DILONGI 6
Tat’itu, Yave, Wutuzolanga Beni
“Tala phila mufueti sambidilanga: ‘Tat’itu widi ku diyilu.’’—MATAI 6:9.
NKUNGA 135 “Ba Nduenga Muan’ami”
MAMBU TUANLONGUKA a
1. Mu thangu yikhulu ku Pelesia, mambu mbi maba monikanga?
YINDULABU mambu amama maba monikanga mu thangu yikhulu ku tsi Pelesia ku divula di Susani ntinu kaba kalanga. Ngie kukuenda va ntuala ntinu muingi kukoluka yandi, boti nandi kasa kuvana ko nsua, bafueti kuvonda kheti diambu dinkinza bekuendila kuna muingi kuzabikisa ntinu.—Esteli 4:11.
2. Mbi bimmonisa ti Yave kasi ko buka ntinu wu Pelesia?
2 Vayi tunkuangalalanga beni kuzaba ti Yave kasi ko buka ntinu wu Pelesia! Yave nandi ntinu wulutidi zangama mu nza, vayi kheti bobo tulenda koluka yandi yosokua thangu. Ayi nandi kasintomba ko befu tuba boma bu kuvanga mawu. Kheti nandi widi Mvangi Wilutidi Zangama, Nkua Ngolo Zioso, Mfumu Yilutidi Zangama, Yave wutu kindisa tuntedila “Tata” kikuma kimmonisa luzolo. (Matai 6:9) Bukiedika, mayangi beni kuzaba ti Yave wuntomba befu tuba bakundi bandi!
3. Kibila mbi tulenda tedila Yave “Tata” ayi mbi tunkuiza mona mu dilongi adidi?
3 Befu tulenda tedila Yave “Tata,” kibila nandi tho yi luzingu luitu. (Minkunga 36:9) Bo Yave kadi Tata’itu, befu tuidi nsua wu kuntumukina. Befu kuvanga mambu nandi katu tuma, tuala tambula lusakumunu lu kuzinga mvu ka mvu. (Ebeleo 12:9) Vayi kheti bubu, kutumamana Nzambi kutu tuadisanga lusakumunu luwombo. Mu dilongi adidi, tunkuiza mona buidi Yave kammonisinanga ti widi tata yi luzolo ayi kibila mbi tulenda bela lufiatu ti nandi kalasa tukuekula ko. Vayi theti, tuemmona bivisa bimmonisa ti Tat’itu wutuzolanga beni ayi tidi kutu sadisa.
YAVE WIDI TATA WUTUZOLANGA BENI
Yave tidi kutu fikama dedi bo tata kamfikiminanga muan’andi (Tala lutangu 4)
4. Kibila mbi batu bawombo bammuenanga phasi kutadila Nzambi banga Tata?
4 Wummonanga phasi kutadila Yave buka Tat’aku? Batu bawombo banyindulanga ti basi ko luvalu va meso ma Yave, kibila nandi lutidi zangama. Diawu bammuenanga beni phasi kukikinina ti Nzambi Nkua Ngolo Zioso, kalenda bavua nkinza. Vayi, buawu Tat’itu yi luzolo kanyindudilanga? Nandi wutuvana luzingu ayi tidi tuba bakundi bandi. Mvuala Polo wukindisa diyindu adiodi kuidi batu baba kunkuwa ku Atene ayi wubuela tuba ti Yave “kasi ko thama kuidi kadika mutu.” (Mavanga 17:24-29) Yave wuntomba tumfikama dedi bo muana kamfikiminanga tat’andi yi luzolo.
5. Mbi tulenda longuka mu kifuani ki khomba mueka yinkieto?
5 Batu bankaka bammonanga phasi kutadila Yave buka Tata, kibila basa tambula ko luzolo lu tata wubabuta. Tala mambu matuba khomb’itu yinkieto: “Tat’ama kabasa tuvuanga ko nkinza. Bo yitona kulonguka Kibibila, yimona beni phasi kukikinina ti Yave widi luzolo mu minu. Vayi, bo yiyiza kunzaba buboti mayindu mami mabaluka.” Mvaku, wummonga phasi kufikama Yave? Boti buawu, ba lufiatu ti Yave widi Tata yilutidi mu baboso.
6. Dedi buntubila Matai 11:27, buidi Yave katu sadisilanga kuntadila Tata?
6 Mu kubika mambu Yesu katuba ayi kavanga mu kibibila, yidi phila Yave kammonisinanga ti widi Tata yi luzolo. (Tanga Matai 11:27.) Yesu wulandakana buboti kifuani ki Tat’andi, diawu katubila: “Woso wumbueni, mueni Tata.” (Yoane 14:9) Khumbu ziwombo Yesu kamonisina ti Yave widi Tata yi luzolo. Buka, mu zibuku zinna zintubila luzingu luandi, Yesu wusadila kikuma “Tata” nduka 165 di zikhumbu muingi kutubila matedi Yave. Vayi, kibila mbi Yesu katubila beni matedi Yave? Kibila nandi waba tomba batu baba lufiatu ti Yave widi Tata yi luzolo.—Yoane 17:25, 26.
7. Mbi tube longuka matedi Yave mu phila nandi kakiebila Muan’andi?
7 Tulenda longuka mambu mawombo matedi Yave, mu kutadila phila nandi kakiebila Muan’andi Yesu. Yave kabasa kuwanga ko to minsambu mi Yesu vayi mvandi waba mitambudilanga. (Yoane 11:41, 42) Kheti mu mambu moso maphasi kaviokila, Yesu waba monanga luzolo ayi lusalusu lu Tat’andi.—Luka 22:42, 43.
8. Buidi Yave kakiebila Yesu bo kaba va ntoto?
8 Yesu wuzaba ti Yave nandi tho yi luzingu diawu muingi katatamanana kuzinga, vaba tombulu lusalusu lu Yave. Yesu wutuba: “Ndilembo zingi mu diambu di Tata.” (Yoane 6:57) Yesu wuba beni lufiatu kuidi Tat’andi, diawu Yave kaba kiebilanga zitsatu ziandi zi kinsuni. Ayi dilutidi nkinza, Yave waba kiebanga zitsatu zi kiphevi zi Yesu.—Matai 4:4.
9. Buidi Yave kamonisina ti wunzolanga Yesu?
9 Yave wusadisa Yesu kuba lufiatu ti nandi wuba yandi muingi kunsadisa, kibila nandi widi tata yi luzolo. (Matai 26:53; Yoane 8:16) Kheti Yave kasa botula ko ziphasi zioso Yesu kamonikina, vayi nandi wunsadisa kununga ziawu. Yesu wuba lufiatu ti, zioso kua ziphasi kalenda monikina, zialasa kadidila ko. (Ebeleo 12:2) Yave wumonisa ti wunzolanga Yesu mu kunkuwa, mu kukieba zitsatu ziandi, mu kunkubika ayi mu kunsadisa. (Yoane 5:20; 8:28) Tuemmona buidi Tat’itu yi luzolo katu kiebilanga dedi bo kakiebila Yesu.
BUIDI YAVE KAMMONISINANGA TI WUTU ZOLANGA
Tata wummonisanga luzolo mu bana bandi mu (1) kuba kuwa, (2) kukieba zitsatu ziawu, (3) kuba kubika, ayi (4) kuba kieba. Tat’itu Yave wunkiebanga zitsatu zitu mu ziphila ziwombo (Tala bitini bi matangu 10-15) b
10. Dedi buntubila Minkunga 66:19, 20, buidi Yave kammonisanga ti wukutuzolanga?
10 Yave wunkuwanga minsambu mitu. (Tanga Minkunga 66:19, 20.) Yave kasa tula ko ndilu mu minsambu tufueti vanga, vayi nandi wutu kindisanga muingi tutatamana kusambila. (1 Tesalonika 5:17) Mu lukinzu tulenda fikama Nzambi, yosokua thangu voti kioso kibuangu tuidi. Yave widi wukubama muingi kukuwa minsambu mitu. Bo tummona Yave kutambudila minsambu mitu, tunluta kumfikamanga. Nsoniki wumueka wu minkunga wutuba: “Ndieti zola Yave bila niandi weti wa mbembu’ama.”—Minkunga 116:1.
11. Kibila mbi tufueti bela mvibudulu mu matedi minsambu?
11 Tat’itu kayuwanga ko to minsambu mitu, vayi mvandi wuntambudilanga miawu. Mvuala Yoane wutuba: “Enati tulombidi diambu dimosi boso buididi luzolo luandi, niandi wukutuwilanga.” (1 Yoane 5:14, 15) Yave zebi malutidi mboti mu befu. Diawu, khumbu zinkaka mvutu’andi wala banga “ndamba” voti wala tomba tuvingila mua nkadu muingi katuvana biuma tuntomba.—2 Kolinto 12:7-9.
12-13. Mu ziphila mbi Tat’itu yi diyilu katu kiebilanga?
12 Yave wunkiebanga zitsatu zitu. Yave widi kifuani kimboti kuidi matata, kibila nandi wunkiebanga zitsatu zi kinsuni zi bana bandi. (1 Timoteo 5:8) Yave kasintomba ko tutatubuka mu matedi bi kudia, bi kuvuata ayi va kukala. (Matai 6:32, 33; 7:11) Bo kadi Tata yi luzolo, Yave mvandi wukanikisa kukieba zitsatu zitu zioso mu bilumbu binkuiza.
13 Dilutidi nkinza, Yave wunkiebanga zitsatu zitu zi kiphevi. Mu nzila Kibibila, nandi wutu zabikisa phila mutu mbi kadi ayi mbi katidi kuvanga. Mvandi, wutuzabikisa tsundu yi luzingu luitu ayi matedi bilumbu binkuiza. Muingi kamonisa ti wumvuanga nkinza kadika mutu mu befu, Yave wutu vana luaku lu kunzaba mu kusadila matata mitu voti khomba wunkaka. Ayi nati bubu, tukhidi tambula lusalusu lu bakulutu ba kimvuka ayi lu zikhomba zinkaka bayonzuka mu kiphevi. Mvandi Yave wutu vananga zithuadusulu mu nzila zikhutukunu. Aziozi zidi mua ziphila Yave kammonisinanga ti wutu zolanga buka Tata.—Minkunga 32:8.
14. Kibila mbi Yave katu kubikilanga, ayi buidi kamvangilanga mawu?
14 Yave wutu kubikanga. Befu tuisi ko bavedila buka Yesu. Phila Yave katu kubikilanga yidi mu kutu semba na kumona ti tuidi mu kuvekuka. Kibibila kintuba: ‘Yave wunsembanga mutu wowo nandi kanzolanga.’ (Ebeleo 12:6, 7) Yave wutu sembanga mu ziphila ziwombo. Buka nandi kalenda kutu semba mu kusadila mambu tuntanga mu Kibibila, mu diambu tunkuwa mu lukutukunu voti mu malongi ma bakulutu ba kimvuka. Yosokua phila Yave ka tusembila, nandi wuma vangilanga mu luzolo.—Yelemia 30:11.
15. Buidi Yave ka tukiebilanga?
15 Yave wutu sadisanga bo tumviokila mu ziphasi. Dedi bo tata wu luzolo kansadisilanga muan’andi mu thangu yi ziphasi, Tat’itu yi diyilu wutu vananga mangolo muingi tununga zithotolo. Nandi wunsadilanga phevi’andi yinlongo muingi kutu kieba mu mambu moso malenda bifisa kiphevi kitu. (Luka 11:13) Yave wunkiebanga mvandi mabanza mitu. Buka, nandi wutu vana kivuvu mu bilumbu binkuiza. Kivuvu beni, kitu sadisanga kununga ziphasi. Yindula diambu adidi: Khama ziphasi tumviokila bubu, Yave Tat’itu yi luzolo wunkanikisa kumanisa ziawu. Ziphasi tummona bubu, kuvioka kuandi zimvioka, vayi lusakumunu Yave kala tuvana luala kadidila mu thangu zioso.—2 Kolinto 4:16-18.
TAT’ITU KALASA TUKUEKULA KO
16. Mambu mbi mamonika bo Adami kasumuka?
16 Tulenda mona luzolo Yave kadi mu befu, mu kuyindula mambu nandi kavanga bo Adami kasumuka. Dedi, Adami wuzimbisa luaku lu kuba mu khati dikanda di Yave ayi wuvanga mvandi mawu kuidi nkunu’andi, vayi Yave wuyiza vana lusalusu. (Loma 5:12; 7:14).
17. Bo Adami kasumuka, mbi Yave kavanga?
17 Yave wusemba Adami, vayi wukanikisa kusadisa nkun’andi. Nandi wutuba ti batu ba kuntumukinanga bala vutuka mu khati dikanda diandi. (Ngenesi 3:15; Loma 8:20, 21) Muingi mawu masalama, Yave wufila Muan’andi Yesu muingi kafuila mu kibila kitu. Khudulu yimmonisa kitesu ki luzolo Yave kadi mu befu.—Yoane 3:16.
Boti tube vanga nzimbala vayi tube nyonga mu mawu, tulenda ba lufiatu ti Tat’itu yi luzolo Yave, widi wukubama muingi kubue tutambula (Tala lutangu 18)
18. Kibila mbi tulenda bela lufiatu ti Yave wukutuzolanga, kheti tuidi batu ba masumu?
18 Kheti tuidi batu ba masumu, Yave tidi beni befu tuba mu khati dikanda diandi ayi widi wukubama muingi kutu sadisa. Bukiedika khumbu zinkaka befu tulenda kumfuemisa voti kunlueka ntima, vayi Yave kavonganga ko kutu sadisa. Muingi kumonisa luzolo Yave kadi mu bana bandi, Yesu wuta kinongo ki muana wuzimbala. (Luka 15:11-32) Tata bantubila mu kinongo beni, wuba kivuvu ti muan’andi wunkuiza vutuka. Bo muana kabaka makani ma kuvutuka ku nzo, tata wuntambula mu mayangi. Boti tube vanga nzimbala vayi tube nyonga mu mawu, tulenda ba lufiatu ti Tat’itu wu luzolo Yave, widi wukubama muingi kubue tutambula.
19. Buidi Yave kala manisina ziphasi zioso Adami ka tutuadisila?
19 Tat’itu wala manisa ziphasi zioso Adami katutuadisila. Bo Adami kasumuka, Yave wubaka makani ma kusobula va ntoto 144.000 di batu muingi bayala na Muan’andi Yesu ku diyilu banga mintinu ayi zinganga nzambi. Buawu, Yesu ayi bo bala yala yandi bala sadisa batu bakuikama kuba bavedila muingi bakota mu nza yimona. Bo batu baso bakuikama bala nunga kuvioka mu thotolo yitsuka, Nzambi wala bavana luaku lu kuzinga mvu ka mvu. Bosi Tat’itu wala ba mu mayangi ma kumona ntoto wuwala mu bana bandi bavedila. Bukiedika, yawu yala ba thangu yi mayangi mawombo!
20. Mu ziphila mbi Yave kammonisinanga ti wutuzolanga? Ayi mbi tuala longuka mu dilongi dinkuiza?
20 Bukiedika, Yave wutu vananga bivisa biwombo bimmonisa ti nandi wutu zolanga beni. Yave widi Tata yi luzolo. Nandi wunkuwanga minsambu mitu, wutu kiebanga mu kinsuni ayi mu kiphevi. Mvandi wutu kubikanga ayi wu tusadisanga. Nandi wukanikisa kutu vana lusakumunu luwombo mu bilumbu binkuiza kuntuala. Tumbanga beni mayangi, kuzaba ti Tat’itu Yave wutu zolanga beni ayi wutu kiebanga. Bo tuidi bana bandi, tutidi mvandi kummonisa luzolo! Vayi buidi tulenda vangina mawu? Tunkuiza longuka mawu mu dilongi dinkuiza.
NKUNGA 108 Luzolo lu Kuikama lu Nzambi
a Buboti beni kutadilanga Yave buka Mvang’itu ayi Ntinu Wulutidi Zangama. Vayi mvandi tuidi bibila biwombo muingi kuntadila buka tata yi luzolo. Bibila beni, biawu tuentubila mu dilongi adidi. Mvandi tunkuiza mona, kibila mbi tufueti bela lufiatu ti Yave kalasa tukuekula ko.
b MAMBU MADI MU ZIFIKULA: Zifoto zinna zimmonisa matata ayi bana bawu: Tata wunkuwa buboti mambu muan’andi kakunkamba, Tata wunkieba zitsatu zi muan’andi wu nkieto, Tata widi mu kulongisa muan’andi kuba zikhadulu zimboti, ayi Tata wumbomba muan’andi. Koko ku Yave kuidi ku tsi zifoto muingi kutu tebula moyo ti buka matata amomo, nandi wunkiebanga zitsatu zitu.
