Mua nkanda beni wutuadisa dingumba dimona. Diawu diba “makani ma kutuadisa kithuadi, ndembama ayi nsika mu nza yimvimba.” Binganga biwombo bantubanga ti badi Baklisto babuela mioko dingumba adiodi. Dingumba di Bakulutu ba Binganga ku América (CNI) batedila diawu “mbonosonu yi luyalu lu Kintinu ki Nzambi va ntoto.” Muingi bamonisa ti baba buela mioko dingumba beni, bawu bafila zimvuala ziawu mu lukutukunu luvangama ku França. Wumueka mu bawu wutuba ti lukutukunu beni “yiba thononu yi mambu mamona va nza.”

Mbandu yimona yaba tona, bika ti mu kibila ki batu baba mu lukutukunu batubila matedi ndembama. Mu mvu 1919 mbandu yimona yitona mu matedi kisalu ki kusamuna. Yave wuvana dikabu diandi mangolo ma kusamuna mu phila bakhambu vangilanga. Vayi theti mambu mankinza maba tombulu kumonika kuidi Minlonguki mi Kibibila

Mu kilumbu 4 Ngonda Yitheti mvu 1919, bavanga lukutukunu muingi kusola nani wunkuiza tuama ntuala mu kimvuka ki Yave. Mu thangu yinani, mutu waba tuama ntuala mu dikabu di Yave wuba Khomba Joseph F. Rutherford. Vayi nandi ayi sambuadi di zikhomba, baba vunina mambu ayi baba tula mu buloku ku Atlanta, Georgia ku U.S.A. Diawu zikhomba baba kuyikuvusa: Bukiedika ti tufueti kubue sola zikhomba badi mu buloku? Voti tufueti vingisa bankaka?

Muna khati buloku, Khomba Rutherford waba kuazuka beni matedi buidi kimvuka kinkuiza bela kuntuala. Nandi wuzaba ti zikhomba ziwombo baba tomba kusola mutu wunkaka muingi kaba ntuadisi. Diawu nandi kayisonikina nkanda waba tuba ti mu mbuenu’andi mboti basola Yaya Evander Coward muingi kaba ntuadisi wu kimvuka. Mu nkanda beni Khomba Rutherford wutuba ti Yaya Coward wuba Khomba “wuvumbama,” “widi nduenga,” ayi “wukuikama mu Mfumu.” Vayi bankaka baba yindula ti, vafueti vioka sambanu di zingonda muingi basola nani wunkuiza  tuama ntuala. Mimfundisi bakakidila zikhomba baba mu buloku bakikinina diyindu adiodi. Bo baba tubila mambu bafueti vanga, zikhomba zinkaka badasuka.

Richard Barber wutuba ti diambu dimueka dimonika disadisa kuzonza mambu beni. Wumueka mu zikhomba ziba vana wutuba: “Yisiko luzabu luwombo mu matedi lufundusu, vayi yizebi mbi lukuikumunu lunsundula. Lukuikumunu luawu Nzambi kantomba. Phila yilutidi tulenda monisina lukuikumunu kuidi Nzambi yidi mu kubue sola Yaya Rutherford muingi kaba ntuadisi wu kimvuka ki Yave.”—Minkunga 18:25.

Alexander Macmillan wuba mvandi mu buloku, kuntuala wutuba mambu mayiza monika mu kilumbu kilanda mu lukutukunu beni. Khomba Rutherford wubunda va kibaka kuba Khomba Alexander ayi wunkamba: “Basisa koko kuaku ku nganda.” Khomba Rutherford wuvana Khomba Macmillan mua nkanda. Khomba Macmillan wumona tsangu yiba mu nkanda beni ayi wuvisa mambu maba muna. Tsangu beni yaba tuba: “RUTHERFORD WISE VAN BARBER ANDERSON BULLY AYI SPILL MINTUADISI MITATU OFFICERS LUZOLO KUIDI BABOSO.” Tsangu beni yaba tomba kutuba ti Khomba Joseph Rutherford, ayi William Van Amburgh, bala tatamana kuba officers. Mu phila ayoyi, Khomba Rutherford wala tatamana kuba ntuadisi.

Minlonguki mi Kibibila badinda batu muingi baviaka nlembo nkanda wumueka waba dinda nsua kuidi ntinu babasisa nana di zikhomba baba mu buloku. Vaba tombulu kibakala muingi kudinda batu bakhambu ba Minlonguki mi Kibibila kuviaka nlembo. Vayi zikhomba zitu banunga ayi kuvioka 700.000 di batu baviaka nlembo. Vayi ava nkanda beni wutuka kuidi ntinu, Khomba Rutherford ayi zikhomba zinkaka baba basisa ku buloku.

Bo kabasika mu buloku, Khomba Rutherford wuvanga disolo dimueka. Nandi wutuba: “Yidi lufiatu ti mamoso amama tuba viokila, mamonikini muingi kutu kubika mu mambu maphasi mankuinza kuntuala. Mangolo muvengi masi ko to muingi kubasisa zikomba zinu mu buloku, vayi vadi diambu dinkaka dilutidi nkinza. . . . Muvengi mangolo ma kuvana kimbangi ki Kiedika, ayi baboso bavengi mawu bala tambula lusakumunu.”

Mambu matedi lufundusu zikhomba zitu baviokila mammonisa ti Yave waba tuama ntuala mu mawu. Mu kilumbu 14 Ngonda Yintanu, mvu 1919, mimfundisi batuba: “Batu bavunina mambu basa bafundisa ko mu phila yifuana,  . . diawu bakubudila mambu moso baba vunina.” Mambu bavunina zikhomba maba beni ma phasi. Boti baba lemvukila to voti kudekula nkanu baba zengila, khanu mambu baba vunina matatamana. Vayi bakubula mamoso ayi basa bue bavunina ko mambu mankaka. Mu phila ayoyi, Khomba Rutherford  wutatamana kuba mfundisi ayi khumbu ziwombo wukakidila dikabu di Yave ku Nzo Lufundusu Lunneni ku U.S.A.

Khomba Macmillan wutuba: “Befu tusa zinga ko mioko ayi kutedimina muingi Mfumu katunata ku diyilu. Vaba tombulu kuvanga diosokua diambu muingi tuzaba luzolo lu Mfumu.”

Vayi zikhomba ku Beteli basa bue baka ko luaku lu kuvanga kisalu baba vanganga mu mimvu miwombo. Kibila mbi? Kibila bo nana di zikhomba baba mu buloku, bisengu bioso baba sadilanga muingi kubasisa bilongulu biyiza vavuka. Mawu matuadisa kiunda, ayi zikhomba zinkaka batona kuyikuvusa boti kisalu ki kusamuna kituka kutsuka.

Bukiedika kuandi ti vaba batu baba bakubama muingi kukuwa zitsangu Minlonguki mi Kibibila baba samuna? Muingi kubakula mvutu, Khomba Rutherford wubaka makani ma kuvanga dilongi. Batumisa baboso. Khomba Macmillan wutuba: “Boti ni mutu kasinkuiza ko mu lukutukunu, buna kisalu kima tuka kutsuka.”

Dilongi beni divangama mu kilumingu, kilumbu 14 yi Ngonda Yintanu mvu 1919. Kheti wuba kubela mu kilumbu beni, Khomba Rutherford wuvanga dilongi diaba tuba “Kivuvu Kuidi Batu Badi mu Kiunda” ku tsi yi U.S.A. Nduka 3.500 di batu baba mu lukutukunu beni ayi bivevi na bivevi bi batu bankaka basa kota ko kibila kibuangu kiba kiluelu. Mu kilumbu kilanda, kuvioka 1.500 balandakana dilongi. Zikhomba bayiza bakula ti bawombo bakhidi vua nkinza zitsangu Minlonguki mi Kibibila baba samuna!

Mambu malanda zikhomba bayiza vanga, masadisa kisalu ki kusamuna ki Zimbangi zi Yave kienda kuntuala nati bubu.

Kibanga ki Nsungi ki kilumbu 1 Ngonda Yinana, mvu 1919, kivana ndubu matedi lukutukunu lu mavula luyiza vangama va thononu Ngonda Yivua ku Cedar Point, Ohio ku tsi yi  U.S.A. Nlonguki wumueka wu Kibibila bantedilanga Clarence Beaty waba kalanga ku Missouri tsi yi U.S.A, wutuba: “Babosa baba makani ma kukuenda mu lukutukunu beni.” Kuvioka 6.000 di zikhomba zi babakala ayi zi bakieto baba mu lukutukunu beni, ayi yisa ba ko thalu bawu baba vingila. Ayi diambu diluta tuadisa beni mayangi diba mbotumunu yi 200 di batu ku minlangu midi ku Erie.

Mu kilumbu 5, Ngonda Yivua mvu 1919, Khomba Rutherford wuvanga dilongi diaba tuba: “Ndubu Kuidi Minsamuni”. Mu dilongi beni, nandi wukundula levista yimona batedila The Golden Age (Thangu yi Wola). * Levista beni yibasika muingi “kutuala zitsangu zinkinza, zimona, ayi mu nzila Kibibila kusudikisa kibila mbi mambu beni maba monika”.

Minlonguki mi Kibibila batambula khindusulu yi kusamuna mu kibakala mu kusadila levista beni. Nkanda wumueka wuba zithuadusulu matedi phila yi kuvangila kisalu beni wutuba: “Bika kadika khomba wubotama katebukanga moyo luaku kadi lu kusadila Nzambi ayi kasadila buboti luaku kadi lu kuvana kimbangi mu nza yimvimba.” Bawombo bakikinina kiyeku akioki ki kusamuna! Mu Ngonda Kumi Yimuadi, minsamuni amiomi mi Kintinu banunga kukabula kuvioka 50.000 di zi levista zimona.

Kutsuka mvu 1919 dikabu di Yave diyiza ba dilulama ayi dikinda. Mvandi zimbikudulu ziwombo zi nkinza zitedi bilumbu bitsuka ziyiza salama. Mambu Malaki 3:1-4 kantuba matedi zithotolo ayi phila Nzambi kaludikila dikabu diandi mayiza mana. Ayi dikabu di Yave diyiza kulu mu mioko mi “Babiloni Yinneni”, ayi mvandi Yesu wuyiza sola “nnanga wukuikama”. * (Nzaikusu 18:2, 4; Matai 24:45) Mu phila ayoyi, Minlonguki mi Kibibila baba bakubama muingi kutambula kisalu Yave kaba tomba kuba vana.