1. Kibila mbi Yave nandi to fueni muingi kutambula mbuongimin’itu?

YAVE widi Mvang’itu ayi nandi wu tuvana moyo. Diawu nandi to fueni muingi kutambula mbuongimin’itu. (Nzaikusu 4:11) Vayi vadi ntambu. Kheti tunzolanga ayi tunkizinganga Yave, tulenda bika biuma binkaka kukuiba mbuongimini tufueti vana to kuidi nandi. Buboti beni kuzaba buidi malenda monikina. Vayi theti, tuemmona mbi binsundula kubuongimina to Yave.

2. Dedi buntubila Esodu 34:14, mbi binsundula kubuongimina to Yave?

² Mu Kibibila, kuba luzolo lungolo mu Yave kunsundula kubuongimina to nandi. Tulendi bika ko ni mutu voti kiuma kinkaka kibonga kibuangu ki Yave mu ntim’itu.—Tanga Esodu 34:14.

3. Kibila mbi tumbuongiminanga to Yave?

³ Befu tumbuongiminanga to Yave kibila tuidi bivisa biwombo mu mambu tunlongukanga matedi nandi. Befu tuzebi ayi tunkuitukanga zikhadulu zimboti zi Yave. Mvandi tunkinzikanga mambu kanzolanga ayi kakhambu zolanga. Tumvisanga ayi tumbuelanga mioko lukanu kadi mu batu. Befu tunkualalanga beni mu luaku tuidi lu kuba bakundi ba Nzambi. (Minkunga 25:14) Kadika kiuma tunlonguka matedi Mvang’itu ki tubuela fikikanga kuidi nandi.—Yakobi 4:8.

4. (a) Mbi Satana kansadilanga muingi ku tuvanga kubika buongimina to Yave? (b) Mbi tunkuiza longuka mu dilongi adidi?

 ⁴ Satana wuntuadisanga nza ayiyi. Nandi wunsadilanga yawu muingi kukengidila zitsatu ayi zinzimbala zitu. (Efeso 2:1-3; 1 Yoane 5:19) Nandi wuntomba ntim’itu wuba wukabuka. Bila befu kubela abobo, tualasa vana ko Yave mbuongimini kafueti tambula. Mu dilongi adidi, tunkuiza tubila biuma biodi Satana kansadilanga muingi kununga kuvanga ntim’itu kuba wukabuka. Phila yitheti yidi mu ku tuvanga kuba luzolo mu zimbongo, ayi yimuadi yidi mu ku tuthota muingi kusola bisavu bimbi.

5. Kibila mbi tufueti bela keba keba muingi tubika ba luzolo mu zimbongo?

⁵ Disi ko diambu dimbi kutomba baka bi kudia, bikhutu bimboti, ayi nzo yimboti muingi kuzinga. Vayi tufueti ba keba keba muingi tubika tona kuzola zimbongo. Bawombo badi mu nza yi Satana banzolanga zimbongo ayi biuma balenda sumbila mu zimbongo. (2 Timoteo 3:2) Yesu wuzaba ti minlandikini miandi bala thoto muingi kukuna ntindu luzolo alolo. Diawu katubila: ‘Kuisi ko mutu kalenda ba mvika wu zimfumu ziwadi mu khumbu yimweka, bila wela lenda wumueka ayi zola wunkaka; voti wela singimina mu wumueka ayi wela lenda wunkaka. Lulendi sadila ko Nzambi ayi busina.’ (Matai 6:24) Mutu wumbuongiminanga Yave ayi wumviokisanga thangu ayi mangolo mawombo muingi kubaka bimvuama, widi mu kusadila zimfumu ziwadi. Nandi kalendi nunga ko kuvana Yave mbuongimini kafueti tambula.

6. Mbi tube longuka mu mambu Yesu kakamba kimvuka ki Lawodise?

⁶ Kutsuka sekulu yitheti, kuba kimvuka kimueka ku divula di Lawodise. Batu baba  mu kimvuka beni baba tubanga mu lunangu: “Minu ndidi nkua kimvuama, ndibeki kimvuama kiwombo ayi ndisi kadi mfunu wu kima ko.” Vayi va meso ma Yave ayi Yesu, bawu baba “nkua mabienga, nkua kiadi, nsukami, phofo ayi pheni nkua.” Yesu wuba semba bika ti mu kibila ki busina baba, vayi mu kibila ki luzolo baba mu bimvuama. Luzolo alolo luaba bifisa kinkundi kiawu na Yave. (Nzaikusu 3:14-17) Vayi befu kubakula ti tuma tona kukuna luzolo lu zimbongo mu ntim’itu? Tufueti vanga diosokua diambu muingi kubotula mayindu amomo. (1 Timoteo 6:7, 8) Befu khambu vanga mawu, ntim’itu wala ba wukabuka ayi Yave kalasa kikinina ko mbuongim’itu. Kibila Yave wuntomba tubuongimina to nandi. (Deutelonomi 4:24) Buidi zimbongo zilenda bela kiuma kilutidi nkinza mu luzingu luitu?

7-9. Mbi ngie belonguka mu kifuani ki David?

⁷ Tala kifuani ki David, nkulutu wumueka wu kimvuka wunkalanga ku U.S.A. Nandi wutuba ti wuba wumueka mu bisadi waba kukivananga beni mu kisalu. Nandi wuyiza tambula kiyeku kimfunu ku kibuangu kaba sadilanga ayi wuyiza zabakana buka wumueka mu bisadi wulutidi ku tsi kaba kalanga. David wutuba: “Mu thangu yineni, minu yaba yindulanga ti lusalusu loso yaba tambulanga kuidi Yave luaba fuminanga.” Vayi mambu kaba yindulanga madi makiedika?

⁸ David wubakula ti kisalu kiandi kiaba bifisa kikundi kiandi na Yave. Nandi wutuba: “Bo yaba banga mu zikhutukunu ayi mu kisalu ki kusamuna, minu yaba yindulanga thangu zioso mambu maba viokanga ku kisalu. Minu yaba tambulanga zimbongo ziwombo, vayi kheti bobo yisa ba ko mayangi ayi mambu maba buelama mu dikuela ditu.”

 ⁹ David wuvisa ti vaba tombulu nandi kuludika mambu mu luzingu luandi. David waba tomba kudekula thangu kaba viokisanga ku kisalu ayi wuyoluka mawu na mfumu’andi. Mambu mbi mayiza monika? David bambotula mu kisalu! Mbi nandi kayiza vanga? Nandi wutuba: “Mu kilumbu kilanda, yiwesa nkanda muingi kuba nsadisi wu mintuami ntuala.” Bo vavioka thangu, David wuyiza ba ntuami ntuala, ayi bosi nkazi’andi mvandi wuyiza ba. Muingi kuyizingisa nandi ayi nkazi’andi batona kuvanga kisalu ki kudiodisa bibuangu. Kheti kiawu kidi kisalu bankaka bavuanga ko nkinza, vayi kuidi David ayi nkazi’andi malutidi nkinza masa ba ko ntindu kisalu vayi kutula kisalu ki Yave va theti. Kheti babasa bakanga ko zimbongo ziwombo dedi zio babe tambulanga, kadika ngonda, bawu baba nunganga kusumbu biuma baba tomba muingi kuyizingisa. Bawu bamona mu bukiedika phila Yave kankiebilanga batu bantulanga Kintinu kiandi va theti mu luzingu.—Matai 6:31-33.

10. Buidi tulenda kiebila ntim’itu?

¹⁰ Kheti tuidi bisina voti biphumbulu, befu boso tufueti kieba ntim’itu. Buidi? Kawubika luzolo lu zimbongo kukonzuka mu ntim’aku. Ayi kawubika kisalu kiaku kiluta ba nkinza mu luzingu luaku kena kisalu kiaku kuidi Yave. Buidi wulenda zabila ti widi mu kumonikina mawu? Wukiyuvusa: ‘Boti yidi mu lukutukunu voti mu kisalu ki kusamuna, yinyindulanga to mu mambu ma kisalu kiami? Yinkuazukanga boti yimbaka zimbongo zi kusadila mu bilumbu binkuiza? Yidi mu kubika zimbongo voti biuma bi kinsuni kutuadisa mambu mu dikuela diami? Wulenda kikinina ntindu kisalu bankaka bavuanga ko beni nkinza muingi kubaka thangu yi kukivana mu kisalu ki Yave? (1 Timoteo 6:9-12) Bo wumvanga biuvu beni, bambuka moyo ti Yave wutu zolanga beni. Nandi wukanikisa kuidi baboso bakumbuongiminanga: “Ndilendi kuyekula ko, ndilendi ku loza ko.” Diawu mvuala Polo kasonikina: “Bika khadulu eno yibika diatusu kuidi luzolo lu zimbongo.”—Ebeleo 13:5, 6.

11. Mambu mbi malenda monikina mutu mu kibila ki bisavu kansola?

¹¹ Yave wuntomba tumona mayangi mu luzingu. Ayi bisavu bilenda tusadisa mu mawu. Kibibila kintuba ti “[kuisi ko diambu] dilutidi mu mbote kwa muntu kansi mu dia ye nua ye yangidika mwel’andi mu salu kiandi.” (Mpovi 2:24) Vayi bisavu biwombo bidi mu  nza yi Satana bilenda bifisa mayindu mitu. Biawu bimvanganga batu bawombo kutona kukikinina ayi kuzola mambu Yave kankandimina.

12. Dedi buntubila 1 Kolinto 10:21, 22, kibila mbi tufueti sodila mu nduenga bisavu bitu?

¹² Befu tutidi kubuongimina to Yave. Diawu tulendi dia ko va kimueka “va meza yi [Yave] ayi va meza yi zipheve zimbimbi.” (Tanga 1 Kolinto 10:21, 22.) Kudia va kimueka na mutu yidi mbonosonu ti muidi kinkundi. Befu kusola bisavu bimmonisa batu bantengula menga, mambu ma ziphevi zimbi, kitsuza, voti mambu mankaka mambi, yidi dedi mueka buka befu tundia bidia bilambu kuidi zimbeni zi Nzambi. Kubika kuandi to kutu vanga bubi, bidia beni mvandi bilenda tulula kinkundi kitu na Yave.

13-14. Dedi buntubila Yakobi 1:14, 15, kibila mbi tufueti bela keba keba mu bisavu tunsola? Vana kifuani.

¹³ Tulenda fuanikisa bisavu buka bidia. Bo tundia, befu tulenda sola mbi tuntula mu munu. Vayi bo tummina biawu, tulendi sola ko ndandu mbi binkuiza tuadisa mu nyitu’itu. Vayi kuntuala biawu binkuiza fubakananga na nyitu’itu. Bidia bimboti biala tuvana buvinya, vayi bidia bimbi bilenda vanga bubi buvinya buitu. Ḿba masinkuiza monika ko muna thangu, vayi kuntuala mala monika.

¹⁴ Momawu mvandi mammonikanga bo tunsola bisavu. Befu tulenda sola biuma tuntula mu kilunzi kitu. Vayi tuisi ko bu kuyadila mambu mankuiza monikanga mu kilunzi ayi ntim’itu. Bisavu bimboti bilenda tutuadisa mayangi. Vayi bisavu bimbi bilenda tuvanga bubi. (Tanga Yakobi 1:14, 15.) Kheti bisinkuiza tuvanga ko bubi muna thangu, vayi bivisa bilenda kuiza kuntuala. Diawu Kibibila kintuba: ‘Lubika vunuka: Nzambi bansakininanga ko. Kibila byo mutu kamvata, biawu mvandi kala vela; woso mutu kunini mu diambu di nsuni andi buna wela tota biobi bieta buta nsuni [mbungulu].’ (Ngalatia 6:7, 8) Bukiedika, diambu dinkinza kutatuka bisavu bimmonisa biuma Yave kamonanga khenene!—Minkunga 97:10.

15. Nkayilu mbi Yave katuvana?

¹⁵ Zikhomba ziwombo banzolanga kulandakana JW Broadcasting^®. Khomba mueka bantedilanga Marilyn wutuba: “JW Broadcasting yi kunsadisanga kuba mayindu mamboti. Yilenda landakana zivideo zioso kibila biabioso bidi bimboti. Bo yidi miveka voti yidi mu kiunda, yintalanga mua dilongi voti malongi bamvanganga mu Mbuongimini va meni, ayi mawu ma kukhindisanga. Yinluta fikamanga Yave ayi kimvuka kiandi. TV JW Broadcasting yibalula luzingu luama!” KubotuIa kuandi to zivideo zi kadika ngonda, mu JW Broadcasting muidi bilongulu bisueku mu fono, minkunga mikhindusulu, ayi zivideo wulenda mona yosokua thangu wutidi. Abu ngiewu? Widi mu kusadila nkhayilu ayoyo yi Yave?

16-17. Kibila mbi tufueti yadila thangu tumviokisanga mu bisavu? Buidi tulenda vangila mawu?

¹⁶ Vasintombulu to kuba keba keba mu ntindu bisavu tunsola vayi tufueti ba mvandi keba keba mu thangu tumviokisila mu biawu. Befu khambu vanga mawu, tuala luta viokisa thangu mu bisavu kena kusadila Yave. Bawombo bammonanga phasi kuyala thangu bamviokisanga mu bisavu. Abigail, khomba yimueka yinkieto widi 18 di mimvu wutuba: Kutala TV ku kutsadisanga kuba wuvumbama. Vayi minu kumanga ba keba keba yilenda viokisa bilokolo biwombo mu kutala yawu. Ditoko dimueka bantedilanga Samuel wutuba: “Minu yibakula ti yimmonanga zivideo ziwombo zi khufi mu internet. Yintonanga  kutala yimueka, vayi bo yintulubuka, vama vioka bilokulu bitatu voti binna.”

¹⁷ Mbi wulenda vanga muingi kununga kuyala thangu wumviokisanga mu bisavu? Diambu ditheti didi kubakula thangu kua wumviokisanga mu biawu. Yedika kusonika thangu wumvanganga mu sabala yimueka. Sonika thangu kua wumvanganga mu kutala TV, mu kusadila internet voti kuta bisavu mu telefoni. Ngie kubakula ti widi mu kuviokisanga thangu yiwombo mu biawu, buna yedika kusonika buidi wunkuiza kabudilanga thangu. Botula theti thangu muingi wuvanga mambu malutidi nkinza, bosi bisavu. Dinda Yave ka kusadisa kulandakana makani maku. Ngie kuvanga mawu, wala baka thangu ayi mangolo ma kulonguka Kibibila, kuvanga mbuongimini yi dikanda, kulandakana zikhutukunu ayi kubasika mu kisalu ki kusamuna. Mvandi kuala kusadisa kuba kilunzi kimboti.

18-19. Buidi tummonisinanga ti tumbuongiminanga to Yave?

¹⁸ Bo kamana kutuba matedi tsukulu yi nza yi Satana ayi matedi nza yimona, mvuala Petelo wutuba: “Diawu bakiluzolo bama, bulu vingilanga mambu momo buna lunuana muingi kalubata, mu ndembama batu bakambulu ditona ayi tsembolo va ntual’andi.” (2 Petelo 3:14) Mawu mansundula ti tufueti vanga mangolo muingi kuba basama mu kinsuni ayi mu kiphevi. Mu phila ayoyi, tummonisanga ti tuidi mu kubuongimina to nandi.

¹⁹ Satana ayi nza kanyadila bala tatamana kutu vanga kutomba kutula biuma binkaka va theti mu luzingu kubika kuandi mbuongimina yi Yave. (Luka 4:13) Vayi kheti tumviokila mu ziphasi, tualasa bika ko ni mutu voti kiuma kinkaka kukuiba kibuangu ki Yave mu ntim’itu. Tuidi makani ma kuvana to Yave mbuongimini kafueni mu tambula!