DILONGI 34
Ngie Widi Luvalu mu Kimvuka ki Yave!
‘Dedi bo nyitu yididi yimueka, vayi yidi na binama biwombo, buawu mvandi buididi nyitu yi Klisto.’—1 KOLINTO 12:12.
NKUNGA 101 Tusala mu Kithuadi na Zikhomba
MAMBU TUANLONGUKA *
1. Kiyeku mbi tuidi ki tutuadisanga mayangi?
LUAKU lunneni tuidi mu kuba mu khati kimvuka ki Yave! Kiawu mvandi ba kitedilanga paladizu yi kiphevi, kibila tuidi ndembama ayi mayangi mu thangu tumbuongimina Yave va kimueka na zikhomba zitu. Buabu luvalu mbi ngie widi mu kimvuka ki Yave?
2. Mu minkanda katuadusu muingi kusonika, kifuani mbi mvuala Polo kasadila khumbu ziwombo?
2 Mawombo tulenda longuka mu ntu diambu awuwu, mu kutanga kifuani mvuala Polo kasadila khumbu ziwombo mu minkanda miandi. Mu kadika nkanda kasonika, mvuala Polo wudedikisa kimvuka banga nyitu yi mutu. Ayi batu badi mu kimvuka banga binama bi nyitu.—Loma 12:4-8; 1 Kolinto 12:12-27; Efeso 4:16.
3. Mambu mbi matatu tunkuiza tubila mu dilongi adidi?
3 Mu dilongi adidi, tunkuiza mona mambu matatu mankinza tulenda longuka mu kifuani mvuala Polo kasadila. Theti, tunkuiza mona ti kadika mutu mu befu widi kibuangu * mu kimvuka ki Yave. Dimuadi, tunkuiza mona mbi tufueti vanga boti tunyindulanga ti tuisi ko luvalu mu kimvuka. Ayi dintatu, tunkuiza mona kibila mbi didi diambu dinkinza kutatamana kukivana mu kisalu Yave kavana kadika mutu mu befu.
KADIKA MUTU MU BEFU WIDI KIBUANGU MU KIMVUKA KI YAVE
4. Mbi nkanda Loma 12:4, 5 wu tulonga?
4 Kifuani mvuala Polo kasadila, theti kitulonga ti kadika mutu mu befu, widi kiyeku kinkinza mu dikabu di Yave. Va thonono kifuani kiandi, mvuala Polo wutuba: ‘Dedi bo tuididi binama biwombo mu nyitu yimueka, vayi binama bioso bisi ko tsadulu yimueka, bobuawu mvandi befu kheti tuidi bawombo, vayi tuidi nyitu yimueka to mu kithuadi na Klisto.’ (Loma 12:4, 5) Mbi mvuala Polo kaba tomba kutuba? Nandi waba tomba kutuba ti kadika mutu mu kimvuka widi kiyeku kiviakana, vayi kheti bobo, nandi widi luvalu va meso ma Yave.
We have different roles in the congregation, but each one of us is valuable (See paragraphs 5-12) *
5. Banani bantuamanga ntuala mu kimvuka badi buka “makaba ma batu”?
5 Ḿba mu thangu bekuwa kikuma kiyeku, ngie beyindula batu bantuamanga ntuala mu kimvuka. (1 Tesalonika 5:12; Ebeleo 13:17) Muingi kutu sadisa, Yave mu nzila Yesu wutuvana Nnanga wukuikama voti dingumba dintuadisi, minsadisi miawu, dingumba di Filiali, minkengididi mi bimvuka, minlongisi mi bikola bi Kintinu, bakulutu ba kimvuka ayi minsadisi mi bakulutu ba kimvuka. Bawu, badi buka “makaba ma batu” mu kimvuka. (Efeso 4:8) Zikhomba zioso aziozio, babieku mu phevi yinlongo muingi kukieba mamemi ma Yave ayi kukieba zitsatu zi kimvuka.—1 Petelo 5:2, 3.
6. Dedi bummonisina 1 Tesalonika 2:6-8, mangolo mbi zikhomba badi biyeku bamvanganga?
6 Mu thuadusulu yi phevi yinlongo, zikhomba ziwombo bantambulanga biyeku mu kimvuka. Dedi bo mioko ayi malu mansadilanga va kimueka muingi kutuadisa ndandu mu nyitu, zikhomba babieku mu phevi yinlongo, mvawu bansalanga beni muingi kutuadisa ndandu mu kimvuka. Bawu batombanga ko mamboti mawu baveka, vayi bamvanganga mamoso mungi kukindisa zikhomba ziawu mu kimvuka. (Tanga 1 Tesalonika 2:6-8.) Befu tumvutudilanga Yave matondo mu zikhomba aziozio bantulanga zitsatu zi bankaka va ntuala zitsatu ziawu!
7. Lusakumunu mbi zikhomba ziwombo bambakanga mu kisalu ki thangu ka thangu?
7 Bankaka mu kimvuka batambula biyeku bi kusala mu kisalu ki misioni, mintuami ntuala mifilu, voti mintuami ntuala. Zikhomba zinkaka mu nza yimvimba ba kivana mu kisalu ki thangu ka thangu mu kusamuna ayi kuvanga minlonguki. Mu phila ayoyi, bawu basadisa batu bawombo kuba minlandikini mi Klisto. Batu badi mu kisalu ki thangu ka thanga basi ko beni mbakulu. Vayi Yave wuba vananga lusakumunu luwombo. (Malako 10:29, 30) Befu tumvananga beni luvalu zikhomba, ayi tumvutulanga beni matondo mu kuba yawu mu kimvuka!
8. Kibila mbi minsamuni mioso badidi luvalu va meso ma Yave?
8 Bukiedika ti zikhomba badi biyeku mu kimvuka ayi badi mu kisalu ki thangu ka thangu bawu to badi nkinza mu kimvuka? Ndamba! Minsamuni mioso mi zitsangu zimboti zi Nzambi, badi nkinza va meso ma Yave ayi mu kimvuka. (Loma 10:15; 1 Kolinto 3:6-9) Bukiedika, kiyeku ki kukitula batu minlonguki mi Klisto, kiawu kiyeku kilutidi nkinza kuidi baboso mu kimvuka. (Matai 28:19, 20; 1 Timoteo 2:4) Diawu baboso badi mu kimvuka, minsamuni mibotama ayi bakhambu botama, bamvangilanga mangolo muingi kutula kisalu akiokio va theti mu luzingu luawu.—Matai 24:14.
9. Kibila mbi zikhomba zitu zi bakieto badidi luvalu?
9 Yave wumvananga beni luvalu kiyeku zikhomba zi bakieto badi mu kimvuka. Bawombo mu bawu badi bakazi, zingudi, mimfuizi ayi bankaka basi ko bakuela. Vayi kheti buawu, bawu bansadilanga Yave mu lukuikumunu loso. Mu Kibibila muidi bifuani biwombo bi bakieto bamonisa zikhadulu ziwombo zimboti ayi bayangidika Nzambi. Befu tuba tebukilanga moyo mu kibila ki kifuani kiawu kimboti ki nduenga, kiminu, kifuza, kibakala, kukaba ayi mu kibila ki mavanga mawu mankaka mamboti. (Luka 8:2, 3; Mavanga 16:14, 15; Loma 16:3, 6; Filipi 4:3; Ebeleo 11:11, 31, 35) Tuntondanga beni Yave mu kuba na zikhomba zi bakieto mu kimvuka ki baklisto bammonisanga zikhadulu aziozio zimboti!
10. Kibila mbi tumvaninanga luvalu biboba mu kimvuka?
10 Biboba badi nkhayilu yinkaka tuidi mu kimvuka. Mu bimvuka binkaka muidi zikhomba zi bakieto ayi zi babakala beka biboba, bakivana mu kusadila Yave mu luzingu luawu loso. Vayi bankaka mu bawu balonguka kiedika mu bukulutu. Mu kibila ki bununu, zikhomba aziozio bamviokilanga mu mambu mawombo maphasi ayi basiala benunga ko kuvanga mawombo mu kimvuka ayi mu kisalu ki kusamuna. Vayi kheti bobo, bawu bamvanganga mangolo ma kubasika mu kisalu ki kusamuna ayi kusadila thangu’awu muingi kukindisa ayi kukubika bankaka! Bukiedika, befu tumbakanga beni ndandu mu kifuani kiawu. Diawu Yave ayi befu tuba vuilanga nkinza.—Zingana 16:31.
11-12. Buidi tumbelanga mu thangu tummona kifuani kimboti matoko bamvana mu kimvuka?
11 Yindula mu matedi matoko. Bawu bamviokilanga mu mambu mawombo mambi mantotanga kiminu kiawu mu nza ayiyi yi Satana. Dedi mu bikola ba kuba longanga malongi mankuizilanga mu diela di batu. (1 Yoane 5:19) Diawu befu boso tumbakilanga khindusulu mu thangu tummona matoko kuvana mimvutu mu zikhutukunu, kuvanga biyeku biawu ayi kumonisa kibakala mu thangu bantelimina kimbangi mu mambu bankikininanga. Bukiedika benu matoko muidi kibuangu kinkinza mu kimvuka ki Yave!—Minkunga 8:2.
12 Vayi zikhomba zitu zinkaka zi bakieto ayi zi babakala, bammonanga beni phasi kukikinina ti badi luvalu mu kimvuka. Mbi bilenda tusadisa kukikinina ti kadika mutu mu befu luvalu kadi mu kimvuka? Mawu tuemmona.
BAKULA KIBUANGU KIAKU MU KIMVUKA
13-14. Kibila mbi bankaka banyindudilanga ti basi ko luvalu mu kimvuka?
13 Tala dilongi dimuadi tulenda longuka mu kifuani mvuala Polo kasadila. Nandi wutuba diambu dimueka tummonanga phasi bubu; kukikinina ti befu tuidi luvalu mu kimvuka. Mvuala Polo wusonika: ‘Enati kulu kutuba: bo yisi ko koko, buna minu yisi ko kinama ki nyitu, akiokio kisi ko kibila kiala vanga kulu kubika ba kinama ki nyitu. Enati dikutu dituba: bo yisi ko dieso, buna yisi ko kinama ki nyitu, akiokio kisi ko kibila kiala vanga dikutu dibika ba kinama ki nyitu.’ (1 Kolinto 12:15, 16) Mbi mvuala Polo kaba tomba kutuba mu mambu amomo?
14 Ngie kuba kifu ki kuyidedikisanga na bankaka mu kimvuka, mawu malenda kutula nkaku muingi wumona ti ngie nkinza keli mu kimvuka. Mu kimvuka ngie widi, ḿba muidi zikhomba zipisuka mu kulonga, mu kubomba ayi mu kukindisa bankaka. Ayi ḿba ngie wulenda yindula ti wulendi dedakana ko na bawu. Amomo, malenda ba mayindu mamboti kibila mammonisa ti ngie wukikululanga ayi wuzebi ti wulendi nunga ko kuvanga mamoso. (Filipi 2:3) Vayi wufueti ba kieba kieba, kibila kutatamana kuyindudila phila ayoyi, kulenda kubika mu kiunda ayi kudekula kifuza kiaku. Dedi bo mvuala Polo katubila, ḿba ngie wulenda tona kuyindula ti wisi ko luvalu mu kimvuka. Mbi wulenda vanga muingi kununga mabanza amomo?
15. Dedi bummonisina 1 Kolinto 12:4-11, Kibila mbi dilongi di mvuala Polo dikadidi nkinza mu befu?
15 Yindula mambu amama: mu sekulu yitheti, Yave wusadila phevi’andi yinlongo muingi kusadisa bisadi biandi binkaka kuvanga mangitukulu. (Tanga 1 Kolinto 12:4-11.) Yave wuba vana biyeku biviakana, vayi kheti bobo nandi waba vananga luvalu kadika kisadi kiandi. Bubu, Yave katuvananga ko luaku lu kuvanga mangituku. Vayi dilongi di mvuala Polo, dikhidi nkinza mu befu. Kibila mu kimvuka, befu boso tuidi beyeku biviakana. Vayi kheti bobo Yave wumvuanga nkinza kadika kisadi kiandi.
16. Dilongi mbi di mvuala Polo tufueti vangila mangolo muingi kulandakana?
16 Tubika banga kifu ki kuyidedikisa na bankaka, vayi tufueti vanga mangolo ma kulandakana dilongi di mvuala Polo, dintuba: ‘Vayi bika kadika mutu kafiongunina mavanga mandi, ayi nandi wala baka kibila ki kukuangalala mu naveka, vayi kabika kuyidedikisa na batu bankaka.’—Ngalatia 6:4.
17. Mbi biala monika befu kutsikika mayindu mitu mu mambu tuidi tsuakulu mu kuvanga?
17 Befu kulandakana dilongi di mvuala Polo ayi kukifiongunina, tuala mona ti vadi mambu mawombo tulenda nunga kuvanga. Ḿba nkulutu wu kimvuka kasi ko beni wupisuka mu kulonga va kikuma, vayi nandi kalenda ba wupisuka mu kisalu ki kusamuna. Voti ḿba nandi kasi ko kifu ki kuludikanga buboti biuma bi kimvuka ove bi nzo’andi. Vayi widi khomba yi luzolo ayi zikhomba mu kimvuka banzolanga beni kundinda malongi ayi nandi wuba kuwanga mu mvibudulu. Voti widi kifu ki kuyambanga buboti zikhomba. (Ebeleo 13:2, 16) Befu kubakula ayi kutsikika mayindu mitu mu mambu tuidi tsuakulu mu kuvanga, befu tuala baka bibila muingi kukuangalala. Ayi mawu mala tusadisa tuluta kukivana mu kimvuka ayi kubika monanga nsoki zikhomba mu mambu bazabizi kuvanga, angi befu tukhambu zaba.
18. Mbi bi tusadisanga tubuela pisuka mu kisalu ki kusamuna?
18 Kioso kuandi kiyeku befu tuidi mu kimvuka, tufueti vanga mangolo ma kubuela pisuka ayi kusadila mangolo Yave ka tuvananga mu kiyeku beni. Bukiedika, Yave wunsadilanga kimvuka kiandi muingi kutukubika buboti. Dedi mu lukutukunu tumbanga va khati sabala, befu tuntambulanga zithuadusulu muingi tuluta pisuka mu kisalu ki kusamuna. Buabu, bukiedika kuandi ti ngie widi mu kuvanga mangolo ma kusadila zithuadusulu beni tuntambulanga?
19. Mbi biala kusadisa wununga kukota mu Kikola ki Minsamuni mi Kintinu?
19 Khubumunu yinkaka yimboti tuntambulanga yidi, Kikola ki Minsamuni mi Kintinu. Bantumisanga mu kikola beni zikhomba zi bakieto ayi zi babakala badi mu kisalu ki thangu ka thangu, badi 23 nate 65 di mimvu. Khumbu zinkaka ngie wulenda yindula ti wulendi nunga ko kukota kikola beni. Vayi bika kutsikika mayindu maku mu biuma bilenda kutula nkaku mu kukota kikola beni, angi yindula mu bibila bi kuvanga kutomba kukota kiawu. Bosi tomba kuzaba mbi wulenda vanga muingi wuba wufuana mu kukota kikola beni. Mu lusalusu lu Yave ayi mangolo maku veka, ngie wala nunga kudukisa makani maku.
SADILA LUAKU NGIE WIDI MUINGI KUKINDISA KIMVUKA
20. Mbi tulenda longuka mu Loma 12:6-8?
20 Dilongi dintatu kifuani ki mvuala Polo kitulonga, didi mu Loma 12:6-8. (Tanga.) Mvuala Polo wubue tuba ti befu boso mu kimvuka tuidi disuasana mu mambu tuzebi kuvanga. Mu matangu amomo, nandi wutuba ti tufueti sadila mambu beni muingi kusadisa bankaka ayi kukindisa kimvuka.
21-22. Mbi tube longuka mu kifuani ki yaya Robert ayi Felice?
21 Tala kifuani ki khomba yimueka bantedilanga Robert. Nandi wuba mu kisalu ki thangu ka thangu ku tsi yinkaka, vayi bamfila muingi kasadila ku Beteli yiba ku tsi kabutukila. Kheti nandi wuzaba ti basa kumvingisa ko kiyeku mu kuvanga diambu dimbi, yaya Robert wutuba: “Zingonda ziwombo yivanga mu kuyindulanga mambu makhambu fuana mu minu veka—ayi khumbu ziwombo minu yiyindula kubika kisalu kiami ku Beteli.” Mbi binsadisa kununga mabanza amomo ayi kuvutula mayangi kaba? Nkulutu wumueka wu kimvuka wutebula Robert moyo ti biyeku Yave kaba vana mu mimvu kumbusa, biba muingi kuba kubika mu biyeku badi bubu. Mawu masadisa Robert kabika tsikika mayindu mandi mu mambu mavioka, vayi kutsikika mayindu mandi mu mambu kalenda nunga kuvanga bubu.
22 Khomba Felice Episcopo wuviokila mvandi mu mambu ma phila ayoyi. Nandi ayi nkazi’andi bakota mu kikola ki Ngiliadi mu mvu 1956 ayi basadila ku kizunga ki Bolivia. Vayi mu mvu 1964 bawu bayiza buta muana. Yaya Felice wutuba: “Diba diambu diphasi kubika kiyeku kitu tuabe zolanga beni. Yintebuka moyo ti yiviokisa mvu wumvimba mu kunyonginanga mu mawu. Vayi mu lusalusu lu Yave, minu yibalula phil’ami yi kuyindudila ayi yitona kuyindula mu kiyeku kiami kimona ki kuba tata.” Ngiewu, wumana viokila mu mambu khomba Robert voti yaya Felice baviokila? Boti ngete, buna vanga mangolo ma kubalula mayindu maku ayi tsikika mawu mu mambu wulenda nunga kuvanga bubu; kusadila Yave ayi zikhomba.
23. Mambu mbi tufueti botulanga thangu muingi kuyindula, ayi mbi tuala tubila mu dilongi dinkuiza?
23 Kadika mutu mu befu widi luvalu va meso ma Yave. Diawu nandi kantombila befu tuba mu khati dikabu diandi. Befu kubotula thangu muingi kuyindulanga mu phila tulenda kindisila zikhomba zitu mu kimvuka ayi kuvanga mamoso tulenda nunga mu kiyeku Yave katuvana, tuala bakula ti kiyeku kinneni tuidi mu kimvuka ki Yave! Vayi mbi tulenda tuba mu matedi zikhomba zinkaka mu kimvuka? Buidi tulenda monisina ti tunzolanga ayi tunkinzikanga kiyeku voti kibuangu bawu badi mu kimvuka? Mu dilongi dinkuiza, tuala tubila mambu amomo mankinza.
NKUNGA 24 Yiza ku Mongo wu Yave
^ Lut. 5 Befu boso tutidi kuba luvalu va meso ma Yave. Vayi tufueti ku yikuvusanga mbi tufueti vanga muingi nandi kaluta ku tusadila. Dilogi adidi dinkuiza tusadisa kuvisa kibuangu kadika mutu kadi mu kimvuka.
^ Lut. 3 TSUDUKUSU YI BIKUMA: Kibuangu kitu mu kimvuka ki Yave, kisinsundula ko kibuangu tunkalanga, thalu yi zimbongo tukeli, kimfumu kitu, ndongukulu’itu voti mvila tubutukila. Angi kinsundula kiyeku kadika mutu kakeli mu kubuela kindisa kimvuka.
^ Lut. 62 MAMBU MADI MU ZIFIKULA: Zifoto zitatu zimmonisa mambu mammonikanga ava lukutukunu lutona, mu thangu luidi mu kuvangama ayi ku tsuka lukutukuna. Foto 1: Nkulutu wumueka wu kimvuka wumvana ndizulu yimboti kuidi mutu bekuiza mu lukutukunu mu khumbu yitheti, khomba yi ditoko widi mu kuludika bisengu bintodisanga mbembu, khomba yinkaka yinkieto widi ditoko wunkoluka na khomba yinkaka yinkieto weka kiboba. Foto 2: Matoko ayi biboba bannanguna koko muingi kuvana mimvutu mu ndongukulu yi Kibanga ki Nsungi. Foto 3: Nkazi ayi nnuni badi mu kubuela mioko mu kudiodisa Nzo yi kintinu. Ngudi yimueka widi mu kusadisa muan’andi kutula zimbongo mu kasu yidi ku Nzo yi Kintinu. Khomba yi ditoko wunkieba bilongulu bi kimvuka ayi khomba yinkaka yi dibakala widi mu kuvana khindusulu khomba yinkieto weka kiboba.
