Kheti bobo, Yave wuntomba tutatamana kuvibidila nati thangu’andi yala fuana. Kibila mbi nandi kantombila befu tuvibidila? Mbi bilenda kutusadisa kuba mayangi bo tumvingila kilumbu kiandi?

KIBILA MBI YAVE KANTOMBILA TUVIBIDILA?

Kibibila kintuba: “Yave wukhidi vibidila muingi kulu monisa mamboti ayi mvandi wala telama muingi kulu monisa kiadi. Kibila Yave widi Nzambi yi busonga. Mayangi kuidi baboso bantulanga kivuvu mu nandi.” (Yesa. 30:18) Mambu amomo, Yesaya wusonikina mawu, kuidi basi Yuda baba ntu ngolo. (Yesa. 30:1) Vayi, bankaka mu bawu, baba bakuikama ayi mambu amomo maba vana kivuvu. Bobuawu mvandi, mambu amomo malenda vana kivuvu kuidi bisadi bikuikama bi Yave bubu.

Tufueti vibidila, kibila Yave mvandi wumvibidilanga. Nandi wutsikika thangu kala tuala tsukulu yi nza ayiyi, ayi kemu kutemina kilumbu ayi thangu yifuana. (Matai 24:36) Mu thangu beni, befu boso tuala mona bivisa ti mambu Satana ayi baboso ba kumbuelanga mioku bamvuninanga Yave, make ma luvunu. Ayi nandi wala tulula Satana ayi baboso ba kumbuelanga mioku, vayi wala “mona kiadi [bisadi] biandi.”

Yave kasimmanisa ko ziphasi tumviokila. Vayi nandi wutu kindisa ti, tulenda ba mayangi bo tumvibidila mu nandi. Dedi bo Yesaya katubila, tulenda ba mu mayangi bo tuntemina diambu dimboti dinkuiza. (Yesa. 30:18) a Buidi tulenda bakila mayangi? Mona mambu manna malenda tusadisa.

BUIDI TULENDA BELA MAYANGI BO TUMVINGILA?

Sikika mayindu mu mambu mamboti. Ntinu Davidi wuviokila mu mambu mawombu mambi, mu luzingu luandi. (Minku. 37:35) Kheti bobo, nandi wusonika: ‘Vuena sui vantuala Yave ayi telimina mu mvimbudulu. Bika kumona nsoki batu bambaka kimvuama mu zinzila ziawu.’ (Minku. 37:7) Davidi wusadila mambu amomo katuba, bo kasikika thalu mu kivuvu ki luvulubukusu.  Mvandi waba tebukilanga moyo, lusakumunu Yave kaba kumvananga. (Minku. 40:5) Befu kusikika thalu mu mambu mamboti, kubika mu mambu mambi, tualasa bako kiunda mu mambu mambi mammonika mu nza. Vayi tuala luta vibidila mu Yave.

Sadila thangu’aku mu kuzitisa Yave. Davidi wukamba Yave mu buku yi Minkunga 71 bo katuba: ‘Vayi minu yala tatamana kukutemina, yinkuiza kuzitisanga khumbu ziwombo.’ (Minku. 71:14) Buidi nandi kaba zitisilanga Yave? Mu kukamba bankaka matedi Yave ayi mu kuyola minkunga. (Minku. 71:​16, 23) Dedi Davidi, mvitu tulenda baka mayangi bo tumvibidila mu Yave. Tunzitisanga Yave, mu kisalu ki kusamuna, mu masolu tumbanga ayi mu kuyola minkunga. Diawu mu khumbu wala bue kuimbila minkunga mi Kintinu, botula thangu muingi wuyindula mu mambu bantuba mu nkunga beni.

Vitika khindusulu kuidi zikhomba ziaku mu kimvuka. Bo Davidi kaviokila mu mambu maphasi, nandi wukamba Yave: ‘Yinkuiza kuzitisa vantuala bisadi biaku bikuikama. Kibila widi nkua mamboti.’ (Minku. 52:9) Befu mvitu tulenda baka khindusulu yimfuminanga kuidi zikhomba zitu zi kiphevi kubika to mu zikhutukunu voti mu kisalu ki kusamuna, vayi mvandi bo tumviokisa yawu thangu va kimueka.—Loma 1:​11, 12.

Kindisa kivuvu kiaku. Minkunga 62:5 wuntuba: ‘Mu Yave to yimvibidilanga, kibila kivuvu kiama mu nandi kidi.’ Kuba kivuvu kikinda, kunsundula mvandi kuba lufiatu mu mambu tuntemina. Ayi nkinza beni kuvanga mawu, muingi tutatamana kukindama kheti tsukulu nza ayiyi, yisinkuinza ko mu thangu tumvingila. Befu tufueti ba lufiatu ti zikhanu zi Yave ziala salama kheti zimmonikina ti zisi nsalama ko. Tulenda kindisa kivuvu kitu mu kulongukanga Kibibila. Ayi kulandakana zimbikudulu zidi muawu, muingi kumona nguizani ziawu zidi na mambu matedi naveka Yave. (Minku. 1:​2, 3) Mvandi, tufueti tatamana “kudindanga phevi yinlongu mu nsambu;” muingi tutatamana kuba yandi kikundi kimboti ayi bo tuntemina lukanu lutedi luzingu lu mvu ka mvu kusalama.—Yuda 20, 21.

Dedi Ntinu Davidi, tufueti ba lufiatu ti Yave wumvuanga nkinza batu bamvibidilanga mu nandi. Ayi nandi, wu kuba monisanga luzolo luandi lukuikama. (Minku. 33:​18, 22) Diawu, tatamana kuvibidila mu Yave, mu kusikika mayindu maku mu mambu mamboti, mu kunzitisanga, mu kuvitikanga khindusulu yi zikhomba ayi mu kutatamana kukindisa kivuvu kiaku.