boti luzolo luitu kuidi zikhomba luidi mu kudekuka. Kibila mbi? Kibila mawu mansundula ti kiphevi kitu kidi mu kulebakana. Mvuala Yoane wusonika ti: “Mutu wukhambu zolanga khomb’andi no kammonanga, kalendi zola ko Nzambi no kakhambu monanga.” (1 Yoa. 4:20) Mbi tulenda longuka mu mawu? Yave wumbanga mu mayangi bo tuntatamana “kuzolasananga befu na befu.”—Tanga 1 Yoane 4:​7-9, 11.

7-8. Mu ziphila mbi tulenda monisina luzolo befu na befu?

⁷ Khumbu ziwombo tuntanganga mu Kibibila lutumu luntuba, “luzolasananga benu na benu.” (Yoa. 15:​12, 17; Loma 13:8; 1 Tesa. 4:9; 1 Pete. 1:22; 1 Yoa. 4:11) Luzolo luidi khadulu yidi mu khati ntim’itu ayi ni mutu kalendi mona ko yawu. Vayi buidi bu kumonisina luzolo befu na befu? Tulenda vangila mawu mu mambu tunkoluka ayi tumvanga.

⁸ Vadi ziphila ziwombu tulenda monisina luzolo kuidi zikhomba zitu. Dedi, Kibibila kintuba: ‘Tubanganu kiedika benu na benu.’ (Zaka. 8:16) “Zingilanu mu ndembama benu na benu.” (Malaku 9:50) Kutuama ntuala mu “kukinzikanga bankaka.” (Loma 12:10) “Kukiyambanga befu na befu.” (Loma 15:7) “Tatamananu . . . kulemvukilanga bankaka.” (Kolo. 3:13) “Tatamananu kuyisadisa benu na benu.” (Ngala. 6:2) ‘Vanasananganu mbombolo benu na benu.’ (1 Tesa. 4:18) “Tatamananu . . . kukindasana benu na benu.” (1 Tesa. 5:11) “Lunatasananga mu minsambu.”—Tiagu 5:16.

9. Kibila mbi kubomba bankaka yidi phila yinkinza yi kumonisina luzolo luitu? (Tala mvandi foto.)

⁹ Tuemfiongunina phila yimueka yi kumonisina luzolo tube tubila mu lutangu luma vioka, mu matedi mambu Polo katuba: ‘Vanasananganu mbombolo benu na benu.’ Kibila mbi kubombasana befu na befu yidi phila yinkinza yi kumonisina luzolo? Dedi buntubila buku yimueka, kikuma Polo kasadila  muingi kutubila “kubombasana,” kinsundula “kuba va khonzu mutu widi mu kuviokila mu mambu ma phasi muingi kunkindisa.” Mu phila ayoyo, kubomba kunsadisanga khomba widi wulebakana kukindama ayi kutatamana kudiatila mu nzila yi luzingu. Ayi kadika khumbu tumbomba khomb’itu, tumonisanga ti tukunzolanga.—2 Koli. 7:​6, 7, 13.

10. Nguizani mbi yidi kumona kiadi ayi kubomba?

¹⁰ Kumona kiadi ayi kubomba kuidi nguizani. Kibila mutu wummonanga kiadi wadi’andi, nandi wu kumbombanga ayi wu kunsadisanga mu mambu kadi mu kuviokila. Theti tummonanga kiadi bosi tumbombanga. Mona buidi Polo kamonisina nguizani yidi kiadi ki Yave na mbombolo ka tuvananga. Polo wusonika ti Yave widi “Tata nkua kiadi ayi Nzambi yinkua mbombolo.” (2 Koli. 1:3) Dedi bunsudikisila nota yi lutangu alolo, Polo wusadila kikuma “nkua kiadi” muingi kutubila matedi kumonisa kiadi kuidi bankaka. Mu phila ayoyo, “Nzambi wuntedulu Tata voti nkua kiadi, kibila nandi wummonanga beni kiadi.” Ayi kiadi akiokio, ki kumvanganga kutu bomba “mu zikuamusu zitu zioso.” (2 Koli. 1:4) Dedi bo nlangu wu phosi wuntuadisanga ndandu kuidi batu badi phuila nlangu, Yave wuntuadisanga phosi ayi mbombolo kuidi batu bamviokila mu mambu ma phasi. Buidi tulenda landikinina kifuani ki Yave mu kumonisa kiadi ayi kubomba bankaka? Phila yimueka yi kuvangila mawu, yidi mu kukuna zikhadulu zimboti zidi kithuadi na mbombolo. Zikhadulu mbi?

11. Dedi bummonisina Kolosai 3:12 ayi 1 Petelo 3:​8, zikhadulu mbi zintombulu muingi kumonisa luzolo lu tuvanganga kubomba bankaka?

¹¹ Mbi biala tusadisa kumonisa luzolo luntombulu muingi “kutatamana kubombasana befu na befu” kadika kilumbu? Tufueti kuna zikhadulu dedi, kuvua nkinza mabanza ma bankaka, kuzolasananga banga zikhomba ayi kumonisa mamboti. (Tanga Kolosai 3:12; 1 Petelo 3:8.) Buidi zikhadulu aziozio zilenda tusadisila? Befu kumonisa kiadi ayi zikhadulu zidi nguizani na khadulu ayoyo, tualasa bika ko kubomba zikhomba badi mu kuviokila mu mambu ma phasi. Dedi bo Yesu katubila, “munu wuntubanga mambu mawedi mu ntima. Mutu wumboti wunkolukanga mambu mamboti.” (Matai 12:​34, 35) Kubomba zikhomba bamviokila mu mambu ma phasi, yidi phila yinkinza yi kumonisina luzolo tuidi mu bawu.

12. (a) Kibila mbi tufueti bela keba keba? (b) Kiuvu mbi tunkuiza fiongunina?

¹² Befu boso tuntomba “kutatamana kuzolasana befu na befu.” (1 Yoa. 4:7) Vayi nkinza beni kutebukila moyo mambu Yesu kalubula, “luzolo lu batu bawombo luala dekuka.” (Matai 24:12) Mawu masinsundula ko ti Yesu waba tomba kutuba ti mala monikina kuidi minlandikini miwombu. Vayi tufueti ba keba keba muingi luzolo luitu lubika dekuka dedi batu bawombu mu nza. Mu kutadila mambu amomo, tuamfiongunina kiuvu kimueka kinkinza: Buidi tulenda zabila boti luzolo luitu mu zikhomba luidi lungolo?

13. Mbi bilenda thota luzolo luitu?

¹³ Phila yimueka yi kuzabila boti luzolo luitu luidi lungolo, yidi mu kufiongunina buidi tundedikisilanga mambu na zikhomba zitu. (2 Koli. 8:8) Kibila kulebakana ayi zinzimbala zi bankaka kulenda tota luzolo luitu. Mvuala Petelo wutubila phila yimueka yi kudedikisila mambu, bo katuba: “Tatamananu kumonisa luzolo lungolo benu na benu, kibila luzolo  lumfukanga masumu mawombo.” —1 Pete. 4:8.

14. Dedi bummonisina 1 Petelo 4:​8, ntindu mbi luzolo tufueti monisa? Vana kifuani.

¹⁴ Buabu tuamfiongunina mambu Petelo katuba. Tsielu yitheti yi lutangu 8, nandi wutubila ntindu luzolo tufueti monisa—“luzolo lungolo.” Kikuma Petelo kasadila muingu kutubila “lungolo”, kinsundula “luyalubuka.” Tsielu yimmuadi yi lutangu, nandi wutubila matedi ndandu luzolo lungolo luntuadisanga. Lumfukanga masumu ma zikhomba zitu. Tala kifuani akiki: Yindul’abu boti widi meza yi kudila yidi mavudu mawombu. Mbi ngie wunkuiza vanga muingi kufuka mavudu beni? Ḿba wunkuiza yala nledi muingi kufuka mavudu moso, kubika kuadi to divudu dimueka. Bobuawu mvandi, befu kuba luzolo lungolo kuidi zikhomba zitu, tulenda “fuka” voti kulemvukila kubika to khumbu yimueka voti khumbu wadi, vayi kulemvukila zinzimbala zioso.

15. Befu kuba luzolo lungolo kuidi zikhomba zitu, mbi tulenda nunga kuvanga? (Kolosai 3:13)

¹⁵ Luzolo tummonisa kuidi bankaka, lufueti ba lungolo muingi tununga kulemvukila  zinzimbala ziawu, kheti dilenda ba diambu diphasi kuvanga mawu. (Tanga Kolosai 3:13.) Bo tulemvukila bankaka, tunkuiza monisa ti luzolo luitu, luidi lungolo ayi tunkuiza yangidika Yave. Vayi mbi bilenda tusadisa kulemvukila bankaka ayi kubika fika dasuka mu zinzimbala bamvanga?

16-17. Mbi bilenda tusadisa kuzimbakana zinzimbala zi zikhomba zitu? Vana kifuani. (Tala mvandi foto.)

¹⁶ Tufueti sikika thalu’itu mu zikhadulu zimboti zi zikhomba zitu, kubika kuandi mu zinzimbala ziawu. Tala mambu amama: Yindul’abu boti widi mu kuviokisa thangu va kimueka na zikhomba, ngie widi mu mayangi ayi kutsuka wumbotula foto na zikhomba zioso. Ḿba wunkuiza buebotula zifoto wadi boti foto yitheti yisa basika ko buboti. Mu phila ayoyo, ngie weka na zifoto zitatu. Vayi mu foto yinkaka, khomba mueka kasa basika ko buboti. Mbi wunkuiza vanga mu foto beni? Ḿba ngie wunkuiza kubula yawu, kibila widi zifoto zinkaka zikhomba zioso babe basika buboti.

¹⁷ Tulenda dedikisa zifoto tube lunda na mayindu mitu. Befu tuntebukilanga moyo mambu mamboti tuvanga na zikhomba zitu bo tuviokisa thangu va kimueka. Buabu, yindul’abu boti mu nkungi wumueka, khomba wu dibakala voti yinkietu wuntuba voti wumvanga diambu mu khambu yindula. Mbi tufueti vanga? Tulenda zimbakana mawu dedi bo tunkubudila foto yikhambu basika buboti.  (Zinga. 19:11; Efe. 4:32) Mawu mansundula ti tulenda zimbakana nzimbala khomb’itu, kibila tuidi mambu mawombu mamboti muingi kutebukila moyo matedi khomba beni. Mambu amomo, mawu tufueti tatamana kulunda voti kusueka mu kilunzi kitu.

18. Mambu mbi mankinza matedi luzolo tuma tubila mu dilongi adidi?

¹⁸ Kibila mbi tufueti tatimina kumonisa luzolo lungolo befu na befu? Dedi bo tumamuena, bo tummonisa luzolo kuidi zikhomba zitu, mvandi tuidi mu kumonisa luzolo tuidi mu Yave. Buidi tulenda monisina luzolo kuidi zikhomba? Phila yimueka yi kuvangila mawu, yidi mu kuba bomba. Befu kutuadusu mu kiadi, tuala “tatamana kubombasana befu na befu.” Buidi tulenda kindisila luzolo luitu befu na befu? Mu kuvanga mamoso tulenda nunga muingi kulemvukila zinzimbala zi bankaka.

19. Kibila mbi didi diambu dinkinza kumonisanga luzolo befu na befu bubu?

¹⁹ Kibila mbi vantombulu kuluta monisa luzolo bubu? Mona kibila mu mambu Petelo katuba: “Tsukulu yi biuma bioso yidi mu kufikama. Diawu, . . . tatamananu kumonisa luzolo lungolo benu na benu.” (1 Pete. 4:​7, 8) Mambu mbi malenda kutumonikina bo tsukulu yi nza ayiyi yidi mu kuefikamanga? Tulenda baka mvutu mu mambu Yesu kakamba kuidi minlandikini miandi: “Bala kululenda kuidi batu boso mu kibila ki dizina diama.” (Matai 24:9) Muingi tununga kukindama, tufueti tatamana kuba kithuadi. Befu kuvanga mawu, tulenda nunga mambu moso Satana kalenda vanga muingi kutuvukumuna. Ayi tufueti monisa luzolo lungolo befu na befu, kibila luzolo—“yawu khadulu yintuadisanga kithuadi.”—Kolo. 3:14; Fili. 2:​1, 2.