Zikhomba ku Beteli basala kuvioka mvu mueka muingi kutunga kibuangu ki Rádio WBBR ku divula di Nova York. Bo bamana kutunga kibuangu beni, batunga nzo yaba kalanga bisadi ayi nzo yinkaka baba lundilanga bisadulu. Bo kisalu ki kutunga kimana, zikhomba batona kukubika bisadulu biaba tombulu muingi batona kusamunina mu rádio. Vayi baviokila mu mambu maphasi.

Zikhomba babakula ti muingi kukubika antena diba diambu diphasi. Kibila wawu wuba 91 di zi metro mu kukula. Vaba tombulu kusikika wawu mu makunzi muadi maba 61 di zi metro mu kukula. Khumbu yitheti bameka, basa nunga ko. Vayi bafiatila mu lusalusu lu Yave ti, bankuiza nunga. Calvin Prosser, wuba wumueka mu dingumba beni wutuba: “Ti tununga mu khumbu yitheti khanu tuyinangika mu kutuba, ‘tala mambu tuma vanga!’” Vayi zikhomba bazaba ti banungina kuvanga mawu mu lusalusu lu Yave. Vayi bikaku bisa mana ko.

Kisalu ki kukubika Rádio kiba kimona ayi bisadulu basadila, biba phasi kumonika mu mazandu. Diawu zikhomba babaka kisengu kimueka kikhulu bantanguninanga transmissor, kiba 500-watt. Mvandi basa ba ko micro mifuana muingi kusadila. Diawu basadila telefone. Builu bumueka, zikhomba babaka makani ma kukuedika Rádio bavanga. Bawu basa ba ko thuadusulu yi mambu bafueti zabikisa kuidi zikhomba mu kusadila Rádio, diawu bayodila minkunga mi Kintinu. Ernest Lowe wutuba: Bo zikhomba baba kuimbila, bawu  batambula chamada yi yaya Rutherford, b waba kuwa minkunga beni mu Rádio ku kinanu ki 25 di zi quilômetro ku Brooklyn.

Yaya Rutherford wusakana mu kutuba “Dokisanu lusuku alolo, luke buka lusuku lu biwayi!” Zikhomba bamona zitsoni ayi mu thinu badokisa, vayi baba lufiatu ti baba belama kutiamuna tsangu yitheti mu rádio.

Mu kilumbu 24 Ngonda Yimmuadi mvu 1924, bo batiamuna tsangu yitheti mu rádio, yaya Rutherford wuyundula rádio ayi wutuba ti bankuiza sadila yawu “muingi kuvanga kisalu ki Kintinu Yesu Klistu kaba vana.” Nandi wutuba mu lufiatu ti bavangila rádio beni, “muingi kusadisa batu boso bavisa kiedika ki Kibibila.”

Tsangu yitheti batiamuna, yivangama buboti. Ayi bisadi bi Yave, basadila programa yi rádio WBBR mu 33 di mimvu.

Ngonda Sambuadi mvu 1924, Minlonguki mi Kibibila balandakana lukutukunu lu mavula ku Columbus, Ohio. Zikhomba bafumina mu zitsi ziwombu balandakana lukutukunu mu mbembu, Árabe, Inglês, Francês, Alemão, Grego, Húngaro, Italiano, Lituano, Polonês, Russo, Escandinavo ayi Ucraniano. Mvandi baviokisa lukutukunu alolo mu rádio ayi zikhomba badinda basi jornal va kibuangu beni muingi basonika kadika kilumbu matedi lukutukunu alolo.

Mu kilumbu 24 Ngonda Sambuadi, kuvioka 5.000 di zikhomba basamuna ku divula diaba vangimina lukutukunu lu mavula. Bawu bakabula nduka 30.000 di zibuku ayi batona kutuadisa ndongukulu yi Kibibila kuidi bivevi na bivevi bi batu. Ndongukulu yi Kibanga ki Nsungi, “yituadisa beni mayangi mu lukutunu alolo.”

Mu Kintanu kilumbu 25 Ngonda Sambuadi, yaya Rutherford wutubila diambu dinkaka dinkinza mu lukutukunu alolo, bo kaba tanga nkanda waba tubila luvunu lu zifumu zi binganga. Nandi wutuba ti zifumu zi binganga, zifumu zi pulitika ayi basi lungoso, bantulanga “nkaku muingi batu kuzaba kiedika ki Kintinu ki Nzambi,” kio Nzambi kala sadila muingi kusakumuna ntoto woso. Nandi mvandi wutuba ti “batu abobo baba fotu kibila baba buelanga mioku Liga das Nações ayi baba tubanga ti ayoyo, yawu phila Nzambi  kanyadila nza.’” Minlonguki mi Kibibila baba tombulu kibakala muingi kusamuna zitsangu zimboti kuidi batu.

Kibanga ki Nsungi kimueka kitubila mu bukhufi lukutukunu alolo lu mavula. Kiawu kituba ti: “Lukutukunu lu mavula luvangama ku Columbus, lukindisa kiminu ki zikhomba aziozio zi kuikama . . . , luba vana kibakala muingi basamuna kheti mu zioso kua zikhuamusu balenda viokila kuidi zimbeni ziawu.” Yaya Leo Claus wulandakana lukutukunu alolo, wuntebuka moyo mu kutuba: “Bo tubasika mu lukutukunu, tusamuna tsangu ayoyo mu mayangi va kizunga kitu.”

Mu Ngonda Yikumi, Minlonguki mi Kibibila batona kukabula bivevi na bivevi bi mua nkanda baba tedilanga Ecclesiastics Indicted, muba zitsangu yaya Rutherford Katanga mu lukutukunu matedi zifumu zi binganga. Ku Cleveland, Oklahoma mua divula dimueka ku Estados Unidos da América, yaya Frank Johnson wumanisa kukabula mua minkanda ayi wutemina mu 20 di minutu muingi kudengana na zikhomba zinkaka. Disa ba ko diyindu dimboti kutemina zikhomba zinkaka va kibuangu balenda fika kummuena, kibila babakala ba divula adiodio, baba mu nganzi mu kibila ki kisalu ki kusamuna nandi kavanga. Diawu yaya Johnson kabakila makani ma kusuama mu nzo nzambi yiba yibelama. Bo kamanga kue bata muna ni mutu, nandi wubika mua minkanda va khati Kibibila ki mpelu ayi mu kadika kikundu. Nandi wuvangila mawu mu thinu. Ayi mua minkanda beni misa mana ko, diawu kakotila diaka mu zinzo nzambi wadi zibelama ayi wubika muawu minkanda.

Yaya Frank wuvutuka va kibuangu babinana na zikhomba. Nandi wusuama kumbusa zi bomba ayi babakala baba kuntomba bavioka mu dikalu ayi basa kummona ko. Bosi zikhomba bayiza landa yaya Frank ayi bayenda.

“Bo tuaba basika ku divula,” khomba mueka wutebuka moyo mu kutuba, “tuvioka zinzo nzambi zitatu. Ayi vantuala kadika nzo nzambi beni, vaba nduka 50 di batu. Bankaka baba tanga mua minkanda beni ayi bankaka basimba miawu muingi kumonisa mpelu. Befu tubasika mu thangu yifuana ayi tubikana kubakana mu mambu! Tuvutula matondo kuidi Yave mu kutukieba mu mioku mi zimbeni.”

Minlonguki mi Kibibila mu zitsi zinkaka, mvandi balonga mu kibakala. Ku norte yi França, yaya Józef Krett waba samuna kuidi batu baba salanga mu zimina bafumina ku Polónia. Nandi wuvanga thuadusulu muingi kuvanga dilongi diba ntu diambu “Luvulubukusu Luambelama.” Bo zikhomba baba tumisa batu, mpelu va kizunga beni wuba kamba muingi babika kukuenda. Vayi va monika diambu di kukuitukila. Kuvioka 5.000 di batu balandakana dilongi beni kubunda mvandi mpelu beni! Yaya Krett wutumisa mpelu beni muingi kutubila mambu kankikininanga vayi nandi wumanga. Bo dilongi dimana, yaya Krett wukabula bilongulu kuidi batu kibila nandi wumona ti bawu baba phuila yi Diambu di Nzambi.—Amo. 8:11.

Ku África, yaya Claude Brown wunata zitsangu zimboti ku Costa de Ouro, bubu bantanguninanga Gana. Malongi mandi ayi bilongulu kakabula, bisadisa kutiamuna kiedika mu thinu ku tsi ayoyo. John Blankson, wulonguka muingi kusadilanga ku farmácia, wuba wumueka mu batu balandakana malongi ma yaya Brown. Mu thinu, nandi wuvisa ti wubakula kiedika. Nandi wutuba:  “Kiedika kithuadisa mayangi. Ayi yizabikisa mawu kuidi batu bawombu ku kikola ki farmácia yaba longukilanga.”

John wulonguka ti Kibibila kisinlonga ko ti Nzambi widi wumueka mu batu batatu. Diawu kilumbu kimueka kayuvudila mawu kuidi mpelu. Mpelu wunkamba ayi wutenduka: “Ngie wisi ko kisadi ki Nzambi; ngie Satana wu kuvuidi. Botuka avava!”

Bo kavitila ku nzo, John wusonikina nkanda kuidi mpelu mu kuntumisa muingi kusudikisa mu lukutukunu vantuala batu boti Nzambi widi batu batatu mu mutu mueka. Mpelu wutambudila John mu kuntumisa ku escritório yi direitor yi kikola ki Farmácia. Ayi nandi wunyuvula boti nandi wusonikina nkanda kuidi mpelu.

John wumvutudila, “ngete fumu.”

Direitor wukamba John kasonika nkanda muingi kundinda nlemvu kuidi mpelu. John wusonika:

“A fumu, direitor be kundinda muingi yi kusonikina nkanda muingi yi kudinda nlemvu. Yike wukubama mu kusonikina nkanda muingi yi kudinda nlemvu, boti ngie wunkuiza kikinina ti ngie wunlongisanga malongi ma luvunu.”

Direitor wuyituka ayi wunyuvula, “Blankson, mawu ngie wuntomba kusonika?”

“Ngete fumu. Minu yisindinda ko nlemvu kibila yisa vanga ko diambu dimbi.”

“Nandi wunkamba, ngie wulendi tatamana ko ku kikola akiki ngie kutatamana kutubila bubi mpelu wu kinganga ntinu kambuelanga mioku.”

“A fumu, . . . Bo ngie wu tuvananga malongi befu tuvananga ko biuvu mu mambu tukhambu visanga buboti?”

“Ma budedi.”

“Mawu mamonika, mpelu wu tulonganga Kibibila ayi minu yimvana kiuvu. Boti nandi kasinnunga ko kuvana mvutu, kibila mbi minu yifueti kunsonikina nkanda muingi kundinda nlemvu?”

Blankson basa kunkuka ko ku kikola. Ayi nandi kasa sonika ko nkanda muingi kudinda nlemvu.

Mu bukhufi, Kibanga ki Nsungi kituba: “Dedi Davidi, tulenda tuba mu lufiatu: ‘Ngie wuphana mangolo muingi kunuana.’ (Minkunga 18:39) Mvu awowo, wuba beni wu khindusulu kibila tumona buidi Yave ka tusadisila mu kisalu kiandi . . . Bisadi biandi bikuikama, . . . mu mayangi basamuna zitsangu zimboti.”

Kutsuka mvu, zikhomba bavanga thuadusulu muingi kubuela samuna mu rádio. Mvandi, babue tunga kibuangu kinkaka ki rádio ku Chicago Estados Unidos da América. Kibuangu akiokio kimona ki radio baba kitedilanga WORD. Baba sadilanga rádio yiba capacidade yi 5.000-watt. WORD voti rádio ayoyo, yaba tiamunanga zitsangu zi Kintinu mu bibuangu bi kinanu kubunda mvandi ku norte yi Canadá.

Mu mvu 1925 Yave wusadisa zikhomba kuvisa diambu dimona didi mu Nzaikusu kapu 12. Mu kibila ki phisulu ayoyo yimona, bankaka babika kubue sadila Yave. Vayi bawombu mu bawu, baba mu mayangi muingi kuvisa buboti mambu mamonika ku diyilu ayi ndandu mawu matuadisa kuidi dikabu di Yave va ntoto.