DILONGI 32
Bika Luzolo Luaku Lubuelama
“Diawu ndieti luta lomba mu zitsambulu ziama: luzolo lueno lubuelama mu tezo [kiwombo].”—FILIPI 1:9.
NKUNGA 106 Tukuna Khadulu yi Luzolo
MAMBU TUANLONGUKA *
1. Banani basadisa kuvangisa kimvuka ku divula di Filipi?
BO MVUALA Polo, Sila, Luka ayi Timoteo bavitila ku divula di Filipi, bawu badengana batu bawombo baba tomba kukuwa zitsangu zi Kintinu. Zikhomba aziozi zinna, basadisa kuvangisa kimvuka ku Filipi ayi minlonguki mioso batona kukutakana ḿba ku nzo yi khomba yimueka waba zolanga kuyamba bankaka, bantedilanga Lidi.—Mavanga 16:40.
2. Bikaku mbi zikhomba bayiza monikina kuntuala?
2 Kimvuka akioki kimona kiviokila mu mambu maphasi. Satana wusadila zimbeni zi kiedika muingi batuadisa zithotolo voti ziphasi mu kisalu ki kusamuna ki Baklisto abobo bakuikama. Polo ayi Sila baba bula mu bikoti ayi baba kotisa buloku. Bo baba basisa ku buloku, bawu bayenda kuemona minlonguki mimona ayi baba kindisa. Diawu Polo, Sila ayi Timoteo babika divula beni. Vayi Luka ḿba wutatamana kuna. Mambu mbi zikhomba aziozi zimona bankuiza vanga? Mu lusalusu lu phevi yinlongo yi Yave, bawu batatamana kunsadila mu kifuza. (Filipi 2:12) Polo wuba bibila bioso muingi kukuangalala mu kibila ki zikhomba aziozi!
3. Dedi buntubila Filipi 1:9-11, mbi Polo kadinda mu nsambu?
3 Bo vavioka kumi di mimvu, Polo wusonika nkanda kuidi kimvuka ki Filipi. Bo wuntanga nkanda awowo, ngie wulenda fika bakula luzolo Polo kaba mu zikhomba ziandi. Nandi wusonika: “Ndieti [kuluzola] beno boso mu luzolo lu Klisto Yesu.” (Filipi 1:8) Nandi wuba sonikina ti waba kuba natanga mu nsambu. Nandi wulomba kuidi Yave muingi kaba sadisa kubuela lozolo luawu, kuzaba kusuasisa mambu malutidi nkinza, kuba bavedila, kubika buisa bankaka mu masumu ayi kutatamana kubuta mimbutu misonga. Bubu, befu mvitu tulenda longuka mawombo mu mambu Polo katuba. (Tanga Filipi 1:9-11.) Tunkuiza tubila mambu katuba ayi kumona buidi tulenda sadila mawu.
BUELA LUZOLO LUAKU
4. (a) Dedi buntubila 1 Yoane 4:9, 10, buidi Yave kamonisina luzolo luandi mu befu? (b) Nati kitesu mbi tufueti zodila Nzambi?
4 Yave wumonisa luzolo luandi bo kafila Muan’andi va ntoto muingi kafuila mu kibila ki masumu mitu. (Tanga 1 Yoane 4:9, 10.) Luzolo lu Nzambi lutu vanga befu mvitu kunzola. (Loma 5:8) Nati kitesu mbi tufueti zodila Nzambi? Yesu wuvana mvutu wu kiuvu akioki bo kakamba Mfalisi wumueka: ‘Zola Yave Nzambi’aku mu ntim’aku woso, mu muel’aku woso, ayi mu mayindu maku moso.’ (Matai 22:36, 37) Befu tusintomba ko luzolo luitu mu Nzambi ludekuka. Vayi tutidi luawu lubuelama kadika kilumbu. Polo wukamba basi Filipi ti luzolo luawu lufueti tatamana kubuelama mu kitesu kiwombo. Mbi tulenda vanga muingi tukindisa luzolo luitu mu Yave?
5. Buidi tulenda kindisila luzolo luitu?
5 Tufueti zaba Nzambi muingi tunzola. Kibibila kintuba: ‘Mutu wukhambu zolanga kasa zaba ko Nzambi, kibila Nzambi luzolo.’ (1 Yoane 4:8) Mvuala Polo wusudikisa ti tuala luta zola Yave bo tunzaba kiedika kitedi nandi ayi tumvisa buboti mayindu mandi. (Filipi 1:9) Bo tutona kulonguka Kibibila, befu tutona kuzola Yave kheti tusa zaba ko mamoso matedi nandi. Bo tumbuela longuka matedi Yave, luzolo luitu mu nandi lumbuela banga lungolo. Diawu, nkinza beni kulongukanga Kibibila kadika kilumbu ayi kuyindula buboti mu mambu tuntanga!—Filipi 2:16.
6. Mu matedi kubuela kuzolo luitu, mbi tulenda longuka mu 1 Yoane 4:11, 20, 21?
6 Luzolo lungolo Nzambi kadi mu befu, luala tuvanga kuzola zikhomba zitu. (Tanga 1 Yoane 4:11, 20, 21.) Ḿba tunyindulanga ti didi diambu diluelu kuzola zikhomba zitu. Kibila befu tumbuongiminanga Yave ayi tunlandakananga zikhadulu ziandi zimboti. Befu tunlandakananga kifuani ki Yesu, kibila luzolo luandi luba lungolo ayi wuvana moyo’andi mu kibila kitu. Vayi khumbu zinkaka dilenda ba diambu diphasi kutumukina lutumu lutedi kuzola bankaka. Tala kifuani kimonika ku kimvuka ki Filipi.
7. Mbi tulenda longuka mu dilongi Polo kavana Evodi ayi Sintike?
7 Evodi ayi Sintike, baba zikhomba zi bakieto baba kifuza kiwombo ayi baba salanga va kimueka na mvuala Polo. Vayi ḿba mambu babakasana bawu babuadi diawu bamanisina kikundi baba. Mu nkanda kafila kimvuka zikhomba aziozi baba, Polo wutanguna mazina mawu ayi wuba vana dilongi di kuba kithuadi mu ‘mayindu mamueka.’ (Filipi 4:2, 3) Polo wumona ti buboti beni kuvana dilongi beni kuidi kimvuka kioso: “Bika luvangila mambu moso mu [khambu] maniunguta ayi ziphaka.” (Filipi 2:14) Bukiedika, dilongi adiodi disadisa zikhomba aziozi zikuikama, ayi mvandi disadisa zikhomba zinkaka mu kimvuka kutatamana kukindisa luzolo luawu bawu na bawu.
Kibila mbi tufueti kunina mayindu mafuana mu zikhomba zitu? (Tala lutangu 8) *
8. Mbi bilenda kututula nkaku mu kuzola zikhomba zitu, ayi buidi tulenda nungina nkaku beni?
8 Khumbu zinkaka phasi beni tummonanga kuzola zikhomba zitu kibila tumvanganga mambu Evodi ayi Sintiki bavanga—kutsikika mayindu mu zinzimbala zi zikhomba zitu. Befu boso tumvanganga zinzimbala kadika kilumbu. Befu kutsikika mayindu mitu mu zinzimbala zi bankaka, mawu mala vanga luzolo luitu mu bawu kudekuka. Buka, boti khomba bezimbakana kutu sadisa mu kudiodisa Nzo yi Kintinu, befu tulenda dasuka. Befu kutona kuyindula zinzimbala zinkaka nandi kavanga, mawu mala kutu vanga kubuela kudasuka ayi luzolo luitu mu nandi lunkuiza dekuka. Boti mawu widi mu kuviokila, buboti beni kuyindula ti Yave wummonanga zinzimbala zitu ayi zi khomba beni. Vayi kheti bobo, nandi wuntatamana kutu zola befu boso. Diawu, tufueti landakana kifuani ki luzolo lu Yave ayi kutsikika mayindu mu zikhadulu zimboti zi zikhomba zitu. Bo tumvanga mangolo muingi kuzola zikhomba zitu, tunluta kindisanga kithuadi kitu na bawu.—Filipi 2:1, 2.
‘MAMBU MALUTIDI NKINZA’
9. Mambu mbi malutidi nkinza Polo kakamba Baklisto ku Filipi?
9 Yave wutuadisa Polo muingi kukamba basi Filipi ayi Baklisto boso bubu—muingi ‘bazaba kusuasisa mambu malutidi nkinza.’ (Filipi 1:10) Mambu amomo ma nkinza madi: Nzitusu yi dizina di Yave, zikhanu ziandi zinsalamanga, ndembama ayi kithuadi mu kimvuka. (Matai 6:9, 10; Yoane 13:35) Bo tuntula biuma abiobi va theti mu luzingu luitu, befu tummonisanga ti tunzolanga Yave.
10. Mbi tufueti vanga muingi tumonikina buka batu bavedila?
10 Vayi Polo wutuba ti tufueti ba batu bavedila. Mawu masinsundula ko ti tufueti ba bavedila dedi Yave Nzambi kadi ‘wuvedila’. Vayi Yave wala kutu tadila dedi bavedila befu kuvanga mangolo muingi kukindisa luzolo luitu ayi kuzaba kusuasisa mambu malutidi nkinza. Phila yimueka tulenda monisina luzolo luitu yidi mu kuvanga mangolo muingi kubika buisa bankaka mu masumu.
11. Kibila mbi tufueti bela keba keba mu matedi kubuisa bankaka mu masumu?
11 Dilongi di kubika buisa bankaka mu masumu didi ndubu yinkinza beni. Buidi tulenda buisila bankaka mu masumu? Tulenda vanga mawu mu biuma tumviokisilanga thangu, biuma tunsola kuvuata ayi ntindu kisalu tunsola kuvanga. Ḿba tusavanga ko mambu Yave kanlendanga. Vayi boti biuma tunsola binluekisa kilunzi ki mutu wunkaka ayi kumvanga kusumuka, buna diambu dimbi tuvengi. Yesu wutuba ti bulutidi buboti kutu kanga dimanya dinneni va dinga ayi kutu buma mu ḿbu kena kubuisa zikhomba zitu mu masumu!—Matai 18:6.
12. Mbi tube longuka mu kifuani ki bakuela badi mintuami ntuala?
12 Tala buidi bakuela bamueka badi mintuami ntuala basadila mambu Yesu katuba. Bawu bansadilanga mu kimvuka kimueka na bakuela bamueka bakhidi bamona tona babotama ayi bayonzukila va dikanda didi minsiku miwombo ayi baba khambu vanganga mambu mawombo. Bakuela abobo bamona baba kikininanga ti disi ko diambu dimboti Baklisto kukuendanga mu bibuangu bantalanga zifilme, kheti ziawu zidi zimboti. Bawu badasuka beni bo bazaba ti bakuela abobo badi mintuami ntuala bayenda kue tala filme. Bo mambu beni mamonika, bakuela badi mintuami ntuala babika kubue kuendanga ku kibuangu bantadilanga zifilme nati bakuela bamona bala kubika mayindu mawu ayi kuvisa buboti mambu mambi ayi mamboti. (Ebeleo 5:14) Mu phila ayoyi bakuela abobo badi mintuami ntuala, bamonisa kubika to mu thubulu, vayi mu mavanga ti baba zolanga bakuela abobo bamona.—Loma 14:19-21; 1 Yoane 3:18.
13. Buidi tulenda vangila mutu kusumuka?
13 Phila yinkaka tulenda buisila mutu yidi mu kunnata kuvola disumu. Buidi mawu malenda monikina? Yindula mambu amama: Thangu yiwombo yivioka nlonguki wumueka wu Kibibila mu mangolo ma Yave wuyiza nunga kubika kifu ki kunuanga beni malavu. Nandi wuzaba ti kalendi bue nua ko malavu. Nandi wubalula nzingulu’andi ayi wubotama. Kuntuala, khomba wumueka wuntumisa mu mua nkungi ayi bo kantambika malavu nandi wunkamba: “Ngie bosi weka Mbangi yi Yave, ngie widi phevi yi Yave. Yimueka mu mimbutu mi phevi yinlongo yidi kukiyala. Ngie kukuna khadulu yi kukiyala, ngie walasa viokisanga ko kitesu kiaku bo wunnua malavu.” Kiadi ayi kiunda boti khomba ayoyi yimona wuyuwa dilongi adiodi dimbi ayi kubue vutula kifu kaba ki kunuanga beni malavu!
14. Buidi zikhutukunu zi tusadisanga kusadila zithuadusulu zidi mu Filipi 1:10?
14 Zikhutukunu zi Baklisto zi tusadisanga kusadila zithuadusulu zidi mu Filipi 1:10 mu ziphila ziwombo. Yitheti, bidia biwombo bi kiphevi tuntambulanga mu zikhutukunu bitumonisa biuma Yave kanluta vuanga nkinza. Yimuadi, zikhutukunu zitumonisa buidi bu kusadila mambu tunlongukanga muingi tuba bavedila. Yintatu, batukamba muingi ‘tuyikindasana mu luzolo ayi mu mavanga mamboti.’ (Ebeleo 10:24, 25) Bo zikhomba zitu batukindisa, luzolo luitu mu Nzambi ayi mu zikhomba luala buela konzuka. Befu kuzola Nzambi ayi zikhomba zitu mu ntima woso, tuala vanga mangolo muingi kubika babuisa mu masumu.
TATAMANA KUBA “MAVANGA MASONGA”
15. Mbi binsundula kuba “bawala mu mavanga masonga”?
15 Polo wusambila muingi basi Filipi “bawala mu mavanga masonga.” (Filipi 1:11) Bukiedika, “mavanga masonga” kantubila luidi luzolo luandi mu Yave ayi mu dikabu diandi. Mawu mansundula mvandi, kukoluka na bankaka matedi kiminu kiaku mu Yesu ayi kivuvu widi. Mu Filipi 2:15, Polo wukamba basi Filipi “[balezama] banga minda va nza.” Mawu madi makiedika, kibila Yesu wutedila minlonguki miandi “muinda va nza.” (Matai 5:14-16) Nandi wutuma minlandikini miandi muingi bavanga ‘minlonguki,’ ayi wuba kamba ti bala ba ‘zimbangi ziandi . . . nate muna mu sukisina nza.’ (Matai 28:18-20; Mavanga 1:8) Befu tummonisanga “mavanga masonga” bo tukivananga mu kisalu akioki kilutidi nkinza.
Bo kaba mu buloku ku Loma, Polo wusonika nkanda kuidi kimvuka kiba ku Filipi. Mu thangu yoso kavanga kuna, Polo mvandi wusadila luaku kaba muingi kuvana kimbangi masodi maba kunkengidila ayi batu baba kuedanga kuentala. (Tala lutangu 16)
16. Buidi Filipi 1:12-14 yimmonisina ti tulenda lezama banga muinda kheti bo tuidi mu kuviokila mu ziphasi? (Tala fikula yidi va busu bu luvista.)
16 Mu mosokua mambu tulenda viokila, tulenda bika muind’itu wulezama. Khumbu zinkaka mambu mammonika buka ti ma tutula nkaku mu kusamuna, malenda ba luaku lunneni muingi kusamuna. Buka, bo kasonika nkanda kuidi basi Filipi, mvuala Polo wuba mu buloku ku Loma. Kheti bobo nandi kasa bika ko kusamuna batu baba kuizanga kuentala ayi masodi baba kunkengidila. Kifuza kiandi kisadisa zikhomba kuba lufiatu ayi “[kuyolukila] mambu ma Nzambi mu kibakala ayi mu [khambu] boma.”—Tanga Filipi 1:12-14; 4:22.
Tatamana kutomba ziphila wulenda buedila kifuza kiaku mu kisalu ki kusamuna (Tala lutangu 17) *
17. Buidi zikhomba zitu zi babakala ayi zi bakieto bannunginanga kusamuna kheti bo bamviokila mu zithotolo?
17 Zikhomba zitu ziwombo zi bakieto ayi zi babakala banlandakananga kifuani ki kibakala ki Polo. Bawu bankalanga mu zitsi balendi samuna ko nzo ka nzo voti mu ziphila zinkaka batu balenda kuba mona, vayi kheti bobo, bantombanga ziphila zinkaka zi kusamunina. (Matai 10:16-20) Yimueka mu zitsi aziozi, nsungi wu divula wukamba kadika nsamuni muingi kalonga mu “kizunga” kiandi. Mawu maba sundula kulonga basi dikanda, batu bankalanga va nsengi, bansalanga yawu, bankotanga yawu kikola ayi batu bankaka bazebi. Mu khati mimvu miodi, thalu yi bimvuka ku kizunga beni yibuelama. Ḿba basa kandimina ko kisalu kitu ki kusamuna mu tsi tunkalanga. Vayi tulenda longuka beni mu kifuani ki zikhomba aziozi: Mu kuvanganga mamoso tulenda nunga mu kisala ki kusamuna bankaka. Befu kuvanga mawu, Yave wala tuvana mangolo muingi tutatamana kulonga, kheti mu thangu tumviokila mu zithotolo.—Filipi 2:13.
18. Mbi tufueti ba bakubama mu kuvanga?
18 Mu thangu ayiyi tuidi mu kuzingila, tufueti ba bakubama mu kulandakana malongi Polo kavana basi Filipi: Tuzaba kusuasisa biuma bilutidi nkinza, kuba bavedila, kubika buisa bankaka mu masumu ayi kuwala mu mavanga masonga. Befu kuvanga mawu, luzolo luitu luala buelama ayi tuala zitisa Tat’itu yi luzolo, Yave.
NKUNGA 17 ‘Yitidi’
^ Lut. 5 Ayiyi yawu thangu tufueti buedila luzolo luitu mu zikhomba zitu. Nkanda wu Filipi wutu sadisa kumona buidi tulenda buedila luzolo luitu, kheti bo tumviokila mu ziphasi.
^ Lut. 54 MAMBU MADI MU ZIFIKULA: Mu thangu bandiodisa Nzo yi Kintinu, khomba yimueka bantedilanga Joe, wumbika kusala muingi kukoluka na khomba wunkaka ayi muan’andi. Mawu mavanga Mike, khomba wunkaka wuba sala kudasuka. Nandi wuyindula, ‘Joe khanu kusala kadi mu kusala, kubika kuandi kukoluka.’ Kuntuala , Mike wummona Joe kusadisa khomba yimueka weka kiboba. Mambu amomo mavanga Mike kubue yindula mu zikhadulu zimboti zi khomb’andi.
^ Lut. 58 MAMBU MADI MU ZIFIKULA: Ku tsi yimueka bakandimina kisalu ki Zimbangi zi Yave, khomba yimueka wundengana mutu kazebi mu dikalu. Mu khambu zabikisa bankaka baba yawu mu dikalu, khomba beni wunzabikisa zitsangu zi Kintinu kuidi dibakala beni. Mu thangu bamvunda mu kisalu, khomba beni wumvana kimbangi mutu wunsalanga yandi.
