DILONGI 34
NKUNGA 107 Yave Ntungulu Wumboti wu Luzolo
Buidi Bakulutu ba Kimvuka Bammonisinanga Luzolo ayi Kiadi Kuidi Batu Bavola Disumu Dingolo?
“Nzambi mu luzolo, wummeka kusadisa kunyongina masumu.”—LOM. 2:4.
Mambu Tuanlonguka
Buidi bakulutu ba kimvuka balenda sadisila khomba bevola disumu dingolo?
1. Mambu mbi bankaka bamvolanga masumu mangolo bavanga?
Mu dilongi dibedi, befu tumueni buidi Polo kasadisila kuzonza, mambu matedi mutu wuvola disumu dingolo ku Kolintu. Bo kakhambu nyongina masumu mandi, nandi wubotuka mu kimvuka. Vayi dedi bummonisina matangu babongila ntu diambu wu dilongi adidi, bankaka bamvolanga masumu mangolo balenda nyongina masumu mawu. Mawu mammonikanga kibila Yave wuba sadisanga kuvanga mawu. (Lom. 2:4) Buidi bakulutu ba kimvuka balenda sadisila mutu bevola disumu dingolo kunyongina mawu?
2-3. Mbi tufueti vanga befu kuzaba ti khomba mueka bevola disumu dingolo ayi kibila mbi?
2 Ava bakulutu basadisa mutu bevola disumu dingolo, bawu bafueti zaba buboti mambu mabe monika. Abu befu kuzaba ti khomba mueka bevola disumu dingolo dilenda kumvanga kubotuka mu kimvuka? Befu tufueti kunkindisa kayoluka na bakulutu ba kimvuka.—Yesa. 1:18; Mava. 20:28; 1 Pet. 5:2.
3 Abu boti khomba beni wumanga kutomba lusalusu lu bakulutu ba kimvuka? Ma kumonika befu tufueti zabikisa mawu kuidi bakulutu ba kimvuka, muingi bansadisa. Kuvanga mawu yidi mbonosono yi luzolo, kibila befu tuisintomba ko khomb’itu kafua mu kiphevi. Befu kumbikila bobo muingi kutatamana kuvanga mambu mambi, mawu malenda buela tula kikundi kiandi na Yave va kingela. Mvandi kalenda vanga batu batadila bubi kimvuka ki Yave. Diawu mu kibakala ayi luzolo tuidi kuidi Yave ayi kuidi nandi, befu tufueti zabikisa mawu kuidi bakulutu ba kimvuka.—Minku. 27:14.
BUIDI BAKULUTU BA KIMVUKA BANSADISILANGA BATU BABE VOLA DISUMU DINGOLO?
4. Mbi bakulutu ba kimvuka bamvanganga bo khomba kamvola disumu dingolo?
4 Bo khomba mu kimvuka kamvola disumu dingolo, dingumba di bakulutu bansolanga bakulutu batatu mu bawu bazonza mambu beni. a Bawu bafueti zaba ndilu’awu ayi bafueti kukikulula. Bo bamvanga mangolo muingi kusadisa mutu bevola disumu dingolo kunyongina mambu kabe vanga, bawu bantebukanga monyo ti balendi kunkuika ko kubalula mayindu mandi. (Deute. 30:19) Bakulutu ba kimvuka bafueti zaba ti bakana ko baboso bankikininanga lusalusu bantambulanga dedi ntinu Davidi. (2 Samu. 12:13) Bankaka balenda sola kumanga kuawu kukikinina malongi ma Yave. (Ngene. 4:6-8) Vayi bakulutu ba kimvuka, bafueti vanga mamoso bannunga, muingi kukuedika kusadisa mutu beni. Minsua mbi mi Kibibila mi kuba tuadisanga bo bankutakana ayi mutu bevola disumu dingolo?
5. Dilongi mbi bakulutu ba kimvuka bantebukilanga monyo bo bankutakana ayi mutu bevola disumu dingolo? (2 Timoti 2:24-26) (Tala foto.)
5 Bakulutu ba kimvuka bantadilanga mutu bevola disumu dingolo buka dimemi di Yave dizimbala didi beni luvalu. (Luk. 15:4, 6) Diawu, bo bawu bankutakananga ayi mutu bevola disumu dingolo bawu bammonisanga ko lukasu mu phila bawu bantubila, mu mambu banyindula ayi mu mambu bantuba. Ayi mvandi bawu batadilanga ko lukutukunu alolo buka luaku muingi bawu bavanga to biuvu ayi kubaka bivisa. Vayi bawu bammonisanga zikhadulu zidi mu 2 Timoti 2:24-26. (Tanga.) Mvandi, bakulutu ba kimvuka bantatamananga kuba balembama, kumonisa luzolo ayi mamboti bo bamvanga mangolo muingi kusadisa mutu bevola disumu.
Dedi minsungi mi mamemi mu thangu yikhulu, bakulutu ba kimvuka bamvanganga mangolo muingi kutomba ayi kusadisa mamemi mazimbala (Tala mvandi lutangu 5)
6. Buidi bakulutu ba kimvuka bankubikilanga mintima miawu ava kukutakana ayi mutu bevola disumu dingolo? (Loma 2:4)
6 Bakulutu ba kimvuka bankubikanga mintima miawu. Bawu banlandakananga kifuani ki Yave mu phila banzonzilanga mambu ayi mutu bevola disumu dingolo. Bawu bantebukilanga monyo mambu Polo katuba: ‘Nzambi mu luzolo, wummeka kutusadisa kunyongina masumu.’ (Tanga Loma 2:4.) Bakulutu ba kimvuka bafueti tebukila monyo ti, kiyeku kiawu kitheti kidi kuba minsungi mu kulandakana thuadusulu yi Klistu. (Yesa. 11:3, 4; Mat. 18:18-20) Ava bawu bakutakana ayi mutu bevola disumu dingolo, mua dingumba di bakulutu bansambilanga ayi banyindulanga makani mawu ava kukutakana yandi: ma kunsadisa kunyongina masumu mandi. Bawu bansadilanga Kibibila, bilongulu bitu ayi bandindanga nduenga kuidi Yave. Bawu banyindulanga mbi bawu bankuiza tomba kuzaba matedi kimutu ki khomba beni, mambu mantuadisanga phil’andi yi kuyindudila ayi zikhadulu ziandi.—Zinga. 20:5.
7-8. Buidi bakulutu ba kimvuka banlandikininanga mvibudulu wu Yave bo bankutakana na mutu bevola disumu dingolo?
7 Bakulutu ba kimvuka banlandakananga mvibudulu wu Yave. Bawu bantebukanga monyo phila Yave kazonzila mambu matedi batu bavola disumu dingolo mu thangu yikhulu. Dedi, mu mvibudulu, Yave wuyoluka na Kaini ayi wunzabikisa mbi malenda kummonikina na kumanga kubalula mayindu mandi ayi wunkamba ti wunkuiza nsakumuna na kuntumukina. (Ngene. 4:6, 7) Yave wulubula Davidi mu kusadila mbikudi Natani, wusadila kifuani ki nyikuna ntim’andi. (2 Samu. 12:1-7) Ayi Yave ‘wutatamana kufila’ mimbikudi ‘khumbu ziwombo’ kuidi dikabu di Isaeli kheti bawu bambalukila. (Yele. 7:24, 25) Nandi kasa temina ko batu abobo banyongina theti masumu mawu muingi kaba sadisa. Vayi Yave wutuama ntuala muingi kaba sadisa kunyongina masumu mawu.
8 Bakulutu ba kimvuka banlandakananga kifuani ki Yave bo bansadisa mutu bevola disumu dingolo. Dedi bummonisina 2 Timoti 4:2 bawu bankolukanga mu “mvibudulu woso” bo bankutakana ayi mutu bevola disumu dingolo. Nkulutu wu kimvuka kafueti zaba ndilu’andi mu mamoso ayi kutebulanga monyo mutu bevola disumu ti nandi zebi ti mutu beni, wuntombanga kuvanga mamboti. Nkulutu wu kimvuka, na kuba mu nganzi voti kufuemina mutu beni, kalenda vanga mutu bevola disumu kamanga kukuwa malongi mandi ayi kukhambu nyongina masumu mandi
9-10. Buidi bakulutu ba kimvuka balenda sadisila mutu kuvisa mbi bibe kunnata kubua mu disumu?
9 Bakulutu ba kimvuka bamvanganga mangolo muingi bavisa mambu mbi mabe vanga mutu beni kubua mu disumu dingolo. Dedi, bukiedika ti khomba beni, malembe malembe wutona kulenza ndongukulu’andi yi Kibibila voti kisalu ki kusamuna? Bukiedika ti nandi wubika kuvanga minsambu voti minsambu miandi, misiala ko beni tsundu? Bukiedika ti nandi wubika mayindu mambi mantuadisa? Ove, bukiedika ti nandi wuyiza ba minkangulu mimbi ayi kuviokisa thangu na biuma Yave kanlendanga? Buidi mambu amomo mabaludila phil’andi yi kuyindudila? Bukiedika ti nandi wunkikinina ti disumu dingolo kabe vola dibentatula kuidi tata’andi Yave?
10 Bo Bakulutu ba kimvuka bamvana biuvu binkinza kuidi mutu bevola disumu dingolo, bafueti ba keba keba muingi babika kukota mu mambu ma mutu beni bakhambulu nsua wu kuzaba. Vayi mu luzolo bawu bankuiza nsadisa kukoluka ayi kumona mbi bibe kunnata kubua mu disumu beni. (Zinga. 20:5) Mvandi, muingi kunsadisa, bawu balenda sadila bifuani muingi kusadisa mutu beni kuyindula ayi kumona buidi mambu kabe vanga, mabe bifisila kikundi kiandi na Yave dedi bo Natani kavangila na ntinu Davidi. Ḿba mu lukutukunu lutheti ayi mutu beni, nandi wunkuiza tona kumona kiunda mu mambu kabe vanga ayi mu kibila akiokio kalenda tona kunyongina mawu.
11. Buidi Yesu katadila batu ba masumu?
11 Bakulutu ba kimvuka bamvanganga mangolo muingi kulandakana kifuani ki Yesu. Bo Yesu kayoluka ayi Saulu musi Tarsu, Yesu wunyuvula: “Saulu, Saulu, kibila mbi widi mu kukhuamisina?” Mu phila ayoyo, Yesu wusadisa Saulu kuyindula mambu mambi kaba vanga. (Mava. 9:3-6) Matedi Yezabeli, Yesu wutuba: “Minu yimvana thangu muingi kabalula mavanga mandi.”—Nzai. 2:20, 21.
12-13. Buidi bakulutu ba kimvuka balenda bikila thangu muingi mutu bevola disumu kanyongina mawu? (Tala mvandi foto)
12 Mu kulandakana kifuani ki Yesu, bakulutu ba kimvuka bamonisanga ko lukasu mu kuyindula ti khomba bevola disumu kalendi nyongina ko masumu mandi. Batu bankaka bamvolanga disumu dingolo, banyonganga masumu mawu, muna lukutukunu lutheti bambanga na mua dingumba di bakulutu ba kimvuka. Vayi kuidi bankaka ḿba vankuiza tombulu kuba bikila mua thangu. Diawu bakulutu balenda kutakana ayi mutu bevola disumu dingolo khumbu ziwombo. Ḿba bo lukutukunu lutheti lumvioka, khomba bevola disumu kalenda yindula beni matedi mambu babe nkamba. Ayi ḿba kalenda kukikulula ayi kusambila kuidi Yave. (Minku. 32:5; 38:18) Mu phila ayoyo mu lukutukunu lunkaka ḿba nandi kalenda ba mayindu masuasana kena mo kaba mu lukutukunu lutheti.
13 Muingi kusadisa mutu bevola disumu kunyongina masumu mandi, bakulutu ba kimvuka bafueti monisa luzolo ayi mamboti. Bawu bantombanga ayi bansambilanga muingi Yave kasakumuna mangolo bawu bamvanga ayi kasadisa khomba bevola disumu, kuvisa mambu kabe vanga ayi kanyongina masumu mandi.— 2 Ti. 2:25, 26.
Bakulutu ba kimvuka, balenda kutakana khumbu ziwombo na mutu bevola disumu dingolo, muingi kumvana thangu yi kubalula phil’andi yi kuyindudila (Tala lutangu 12)
14. Nani wufueti tambula nzitusu bo khomba bevola disumu dingolo kunyongina masumu mandi?
14 Bo mutu bevola disumu dingolo kanyongina masumu mandi, mawu mantuadisanga beni mayangi. (Luk. 15:7, 10) Nani fueti tambula nzitusu mu mawu? Bakulutu ba kimvuka? Tebuka monyo mambu Polo kasonika matedi batu bavola disumu dingolo: “Ḿba Nzambi kalenda kuba vana luaku lu kubalula mavanga mawu.” (2 Ti. 2:25) Mutu wufueni tambula nzitusu bo khomba wuvola disumu kanyongina masumu mandi, Yave, bika kuandi mutu wunkaka. Polo wutatamana kutuba mambu mamboti mammonikanga bo mutu kanyongina masumu mandi. Mutu beni, wumbuela bakanga nzailu yi kiedika ayi mawu ma kunsadisanga kavuka mu mintambu mi Satana.—2 Ti. 2:26.”
15. Buidi bakulutu ba kimvuka bankuiza tatamana kusadisa khomba wunyongina masumu mandi?
15 Bo khomba bevola disumu dingolo kanyongina masumu kabe vanga, bakulutu ba kimvuka bankuiza tatamana kuentalanga muingi kunsadisa, kukindisa kiminu kiandi, kunsadisa kutatamana kunuana mu zithotolo kamviokila ayi kuvanga mambu mamboti. (Ebe. 12:12, 13) Bukiedika, bakulutu ba kimvuka basinkuiza zaba ko kuidi woso kuandi mutu mambu mambi khomba beni kavanga. Vayi mambu mbi bakulutu ba kimvuka balenda zabikisa kuidi kimvuka?
“SEMBILA VA NTUALA KIMVUKA”
16. Dedi bumonisa 1 Timoti 5:20, mbi Polo kaba tomba kutuba bo kasadila kikuma kimvuka?
16 Tanga 1 Timoti 5:20. Polo wusonika mambu amomo kuidi Timoti wuba mvandi nkulutu wu kimvuka muingi kazaba bu kuzonzilanga mambu matedi batu “bamvolanga masumu.” Mbi nandi kaba tomba kutuba? Mu kusadila kikuma “kimvuka”, Polo kabasa tomba ko kutubila zikhomba zioso. Vayi, nandi waba tomba kutubila nkadu batu mu kimvuka bazaba masumu beni. Ḿba bawu bamona bo khomba kaba vola disumu beni voti ḿba khomba beni wuba kamba mambu kavanga. Mu keba keba, bakulutu ba kimvuka balenda kuba tela ayi kuba zabikisa ti babe zonza mambu beni ayi khomba beni betambula tsembolo.
17. Boti batu bawombo mu kimvuka babe zaba disumu khomba kabe vola voti bankuiza zaba diawu, ndubu mbi balenda vana mu kimvuka ayi kibila mbi?
17 Thangu zinkaka ḿba masumu beni bamana zaba mawu kuidi batu bawombo mu kimvuka voti bawombo bankuiza zaba mawu. Ma kumonika, buna kikuma “kimvuka” kinsundula zikhomba zioso mu kimvuka. Diawu, nkulutu wumueka wu kimvuka kalenda vana ndubu mu kimvuka muingi kuzabikisa zikhomba zioso ti, khomba bevola disumu beni betambula tsembolo. Kibila mbi? Polo wusudikisa: “Muingi mawu maba ndubu kuidi bankaka”.
18. Mbi bakulutu ba kimvuka bamvanganga bo muana wubotama wukhambu dukisa 18 di mimvu kamvola disumu dingolo? (Tala mvandi foto)
18 Mbi bakulutu ba kimvuka bamvanganga bo muana wubotama wukhambu dukisa 18 di mimvu kamvola disumu dingolo? Dingumba di bakulutu bansolanga bakulutu buadi muingi bakutakana na muana beni ayi matata voti batu bankaka badi Baklistu ba kunkiebanga. Bakulutu ba kimvuka bankuiza tomba kuzaba mambu mbi matata badi mu kuvanga muingi kusadisa muan’awu kunyongina masumu mandi. Boti muana beni widi mayindu mamboti ayi wunkikinina lusalusu lu matata, buna bakulutu beni basinkuiza bue nata ko mambu beni kuntuala. Ayi mvandi buboti kutebukanga monyo ti Yave wuvana kiyeku kuidi matata ki kusembila bana bawu mu luzolo. (Deute. 6:6, 7; Zinga. 6:20; 22:6; Efe. 6:2-4) Vayi bumviokila thangu bakulutu ba kimvuka bala tombanga kuzaba kuidi matata, boti muana beni wukhidi tambula lusalusu luntombulu. Abu boti muana wubotama wukhambu dukisa 18 di mimvu wumvola disumu dingolo, wummanga lusalusu ayi wuntatamana kuvanga mambu mambi? Ma kumonika, bakulutu ba kimvuka bankuiza kutakana yandi ayi matata mandi voti Baklistu bankaka bakunkiebanga.
Bo muana wukhambulu wubotama kamvola disumu dingolo, bakulutu buadi ba kimvuka, bankutakana na muana beni ayi matata mandi voti batu bankaka badi Baklistu ba kunkiebanga (Tala lutangu 18)
“YAVE WIDI LUZOLO LUWOMBO MU NTIMA AYI WIDI NKUA KIADI”
19. Buidi bakulutu ba kimvuka bamvangilanga mangolo muingi kulandakana kifuani ki Yave bo banzonza mambu matedi disumu dingolo?
19 Bakulutu ba kimvuka bansolu muingi kuba mu mua dingumba dintadila mambu matedi disumu dingolo, bantambula vantuala Yave kiyeku ki kudiodisa kimvuka kiandi. (1 Ko. 5:7) Bawu mvandi bantomba mutu bevola disumu kanyongina masumu mandi boti kuba. Muingi banunga kuvanga mawu, bakulutu ba kimvuka bafueti ba mayindu mamboti ayi kuvanga mamoso bannunga, mu lufiatu ti mutu beni wunkuiza nyongina masumu mandi. Kibila mbi? Kibila bawu bantomba kulandakana kifuani ki Yave widi “luzolo luwombo mu ntima ayi widi nkua kiadi.” (Tia. 5:11) Tala mambu mvuala Yoane kasonika matedi mambu amomo. Nandi wusonika: “Bana bami ba luzolo, yiku lusonikina mambu amama muingi lubika vola disumu. Vayi boti mutu bevola disumu, tuidi nsadisi wusonga widi va kimueka na Tata: Yesu Klistu.”— 1 Yoa. 2:1.
20. Mbi tuala tubila mu dilongi dinlanda?
20 Kiadi ayi kiunda kuzaba ti, khumbu zinkaka Baklistu bankaka bammanganga kunyongina masumu mawu. Ma kumonika, batu abobo bambotukanga mu kimvuka. Buidi bakulutu ba kimvuka banzonzilanga mambu amomo? Mawu tunkuiza tubila mu dilongi ditsuka di kikhuku akiki ki malongi.
NKUNGA 103 Bakulutu ba Kimvuka —Nkhayilu wu Yave
a Kumbusa, bakulutu ba kimvuka baba solanga muingi kutadila mambu na mutu bevola disumu dingolo, baba kuba tedilanga, dingumba di lufundusu. Vayi bo buidi ti kiyeku kiawu kisiko to kufundisa, diawu tuisi bue sadilanga ko dizina adiodio. Vayi tuala batedilanga to, mua dingumba di bakulutu.
