Minu yibutukila ku Canada ku divula bankolukanga Kifalasi. Tat’ami Louis ayi ngudi’ami Zélia, bandionzudila mu luzolo. Tat’ami kabasa zolanga ko beni kukoluka, vayi waba tianga beni kutanga zibuku. Minu yaba tianga kusonika ayi yaba tombanga kuba ntiamuni wu zitsangu.

Bo yiba 12 di mimvu, dibakala dimueka waba salanga na tat’ama baba tedilanga Rodolphe Soucy ayi nkundi’andi, bayiza ku nzo’itu. Bawu baba Zimbangi zi Yave. Minu yisa zaba ko mambu mawombo matedi Zimbangi zi Yave ayi yabasa vuanga ko nkinza kuzaba mawu. Vayi minu ayi matata mami, tuyituka beni mu phila bawu baba sadila Kibibila muingi kuvutula mimvutu mi biuvu tuba vana. Diawu tukikinina batulonga mambu matedi Kibibila.

Mu thangu beni, minu yaba longukilanga mu kikola kimueka ki kinganga ki católica (Catholique). Thangu zinkaka, minu yaba kambanga baba kotanga yama kikola mambu yaba longuka mu ndongukulu’ama yi Kibibila. Bo minlongisi mi kikola ayi zimfumu zi kinkanga ki católica bayiza bakula mawu, Bawu bathumbudila mu kukhambu sadila Kibibila ayi batuba ti minu yitona kuba mambayisa. Kheti diba diambu diphasi, vayi yitadila diawu buka lusakumunu, kibila buawu yivisila ti mambu baba tulonganga kuna matedi Kibibila, masa ba ko nguizani na kiedika yilonguka. Yivisa ti yifueti botuka kuna ayi mu lusalusu lu matata mami yiyenda kikola kinkaka.

Yitatamana kulonguka Kibibila, vayi yisa fika konzuka ko mu kiphevi, kibila yiba beni boma bu kusamuna nzo ka nzo. Kinganga ki católica  kiba beni kithuadi na Mintinu mi Quebec ayi kiawu kiba beni kithatu mu kisalu kitu ki kusamuna. Maurice Duplessis, wumueka mu zimfumu zi luyalu ku Quebec, wuba beni kithuadi na kinganga ki católica. Ayi mu lusadusu luandi, batu baba tulendanga, ba tuvangila mambu mawombo maphasi. Diawu, tuaba tombilanga beni kuba kibakala muingi kusamuna mu thangu beni.

Vayi khomba mueka baba tedilanga John Rae, wuba mu kikola 9 ki Ngiliadi, nandi wutsadisa kununga boma yiba. Kheti yaya John wuba nzayilu yiwombo, vayi nandi waba kukikululanga ayi waba dindanga lusalusu lu bankaka. Kheti kabasa kutsembanga ko beni, vayi yilonguka beni mu kifuani kiandi kimboti. John kasa zabanga ko kukoluka buboti Kifalasi, diawu minu yaba basikilanga beni yandi mu kisalu ki kusamuna ayi yaba kunlongisanga mbembo beni. Mimvu yiviokisa yandi, mitsadisa kubaka makani mu ndionzukulu’ami yi kiphevi. Diawu, yiyiza botama mu kilumbu 26 ngonda Yintanu, mvu 1951.

Bawombo mu kimvuka kitu ku Quebec, baba mintuami ntuala. Kifuani kiawu kimboti, kitsadisa mvami kuba ntuami ntuala. Bo tukhambu ba nsua wu kusadila bilongulu bitu mu kisalu ki kusamuna, diawu tuaba sadilanga to Kibibila bo tuaba longanga nzo ka nzo. Diawu minu yivanga beni mangolo ma kulunda matangu ma Kibibila mu kilunzi muingi yibaka bu kuvanina kimbangi. Vayi kheti bobo, batu bawombo babasa kikininanga ko kutanga Kibibila, boti kiawu kisi ko kidimbu kimmonisa nsua wu zimfumu zi kinganga ki católica (catholique).

Mu mvu 1952, minu yikuela na khomba mueka wukuikama baba tedilanga Simone Patry. Muna mvu beni, befu tuyenda kuezingila ku Montereal. Ayi mu mvu wulanda, Yave wutu sakumuna ayi tubuta muana wunkieto tuvana dizina di Lise. Kheti minu yibika kubue ba ntuami ntuala, vayi minu ayi nkazi’ami tuvanga mangolo muingi kuba luzingu lukhambu kikhafi. Mawu masadisa dikanda ditu kubuela kukivana muingi kusadisa kimvuka kitu.

Bo vavioka kumi di mimvu, minu yaba tomba kubue vutuka mu kisalu ki ntuami ntuala. Kibila mbi? Kibila mu mvu 1962, bathumisa ku beteli yi Canada, muingi kukota kikola ki bakulutu ba kimvuka kiaba dukisanga ngonda yimueka. Bo yituka ku beteli, bathula kivinga kimueka na khomba yinkaka wuyiza mvandi mu kikola beni, bantedilanga Camille Ouellette. Minu yiyituka beni mu kifuza kaba mu kisalu ki kusamuna, kheti mu kuba mfumu dikanda. Mu thangu beni, diba diambu diphasi kumona ku Quebec  mfumu dikanda widi ntuami ntuala. Kheti bobo, mawu makani Camille kaba. Thangu tuaba viokisanga va kimueka, nandi wukhindisa muingi yiyindula matedi kuvutuka mu kisalu ki ntuami ntuala. Diawu yibakila makani ma kuvutuka. Kheti bawombo baba kuthubilanga bubi mu makani yibaka, vayi minu yisa vutuka mbusa ko, kibila minu yivisa ti yilenda bue ba ntuami ntuala. Ayi minu yiba lufiatu ti Yave wunkuiza sakumuna makani mami ayi mangolo yiba vanga muingi kubuela vanga kisalu kiandi.

Mu mvu 1964, minu ayi nkazi’ama, ba tufila mu kisalu ki mintuami ntuala mifilu ku Quebec, divula tubutukila. Tusadila kuna mu mimvu miwombo. Kheti kisalu ki kusamuna kisa bue ba ko beni phasi dedi mu mimvu mivioka, vayi kuba mvandi batu batatamana kutulenda.

Kilumbu kimueka yaba samuna mu nzo ka nzo ku Sainte-Marie, divula difikama na Quebec, disodi dimueka dimbuila ayi wundata mu buloku. Vayi, bo bandata kuidi mfundisi wumueka baba tedilanga Baillargeon wuba kizizi ki tsisi, nandi wundiuvula: “Nani wunkuiza ba mvual’ama ku nzo lufundusu?”. Bo yinkamba ti mvual’ama wunkuiza ba Glen How, a wumueka mu Zimbangi zi Yave, wuba mvuala wuzabakana beni, mu boma nandi wukhamba: “Awowo ndamba, sola wunkaka!” Kibila khomba Glen How, wuba wuzabakana beni mu kusadisa Zimbangi zi Yave kununga khumbu ziwombo ku nzo lufundusu. Bo vavioka mua thangu, zimfumu beni zi lufundusu baveka bakhamba ti basinkuiza bue tsambisa ko, kibila maba mambu ma luvunu baba kamba.

Mu kibila ki kithatu ki mintinu mi Quebec, diba diambu diphasi kubaka kibuangu kimboti ki kufutila muingi kuvangila zikhutukunu. Diawu mua kimvuka kitu, basadila kibuangu banlundilanga makalu muingi kuvangila zikhutukunu. Ayi mu thangu kiozi, befu tuaba sadilanga kisengu kintulanga lundundungu lu mbazu mu nzo. Zikhomba baba zungidilanga kisengu beni ava lukutukunu lutona, muingi kukindasana mu masolo mamboti.

Didi diambu dimboti kumona buidi kisalu kitu kima konzukila akuku. Mu mvu 1960, kuba to mua bimvuka ku Quebec, ku divula di Côte-Nord ayi ku Gaspé divula diba va ndeko ḿbu. Vayi bubu, tueka bizunga biwombo ayi zikhomba bamana kutakana mu Zinzo zi Kintinu zidi beni kitoko.

Minu ayi Simone ba tutumisa mu kisalu ki kukengidila bimvuka mu mvu 1970. Tutona kusala kisalu ki kukindisa minkengididi mi bimvuka mu mvu 1973. Mu thangu beni, minu yilonguka beni mu kifuani ki zikhomba zinkaka baba bapisuka mu kisalu beni. Buka yaya Laurier Saumur b ayi David Splane, c mvawu baba salanga mu kisalu ki kukengidila bimvuka. Dedi, ku tsuka zikhutukunu zinneni zi divula, minu ayi yaya David, tuaba vanasananga malongi mu matedi buidi tulenda luta pisukila mu kuvanga malongi.  Yintebuka moyo kilumbu kimueka yaya David kakhamba: “Léonce yibe zola beni dilongi di tsuka ngie bevanga. Vayi minu yilenda vanga malongi matatu mu kusadila mambu betuba!” Kibila mbi kakhambila mawu? Kibila minu yiba kifu ki kutubila mambu mawombo makhambulu beni nkinza mu dilongi yimvanga.

Bosi, yiyiza tambula kiyeku ki kukindisa minkengididi mi bimvuka. Vayi bo yiba beni wuzabakana ku divula di Quebec, diawu minsamuni miaba kundindanga beni muingi yibasika yawu mu kisalu ki kusamuna, kheti mu kuzaba ti kibila yibe kuendila kuna muingi kukindisa nkengidi’awu wu bimvuka. Ayi mu kibila beni, yabasa viokisanga ko beni thangu na minkengididi mi bimvuka. Diawu kilumbu kinkaka, nkengididi wumueka wu bimvuka wukhamba mu luzolo: “Buboti beni kuzaba ti ngie wunzolanga beni kuviokisa thangu na zikhomba. Vayi bika kuzimbakana ti ayiyi yidi sabal’ami. Minu mvami khindusulu yintomba.” Tsembolo ayoyi, yitsadisa kumona ti yifueti tsikika mayindu mu kiyeku kiama.

Kiadi ayi kiunda kuzaba ti mu mvu 1976 nkazi’ama Simone wuyiza bua kubela ayi wufua. Nandi wuba luzolo lukuikama ayi wuba kukivananga beni mu kisalu ki Yave. Mambu amomo, mawu mansadisa kuba nsadisi wumboti va khonzo’ami. Kutsikika mayindu mami mu kisalu ki kusamuna, mawa matsadisa kununga kiunda yiba ayi yintondanga beni Yave mu luzolo kambonisina mu thangu beni yi ziphasi. Buviokila thangu, yiyiza kuela Carolyn. Nandi wuba ntuami ntuala ayi wuba beni kifuza mu kisalu ki kusamuna. Kheti waba kolukanga kingelesu vayi wuyiza sadila ku Quebec divula diba beni tsatu yi minsamuni. Carolyn wunzolanga batu ayi wumvuanga beni nkinza bo badi mu kiunda. Nandi wutsadisa beni mu kiyeku yitambula ki kukengidila bimvuka.

Mu ngonda Yitheti mu mvu 1978, baphana kiyeku ki kuba nlongisi mu kikola kitheti ki mintuami ntuala ku Quebec. Yiba beni mu boma, kibila yawu khumbu yitheti yivanga mawu. Kheti minu yiba nlongisi, vayi yiluta longuka mambu mawombo kuidi mintuami ntuala mipisuka batumisa mu kikola beni.

 Ayi mu mvu beni, tuyiza ba lukutukunu lunneni lu mavula luba ntu diambu “Kiminu Kinnungisanga” luvangimina ku Montreal ayi tuyamba zikhomba bafumina mu zitsi zinkaka. Nati bubu, luawu lukutukunu luluta ba lunneni luvangama ku Quebec, kibila kuba kuvioka 80 di bivevi di batu. Baphana kiyeku ki kusadila mu Dingumba Dimvananga Zitsangu bo lukutukunu lu mavula lumvangama. Yiyoluka na mintiamuni miwombo mi zitsangu mu kuvioka 20 di bilokolo ayi yiba beni mayangi mu kumona mambu mamboti bawu basonika matedi Zimbangi zi Yave. Bukiedika, lukutukunu beni lusadisa kuvana kimbangi kuidi batu bawombo.

Tona yibotama, minu yiba sadilanga to mu mavula bankolukanga kifalasi. Vayi mu mvu 1996, mambu mayiza baluka bo yitambula kiyeku ki kusadila ku Toronto, divula bankolukanga kingelesu. Minu yabasa zabanga ko kukoluka buboti kingelesu, diawu yisa ba ko lufiatu ti yilenda nunga kuvanga malongi ku kimvuka. Vayi yaba sambidilanga beni ayi yibuela fiatila kuidi Yave.

Carolyn wuba kundongisanga mu mvibudulu ayi wutsadisa kuba lufiatu ti yilenda nunga kukoluka kingelesu. Mvandi zikhomba baba kukhindisanga ayi baba kutsadisanga. Tuyiza ba bakundi bawombo ku Toronto. Bubu, yilenda tuba ti mimvu mimiodi tusadila kuna miba mi mayangi beni.

Kheti yaba banga beni kikhafi mu sabala tuaba vangilanga lukutukunu lu kizunga, vayi yaba botulanga thangu mu kintanu va masika muingi kudukisa kheti kilokolo kimueka mu kisalu ki kusamuna mu nzo ka nzo. Bankaka babasa visanga ko kibila mbi yaba basikilanga mu kisalu ki kusamuna mu sabala yi lukutukunu lu kizunga. Kibila minu yivisa ti kisalu ki kusamuna kiaba kuphananga beni mayangi. Ayi nati bubu, bo yidi mu kisalu ki kusamuna, buawu yinluta banga mu mayangi.

Mu mvu 1998, minu ayi carolyn tutambula kiyeku ki kusala mu kisalu ki mintuami ntuala mifilu ku Montreal. Mu mimvu miwombo kiyeku kiama kiba, kuvana zithuadusulu kuidi zikhomba bankuiza vana kimbangi kuidi baboso ayi kuvana zitsangu zitedi Zimbangi zi Yave kuidi mintiamuni mi zitsangu zitsi. Bubu, minu ayi Carolyn tunzolanga beni kuvana kimbangi kuidi batu bafumina mu zitsi zinkaka badi phuila yi kubuela longuka Kibibila.

Bo yinyindulanga 68 di mimvu yeka mu kisalu ki Yave, yimmonanga ti lusakumunu luwombo yibaka. Dedi, yiyiza zola beni kisalu ki kisamuna ayi mvandi yinunga kusadisa batu bawombo kuzaba kiedika. Mambu amomo, mathuadisa beni mayangi. Bo batekulu bama bayonzuka, muan’ama Lise ayi nnuni’andi bayiza ba mintuami ntuala. Yimbanga beni mu mayangi kumona kifuza kiandi mu kisalu ki kusamuna. Yintondanga beni zikhomba mu kifuani kiawu kimboti, mu malongi baphana, mu kutsadisa kukonzuka mu kiphevi ayi kukieba biyeku yitambula. Yivisa ti muingi tutatamana bakuikama mu biyeku tuntambulanga, tufueti fiatila mu phevi yinlongo yi Yave. (Minkunga 51:11) Minu yimvutulanga beni matondo kuidi Yave mu luaku kaphana lu kuzitisa dizina diandi!—Minkunga 54:6.