YINDULA boti mfumu buala betambula tsangu yitedi nsongo wu tsisi widi mu kuiza. Mu kibila ki luzolo kadi mu batu, nandi wunkuiza tela mbila muingi kulubula batu mu phila bafueti kukikiebila mu nsongo beni. Mbi tulenda longuka mu mawu?

Buka mfumu buala awowo, Yave widi mu kulubula batu matedi “lufundusu” lunkuiza kuntuala. Buidi Yave kadi mu kuvangila mawu? Ayi kibila mbi tulenda bela lufiatu ti nandi widi mu kuvana thangu yifuana muingi batu balandakana ndubu beni? Ava tubaka mvutu wu kiuvu akioki, tuentubila theti mua zindubu Yave kavana mu thangu yikhulu.

Mu thangu yikhulu, Yave wulubula batu matedi “lufundusu” kabina tuala kuidi batu bamanga kuntumukina. (Zingana 10:25; Yelemia 30:23) Thangu yiwombo ava kutuala lufundusu, Yave wulubula batu bakhambu kuntumukina ayi wuba kamba mbi balenda vanga muingi bantumukina. (2 Mintinu 17:12-15; Nehemia 9:29, 30) Muingi kusadisa batu kubalula mavanga, Yave waba sadilanga bisadi biandi bikuikama muingi kuba zabikisa matedi lufundusu luandi. Mawu maba sadisanga batu beni kuvisa mbi bafueti vanga muingi kubalula mavanga.—Amosi 3:7.

Wumueka mu batu Nzambi kasadila muingi kuzabikisa lufundusu luandi widi Nowa. Mu mimvu miwombo, nandi wusamuna mu kibakala kuidi bankua kitsuza, ayi bankua buphunya bazinga mu thangu’andi ayi wu balubula matedi Khuka yi Milangu. (Ngenesi 6:9-13, 17) Nowa wuba kamba mbi bafueti vanga muingi bavuka—diawu kuntuala bayiza kuntedila ‘nlongisi wu mambu masonga.’—2 Petelo 2:5.

Kheti mu mangolo moso Nowa kavanga, batu basa kuwa ko ndubu nandi kaba vana. Bawu basa tula ko kiminu mu zindubu Yave kaba vana mu nzila Nowa. Mu kibila akioki, bawu bafua bo ‘khuka yi nlangu yiyiza ayi yimana vitumuna baboso.’ (Matai 24:39; Ebeleo 11:7) Ni mutu mu bawu kasa ba ko kibila ki kutuba ti Nzambi kasa balubula ko.

Thangu zinkaka Yave wuvana zindubu ziandi bo vaba khambu to nkadu thangu muingi katuala lufundusu. Kheti bobo, nandi wuvana thangu yifuana muingi batu kaba lubula bavanga dioso diambu matedi “lufundusu” beni. Bo katuala kumi di zi tsingulu ku Ngipiti mu thangu yikhulu, Yave wukheti vana zindubu ava kutuala ziawu. Buka, nandi wufila Mose ayi Aloni muingi kulubula Falawo ayi bisadi biandi ti, tsingulu yisambuadi, yidi mvula wu mamanya wuba kuiza mu kilumbu kiba landa ayi wala tulula biuma biwombo. Bukiedika kuandi ti kilumbu kimueka kiba kifuana mo babaka kisuamunu muingi bavuka? Kibibila kintuba: ‘Woso mutu mu bisadi bi Falawo wuba boma mu diambu di Yave, mu thinu wukutikisa bisadi biandi ayi bibulu biandi ku nzo, vayi baboso bakhambu kuwa diambu di Yave babika bisadi biawu ayi bibulu biawu kunganda.’ (Esodu 9:18-21) Mawu mansundula ti Yave wuvana thangu yifuana muingi Falawo ayi bisadi biandi bakubama. Batu bayuwa zindubu ayi bavanga dioso diambu mu thinu, basa monikina ko ziphasi dedi zio bankaka bamonikina.

Yave mvandi wulubula Falawo ayi bisadi biandi mu matedi tsingulu yikumi. Vayi bawu bamonisa buvungisi ayi basa kuwa ko ndubu beni. (Esodu 4:22, 23) Mambu mbi mayiza monika? Bawu bamona bana bawu batheti kufua. Mambu ma kiadi! (Esodu 11:4-10; 12:29) Bukiedika ti batambula ndubu beni mu thangu yifuana? Ngete! Kibila Mose wulubula basi Isaeli mu thinu matedi tsingulu yi kumi ayi wusudikisa mbi bafueti vanga muingi  kuvukisa makanda mawu. (Esodu 12:21-28) Thalu kua yi batu batumukina ndubu beni? Bivisa bimmonisa, kuvioka bivevi bitatu bi batu, kubunda basi Isaeli, basi Ngipiti ayi bakhambu ba basi Isaeli bavuka mu lufundusu lu Yave ayi babotuka ku Ngipiti.—Esodu 12:38; tala matangu madi va wanda mu nwt-TPO.

Bifuani abiobi bimmonisa ti Yave waba vananga zindubu mu thangu yifuana muingi batu bayuwa ayi babalula mavanga. (Deutelonomi 32:4) Kibila mbi nandi kaba vangilanga mawu? Mvuala Petelo wusudikisa ti Yave ‘kasintomba ko ni wumueka kabungu, vayi wuntomba baboso babalula mavanga.’ (2 Petelo 3:9) Bukiedika, Yave wuba vuanga nkinza batu baneni. Ayi waba tomba banyonga masumu mawu ayi babalula mavanga ava lufundusu luyiza.—Yesaya 48:17, 18; Loma 2:4.

Bubu, batu mu nza yimvimba badi mu kukuwa ndubu yinkinza beni, ayi baboso bafueti vanga diosokua diambu. Bo kaba va ntoto, Yesu wutuba ti nza tuidi mu kuzingila yela viokila mu “ziphasi zingolo” ayi yela bungu. (Matai 24:21) Nandi wubikula diambu dimueka dinsudikisa buboti mambu ayi zithotolo minlandikini miandi minkuiza monikina bo thangu beni yala dedakana. Mu mbikudulu beni nandi wutuba mambu madi mu kumonika bubu mu nza yimvimba.—Matai 24:3-12; Luka 21:10-13.

Bo tuidi mu kuzingila mu thangu mbikudulu ayoyi yidi mu kusalama, Yave widi mu kuvana ndubu kuidi batu boso. Nandi tidi baboso basola kunsadila ayi kuntumukina, kibila baboso bamvanga mawu bela tambula luzingu lulutidi bubu ayi kuntuala bela tambula lusakumunu luwombo ku nza yimona. (2 Petelo 3:13) Yave wuntomba batu boso baba kiminu mu zikhanu ziandi. Diawu kadi mu kuvanina batu luaku lu kukuwa ‘zitsangu zimboti zi Kintinu’. Yesu wutuba ti zitsangu aziozi zimvukisa miela mi batu ziala samunu ‘kuidi batu ba makanda ma zitsi zioso’. (Matai 24:14) Nzambi widi mu kutuadisa bisadi biandi bikuikama muingi kunata zitsangu ziandi mu 240 di zitsi ayi bibuangu. Yave tidi batu bawombo bayuwa ndubu’andi ayi bavuka mu lufundusu luidi mu kufikama.—Sefania 1:14, 15; 2:2, 3.

Diambu dilutidi nkinza disi ko boti Yave wumvananga thangu yifuana muingi batu bayuwa zindubu ziandi. Kibila nandi wumvananga thangu. Vayi diambu dilutidi nkinza didi: Bukiedika kuandi ti batu bela kuwa ndubu yi Nzambi bo bukhidi thangu? Yave wutu vana luaku lu kusamuna zitsangu ziandi. Diawu, vanga mamoso wunnunga muingi kusadisa batu bawombo kuvuka mu tsukulu yi nza ayiyi.