Dilongi 42
NKUNGA 103 Bakulutu ba Kimvuka—Nkhayilu wu Yave
Monisa ti Wumvutulanga Matondo mu ‘Minkhailu mi Batu’
“Bo nandi kamaka ku diyilu. . . , wuvana minkhailu mi batu”—EFE. 4:8.
MAMBU TUANLONGUKA
Buidi minsadisi mi bakulutu ba kimvuka ayi minkengididi mi bimvuka, ba tusadisilanga ayi buidi tulenda vutudila matondo mu mambu babakala abobo bakuikama bamvanganga?
1. Minkhailu mbi Yesu katuvana?
VASI ko mutu wunluta sadisanga bankaka kena Yesu. Bo kaba va ntoto, khumbu ziwombo nadi wusadisa batu mu kuvanga mangitukulu. (Luk. 9:12-17) Nandi wuvana nkhailu wulutidi mu kuvana luzingu luandi mu kibila kitu. (Yoa. 15:13) Tona Yesu kavulubuka, nandi wuntatamananga kutusadisa. Dedi bo kakanikisila, nandi wudinda kuidi Yave muingi kafila phevi’andi yinlongo muingi katulonga ayi ku tubomba. (Yoa. 14:16, 17; 16:13) Ayi mu nzila zikhutukunu zitu zi kimvuka, Yesu wuntatamananga kutukubika muingi tuvanga minlonguki.—Mat. 28:18-20.
2. Banani badi “minkhailu mi batu” bantubila mu Efeso 4:7, 8?
2 Mona nkhailu wunkaka Yesu katuvana. Mvuala Polo wusonika ti bo Yesu kavutuka ku diyilu, “nandi wuvana minkhailu mi batu.” (Tanga Efeso 4:7, 8.) Polo wusudikisa ti Yesu wuvana babakala bobo muingi kusadisa kimvuka mu ziphila ziwombo. (Efe. 1:22, 23; 4:11-13) Bubu minkhailu amiomio mi batu badi, minsadisi mi bakulutu ba kimvuka, bakulutu ba kimvuka ayi minkengididi mi bimvuka. a Vayi babakala abobo badi batu ba masumu, bawu mvawu bamvanganga zinzimbala. (Tia. 3:2) Vayi Fumu’itu Yesu Klistu wu kuba sadilanga muingi ku tusadisa. Bukiedika, bawu badi minkhailu kuidi befu.
3. Fuanikisa buidi befu bosu tulenda buedila mioku kisalu ki “minkhayilu mi batu.”
3 Yesu wuvana kiyeku kuidi ‘minkhailu amiomio mi batu’ muingi kukindisa kimvuka. (Efe. 4:12) Vayi befu boso tulenda kuba sadisa muingi bakieba kiyeku akiokio kinkinza. Muingi kufuanikisa: bawombu mu befu, badi mu kisalu ki kutunga Zinzo zi Kintinu. Bankaka bambuelanga mioku kisalu ki kukabula bidia, kunata makalu ayi bisalu binkaka. Befu bosu tulenda buela mioku minsadisi mi bakulutu ba kimvuka, bakulutu ba kimvuka ayi minkengididi mi bimvuka mu mambu tuntuba ayi tunvanga. Tuemmona buidi tulenda bakila ndandu mu kisalu kiawu ayi buidi tulenda monisina kuidi “minkhailu mi batu” Yesu kavana, ti tukubatondanga.
MINSADISI MI BAKULUTU BA KIMVUKA “BANSADISANGA BANKAKA”
4. Bisalu mbi minsadisi mi bakulutu ba kimvuka bavanga mu sekulu yitheti?
4 Mu sekulu yitheti, zikhomba zinkaka baba tambulanga biyeku bi kuba minsadisi mi bakulutu ba kimvuka. (1 Ti. 3:8) Ḿba bawu bavanga kisalu ki ‘kusadisa bankaka’ kio Polo katubila. (1 Ko. 12:28) Minsadisi mi bakulutu ba kimvuka, bavanga bisalu biaba tombulu muingi kusadisa bakulutu ba kimvuka basikika thalu mu kisalu ki kulonga ayi ki kukengidila. Dedi, minsadisi mi bakulutu ba kimvuka ḿba baba sadisanga kuvanga zi copia zi Masonoko voti kusumba biuma biaba tombulu muingi kuvanga zi copia beni.
5. Bisalu mbi minsadisi mi bakulutu ba kimvuka bamvanganga bubu?
5 Mona bisalu minsadisi mi bakulutu ba kimvuka bamvanganga mu kimvuka. (1 Pet. 4:10) Bawu bantambulanga biyeku bi kutadila matedi minkhailu, kizunga ki kusamuna, kudinda bilongulu ayi kukabula biawu kuidi minsamuni, kukieba bisiku bi minkunga, kuba minsudiki mi bibuangu ayi kusadisa kudiodisa Nzo yi Kintinu. Bisalu abiobio nkinza bidi muingi kimvuka kitatamana kukuenda bubote. (1 Ko. 14:40) Mvandi minsadisi minkaka bamvangaga biyeku mu lukutukunu lu Nzigulu ayi Kisalu Kitu ki Buklistu ayi dilongi di baboso. Nsadisi wu bakulutu ba kimvuka mvandi kalenda tambula kiyeku ki kuba nkengididi wu dingumba di kisalu ki kusamuna. Ayi khumbu zinkaka nkulutu wu kimvuka kalenda dinda kuidi nsadisi wu bakulutu muingi kanlandakana mu kisalu ki kukengidila.
6. Bibila mbi tuidi muingi kutonda kisalu ki minsadisi mi bakulutu ba kimvuka?
6 Buidi bisalu bakulutu ba kimvuka bamvanganga binsadisilanga bimvuka? “Yaya Beberly b khomba yikietu wunkalanga ku Bolívia wutuba: “Mu kibila ki lusalusu lu minsadisi mi bakulutu ba kimvuka yimbakanga ndandu mu zikhutukunu. Mu kibila ki kisalu kiawu minu yinnunganga ku kuimbila, kuvana mimvutu, kukuwa malongi, kulonguka mu zivideo ayi zi foto. Bawu bamvanganga mangolo muingi tulandakana lukutukunu mu nsika ayi kusadisa zikhomba banlandakananga lukutukunu mu videoconferência. Bo lukutukunu lummana, bawu bantuamanga ntuala mu kudiodisa Nzo Kintinu, kukeba minkhailu ayi kufiongunina boti tuidi bilongulu bintombulu. Diawu minu yi kuba tondilanga!” Yaya Leslie, wunkalanga ku Colômbia ayi nnuni’andi widi nkulutu wu kimvuka wutuba: “Vantombuluanga lusadusu lu minsadisi mi bakulutu ba kimvuka muingi nnuni’ama kanunga kuvanga biyeku binkaka. Boti nandi katambulanga ko lusalusu lu minsadisi mi bakulutu ba kimvuka, khanu nnuni’ami widi beni mawombu ma kuvanga. Diawu yintonda mu kisalu kiawu.” Befu boso, tumvutulanga beni matondo mu kisalu minsadisi mi bakulutu ba kimvuka bamvanganga.—1 Ti. 3:13.
7. Buidi tulenda vutudila matondo mu minsadisi mi bakulutu ba kimvuka? (Tala mvandi foto)
7 Kheti tunzolanga kisalu minsadisi mi bakulutu bamvanganga, Kibibila ki tukindisa: “Vutulanganu matondo.” (Kolo. 3:15) Yaya Cristóvão widi nkulutu wu kimvuka ku Finlandia, wumvutulanga matondo mu kutuba: “Minu yintubanga diambu nsadisi wu bakulutu katuba voti kavanga dikhindisa ayi yimvutulanga matondo mu kisalu kiandi.” Yaya Pascal ayi yaya Jael bankalanga ku Nova Caledónia, bannatanga minsadisi mi bakulutu ba kimvuka mu minsambu. Yaya Pascal wutuba, “mu bilumbu abibi, tunnatanga mu minsambu minsadisi mi bakulutu, kutonda kuidi Yave ayi kundinda kaba yawu ayi kaba sadisa.” Yave wunkuwanga minsambu amiomio ayi kimvuka kioso kimbakanga ndandu.—2 Ko. 1:11.
BAKULUTU BA KIMVUKA “BANSALANGA BENI VA KHAT’INU”
8. Kibila mbi Polo kasonikina ti bakulutu ba kimvuka mu sekulu yitheti, “basala beni”? (1 Tesalonika 5:12, 13)
8 Bakulutu ba kimvuka mu sekulu yitheti baba salanga beni mu kimvuka. (Tanga 1 Tesalonika 5:12, 13; 1 Ti. 5:17) Bawu baba “tuadisanga” kimvuka, zikhutukunu ayi kubaka makani mu dingumba di bakulutu ba kimvuka. Bawu mvawu baba “vananga malongi” ma luzolo kuidi zikhomba, maba kuba sadisanga muingi batatamana bakuikama. (1 Te. 2:11, 12; 2 Ti. 4:2) Babakala abobo mvandi, basala beni muingi kukeba zitsatu zi makanda mawu, muingi kuba sadisa batatamana bakinda mu kiphevi.—1 Ti. 3:2, 4; Titu 1:6-9.
9. Biyeku mbi bakulutu ba kimvuka bankebanga bubu?
9 Bubu mvandi bakulutu ba kimvuka badi beni mawombo ma kuvanga. Bawu badi minsamuni. (2 Ti. 4:5) Bawu bammonisanga kifuza mu kutuama ntuala mu kisalu ki kusamuna ayi ba tukubikanga muingi kusamuna ayi kulonga buboti. Bawu mvawu bansalanga dedi mimfundisi mu kumonisa kiadi ayi kukhambu ku luvasanu. Dedi, bo khomba kamvola disumu dingolo, bakulutu ba kimvuka ba kunsadisanga muingi kanyongina disumu beni ayi kubue vutula kikundi kiandi na Yave. Ayi bamvanganga mamoso muingi kimvuka kitatamana kidiodila. (1 Ko. 5:12, 13; Nga. 6:1) Bakulutu ba kimvuka badi minsungi. (1 Pet. 5:1-3) Bawu bamvanganga malongi mamboti mabongulu mu Kibibila, bamvanganga mangolo muingi kuzaba baboso mu kimvuka ayi ba kuba telanga mu telefoni muingi kuba kindisa. Bakulutu bankaka bansalanga mu bisalu bi kutunga Zinzo zi Kintinu, voti kubuongisa ziawu, bankubikanga zikhutukunu zi mavula ayi bankaka badi mu dingumba di Comissões de Ligação com Hospitais ayi Grupos de Visitas a Pacientes. Bakulutu ba kimvuka bansalanga beni mu kibila kitu!
10. Bibila mbi tuidi muingi kutonda kisalu bakulutu ba kimvuka bamvanganga?
10 Yave wubikula ti minsungi voti bakulutu ba kimvuka, bala tukieba buboti ayi valasa tombulu ko ‘kuba mu boma.’ (Yele. 23:4) Yaya Johanna, khomba mueka wunkalanga ku Finlândia, wumona kiedika ki mambu amomo bo mamandi kaviokila mu kimbefu kingolo. Nandi wutuba: “Kheti yimmonanga phasi kuzabikisa mabanza mami kuidi bankaka, vayi nkulutu mueka wu kimvuka yikhambu zaba buboti, wumbonisa mvibudulu, wusambila yama ayi wuthebula moyo ti Yave wu kunzolanga. Kheti yisintebuka ko moyo mamoso katuba, vayi mawu matsadisa kuba wuvumbama. Ayi yidi lufiatu ti Yave nandi wusadila khomba ayoyo muingi katsadisa mu thangu yifuana.” Buidi bakulutu ba kimvuka kiaku bamana kusadisila?
11. Buidi tulenda tondila bakulutu ba kimvuka? (Tala mvandi foto.)
11 Yave wuntomba tutondanga bakulutu ba kimvuka mu “kibila ki kisalu bamvanganga.” (1 Te. 5:12, 13) Yaya Henrietta wunkalanga ku Finlândia wutuba: “Bakulutu ba kimvuka bansadisanga bankaka mu ntima woso, vayi mawu masinsundula ko ti bawu badi beni thangu voti mangolo ayi baviokilanga ko mu mambu maphasi. Khumbu zinkaka yi kuba kambanga ti benu muidi bakulutu bamboti ba kimvuka.” Khomba mueka bantedilanga Sera wunkalanga ku Turquia c wutuba: “Bakulutu ba kimvuka bantombuluanga khindusulu muingi batatamana kuvanga kisalu kiawu. Befu tulenda kuba sonikina nkanda, kuba tumisa muingi kudia va kimueka voti kubasika yawu mu kisalu ki kusamuna.” Vadi nkulutu wu kimvuka wulenda tonda mu kibila ki kisalu kamvanganga? Nzabikisa ti ngie wuntondanga mu mambu kamvanganga.—1 Ko. 16:18.
Vanga mambu malenda buela mangolo zikhomba badi biyeku muingi batatamana (Tala lutangu 7, 11, 15)
KHINDUSULU YI MINKENGIDIDI MI BIMVUKA
12. Mbi Yesu kavanga muingi kukindisa kimvuka? (1 Tesalonika 2:7, 8)
12 Yesu Klistu wuvana kimvuka “minkhailu mi batu” bansadilanga mu ziphila zinkaka. Mu thuadusulu’andi bakulutu ba kimvuka ku Yelusalemi bafila Polo, Balinabasi ayi bankaka muingi kuba minkengididi mi bimvuka. (Mav. 11:22) Mu kibila akiokio, babieka minsadisi mi bakulutu ayi bakulutu ba kimvuka muingi kukindisa kimvuka. (Mav. 15:40, 41) Babakala abobo bamvanganga mangolo mawombo ayi bantulanga luzingu luawu va kingiela muingi kulonga ayi kukindisa bankaka.—Tanga 1 Tesalonika 2:7, 8.
13. Biyeku mbi minkengididi mi bimvuka badi?
13 Minkengididi mi bimvuka bamvanganga beni ziviage. Bawombo mu bawu bamvanganga ziviage kuvioka khama di zikilometro muingi kuvitila mu kimvuka. Kadika sabala, bamvanganga malongi, bankindisanga zikhomba, bantuadisanga lukutukunu lu mintuami ntuala, lukutukunu lu bakulutu ba kimvuka ayi lukutukunu lu kubasikila mu kisalu ki kusamuna. Bawu bankubikanga malongi ayi zikhutukunu zi mavula. Bawu bantuadisanga kikola ki mintuami ntuala, zikhutukunu zi mintuami ntuala na mintuami ntuala mifilu va kizunga beni ayi mvandi bantadilanga mambu mankaka. Kubotula kuandi amomo, bawu mvawu bantadilanga mambu mankaka mankinza mamfuminanga ku filiali.
14. Bibila mbi tuidi muingi kuvua nkinza kisalu ki minkengididi mi bimvuka?
14 Buidi kimvuka kimbakilanga ndandu mu nkhailu wu minkengididi mi bimvuka? Mu matedi ziviage zi minkengididi mi bimvuka, khomba mueka wunkalanga ku Turquia wutuba: “Kadika khumbu tuntambula nkengididi wu bimvuka, ma kuphananga phuila yi kubuela sadisa zikhomba ziama. Yizaba minkengididi miwombo mi bimvuka, vayi kheti bobo ni wumueka mu bawu wuphanga kuyindula ti badi beni mawombo ma kuvanga voti basi ko thangu yi kukoluka yama.” Yaya Johanna tuma tubila kumbusa, wusala na nkengididi wu bimvuka mu kisalu ki kusamuna, vayi basa nunga ko kue bata ni mutu ku nzo. Ayi kheti bobo nandi wutuba: “Yilendi zimbakana ko kilumbu akiokio. Kibila nkengididi wu bimvuka wukhindisa beni ayi wutsadisa mu kibila ki phuila yiba yi zikhomba ziama wadi zi bakietu bayenda kue zingila ku kibuangu kinkaka. Nkengididi wukhamba ti ḿba dilenda ba diambu diphasi mu bilumbu abibi kuzingila va kimueka na dikanda ayi bakundi bitu. Vayi mu nza yimona tuala baka luaku lukhambu sukanga muingi kuviokisa thangu va kimueka.” Ayi bawombo mu befu, tumvuanga nkinza minkengididi mi bimvuka ayi phila ba tusadisilanga.—Mav. 20:37–21:1.
15. (a) Dedi bummonisina 3 Yoane 5-8 buidi tulenda tondila minkengididi mi bimvuka? (Tala mvandi foto.) (b) Kibila mbi tufueti kinzikila bakazi ba zikhomba bantuama ntuala mu kimvuka ayi mbi tufueti vanga? (Tala mvandi quadro yintuba “ Tebukila Moyo Bakazi Bawu.”)
15 Mvuala Yoane wukindisa Ngaio muingi kayamba zikhomba ayi “kaba sengula mu phila yimboti yidi yifuana va mesu ma Nzambi.” (Tanga 3 Yoane 5-8.) Phila yimueka tulenda landikinina kifuani akiokio yidi mu kutumisa nkengididi wu bimvuka kadia yitu va kimueka. Phila yinkaka yidi mu kubuela mioku kisalu ki kusamuna mu sabala yi kinzenza. Yaya Leslie tuma tubila kumbusa wuvutula matondo mu kutuba: “Yisambila kuidi Yave muingi kakeba zitsatu ziawu.” Nandi wubue tuba. “Minu ayi nnuni’ama mvandi tuba sonikina minkanda ayi tuba zabikisa lusadusu ba tuvana.” Tebuka moyo ti minkengididi mi bimvuka, bamviokilanga mu bikaku ayi bambanga bavonga dedi befu. Khumbu zinkaka bamviokilanga mu mambu ma kuba kuazulanga dedi, bimbevu ayi kiunda. Ḿba mambu ma luzolo wuba kamba voti mua nkhailu wuba vana, wulenda ba mvutu wu nsambu’awu!—Zinga. 12:25.
BEFU TUNTOMBA “MINKHAILU MI BATU”
16. Dedi bummonisina Zingana 3:27, biuvu mbi zikhomba zi babakala bafueti kukivana?
16 Mu nza yimvimba, vantombulu zikhomba ziwombo zi babakala muingi kuba “minkhailu mi batu.” Boti widi khomba wubotama wulenda kukivana muingi ‘kusadisa’? (Tanga Zingana 3:27.) Ngie widi phuila yi kuba nsadisi wu bakulutu ba kimvuka? Ngie wulenda kuyivana muingi wukeba zitsatu zi zikhomba ziaku mu kuba nkulutu wu kimvuka? Ngie widi wukubama muingi kubalula mua mambu mantombulu muingi wuwesa nkanda wu kukota mu kikola ki Minsamuni mi Kintinu? Kikola akiokio kiala kusadisa wuba wukubama muingi Yesu kaluta ku kusadila. Ngie kuyindula ti wisi ko wufuana, sambila kuidi Yave. Dinda phevi’andi yinlongo, muingi yi kusadisa kununga kioso kua kiyeku kakuvana.—Luk. 11:13; Mav. 20:28.
17. Mbi “minkhailu mi batu” mimmonisa matedi Ntinu’itu Yesu?
17 Kisalu kiwombo “minkhailu mi batu” Yesu kasola bamvanganga, kidi kivisa kimmonisa ti nandi wu tutuadisanga mu bilumbu abibi bitsuka. (Mat. 28:20) Tumvutulanga matondo mu kubaka Ntinu widi beni luzolo ayi kukaba, zabizi mambu tuntomba ayi wutuvana zikhomba zi babakala muingi kutu sadisa. Diawu tomba ziphila wulenda tondila kisalu kiwombo zikhomba aziozio bamvanganga. Ayi tatamana kutonda Yave widi tho yi “Nkhailu woso wumboti ayi wuvedila.”—Tia. 1:17.
NKUNGA 99 Bivevi na Bivevi bi Zikhomba
a Bakulutu ba kimvuka badi mu Dingumba di Ntuadisi, minsadisi miawu, zikhomba badi mu Dingumba di Filiali ayi baboso bankaka badi biyeku, badi “minkhailu mi batu.”
b Bavingisa mazina mankaka.
c Muingi wubuela zaba buidi wulenda bela nsadisi wu bakulutu ba kimvuka voti nkulutu wu kimvuka, tala malongi manlanda “Zikhomba zi Babakala—Muidi mu Kuvanga Mongolo Muingi Muba Minsadisi mi Bakulutu ba Kimvuka?” ayi “Zikhomba zi Babakala—Muidi mu Kuvanga Mangolo Muingi Muba Bakulutu ba Kimvuka?” mu Kibanga ki Nsungi Ngonda Kumi Mueka 2024.
