Mu mvu 1913 tat’ami, John Mills, wubotama ku divula di Nova Yorque bo kaba 25 di mimvu. Khomba Russell wuvanga dilongi bamvanganga kwidi bambotama. Thangu yilwelu yivyoka, Tat’ami wuyenda ku divula di Trinidad, ku kakwedila na Constance Farmer, khomba mweka yinkyeto widi kifuza mu kisalu ki Yave. Tat’ami wusadisa nkundi’andi William R. Brown kumonisa “Fotodrama da Criação.” Bawu baba vanganga mawu nate bafila Khomba Brown ku África Ocidental mu mvu 1923. Vayi matata mama batatamana ku divula di Trinidad. Bawu baba kivuvu ki kukwenda ku diyilu.

Matata mami baba vwa di bana, mwana wutheti bantedila Rutherford, wuyiza ba ntwadisi wu Associação Torre de Vigia de Bíblias e Tratados. Bo yibutuka mu kilumbu 30, Ngonda Kumi Yimwadi, mvu 1922, baphana dizina di Clayton J. Woodworth, nyamikisi wu A Idade de Ouro (bubu bantedilanga Despertai!). Matata mitu bavanga mamoso mwingi tumanisa kikola kifwana, vayi baluta tukindisa tuba makani ma kiphevi. Mam’ami waba zabanga beni kusadila Kibibila mwingi kutusadisa kumona ti mambu kintuba makyedika. Tat’ami waba zolanga beni kuta binongu bi Kibibila, ayi waba sadilanga nyitu’andi yoso mwingi ziawu ziluta nyikuna mabanza mitu.

Mangolo mawu masa ba ko maphamba. Mu bana batanu ba babakala, babatatu bakota Kikola ki Ngiliadi. Zikhomba zyama zitatu zi bakyeto Priscilla, Dorcas ayi Christine mu mimvu miwombo baba zolanga kwenda ku divula di Trinidad ayi Tobago. Mu nzila malongi ayi kifwani kiawu kimboti, matata mitu ba tubika banga bana ku “nzo Yave.” Khindusulu’awu yitusadisa kutatamana akuku ayi kukonzuka ‘kunganda nzo yi Nzamb’itu.’—Minkunga 92:13.

Ku nzo’itu baba vangilanga beni zikhutukunu zi kubasikila mu kisalu ki kusamuna. Mintwami ntwala baba kutakananga kuna ayi khumbu ziwombo  baba tubanga beni matedi Khomb’itu George Young, mwisi Canada wuba mu kisalu ki misyoni ayi wuba ku divula di Trinidad. Matata mama baba tubila beni matedi Yaya Brown ayi bankaka, mu thangu yinani bawu baba ku África Ocidental. Mambu moso amomo, matsadisa kukota mu kisalu ki thangu ka thangu bo yiba kumi di mimvu.

Mu bilumbu binani, zilevista zitu zyaba tumbudilanga binganga bi luvunu, batu bamvanganga beni lungosu banzolanga zimbongo ayi mangumba ma política. Diawu mu mvu 1936, mfumu mweka yi kinganga wuvukumuna ntinu wu divula di Trinidad mwingi katuyimina kukabula bilongulu bitu byoso. Befu twaba swekanga bilongulu bitu, vayi tutatamana kusadila biawu nate bitona kumana. Twaba dyatanga dimalu ayi mu mimvelu mu kusadila mwa minkanda tuba natinanga mu nyitu. Twaba sadilanga mvandi makalu mantyamunanga mbembu ku divula di Tunapuna, befu twaba longanga nate mu bibwangu bidi kinanu ku divula di Trinidad. Diba dyambu dyaba tutwadisanga mayangi! Mambu amomo ma kiphevi matsadisa kubotama bo yiba 16 di mimvu.

Kyuka kitu va dikanda ayi mambu amomo mamboti maphanga kubaka makani ma kukota mu kisalu ki misyoni. Makani amomo maba yama nate bo yiyenda ku Aruba mu mvu 1944 ayi yiba na Khomba Edmund W. Cummings. Tuyangalala beni kununga kukutikisa kumi di batu mu Mbambukulu Moyo mu mvu 1945. Mu mvu wulanda, kimvuka kimona ku divula di Aruba kiyiza vangama.

Thangu yilwelu yivyoka, minu yivana kimbangi Oris Williams, wuba nkyeto mweka waba salanga yama. Oris wutuba mambu mawombo mwingi kukakidila mambu kalonguka. Vayi mu ndongukulu yi Kibibila, nandi wulonguka kyedika kidi mu Dyambu di Nzambi ayi wuyiza botama mu kilumbu 5, Ngonda Yitheti, mvu 1947. Mu thangu beni, befu tuyizolasana ayi tukwelana. Nandi wutona kusala banga ntwami ntwala mu Ngonda Kumi Yimweka, mvu 1950. Na Oris va khonzo’ami, luzingu lwami lubwela ba lumboti.

Mu mvu 1955 ba tutumisa mwingi tukota Kikola ki Ngiladi. Mwingi kukubama, befu tubika bisalu bitu, tusumbisa nzo’itu ayi byuma binkaka, ayi tubika divula di Aruba. Mu kilumbu 29, Ngonda Yisambwadi, mvu 1956, befu tuba mu kikola 27 ki Ngiliadi ayi ba tufila ku Nigéria.

Bo katala kumbusa, Oris wutuba: Phevi yi Yave yilenda sadisa mutu mwingi kukolama mu luzingu lu misyoni. Nnuni’ami wuba makani ma kuba mu kisalu ki misyoni, vayi minu ndamba. Minu yaba tomba kubaka nzo’ama ayi kukonzula bana. Vayi yibalula mayindu mami bo yivisa ti kisalu ki kusamuna zitsangu zimboti nswalu kidi. Bo tumanisa Kikola ki Ngiladi, minu yiba beni wukubama mwingi kusamuna banga misyoni. Bo tuyenda ku Queen Mary, Yaya Worth Thornton, wuba salanga na Khomba Knorr, wutukamba tuyenda mboti!’ Nandi wutukamba ti tunkwiza sadila ku Beteli. Minu yivumuka nkadu ayi yituba: Oh, Ndamba! Vayi mu thinu minu yibalula makani mami ayi yitona kuzola Beteli, ko yidi biyeku biwombo. Kisalu yiluta zola kidi ki kutambulanga batu bankwiza ku Beteli. Minu yinzolanga beni batu, ayi kisalu akiki ki kutsadisanga kukoluka beni na zikhomba zi Nigéria. Bawombo baba tukanga bavonga, na phwila yi nlangu ayi nzala. Diba dyambu di mayangi kukyeba zitsatu ziawu ayi kuba bomba. Bisalu byoso biba bisalu binlongo kwidi Yave, ayi biawu biphana beni nyenze ayi mayangi.” Bukyedika, biyeku byoso yitambula bitsadisa kukonzuka mu kiphevi..

Mu lukutukunu lumweka lu dikanda ku Trinidad mu mvu 1961, Khomba Brown wutuba mambu mamboti kamonikina ku África. Bosi wutubila ndyonzukulu’itu ku Nigéria. Khomba Brown wumbumbakana mu luzolo ayi wukamba Tat’ama: “Johnny, ngye wusavanga ko mawu ku África, vayi Woodworth wuvanga!” Tat’ama wumvutudila: “Woodworth, tatamana kuvanga mawu!” Khindusulu yi zikhomba azyozi zyaba sadila Yave mu mimvu miwombo, yitsadisa mwingi yibwela kukivana mu kisalu ki kusamuna.

Mu mvu 1962, yibaka lwaku lu kubwe ba mu kikola 37 ki Ngiladi, mu kumi di zingonda.  Khomba Wilfred Gooch, nkulutu wu filiali ku Nigéria, wuba mu kikola ki 38 ki Ngiladi ayi bamfila ku Inglaterra. Minu yiyiza ba kiyeku ki kuba nkulutu voti kutona twama ntwala ku filiali yi Nigéria. Mu kulandakana kifwani ki Khomba Brown, minu yaba kwendanga mu mavula mawombo, mwingi kuzaba ayi kumonisa luzolo lwama mu zikhomba zi Nigéria. Kheti basa ba ko byuma batu bawombo badi mu bibwangu binkaka, mayangi mawu mamonisa ti kuba luzingu lumboti kwisinsundula ko kubaka zimbongo ziwombo voti kimvwama. Kheti bobo, mayangi beni yiba mu kubamonanga badyodila ayi kukwizila mu phila yifwana mu zikhutukunu. Bo baba kwendanga mu zikhutukunu zi mavula, bawombo baba kwendilanga mu makalu manneni ayi mu zi autocarro * (baba vanganga ku divula diawu). Khumbu zinkaka baba sonikanga mambu mamboti mu makalu beni. Dimweka mu mawu didi: “Mabeta ma nlangu malenda kwiza ba mbu wunneni.”

Bukyedika, mawu madi makyedika! Vayi befu tubwela nkadu: “Mangolo kadika mutu kamvanga mfunu madi.” Mu mvu 1974, divula di Nigéria diyiza ba ditheti diyiza ba 100.000 di minsamuni, kubotula Estados Unidos. Kisalu kyaba kwenda beni kuntwala!

Mu thangu kisalu kyaba kwenda beni kuntwala, Mvita ku Nigéria wutona mu mvu 1967 nate 1970. Mu kibila ki mvita, mu zingonda ziwombo zikhomba zitu ku khonzo yi mwila wu Níger ku Biafra, basa bwe ba ko ku filial’itu. Vayi tutatamana kubavana bidya bi kiphevi. Dedi bo yibe tubila va thononu, mu minsambu ayi lufyatu mu Yave, befu tununga kusabuka ku disimu dinkaka khumbu ziwombo.

Yikhidi tebuka moyo bo twaba sabukanga mwila wu Níger ayi twaba tulanga luzingu lwitu va kingela bila kuba masodi mawombo, zimbela ayi byuma binkaka. Diba dyambu diphasi kuvyokila kuba masodi makhambu ba ma lufyatu, vayi dyaba luta banga dyambu diphasi ku khonzo yi Biafra. Kilumbu kimweka yisabuka Mwila wu Níger va bwilu mu bwatu, yibotuka ku Asaba mwingi kwenda ku Onitsha mwingi kwe kindisa bakulutu baba twamanga ntwala ku divula di Enugu. Bo tutuka ku Aba, tusadila lwaku tuba mwingi kukindisa bakulutu ba bimvuka. Ku divula di Port Harcourt, lukutukunu lwitu lumana mu thinu ayi mu minsambu miwombo bo masodi matona kukota ku divula di Biafra.

Zikhutukunu beni nkinza ziba mwingi kusadisa zikhomba kuvisa ti Yave wu kutukyeba mu lozolo ayi kubalonga mvandi matedi kuba batatuka mu mambu ma política ayi kuba kithwadi. Zikhomba zi Nigéria zinunga kuvyokila mu mambu beni. Bawu bamonisa luzolo lukhambu luvasu, ayi batatamana kuba kithwadi kidi mu Baklisto bakyedika. Lwaku lunneni beni kuba yawu mu thangu baba vyokila mu ziphasi!

Mu mvu 1969, Khomba Milton G. Henschel wuba ntwadisi wu Lukutukunu Lunneni luba ntu dyambu: “Paz na Terra.” Luawu luvangimina ku Yankee, Nova Yorque ayi minu yilonguka mambu mawombo mu kuba nsadisi’andi. Lukutukunu beni nkinza luba, bila mu mvu 1970 befu tuba Lukutukunu Lunneni ku divula di Lagos, Nigéria luba tuba “Homens de Boa Vontade. “ Lukutukunu beni luvangama bo mvita wumana, tununga kuvanga luawu mu lusalusu lu Yave. Lukutukunu beni luba mu 17 di zimbembo, ayi 121.128 di batu. Khomba Knorr ayi Henschel ayi zinzenza zifumina ku Estados Unidos ayi Inglaterra bamona 3.775 di batu babotama, yawu thalu yiluta vyoka yi batu bama botama tona mu Pentekoti! Kusadisa kukubika lukutukunu alolo, ḿba yawu thangu yiluta vanga mambu mawombo mu luzingu lwama. Thalu yi minsamuni yaba bwelama beni!

Kuvyoka 30 ma mimvu yivanga ku Nigéria, yaba kwangalala beni khumbu zinkaka bo yaba salanga banga nsungi wu mavula ku khonzo yi África Ocidental. Zikhomba ziba mu kisalu ki misyoni baba kwangalala beni kubaka khindusulu ayi kuzaba ti tuba vwanga nkinza! Mayangi mawombo kusadisa zikhomba azyozi kuvisa ti tusa bazimbakana ko! Kisalu akyoki kindongisa ti kuvwanga nkinza kadika mutu, kulenda basadisa kukonzuka mu kiphevi, kutatamana bakindama ayi kuba kithwadi mu kimvuka ki Yave.

 Mu lusalusu lu Yave to tununga kuvyokila mu ziphasi tudengana mu kibila ki mvita ayi zimbela. Kadika thangu twaba monanga lusalusu lu Yave. Oris wutuba:

“Befu bwadi tubakana malária khumbu ziwombo. Khumbu yimweka Woodworth bannata ku nzo mbuku ku divula di Lagos mu khambu zaba ni dyambu. Minu yaba tuba ti nandi kasimvuka ko, vayi nandi wuvuka! Bo kilunzi kyandi kitona vutuka, nandi wusamuna zitsangu zitedi Kintinu ki Nzambi kwidi mfelimi waba kunkyeba. Bosi, befu bwadi tuvutukila mfelimi beni. Tusadisa Yaya Nwambiwe kutatamana kuvwa nkinza mambu ma Kibibila. Nandi wukikana kyedika ayi wuyiza ba nkulutu wu kimvuka ku divula di Aba. Minu yisadisa beni batu bawombo, kubunda mvandi zi Muçulmano kuba bisadi bikwikama bi Yave. Befu tuyangalala beni kuzaba ayi kumona luzolo lu zikhomba zitu ku Nigéria, kikhulu kiawu, phila banzingilanga ayi mbembo’awu.

Tala dilongi dinkaka tulonguka: Mwingi tubaka lusalusu mu kisalu kitu ku tsi yinkaka, befu tulonguka ti tufweti zola zikhomba zitu zyoso, kheti kikhulu kiawu diswasana kidi na kikhulu kitu.

Bo tusadila ku Beteli yi Nigéria, mu mvu 1987 befu tutambula kiyeku kimona mwingi kukota mu kisalu ki misyoni ku divula di St. Lucia ku Caribbean. Kiba kiyeku kimboti beni, vayi tuvyokila mu mambu mamona. Ku África, babakala baba kwelanga bakyeto bawombo, vayi ku divula di St. Lucia, batu baba zinganga nzo yimweka mu khambu kwelana mu ntinu. Dyambu di Nzambi disadisa minlonguki miwombo mi Kibibila kubalula nzingulu’awu.

Bo mangolo maba dekuka mu kibila ki mimvu, Dingumba Dintwadisi batufila ku kikulutu ku divula di Brooklyn, Nova Yorque, E.U.A., mu mvu 2005. Kadika thangu yimvutulanga Yave matondo bo yizaba Oris. Nandi wuyiza fwa mu mvu 2015, ayi yimbanga beni mu kyunda mu kuzaba ti nandi wufwa. Nandi wuba nsadisi ayi nkazi wumboti. Minu yinzola beni mu 68 di mimvu tuba bakwelana. Befu tuvisa ti kukinzika nnuni, kulemvukilanga mu luzolo, kutatamana kuyikulula ayi kukuna mbutu wu phevi yinlongo, kuntwadisanga mayangi va dikanda ayi mu kimvuka.

Bo twaba banga mu kyunda voti bavonga, twaba tombanga lusalusu lu Yave mwingi tununga kuvanga biyeku bitu. Bo twaba pisuka mu biyeku beni, mambu matatamana kuba mamboti mu thangu zyoso—ayi mambu malutidi mboti madi kuntwala!—Yesaya 60:17; 2 Kolinto 13:11.

Ku divula di Trinidad ayi Tobago, Yave wusakumuna kisalu ki matata mami ayi ki batu bankaka, mu kipholo bavana—9.892 di batu batona kubwongimina Yave. Ku divula Aruba, bawombo basala beni mwingi kukindisa kimvuka kitheti kyo minu yiba. Ku divula adyodi, bubu kweka 14 di bimvuka. Ku divula di Nigéria, minsamuni mibwelukizi ayi kweka 381.398 di minsamuni. Ayi ku divula di St. Lucia, 783 di batu badi mu kusamuna zitsangu zi Kintinu ki Yave.

Bubu yeka 90 di mimvu. Minkunga 92:14 yintuba mu matedi batu bakunu ku nzo Yave: ‘Kheti mu bununu bawu bala tatamana kubuta mimbutu; Bela tatamana kuba mangolo ayi mvingu.’ Minu yinkwangalalanga beni mu luzingu yidi mu kisalu ki Yave. Kyuka yitambula kwidi matata mami, kitsadisa kukonzuka mu kisalu ki Yave. Mu luzolo lwandi lukwikama, Yave wu kutsadisanga mwingi ‘yiyonzuka kunganda nzo yi Nzambi’ama.’—Minkunga 92:13.