BOTI ngie wukue kangala ku kiseki ki Sangir Besar, ku Indonésia, mu mua mimvu kumbusa khanu ngie wunkuiza mona zikhomba zitatu zi bakietu ku ḿbu. Bawu baba bazabakana ku kiseki akiokio, mu kusadisa batu kuvisa Kibibila. Vayi mu thangu ayoyo, bawu baba vanga kisalu kinkaka.

Bawu bayenda mu ndeku ḿbu, bakupika mamanya manneni ayi bamanata. Mamanya mankaka maba beni manneni buka bola. Bosi, bawu bakala mu mua bikundu bi mabaya ayi basadila zimartelu muingi kuma bula ayi maba maluelu. Bosi ba matula mu zibaldi ayi bamanata nate ku kibuangu bawu baba kalanga. Bosi batula mamanya beni mu zitsaku ayi bama sumbisa kuidi batu baba vanga estrada.

Wumueka mu bakietu beni wuba Hulda. Mu kibila ki mambu kaba viokila mu luzingu, vaba tombulu kuviokisa thangu yiwombu mu kisalu akiokio. Nandi wusadila zimbongo kaba bakanga, muingi kudukisa zitsatu zi dikanda diandi. Mvandi wuba makani mankaka ma kudukisa, waba tomba kusumba tablet muingi kasadila JW Library^®. Yaya Hulda wuzaba ti zivideo ayi mambu mankaka mankuiza ntuadisa ndandu mu kisalu ki kusamuna ayi kuvisa buboti Kibibila.

Mu ngonda mueka ayi ndambu, yaya Hulda waba salanga bilokula biodi mu kadika meni muingi kubula mamanya ayi kuwesa kasoria yi dikalu. Mu phila ayoyo nandi wununga kubaka zimbongo zifuana muingi kusumba tablet.

Kheti waba banga beni wuvonga mu kisalu kaba salanga, yaya Hulda wutuba: Yizimbakana ziphasi zioso yimona bo yaba sadilanga tablet muingi kusadisa batu mu kisalu ki kusamuna ayi bo yaba kubikanga zikhutukunu. Nandi mvandi wutuba ti tablet yinsadisa mu thangu kivunga ki COVID 19, bo mambu moso ma kiphevi tuaba mavangilanga to mu videoconferência. Tuyangalala beni bo yaya Hulda kanunga kudukisa makani amomo.