DILONGI 7
Visa Nsiku wu Kimfumu Yave Katsikika
‘Klisto nandi Mfumu wu kimvuka ayi Mvulusi wu Nyitu ayiyi.’ —EFE. 5:23.
NKUNGA 137 Bakietu Bakuikama
MAMBU TUANLONGUKA *
1. Kibila mbi dikanda ditu di kiphevi dididi ndembama ayi kithuadi?
BEFU TUIDI beni mayangi mu kuba mu khati dikabu di Yave. Kibila mbi dikanda ditu di kiphevi dididi ndembama ayi kithuadi? Kibila befu boso tumvanganga mangolo muingi kukinzika batu Yave kavana kimfumu voti biyeku mu kimvuka. Akioki, kidi kimueka mu bibila biwombo befu tuidi. Ayi bo tumvisa buboti mawu, kimvuka kinluta banga kithuadi.
2. Biuvu mbi tunkuiza baka mimvutu mu dilongi adidi?
2 Mu dilongi adidi, tunkuiza tubila matedi kiyeku bakulutu ba kimvuka badi. Ayi mvandi tunkuiza baka mimvutu mi biuvu abibi: Kiyeku mbi zikhomba zi bakieto badi mu kimvuka? Bukiedika ti kadika khomba wu dibakala mu kimvuka widi ntu voti mfumu yi kadika khomba yinkieto mu kimvuka? Bukiedika ti kimfumu bakulutu ba kimvuka badi mu zikhomba, kidi dedi mueka na kio mfumu wu dikanda kadi mu nkazi’andi ayi bana bandi? Vayi theti tuemmona, buidi tufueti tadilanga zikhomba zi bakieto.
BUIDI TUFUETI TADILANGA ZIKHOMBA ZI BAKIETO?
3. Mbi biala tusadisa kuvua nkinza kisalu zikhomba zitu zi bakieto bamvanganga?
3 Tuntondanga beni zikhomba zitu zi bakieto bamvanganga mangolo muingi kukieba makanda mawu, kusamuna zitsangu zimboti ayi kubuela mioko mu kimvuka. Tulenda buela luzolo luitu mu bawu mu kuyindulanga phila Yave ayi Yesu ba kuba tadilanga. Mvandi tuala baka beni ndandu befu kulandakana kifuani ki mvuala Polo mu kutala phila kaba kiebilanga zikhomba zi bakieto.
4. Buidi Kibibila kimmonisina ti phila Yave kantadilanga babakala yidi yidedakana na phila kantadilanga bakieto?
4 Kibibila kimmonisa ti phila Yave kantadilanga babakala yidi dedi mueka na phila nandi kantadilanga bakieto. Dedi, mu sekulu yitheti, Yave wuvana phevi’andi yinlongo kubika to kuidi babakala vayi mvandi kuidi bakieto muingi bayolukila mu zimbembu ziviakana. (Mava. 2:1-4, 15-18) Mvandi, nandi wusola mu phevi yinlongo –bakieto ayi babakala– muingi bayala na Klisto ku diyilu. (Ngala. 3:26-29) Ayi nandi wukanikisa ti babakala ayi bakieto bala zinga mvu ka ku paladizu va ntoto. (Nzai. 7:9, 10, 13-15) Ayi kiyeku ki kusamuna zitsangu zimboti kivanu kuidi babakala ayi bakieto. (Matai 28:19, 20) Dedi, buku yi Mavanga yintuba ti, khomba yimueka yinkieto bantedilanga Prisca ayi nnuni’andi Akila, basudikisa buboti kiedika ki Diambu di Nzambi kuidi Apolo.—Mava. 18:24-26.
5. Mu kumona mambu madi mu Luka 10:38, 39, 42, buidi Yesu kabe tadilanga bakieto?
5 Yesu waba zitisanga ayi waba kinzikanga bakieto. Nandi kasa ba ko dedi mueka na Bafalisi baba lenzanga bakieto, ni kheti kukoluka yawu vantuala bankaka voti kuba longa kiedika ki Diambu di Nzambi. Vayi Yesu waba vananga luaku kuidi bakieto, muingi bawu mvawu baba va kimueka bo kaba longanga minlandikini miandi Diambu di Nzambi. * (Tanga Luka 10:38, 39, 42.) Nandi mvandi waba vananga bakieto luaku lu kudiata yandi bo kabe kuendanga mu mavula mankaka muingi kuelonga. (Luka 8:1-3) Mvandi, Yesu wumonisa ti waba zitisanga bakieto mu kuba vana luaku lu kuzabikisa kuidi bapostolo bandi ti nandi wuvulubuka.—Yoa. 20:16-18.
6. Buidi mvuala Polo kamonisina ti waba kinzikanga bakieto?
6 Mvuala Polo wutebula moyo Timoteo muingi kazitisanga bakieto. Polo wunkamba muingi katadilanga ‘bakieto bayonzuka banga zingudi ayi bakieto badi matoko banga zikhomba.’ (1 Timo. 5:1, 2) Mvuala Polo wuvanga beni mangolo muingi kusadisa Timoteo kuyonzuka mu kiphevi vayi nandi wutuba ti ngudi wu Timoteo ayi khak’andi, bawu batheti banlongisa ‘masonoko manlongo’. (2 Timo. 1:5; 3:14, 15) Bo kasonika nkanda kafila kuidi zikhomba ku Loma, mvuala Polo wufila zimboti kuidi zikhomba zi bakieto mu kutanguna mazina ma kadika mutu mu bawu. Mvuala Polo kasa yunga ko to zikhomba beni vayi mvandi wuba tonda mu kisalu kimboti baba vanga.—Loma 16:1-4, 6, 12; Fili. 4:3.
7. Biuvu mbi tunkuiza baka mimvutu?
7 Dedi bo tuma muena mu matangu mama vioka, vasiko kibila muingi kuyindula ti bakieto basiko beni luvalu dedi babakala. Zikhomba zitu zi bakieto bamvananga lusalusu luwombo mu kimvuka ayi bakulutu ba kimvuka ba kuba tondanga mu mangolo bamvanganga muingi kimvuka kitatamana mu kithuadi ayi ndembama. Vayi vadi mua biuvu tufueti baka mimvutu: Kibila mbi khumbu zinkaka Yave kandindilanga zikhomba zi bakieto bafuka ntu? Befu tuzebi ti zikhomba zi babakala bawu to balenda tambula biyeku bi kuba bakulutu ba kimvuka, voti minsadisi mi bakulutu ba kimvuka. Vayi mawu mansundula ti kadika khomba wu dibakala, widi mfumu yi kadika khomba yinkieto mu kimvuka?
KADIKA KHOMBA WU DIBAKALA WIDI MFUMU YI KADIKA KHOMBA YINKIETO MU KIMVUKA?
8. Dedi bummonisa Efeso 5:23, bukiedika ti kadika khomba wu dibakala widi mfumu yi kadika khomba yinkieto? Sudikisa.
8 Mvutu wukhufi widi ndamba! Khomba wu dibakala kasiko mfumu yi kadika khomba yinkieto mu kimvuka; vayi Klisto nandi mfumu yi befu boso. (Tanga Efeso 5:23.) Vayi va dikuela, nnuni nandi ntu voti mfumu yi nkazi’andi. Muana wu dibakala kasiko mfumu wu mam’andi. (Efe. 6:1, 2) Kiyeku voti kimfumu bakulutu ba kimvuka badi matedi zikhomba zi babakala ayi zi bakieto, kidi ndilu. (1 Tesa. 5:12; Ebe. 13:17) Khomba yinkieto wukhambu kuela ayi wunzinganga naveka, wunkinzikanga tat’andi ayi mam’andi; vayi nandi kasiediko kutsi lutumu lu tat’andi. Vayi dedi babakala boso mu kimvuka, nandi zebi ti mfumu yimueka to kadi–Yesu.
Zikhomba bakhambulu bakuela ayi basiala bezinga ko na matata mawu, badi mu lutumu lu Yesu (Tala lutangu 8)
9. Kibila mbi khumbu zinkaka vantombuluanga muingi zikhomba zi bakieto bafuka ntu?
9 Bukiedika, Yave wuvana zikhomba zi babakala kiyeku ki kutuama ntuala mu kisalu ki Nzambi ayi kulonga mu kimvuka. Ayi kasa vana ko kiawu kuidi bakieto. (1 Timo. 2:12) Kibila mbi? Mu kiokiawu kibila nandi kabiekila Yesu mfumu wu dibakala—muingi kimvuka kitatamana kilulama voti mu kithuadi. Boti khomba yinkieto widi mu kimvuka kikhambulu dibakala dibotama ove mu kibila kinkaka, nandi kalenda vanga biyeku bio babakala to badi nsua wu kuvanga, vayi kafueti fuka ntu. * (1 Koli. 11:4-7) Yave wundinda muingi zikhomba zi bakieto bamvanganga mawu, bika ti muingi bayindulanga ti zikhomba zi babakala baba lutidi. Vayi alolo luidi luaku nandi kaba vana muingi bamonisa lukinzu kuidi zikhomba nandi kavana biyeku mu kimvuka. Buabu, tuembaka mvutu wu kiuvu akiki: Kiyeku ki bakulutu ba kimvuka, kidi dedi mueka na kiyeku ki zimfumu zi makanda?
KIYEKU KI ZIMFUMU ZI MAKANDA AYI BAKULUTU BA KIMVUKA
10. Kibila mbi khumbu zinkaka nkulutu wu kimvuka kalenda yindudila ti disiko diambu dimbi kutsikika zithumu mu kimvuka?
10 Bakulutu ba kimvuka banzolanga Yesu ayi ‘mamemi’ bawu baba vana muingi bakieba. (Yoa. 21:15-17) Khumbu zinkaka, nkulutu wu kimvuka kalenda yindula ti nandi widi buka tata kuidi zikhomba mu kimvuka. Nandi kalenda yindula ti, dedi bo mfumu wu dikanda kadi nsua wu kutsikika zithumu kuidi dikanda diandi, nandi mvandi widi kuandi nsua wu kutsikika zithumu muingi kukieba mamemi ma Nzambi. Ayi zikhomba ziwombo zi babakala ayi zi bakieto bankindisanga bakulutu ba kimvuka kuvanga mawu, mu kuba dindanga muingi baba bakilanga makani mu mambu bamviokila mu luzingu. Vayi bukiedika ti bakulutu ba kimvuka badi kiyeku kimueka na zimfumu zi makanda?
Bakulutu ba kimvuka bankiebanga zitsatu zi kiphevi ayi zitsatu zinkaka zi mamemi ma Yave. Yave wuba vana kiyeku ki kusadisa kimvuka kiandi kitatamana kidiodila (Tala matangu 11-12)
11. Mu phila mbi kiyeku ki bakulutu ba kimvuka kididi kidedakana na kiyeku ki zimfumu zi makanda?
11 Mvuala Polo wutuba ti kiyeku ki zimfumu zi makanda kidi nkadu kidedakana na kiyeku ki bakulutu ba kimvuka. (1 Timo. 3:4, 5) Dedi, Yave kantomba muingi nkazi ayi bana batumukinanga mfumu dikanda. (Kolo. 3:20) Ayi nandi mvandi kantomba muingi zikhomba mu kimvuka batumukinanga bakulutu ba kimvuka. Yave kantomba mvandi muingi bakulutu ba kimvuka ayi zimfumu zi makanda bakiebanga kiphevi ki batu badi kutsi lutumu luawu. Ayi, dedi zimfumu zi makanda, bakulutu ba kimvuka bamvanganga mangolo muingi kusadisa zikhomba bamviokila mu tsatu. (Yako. 2:15-17) Mvandi, Yave kantomba bakulutu ba kimvuka ayi zimfumu zi makanda balonganga zithumu ziandi ayi ‘babika kusabuka ndilu yi mambu madi masonama’ mu Kibibila.—1 Koli. 4:6.
Yave wuvana zimfumu zi makanda kiyeku ki kutuama ntuala va dikanda. Vayi ava babaka moso kuandi makani, bannuni ba luzolo bankolukanga theti na bakazi bawu (Tala lutangu 13)
12-13. Dedi bummonisina Loma 7:2, disuasana mbi didi mu kiyeku ki bakulutu ba kimvuka ayi kiyeku ki zimfumu zi makanda?
12 Vayi vadi mambu madi disuasana mu kiyeku nkulutu wu kimvuka kadi na kiyeku ki mfumu dikanda. Dedi, Yave wuvana kuidi bakulutu ba kimvuka kiyeku ki kuba mimfundusi. Voti wuba vana luaku lu kusemba ayi kusadisa khomba bevola disumu dingolo mu kimvuka. Vayi kasa vana ko kiyeku akiokio kuidi zimfumu zi makanda.—1 Koli. 5:11-13.
13 Mvandi vadi biyeku Yave kavana kuidi zimfumu zi makanda, kakhambu vana kuidi bakulutu ba kimvuka. Dedi, nandi wuvana nsua kuidi zimfumu zi makanda muingi kutsikika zithumu ayi zindilu mu mambu dikanda diandi balenda vanga. (Tanga Loma 7:2.) Mfumu wu dikanda widi nsua wu kutsikika thangu bana bandi bafueti tukila ku nzo. Ayi boti bana bandi basintumukina ko zindilu beni, nandi widi nsua wu kusemba bana bandi. (Efe. 6:1) Vayi ava kutsikika zindilu aziozio, nnuni widi luzolo, wunkolukanga theti na nkazi’andi, kibila bawu babuadi badi “nsuni wumueka.” *—Matai 19:6.
KINZIKA KLISTO NTU WU KIMVUKA
Yesu, mu lutumu lu Yave wumvananga zithuadusulu kuidi kimvuka ki baklisto (Tala lutangu 14)
14. (a) Dedi buntubila Malako 10:45, kibila mbi tulenda tubila ti didi diambu dimboti Yave kavanga mu kusola Yesu muingi kaba ntu wu kimvuka? (b) Kiyeku mbi Dingumba Dintuadisi didi? (Tala quadro yintiba “ Kiyeku ki Dingumba Dintuadisi.”)
14 Mu nzila khudulu, Yave wusumba luzingu lu kadika mutu mu kimvuka, voti lu batu boso mu nza. (Tanga Malako 10:45; Mava. 20:28; 1 Koli. 15:21, 22) Diawu tulenda tuba ti makani mamboti kabaka mu kubieka Yesu ‘ntu wu kimvuka’, kibila nandi wuvana luzingu luandi muingi tuvuka. Diawu Yesu kadidi nsua wu kutsikika zithumu kuidi batu, makanda ayi kimvuka kioso. Ayi mvandi widi nsua wu kutu dinda muingi tutumamana zithumu beni. (Ngala. 6:2) Yesu katsikikanga ko to zithumu muingi befu tutumukina. Vayi nandi wutu dikilanga ayi wumvuanga nkinza kadika mutu mu befu.—Efe. 5:29.
15-16. Mbi ngie belonguka mu mambu yaya Marley ayi yaya Benjamin batuba?
15 Zikhomba zi bakieto bammonisanga ti bankinzikanga Yesu mu kutumukina batu nandi kavana kiyeku ki kuba kieba. Khomba yimueka bantedilanga Marley, wunkalanga ku Estados Unidos wutuba mambu nandi ayi zikhomba ziwombo zi bakieto banyindulanga. Nandi wutuba: “Minu yimvuanga beni nkinza kiyeku yidi, ki kuba nkazi ayi khomba mu kimvuka. Ayi yimvanganga mangolo muingi kukuna zikhadulu zi kutsadisanga kuba mayindu mafuana mu batu Yave kavana biyeku mu kimvuka. Vayi nnuni’ama ayi zikhomba zinkaka zi babakala mu kimvuka, ba kutsadisanga kukuna zikhadulu beni, kibila bawu ba kukhinzikanga ayi bamvuanga nkinza kisalu yimvanganga.”
16 Zikhomba zi babakala, monisanu ti benu lumvisanga kiyeku Yave ka luvana mu kukinzikanga zikhomba zi bakieto. Khomba mueka wunkalanga ku Inglaterra bantedilanga Benjamin, wutuba: “Minu yinlongukanga beni mu mimvutu zikhomba zi bakieto bamvananga mu zikhutukunu, mu phila yimboti bamvangilanga biyeku biawu matedi kisalu ki kusamuna ayi mu phila bambakilanga ndandu mu kisalu beni. Mu minu, kisalu bamvanganga kidi beni luvalu.”
17. Mambu mbi mammonikanga befu kukinzika nsiku wu kimfumu?
17 Bo befu boso,—babakala, bakieto, zimfumu zi makanda ayi bakulutu ba kimvuka—bamvisa ayi bankinzika nsiku wu kimfumu Yave kavana, kimvuka kioso kinkuiza banga ndembama. Ayi malutidi, tumvananga nzitusu kuidi Tat’itu yi luzolo Yave.—Minku. 150:6.
NKUNGA 123 Tumamana mu Lukuikumu Thuadusulu yi Nzambi
^ Lut. 5 Kiyeku mbi zikhomba zi bakieto badi mu kimvuka? Bukiedika ti kadika khomba wu dibakala mu kimvuka widi ntu voti mfumu yi kadika khomba yinkieto mu kimvuka? Kiyeku ki bakulutu ba kimvuka, kidi dedi mueka na kiyeku ki zimfumu zi makanda? Tunkuiza mona buidi Kibibila kilenda kutu sadisila kubakula mimvutu mi biuvu abiobi.
^ Lut. 5 Tala lutangu 6 lu dilongi di Kibanga ki Nsungi ki Ngonda Yivua mvu 2020 didi ntu diambu “Kindisa Zikhomba zi Bakieto mu Kimvuka”.
^ Lut. 9 Tala quadro yintuba: “ Thangu mbi Zikhomba zi Bakieto Bafueti Fukilanga ntu?”
^ Lut. 13 Muingi wuzaba nani widi nsua wu kusola kimvuka mbi dikanda bafueti landikininanga zikhutukunu, tala Kibanga ki Nsungi ki Ngonda Yinana, mvu 2020, tsielu 17-19 mu dilongi didi ntu diambu “Kinzika Kibuangu ki Baboso mu Kimvuka”.
^ Lut. 59 Boti tidi kubuela zaba thangu mbi khomba yinkieto kafueti fukila ntu, tala buku Tatamana mu Luzolo lu Nzambi, tsielu 209-212.
^ Lut. 64 Muingi wubuela zaba kiyeku ki Dingumba Dintuadisi, mona Kibanga ki Nsungi ki kilumbu 15 Ngonda Yisambuadi, mvu 2013 tsielu 20-25.
