DILONGI 41
Tatamana Wukuikama mu Thangu “Ziphasi Zingolo”
‘Bika luzola Yave beno muidi bakuikama mu nandi. Yave wunkiebanga bakuikama.’—MINKUNGA 31:23.
NKUNGA 129 Tufueti Kuikamanu
MAMBU TUANLONGUKA *
1-2. (a) Tsangu mbi mintinu mi luyalu bala yamikisa? (b) Biuvu mbi bintombulu mimvutu?
YINDULA boti zimfumu zi luyalu bama mana kuyamikisa tsangu yi ‘ndembama ayi nsika’. Mu lungundayi bawu balenda tuba ti bama nunga kutuala nsika mu nza. Bawu bala tomba baboso mu nza kuyindula ti mamoso madi mu kukuenda buboti. Vayi bawu balasa nunga ko kuludika mambu mala monika kuntuala! Kibila mbi? Kibila dedi bummonisina mbikudulu yi Kibibila, “[mbungulu] yingolo yela babuila mu kinzimbukila, ayi balendi baka bu tinina ko”.—1 Tesalonika 5:3.
2 Vadi mua biuvu binkinza bintombulu mimvutu: Mbi biala monika mu thangu “ziphasi zingolo”? Mbi Yave kala tomba tuvanga mu thangu beni? Ayi buidi tulenda kubimina bubu muingi tutatamana bakuikama mu thangu ziphasi zingolo?—Matai 24:21.
MAMBU MBI MALA MONIKA MU THANGU “ZIPHASI ZINGOLO”?
3. Dedi bummonisina Nzaikusu 17:5, 15-18, buidi Nzambi kala tuludila Babiloni Yinneni?
3 Tanga Nzaikusu 17:5, 15-18. ‘Babiloni Yinneni’ yela bungua! Dedi bo tube tubila, zimfumu zi luyalu balasa zaba ko ma kuvanga mu thangu mambu beni mala monika . Kibila mbi? Kibila “Nzambi [wala tula] mu mintima miawu lukanu lu [kuvanga] luzolo luandi.” Lukanu mbi? Lu kutulula binganga bioso bi luvunu, kubunda mvandi bo bantubanga ti badi Baklisto, vayi balonganga ko batu kubuongimina Nzambi mu phila kantombila. Nzambi wala tula mayindu mandi mu ntima ‘kibulu ki nganzi ki ndimba yibenga’ kidi ‘kumi di ziphoka’. Kibulu ki nganzi kinsundula ONU, ayi kumi di ziphoka kinsundula mintinu mioso mi luyalu midi kithuadi na ONU. (Nzaikusu 17:3, 11-13; 18:8) Bo mintinu bela balukila binganga bi luvunu, buawu tuela zabila ti “ziphasi zingolo” zima tona. Yawu yala ba thangu yi boma yala kuizila batu boso va nza.
4. (a) Bibila mbi zimfumu zi luyalu balenda vana muingi kubunga binganga bi luvunu? (b) Mambu mbi batu baba mu binganga bi luvunu balenda vanga?
4 Befu tusa zaba ko bibila mbi mintinu mi luyalu bala vana muingi kubunga Babiloni Yinneni. Ḿba balenda tuba ti binganga biba tulanga nkaku kutuadisa ndembama mu nza yimvimba ayi bankotanga beni mu mambu mawu. Voti balenda tuba ti binganga abiobi bima kupika bimvuama ayi bibuangu biwombo. (Nzaikusu 18:3, 7) Mu thangu mintinu mi luyula bala nuanisa binganga bi luvunu, ḿba bawu balasa bunga ko batu boso badi muna. Vayi ḿba zimfumu zi luyalu bela zenga kithuadi na mangumba ma binganga. Bo binganga bioso bi luvunu biala bungu, batu baba muna bala visa ti zimfumu zi binganga basa nunga ko kuvanga mambu bakanikisa. Diawu bala babandila mbusa.
5. Mbi Yave kakanikisa matedi ziphasi zingolo ayi kibila mbi?
5 Kibibila kisintuba ko thangu kua mbungulu yi Babiloni Yinneni yela vanga. Vayi befu tuzebi to ti yela ba thangu yikhufi. (Nzaikusu 18:10, 21) Yave wukanikisa “kukufisa bilumbu” bi ziphasi zingolo mu kibila ki batu “kasobula” ayi batu badi mu kinganga kikiedika bavuka. (Malako 13:19, 20) Mbi Yave kantomba befu tuvanga bo ziphasi zingolo zintona nati kutsuka alimangedoni?
TATAMANA MU MBUONGIMINI YI KIEDIKA
6. Muingi tubika ba kithuadi na Babiloni Yinneni, mbi binkaka tufueti vanga?
6 Dedi bo tumueni mu dilongi diviokizi, Yave wuntomba bisadi biandi batatuka Babiloni Yinneni. Kuvanga mawu kunsundula kuzenga kithuadi kioso na binganga bi luvunu. Befu tufueti baka makani ma kutatamana kusadila Yave. Tuemmona ziphila ziwadi tulenda vangila mawu.
Kheti mu thangu ziphasi, tulendi bika ko kukutakana (Tala lutangu 7) *
7. (a) Buidi tulenda buedila mioko zithumu zisonga zi Yave? (b) Ebeleo 10:24, 25 yintuba ti tufueti kutakana nga, kibila mbi mawu malutidi nkinza bubu?
7 Ditheti, tufueti tumukina mu kibakala zithumu zisonga zi Yave. Tulendi landakana ko bifu bimbi bi basi nza ayiyi. Buka, tukikininanga ko ziphila zioso zi kitsuza, kubunda mvandi makuela ma babakala na babakala ayi bakieto na bakieto. (Matai 19:4, 5; Loma 1:26, 27 ) Dimuadi, tufueti tatamana kubuongimina Yave va kimueka na zikhomba zitu. Bosokua bumbela, befu tualasa bika ko kukutakana muingi kubuongimina Yave. Tufueti tatamana kukutakana mu ‘kuzaba ti kilumbu ki Mfumu kima fikama.’—Tanga Ebeleo 10:24, 25.
8. Mambu mbi malenda monika mu zitsangu tunsamunanga?
8 Mu thangu ziphasi zingolo, ḿba tsangu tunsamunanga yela baluka. Bubu tunsamunanga zitsangu zimboti zi Kintinu ayi tumvanganga mangolo muingi kukitula batu minlonguki. Mu thangu ziphasi zingolo, zitsangu tunsamunanga ziala luta ba zingolo, dedi mvula wu mamanya manneni. (Nzaikusu 16:21) Ḿba tuala samuna ti nza yi Satana yembelama kubungua. Bo thangu beni yala tuka, tuala zaba mu bukiedika tsangu mbi tuala samuna ayi buidi tuala samunina yawu. Bukiedika ti tuala samuna mu phila tunsamuninanga mu vevi di mimvu kumbusa? Voti tuala samunina mu ziphila zimona? Tufueti vingila thangu beni yifuana muingi tumona. Bosokua bumbela, tuala baka luaku lu kusamuna zitsangu zi lufundusu lu Yave mu kibakala!—Yehezekeli 2:3-5.
9. Buidi zimfumu zi luyalu balenda muena tsangu tuala samuna, ayi lufiatu mbi tuidi?
9 Mamoso mammonisa ti zitsangu tuala samuna ziala fuemisa zimfumu zi luyalu. Diawu bala tomba kutu kandimina kusamuna zitsangu zi Kintinu. Vayi befu tuala fiatila mu Yave. Bubu nandi wutu vananga lusalusu muingi kusamuna zitsangu zimboti. Tuidi lufiatu ti mu bilumbu binkuiza, Yave wala tuvana mangolo muingi kuvanga luzolo luandi.—Mika 3:8.
KUBAMA BO BALA NUANISA DIKABU DI NZAMBI
10. Dedi bummonisina Luka 21:25-28, buidi batu bawombo bala bela mu thangu ziphasi zingolo?
10 Tanga Luka 21:25-28. Mu thangu ziphasi zingolo batu bala ba mu kiunda kingolo. Biuma bioso baba yindulanga ti biala kadidila mu nza ayiyi, biala tuluka. Bawu bela ba beni mu ‘kiunda’, ayi bela mona boma bu kufua mu thangu yineni yi ziphasi. (Sefania 1:14, 15 ) Mu thangu beni, ḿba luzingu luala kuiza ba beni phasi kubunda mvandi kuidi dikabu bi Yave. Bo tukhambulu kithuadi na basi nza ḿba tuala viokila mu ziphasi ziwombo. Ḿba tuala khambu nati biuma biluelu muingi kuyizingisa.
11. (a) Kibila mbi batu ayi zimfumu zi luyalu bala tsikikila thalu’awu kuidi Zimbangi zi Yave? (b) Kibila mbi tulendi bela ko boma bu ziphasi zingolo?
11 Vala ba thangu, batu baba mu binganga bi luvunu bala fuema kibila kinganga ki Zimbangi zi Yave kisa bungu ko. Bawu bala tiamuna zitsangu aziozi kuidi bankaka, kubunda mvandi mu internet. Zimfumu zi luyalu, kubunda mvandi mfumu’awu Satana bala tulenda mu kuzaba ti kinganga kitu kiawu to kisiedi. Bawu basa nunga ko kudukisa makani mawu ma kutulula binganga bioso bidi va ntoto. Diawu bala tubalukila. Yawu thangu mintinu mi luyalu bala zabikinina dedi Ngongi yi Mangongi. * Bawu bala kutakana muingi kunuasisa dikabu di Yave. (Yehezekeli 38:2, 14-16) Tulenda tona kukuazuka beni mu mambu mala monika, kibila tusa zaba ko buidi bala tunuanisina. Vayi diambu dimueka befu tuidi lufiatu: Tulendi ba ko boma bu ziphasi zingolo. Yave wala tuvana zithuadusulu ziala vukisa miela mitu. (Minkunga 34:19) Befu tuala ‘telama ayi kuvumuna mintu mitu’, kibila tuzebi ti ‘khudulu’inu yidi mu kufikama’. *
12. Mbi ‘nnanga wukuikama’ kamvanganga muingi kutu kubika mu mambu mankuiza kuntuala?
12 Mu mimvu miwombo ‘nnanga wukuikama’ wu tukubikanga muingi tutatamana bakuikama mu thangu ziphasi zingolo. (Matai 24:45) Nandi wumvanganga mawu mu ziphila ziwombo. Yindula mu zikhutukunu zi mavula zi mvu 2016 nati 2018. Kadika lukutukunu lutubila matedi khadulu yimueka tufueti kuna muingi tuvuka mu kilumbu ki Yave. Ndoko tutebukila moyo zikhadulu beni.
KINDISA LUKUIKUMUNU, MVIBUDULU AYI KIBAKALA KIAKU
Kubama bubu muingi wuvuka mu “ziphasi zingolo” (Tala bitini bi matangu 13-16) *
13. Mbi biala tusadisa kukindisa lukuikumunu luitu mu Yave? Kibila mbi tufueti vangila mawu bubu?
13 Lukuikumunu: Ntu dilongi wu lukutukunu lu mavula wu mvu 2016 wutuba: “Tatamana Wukuikama mu Yave!” Lukutukunu alolo lutulonga ti muingi tuba bakuikama mu Yave, tufueti ba kikundi kingolo ayi nandi. Malongi mamonisa ti muingi kukindisa kikundi kitu na Yave, tufueti sambilanga mu ntima woso ayi kulongukanga beni Kibibila. Minsambu ayi ndongukulu yi Kibibila yitu vananga mangolo tontomba muingi tununga ziphasi tumviokila. Bo nza yi Satana yi ketukanga kutsuka, befu tulenda vingila kubuela viokila mu mambu manthota lukuikumunu luitu mu Yave ayi Kintinu kiandi. Batu ḿba bala tatamana kutu vueza, kibila tubuelanga ko mioko mambu mamvioka mu nza yi Satana. (2 Petelo 3:3, 4) Boti tutidi kutatamana bakuikama mu Yave mu thangu ziphasi zingolo, tufueti kindisa luikuikumunu luitu bubu.
14. (a) Mbi biala monikina zikhomba bankiebanga dikabu di Yave va ntoto? (b) Kibila mbi vala tombulu befu kuba bakuikama bo mawu mala monika?
14 Bubu, Dingumba Dintuadisi dinkiebanga dikabu di Yave va ntoto. Vayi vala ba thangu mu ziphasi zingolo bawu balasa bue ba ko va ntoto. Batu boso basolo bala bakutikisa ku diyilu muingi kunuana mu mvita wu Alimangedoni. (Matai 24:31; Nzaikusu 2:26, 27) Vayi nkangu wunneni wala tatamana wululama. Zikhomba badi kiphevi kimboti badi mu dingumba di mamemi mankaka bala kieba dikabu di Nzambi. Bo mambu amomo mala monika, tufueti monisa lukuikumunu. Vala tombulu befu kubuela mioko zikhomba aziozi ayi kulandakana zithuadusulu bala tambula kuidi Nzambi. Tufueti landakana zithuadusulu aziozi boti tutidi kuvuka!
15. Mbi biala tusadisa kukindisa mvibudulu’itu? Ayi kibila mbi tufueti vangila mawu bubu?
15 Mvibudulu: Ntu dilongi wu lukutukunu lu mavula wu mvu 2017 wutuba: “Bika Kuvonga!” Lukutukunu alolo, lukindisa mangolo mitu ma kununga zithotolo. Tulonguka ti lukuikumunu luyizilanga ko mu mangolo mitu, vayi mu lufiatu tuidi mu Yave. (Loma 12:12) Tulendi zimbakana ko lukanu lu Yesu: ‘Woso wela kindama ti ku tsuku wela vuka.’ (Matai 24:13) Lukanu alolo lummonisa ti tufueti tatamana bakuikama kheti mu ziphasi tumviokila. Befu kumonisa mvibudulu mu kadika ziphasi tumviokila, tuala luta ba mangolo ma kukhambu vonga mu ziphasi zingolo.
16. Buidi bunkuizilanga kibakala kikiedika? Ayi buidi tulenda kindisila kibakala kitu bubu?
16 Kibakala: Ntu dilongi wu lukutukunu lu mavula wu mvu 2018 wutuba: “Ba Kibakala!” Lukutukunu alolo, lutu tebula moyo ti tuisi ko kibakala mu kibila ki mangolo mitu. Dedi lukuikumunu, kibakala kikiedika kinkuizilanga mu kufiatila Yave. Buidi tulenda kindisila lufiatu luitu mu nandi? Tufueti tanganga Kibibila kadika kilumbu ayi kuyindula buidi Yave kasadisila dikabu diandi mu thangu yikhulu. (Minkunga 68:20; 2 Petelo 2:9) Bo zimfumu zi luyalu bala tunuanisa mu ziphasi zingolo, vala tombulu befu kuba kibakala ayi lufiatu mu Yave mu phila tukhambu vangilanga. (Minkunga 112:7, 8; Ebeleo 13:6) Befu kufiatila Yave bubu, tuala ba kibakala kifuana muingi kununga Ngongi bo kala tunuanisa. *
VINGILA PHULUSU’AKU
Yesu ayi nkangu’andi wu masodi bela kuiza muingi kubunga zimbeni zi Nzambi mu mvita wu Alimangedoni! (Tala lutangu 17)
17. Kibila mbi tulendi bela ko boma bu mvita wu Alimangedoni? (Tala fikula yidi va busu bu levista.)
17 Dedi bo tumueni mu dilongi diviokizi, bawombo mu befu tona muna tona tunzingilanga mu bilumbu bitsuka. Mvandi tuidi kivuvu ki kuvuka mu ziphasi zingolo. Mvita wu Alimangedoni wawu wela manisa mambu moso ma nza yi Satana. Vayi tulendi ba ko boma. Kibila mbi? Kibila awowo, widi mvita wu Nzambi, ayi befu tualasa nuana ko. (Zingana 1:33; Yehezekeli 38:18-20; Zakalia 14:3) Bo thangu yala fuana, Yave wala tuma Yesu, Baklisto basolo ayi bivevi na bivevi bi zimbasi muingi kunuana mvita. Baboso bala nuanisa Satana, ziphevi ziandi zimbi ayi masodi mandi mala ba va ntoto.—Danieli 12:1; Nzaikusu 6:2; 17:14.
18. (a) Mbi Yave kakanikisa? (b) Buidi Nzaikusu 7:9, 13-17 yi kuvana lufiatu mu bilumbu binkuiza?
18 Yave wukanikisa: ‘Binuanunu bioso bamvanga muingi kukunuanisa bialasa nunga ko.’ (Yesaya 54:17) “Nkangu wunneni” wu bisadi bikuikama bi Yave ‘bala vuka mu ziphasi zingolo’! Ayi babaso bala tatamana kubuongimina Yave mu phila yisonga. (Tanga Nzaikusu 7:9, 13-17.) Buboti beni kuzaba ti Kibibila kitu vananga bibila biwombo muingi kuba lufiatu mu bilumbu binkuiza kuntuala! Befu tuzabisi ti ‘Yave wunkiebanga bakuikama’. (Minkunga 31:23) Baboso banzolanga Yave ayi bankembisanga dizina diandi, bala kuangalala beni mu phila Yave kala diodisila dizina diandi mu luvunu lu Satana.—Yehezekeli 38:23.
19. Kivuvu mbi kimboti tuidi mu bilumbu binkuiza kuntuala?
19 Yindula khanu buidi mambu madi mu 2 Timoteo 3:2-5 madidi boti mantubila matedi nza yimona, kibuangu batu balasa vukumuka ko mu matingu ma Satana. (Tala dibaya “Buidi Batu Bala Bela.”) Khomba George Gangas, wuba wumueka mu Dingumba Dintuadisi, wutuba: ‘Nza yala ba kibuangu kimboti mu thangu baboso bala buongimina Yave! Ngiewu wala baka luaku lu kuzinga mvu ka mvu mu nza yimona.’ Bukiedika, akiki kidi kivuvu kimboti beni!
NKUNGA 122 Ba Wukindama!
^ Lut. 5 Befu tuzebi ti thangu yiluelu yisiedi, batu boso bala viokila mu “ziphasi zingolo”. Mambu mbi mala monikina bisadi bi Yave mu thangu beni? Mbi Yave kala tomba tuvanga? Zikhadulu mbi tufueti kuna bubu muingi tutatamana bakuikama mu thangu ziphasi zingolo? Tunkuiza bakula mimvutu mu dilongi adidi.
^ Lut. 11 TSUDUKUSU YI BIKUMA: Kikuma Ngongi ayi Mangongi (voti, Ngongi) kinsundula dingumba di zimfumu zi luyalu bala bundana muingi kunuanisa dikabu di Yave mu thangu ziphasi zinneni.
^ Lut. 11 Muingi kubuela zaba mambu mala monika ava mvita wu Alimangedoni, tala buku (kr) kapu 21. Muingi kubuela zaba matedi phila Ngongi yi Mangongi kala nuanisila dikabu di Yave ayi buidi Yave kala kakudila dikabu diandi mu Alimangedoni, tala buku (rr), kapu 17 ayi 18.
^ Lut. 16 Lukutukunu lu mavula wu mvu 2019, widi ntu diambu: “Luzolo Lusukanga ko!”, lutu monisa ti tulenda luta baka nsika mu phila Yave katu kiebilanga mu luzolo.—1 Kolinto 13:8.
