DILONGI 25
‘Minu Veka Yela Tomba Mamemi Mami’
‘Minu veka yela tomba mamemi mami ayi kuma kieba.’—YEHEZEKELI 34:11.
NKUNGA 105 ‘Nzambi, Nandi Luzolo’
MAMBU TUANLONGUKA *
1. Kibila mbi Yave kayidedikisila banga ngudi?
‘BUKIEDIKA ti ngudi kalenda zimbakana muan’andi kankuemika?’ Kiuvu akioki kiawu Yave kavana kuidi batu bazingila mu thangu yi mbikudi Yesaya. Ayi nandi wubue kamba dikabu diandi: ‘Kheti zingudi aziozi zilenda zimbakana bana bawu, minu yilendi kuzimbakana ko.’ (Yesaya 49:15) Ayoyi yawu khumbu yitheti Yave kayidedikisila na ngudi. Yave wusadila mabanza ngudi kadi mu muan’andi muingi kumonisa luzolo kadi mu bisadi biandi. Zingudi ziwombo balenda kikinina mambu yaya Jasmin katuba: “Bo wunkuemika muana, ngie wunkuiza kuna luzolo lungolo mu nandi ayi luzolo beni, lunkuiza kadidila mu luzingu loso.”
2. Buidi Yave kambelanga, bo wumueka mu bisadi biandi kamvonga mu kiphevi?
2 Mu thangu wumueka mu bisadi biandi kambika kubue samuna ayi kulandakananga zikhutukunu, Yave wummonanga kiunda. Bukiedika, Yave wunyonganga beni bo kammona kadika mvu bivevi bi bisadi biandi kuvonga * mu kiphevi.
3. Mbi Yave kantomba batu bavonga mu kiphevi bavanga?
3 Bawombo mu zikhomba zitu bavonga mu kiphevi, bamvutukanga mu kimvuka ki Yave! Ayi mawu Yave kantomba bawu bavanga, befu mvitu mawu tuntomba. (1 Petelo 2:25) Buidi tulenda kuba sadisila? Ava kubaka mvutu wu kiuvu akiokio, buboti beni kuzaba theti, bibila bimvanganga bankaka babika kubue landakana zikhutukunu ayi kubasika mu kisalu ki kusamuna.
KIBILA MBI BANKAKA BAMVONGILANGA MU KIPHEVI?
4. Mambu mbi bankaka bammonikinanga mu kibila ki kisalu?
4 Bawombo mu kutsikikila ngolo mayindu mu kisalu ki bazingisanga, mawu ma bavanganga kuvonga mu kiphevi. Tala kifuani ki khomba bantedilanga Hung * wunkalanga ku Asia. Nandi wutuba: “Minu yaba yindulanga ti minu kubaka theti biuma biwombo, bosi yinkuiza sadila Yave buboti. Diawu yitonina kusala mu bilokolo biwombo. Mawu madekula kifuza kiami mu zikhutukunu. Ayi buviokila thangu, yiyiza bika kulandakananga zikhutukunu. Ayi yivisa ti nza ayiyi yivangulu muingi kutu tatula kuidi Yave.”
5. Mu kibila ki mambu Anne kaba viokila, mambu mbi mayiza monika?
5 Mu kibila ki ziphasi zi luzingu, bawombo mvandi bamvonganga mu kiphevi. Anne ngudi yimueka widi bana batanu wunkalanga ku Grã-Bretanha wutuba: “Wumueka mu bana bama wubutuka na kimbevo kingolo, ayi muan’ami wunkieto wuyiza vayikusa mu kimvuka ayi wunkaka wuyiza bakana mbela yi ntu. Mawu mathuadisa kiunda kingolo ayi mu kibila akioki, yibika kubue kuendanga mu zikhutukunu ayi kubasika mu kisalu ki kusamuna.” Kukuwa mambu dikanda di Anne ayi makanda mankaka badi mu kuviokila, ma tutuadisanga beni kiunda!
6. Befu khambu landakana dilongi didi mu Kolosai 3:13, mambu mbi malenda monika? Vana kifuani
6 Tanga Kolosai 3:13. Bisadi binkaka bi Yave, bavonga mu kiphevi mu kibila ki mambu khomba wunkaka mu kimvuka kaba vangila. Mvuala Polo wutuba ti khumbu zinkaka mu kibila ki mambu zikhomba ba tuvangilanga, ‘tulenda ba kibila muingi kuba mu nganzi.’ Nganzi yilenda nata mutu kubika kimvuka ki Yave. Mawu mamonikina khomba Pablo, wunkalanga ku América do Sul. Khomba yimueka mu kimvuka wumvunina mambu ayi bakulutu ba kimvuka bakikinina mambu khomba beni katuba. Diawu babotudila Pablo biyeku bioso kaba mu kimvuka. Mbi Pablo kavanga? Nandi wutuba: “Yiba beni nganzi, diawu yiyiza tatukila kimvuka.”
7. Mbi bilenda monika boti kilunzi kitu kintatamana kutu fundisa? Vana kifuani
7 Bo mutu kamvola disumu dingolo, kilunzi kiandi kilenda kumfundisa mu mimvu miwombo ayi kunnata kuyindula ti Nzambi kanzolanga ko. Kheti wunyonga mu disumu kavola ayi wutambula nlemvu, nandi kalenda yindula ti kasiedi ko wufuana muingi kuba mu khati dikabu di Nzambi. Mawu mamonikina khomba yimueka bantedilanga Francisco. Bo bansemba mu kibila ki disumu dingolo kavola, nandi wutuba: “Va thonono minu yaba landakananga zikhutukunu. Vayi buviokila thangu, minu yiyiza bua mu kiunda kingolo ayi yitona kuyindula ti yisi ko wufuana muingi kuba mu khati dikabu di Yave. Ayi mu kibila akioki minu yiba lufiatu ti Yave kasa ndemvukila ko. Diawu yitatukila kimvuka.” Buidi ngie wuntadilanga zikhomba bamviokila mu mambu madedakana na zikhomba tuma tubila mu lutangu lu 4 nati avava? Ngie wuba monanga kiadi? Bulutidi nkinza, buidi Yave kaba tadilanga?
YAVE WUNZOLANGA MAMEMI MANDI
Nsungi wu mamemi musi Isaeli, waba kuazukanga beni mu thangu dimemi diandi diaba zimbalanga (Tala bitini bi matangu 8-9) *
8. Yave wunzimbakananga batu bansadila? Sudikisa.
8 Yave kazimbakananga ko bisadi biandi bavonga mu kiphevi. Nandi mvandi kazimbakananga ko mangolo bavanga mu kisalu kiandi. (Ebeleo 6:10) Mbikudi Yesaya wusonika kinongo kimueka kimboti kimmonisa phila Yave kamvuilanga nkinza dikabu diandi. Nandi wusonika: ‘Dedi nsungi wu mamemi, nandi wela kieba mamemi mandi. Mu koko kuandi nandi wala kutikisa bana ba mamemi, ayi wala kubanatina mu khat’andi.’ (Yesaya 40:11) Buidi Yave Nsungi Wulutidi, kambelanga bo wumueka mu bisadi biandi kambika kunsadila? Yesu wumonisa mabanza Yave kadi kuidi bisadi biandi, bo kata kinongo akiki kuidi minlonguki miandi: ‘Boti mutu widi 100 di mamemi ayi dimueka mu mawu dibe zimbala, bukiedika ti nandi kasinkuiza bika ko 99 muingi kuetomba dimueka diba zimbala? Bukiedika yi kulukamba ti na kubakula diawu, wunkuiza luta ba mayangi mu diawu kena 99 makhambu zimbala.’—Matai 18:12, 13.
9. Buidi minsungi mimboti baba kiebilanga mamemi mawu? (Tala foto yidi va busu bu levista.)
9 Kibila mbi tulenda dedikisila Yave na nsungi wu mamemi? Kibila nsungi wu mamemi mu thangu yikhulu waba vuanga beni nkinza mamemi mandi. Dedi, Davidi wunuana na khosi ayi wulusu muingi kukieba mamemi mandi. (1 Samueli 17:34, 35) Nsungi wumboti wu mamemi waba bakulanga boti dimemi diandi dibe zimbala. (Yoane 10:3, 14) Ntindu nsungi wu mamemi awowo, wuba wukubama muingi kubika 99 di mamemi mandi mu phaka, voti kudinda nsungi wunkaka wu mamemi muingi kakieba mamemi mandi mu thangu kanbila dimemi dibe zimbala. Yesu wusadila kinongo akiokio, muingi ku tulonga diambu dinkinza. Nandi wutuba: ‘Tat’ami widi ku diyilu kayangalalanga ko mu thangu wumueka mu bisadi biandi kambika kunsadila.’—Matai 18:14.
Musi Isaeli mu thangu yikhulu wunkieba dimemi dizimbala (Tala lutangu 9)
YAVE WUNTOMBANGA MAMEMI MANDI
10. Dedi bummonisina Yehezekeli 34:11-16, mbi Yave kankanikisa kuvanga kuidi mamemi mandi mazimbala?
10 Yave wunzolanga kadika mutu mu befu. Kubunda mvandi batu batatuka kimvuka kiandi. Mu nzila mbikudi Yehezekeli, Yave wukanikisa kubila mamemi mandi mazimbala ayi kuba sadisa kubue vutuka kuba kiphevi kimboti. Nandi wusudikisa mbi kankuiza vanga muingi kuba sadisa. Ayi mambu beni mawu nsungi womboti wu mamemi kaba vanganga boti dimemi diandi dibe zimbala. (Tanga Yehezekeli 34:11-16.) Ditheti, nsungi waba tombanga dimemi diandi. Vayi muingi kuvanga mawu vaba tombuluanga thangu ayi mangolo. Ayi bo kaba didengananga, nandi waba kunnangunanga ayi kumvutula vadi mamemi mankaka. Mvandi boti dimemi beni dibe luala voti didi mu nzala, mu luzolo nsungi waba kiebanga zimbeza ziandi ayi kumvana bidia. Bakulutu ba kimvuka, badi mvawu ‘minsungi mi mamemi ma Nzambi.’ Diawu muingi kusadisa mutu wutatuka kimvuka ki Yave, bawu bafueti vanga momawu mambu nsungi wu mamemi mu thangu yikhulu kabe vanganga. (1 Petelo 5:2, 3) Bakulutu ba kimvuka bantombanga zikhomba aziozi ayi ba bavananga lusalusu bantomba *, muingi bavutuka kuba kikundi kimboti na Yave.
11. Mbi nsungi wumboti kaba visanga?
11 Nsungi wumboti wabe visanga ti mamemi mandi malenda zimbala. Na kubakula dimemi dibe zimbala, nandi waba dikiebanga buboti. Tala kifuani kimboti Nzambi katu bikila, mu phila kasadisila bisadi biandi mu thangu yikhulu bantatuka mu mua thangu.
12. Buidi Yave kasadisila Yona?
12 Mbikudi Yona wutina kiyeku Yave kamvana vayi kheti bobo, Yave kasa kunkuekula ko. Dedi nsungi wumboti, nandi wuvana Yona mangolo kaba tomba muingi kanunga kiyeku kaba. (Yona 2:7; 3:1, 2) Kuntuala, Yave wusadila kifuani ki kikunu muingi kusadisa Yona kuvisa ti luzingu lu kadika mutu luvalu luidi kuidi nandi. (Yona 4:10, 11) Mbi bakulutu ba kimvuka balenda longuka mu kifuani akioki? Balenda longuka ti bawu balendi fika kuekulanga ko zikhomba bavonga mu kiphevi. Vayi bawu bamvanganga mangolo muingi kuvisa mbi bivanga khomba ayoyi kutatuka kimvuka. Ayi bo khomba beni kamvutuka kusadila Yave, bakulutu ba kimvuka bantatamananga kummonisa luzolo ayi kumvua nkinza.
13. Mbi bakulutu ba kimvuka balenda longuka mu phila Yave kasadisila nsoniki wu Minkunga 73?
13 Nsoniki wu Minkunga 73, waba banga mu kiunda bo kaba monanga ndembama ayi mayangi bankua mambi baba mu luzingu. Diawu kaba yikuvusanga boti wunkuiza baka ndandu mu kusadila Yave. (Minkunga 73:12, 13, 16) Mbi Yave kavanga? Nandi kasa tumbudila ko nsoniki awowo. Ayi wumonisa mawu mu kubika mambu nsoniki beni katuba masonama mu Kibibila. Ayi kuntuala, nsoniki wu Minkunga wuyiza visa ti kuba kikundi kifikama na Yave, kiawu kuima kilutidi nkinza mu luzingu ayi kikundi beni kinsadisanga luzingu luitu luba tsundu. (Minkunga 73:23, 24, 26, 28) Mbi bakulutu ba kimvuka balenda longuka mu mawu? Bakulutu ba kimvuka balendi fika fundisanga ko mutu wuntona kuba divuda, boti kusadila Yave kiawu kiuma kilutidi nkinza mu luzingu. Mvandi balendi ko kuntumbudila vayi bafueti vanga mangolo ma kutomba kuvisa kibila mbi kantubila mambu amomo ayi kanyindudila mu phila ayoyi. Ba kuvanga mawu, bawu bala nunga kusadila Kibibila muingi kuvana khindusulu khomba ayoyi kantomba.
14. Kibila mbi Elia kaba tombila kufua ayi buidi Yave kansadisila?
14 Mbikudi Elia waba tina muingi Isabeli nkieto ntinu kabika kumvonda. (1 Mintinu 19:1-3) Nandi waba yindulanga ti nandi to wusobila mu mimbikudi mi Yave. Ayi kisalu kioso kavanga kiba kiphamba. Diawu kabela mu kiunda ayi katombila kufua. (1 Mintinu 19:1-4, 10) Yave kasa tumbudila ko Elia vayi wunkindisa mu kunzambikisa ti kasa ba ko naveka. Ayi mvandi wunkamba ti, wunkuiza kumvana mangolo mandi muingi kuvanga kisalu kiaba kuiza kuntuala. Mu luzolo Yave wuyuwa mu thangu Elia kaba kunzabikisa mabanza mandi ma tsi ntima. Ayi mvandi wumvana biyeku bimona. (1 Mintinu 19:11-16, 18) Mbi tulenda longuka mu mawu? Befu boso kuluta bakulutu ba kimvuka, tufueti monisa luzolo mu mamemi ma Yave. Boti khomba widi mu nganzi voti wuntuba ti kasi ko wufuana muingi kutambula nlemvu wu Yave, bakulutu ba kimvuka bafueti kunkuwa mu thangu kanzibula ntim’andi. Bosi bawu bankuiza vanga mangolo muingi kusadisa khomba ayoyi kuvisa ti, nandi widi beni luvalu kuidi Yave.
BUIDI TUFUETI TADILA MAMEMI MAZIMBALA MA NZAMBI?
15. Dedi bummonisina Yoane 6:39, buidi Yesu kabe tadilanga mamemi ma Tat’andi?
15 Buidi Yave kantombila tutadila mamemi mandi mazimbala? Yesu wutu bikila kifuani. Nandi wuzaba ti Yave waba vuanga nkinza mamemi mandi moso. Diawu kavangila mamoso kanunga muingi kusadisa ‘mamemi mazimbala ma nzo yi Isaeli’ kuvutuka kuidi Yave. (Matai 15:24; Luka 19:9, 10) Bo kadi nsungi wumboti, Yesu wuvanga mamoso kanunga muingi ni dimueka mu mamemi ma Yave dizimbala.—Tanga Yoane 6:39.
16-17. Mayindu mbi bakulutu ba kimvuka bafueti ba mu matedi kusadisa batu bavonga mu kiphevi? Vana kifuani (Mvandi, tala tsielu yintuba “Mabanza mbi khomba wuvonga mu kiphevi kalenda ba.”)
16 Mvuala Polo wukindisa bakulutu ba kimvuka ku Efeso balandakana kifuani ki Yesu. Nandi wusonika: ‘Mufueti sadisa baboso balebakana ayi kutebuka moyo mambu matuba Yesu Mfumu’itu ti: ‘Mayangi malutidi kuidi mutu wumvana bika kuidi wuntambula.’’ (Mavanga 20:17, 35) Bukiedika, bakulutu ba kimvuka mvandi badi kiyeku akioki. Salvador nkulutu wumueka wu kimvuka ku Espanha wutuba: “Kutebukanga moyo ti Yave wumvuanga nkinza kadika dimemi diandi dizimbala, ma kutsadisanga kuvanga mamoso yinnunga muingi kuba sadisa. Kibila yizebi ti Yave wuntomba muingi yiba kieba buboti.”
17 Zikhomba zioso zivonga tube tubila mu dilongi adidi, batambula lusalusu ayi bavutuka kubue sadila Yave. Ayi tuzebi ti zikhomba ziwombo batatuka kimvuka ki Yave, mvawu batomba kuvutuka. Mbi tulenda vanga muingi kuba sadisa? Mu dilongi dinkuiza, tunkuiza buela tubila matedi mawu.
NKUNGA 139 Wu Kiyindula mu Nza Yimona
^ Lut. 5 Kibila mbi bisadi binkaka bi Yave bavongila mu kiphevi ayi batatukila kimvuka kiandi? Ayi buidi Yave kaba tadilanga? Mu dilongi adidi, tunkuiza baka mimvutu mi biuvu abiobi. Mvandi, tunkuiza tubila mbi tulenda longuka mu phila Yave kasadisila bisadi biandi mu thangu yikhulu bantatuka mu mua thangu.
^ Lut. 2 TSUDUKUSU YI BIKUMA: Bo nsamuni kamvanga ngonda zisambamu mu kukhambu basika mu kisalu ki kusamuna, ba kutedilanga mutu wuvonga mu kiphevi. Vayi kheti bobo, batu bavonga mu kiphevi badi zikhomba zitu. Ayi befu tuba zolanga beni.
^ Lut. 4 Bavingisa mazina mankaka mu dilongi adidi.
^ Lut. 10 Dilongi dinlanda, dinkuiza sudikisa buidi bakulutu ba kimvuka balenda landikinina mambu nsungi wu mamemi kabe vanganga.
^ Lut. 60 MAMBU MADI MU ZIFIKULA: Nsungi wu mamemi musi Isaeli, waba kuazukanga beni mu thangu dimemi diandi diaba zimbalanga. Nandi waba bilanga diawu ayi ku disadisa divutuka mu phaka. Minsungi mi kiphevi voti bakulutu ba kimvuka bubu, mawu mvawu bamvanganga.
^ Lut. 64 MAMBU MADI MU ZIFIKULA: Bo kantedimina dikalu di nanguka, khomba yimueka wuvonga mu kiphevi, wummona Zimbangi ziwadi zi Yave badi mu mayangi bo bamvana kimbangi ki baboso.
