DILONGI 33
NKUNGA 130 Ba Nkua Nlemvu
Buidi Yave Kantomba Kimvuka Batadila Batu Bamvola Masumu Mangolo?
“Boti mutu bevola disumu, tuidi nsadisi.” —1 YOANE 2:1.
MAMBU TUANLONGUKA
Mbi tulenda longuka mu phila bazonzila mambu matedi dibakala dimueka divola disumu dingolo ku kimvuka ki Kolintu mu sekulu yitheti.
1. Mbi Yave kantomba mu batu boso?
YAVE wuvanga batu boso na luaku lu kusola. Ngie wunsadilaga luaku beni bo wumbakanga makani. Yave kantomba baboso babaka makani malutidi nkinza ma kukivana kuidi nandi ayi kuba mu khati dikanda diandi. Kibila mbi? Kibila nandi wunzolanga batu ayi wuntomba mamboti mu bawu. Nandi mvandi wuntomba batu boso baba bakundi bandi ayi bazinga mvu ka mvu.—Deute. 30:19, 20; Ngala. 6:7, 8.
2. Mbi Yave kantomba mu batu boso ka banyongini’abu ko masumu mangolo bavola? (1 Yoane 2:1)
2 Vayi Yave kakuikanga to ni mutu kansadila. Nandi wumbikanga kadika mutu kasola mbi kantomba kuvanga. Abu boti kisadi ki Yave kibotama wumbundula nsiku’andi, mu kuvola disumu dingolo? Boti nandi kasinyongina ko mambu kabe vanga, buna bafueti kumbotula mu kimvuka. (1 Kol. 5:13) Vayi kheti bobo, Yave wuntomba batu boso ka banyongini’abu ko masumu mangolo bavola, bavutuka kuidi nandi. Ayi kiawu kibila kinkinza nandi katuadisila khudulu—muingi batu banyonginanga masumu mawu babaka nlemvu. (Tanga 1 Yoane 2:1) Tat’itu yi luzolo, wuntumisa baboso bamvolanga masumu muingi banyongina mawu.— Zaka. 1:3; Lom. 2:4; Tia. 4:8.
3. Mbi tuenlonguka mu dilongi adidi?
3 Yave wuntomba muingi befu tutadila masumu ayi batu bamvolanga masumu mu phila nandi kaba tadilanga. Ayi mu dilongi adidi tunkuiza tubila buidi tulenda vangila mawu. Mu dilongi adidi tuenlonguka, (1) buidi bazonzila mambu matedi dibakala dimueka wuvola disumu dingolo ku kimvuka ki Kolintu mu sekulu yitheti, (2) zithuadusulu mbi mvuala Polo kabavana bo mutu beni kanyongina masumu mandi, ayi (3) mbi kinongo akiokio ki Kibibila kitulonga matedi phila Yave kantadilanga baklistu bamvola disumu dingolo.
BUIDI BAZONZILA MAMBU MATEDI DISUMU DINGOLO MU SEKULU YITHETI?
4. Mambu mbi mamonika mu kimvuka ki Kolintu mu sekulu yitheti? (1 Kolintu 5:1, 2)
4 Tanga 1 Kolintu 5:1, 2. Mu viage yintatu Polo kavanga mu kisalu ki misioni, nandi wuyuwa mambu maba tatisa beni zikhomba mu kimvuka kimona ku Kolintu. Khomba mueka wu dibakala mu kimvuka waba bundananga nyitu na nkazi wu tat’andi. Diba diambu diphasi ayi Polo wutuba ti mu thangu beni mambu ma phila ayoyo madi “mambu ma khambu monikanga kuidi batu ba nza.” Zikhomba mu kimvuka ki Kolintu, basa vanga ko ni diambu ayi ḿba bawu bayangalala mu mawu. Ḿba bankaka bayindula ti mu kumbika mu kimvuka, yiba phila Yave kammonisina nlemvu’andi ayi phisulu’andi kuidi batu ba masumu. Vayi Yave katadilanga ko masumu mu khati kimvuka kiandi. Mu kuvanga mambu amomo mambi, dibakala beni waba bivisa kimvuka ki Yave. Ayi boti nandi wutatamana mu kimvuka, khanu bankaka balandakana kifuani kiandi kimbi. Vayi mbi Polo kakamba kimvuka kavanga?
5. Mbi Polo kakamba zikhomba mu kimvuka bavanga ayi mbi mawu mansundula? (1 Kolintu 5:13) (Tala fikula.)
5 Tanga 1 Kolintu 5:13. Mu thuadusulu yi phevi yinlongo, Polo wusonika nkanda ayi muawu kavanina thuadusulu ti bafueti botula dibakala dikhambu nyongina masumu mandi mu kimvuka. Buidi Baklistu bakuikama bantadila? Polo wuba kamba ‘babika ba kithuadi’ na mutu beni. Mbi mawu maba sundula? Polo wusudikisa mvandi ti mawu maba sundula “ni kheti kudia na mutu beni.” (1 Ko. 5:11) Ngie kudia va kimueka ayi mutu wunkaka, mawu malenda kulunata kuba kikundi. Diawu Polo kaba tomba kutuba ti, vaba tombulu zikhomba mu kimvuka babika viokisanga thangu na dibakala beni. Mu phila ayoyo bawu basa kumbika ko kabivisa kimvuka. (1 Ko. 5:5-7) Mvandi mu kukhambu ba yandi kithuadi, mawu masadisa mutu beni muingi kazaba ti nandi wutatuka beni zinzila zi Yave ayi kumona zitsoni mu mambu kavanga ayi mu phila ayoyo kunyongina mambu kavanga.
Mu thuadusulu yi phevi yinlongo, Polo wukamba zikhomba ku Kolintu babotula mu kimvuka mutu wukhambu nyongina disumu diandi (Tala lutangu 5)
6. Ndandu mbi nkanda wu Polo wutuadisa kuidi kimvuka ki Kolintu ayi kuidi dibakala divola disumu dingolo?
6 Bo kafila nkanda kuidi Baklistu ku Kolintu, Polo wutona kuyikuvusa buidi bawu bankuiza tadila wawu. Nandi wuyangalala beni bo Titu kantuadila tsangu ti bawu bayangalala mu nkanda beni. (2 Ko. 7:6, 7) Bawu balandakana zithuadusulu ziba muna. Ayi bo vavioka mua zingonda tona Polo kafila nkand’andi, mutu wuvola disumu beni wunyongina masumu mandi. Nandi wubalula zikhadulu ziandi, phil’andi yi kuyindudila ayi wutona kuzingila mu zithumu zisonga zi Yave. (2 Ko. 7:8-11) Buabu, mbi Polo kakamba kimvuka bavanga?
BUIDI VABA TOMBULU KIMVUKA KITADILA MUTU BENYONGINA DISUMU DINGOLO?
7. Bo babotula mutu wuvola disumu dingolo mu kimvuka, ndandu mbi mawu matuadisa? (2 Kolintu 2:5-8)
7 Tanga 2 Kolintu 2:5-8. Polo wukamba kimvuka ku Kolintu matedi dibakala dikhambu nyongina masumu mandi ti “tsembolo benu boso mube mvana, yifueni kuandi mu nandi.” Polo waba tomba kutuba ti tsembolo bamvana yintuadisa ndandu. Ndandu mbi? Mawu mansadisa kunyongina masumu mandi.—Ebe. 12:11.
8. Diambu mbi dinkaka Polo kakamba zikhomba ku kimvuka ki Kolintu bavanga?
8 Bo dibakala divola disumu dingolo kanyongina diawu, Polo wukamba kimvuka ki Kolintu: “Mufueti kunlemvukila mu ntima woso ayi kumbomba” ayi wubue tuba “monisa luzolo luinu mu nandi.” Mu kutuba mambu amomo, Polo kabasa tomba to kutuba ti bafueti kumbika kavutuka mu kimvuka ki Yave. Vayi nandi waba tomba bawu bamonisa mu mavanga ayi mu thubulu ti babe nlemvukila mu bukiedika ayi baba kunzolanga beni. Mu phila ayoyo bawu bankuiza monisa ti babe vana ndizulu yimboti kuidi mutu beni mu kimvuka.
9. Kibila mbi ḿba bankaka bamuena phasi kuvitika dibakala dinyongina masumu mandi?
9 Bukiedika ti bankaka mu kimvuka ki Kolintu, bamona phasi kuvitika va khati’awu dibakala adinani dinyongina masumu mandi? Kibibila kisintuba ko, vayi ḿba mawu mamonika. Kibila, mambu dibakala adinani kavanga, matuadisa beni ziphasi mu kimvuka ayi mba bankaka baba mu nganzi, kibila nandi wuba lueka ntima. Bankaka mba bayindula ti yisa bako mbonosono yi busonga, kuvitika kavutuka mu kimvuka, kibila bawombo babe vanga mangolo muingi batatamana kuba bakuikama kuidi Yave. (Dedikisa mawu na Luk. 15:28-30.) Vayi, kheti bobo, kibila mbi dibela diambu dinkinza kumonisa luzolo lukiedika kuidi khomba wuvutuka?
10-11. Khanu mambu mbi mamonika boti bakulutu ba kimvuka bamanga kuvutula mu kimvuka dibakala dinyongina masumu mandi?
10 Yindula khanu mambu mbi mamonika, boti bakulutu ba kimvuka ku Kolintu bamanga kubikila dibakala dinyongina masumu kuvutuka mu kimvuka. Ove, yindula boti nandi wuvutuka vayi kimvuka kimanga kummonisa luzolo. Khanu mambu mbi mamonika? Khanu nandi wubua mu “kiunda kingolo.” Mansundula ti khanu wuyindula ti kasiedi ko bu kubue bela kikundi na Yave ayi kuba mu kimvuka kiandi. Voti, khanu wuvonga kuandi mu mangolo kabe vanga muingi kuvutula kikundi kiandi na Nzambi.
11 Ayi dilutidi phasi, boti zikhomba mu kimvuka bamanga kulemvukila dibakala wunyongina masumu mandi, khanu baveka batula kikundi kiawu na Yave va kingela. Mu phila mbi? Kibila boti basa kunlemvukila, khanu bawu balandakana ntungulu wu Satana widi mutu wu lukasu ayi wukhambu lemvukilanga. Vayi Yave widi nkua nlemvu ayi wummonanga batu kiadi. Boti basa kunlemvukila, khanu bawu baba bisadulu bi Satana muingi kuvonda kiphevi ki dibakala beni.—2 Ko. 2:10, 11; Efe. 4:27.
12. Khanu buidi kimvuka ku Kolintu balandikinina kifuani ki Yave?
12 Buabu, khanu buidi kimvuka ku Kolintu balandikinina kifuani ki Yave bika ki Satana? Mu kulandakana phila Yave kantadilanga batu banyonginanga masumu mawu. Tala mambu minsoniki mi Kibibila batuba matedi Yave. Davidi wutuba “Nzambi widi nkua mamboti ayi widi wukubama muingi kulemvukila”. (Minku. 86:5) Mika wusonika: ‘Nani widi Nzambi buka ngiewu, wunlemvukilanga zinzimbala ayi wunzimbakananga masumu?’ (Mika 7:18) Ayi Yesaya wutuba: “Bika bankua mambibabika khadulu ayoyo ayi bankua buphunya babalula mayindu mawu. Bika bavutuka kuidi Yave wunkuiza bamona kiadi, bavutuka kuidi Nzamb’itu wunlemvukilanga mu ntima woso.’—Yesa. 55:7.
13 Kibila mbi bakulutu ba kimvuka babikila dibakala dinyongina masumu mandi kavutuka mu kimvuka? (Tala quadro “ Thangu Mbi Dibakala Wuvola Disumu Dingolo ku Kolintu Kavutukila mu Kimvuka?”)
13 Vasa vioka ko zingonda ziwombo, dibakala beni wunyongina masumu mandi. Ayi zikhomba ku Kolintu, bantambula ayi bamvana ndizulu yimboti mu kimvuka. Kibila mbi? Muingi kulandakana ntungulu wu Yave ayi kumonisa ti bawu baba kunzolanga. Mu kulandakana thuadusulu Polo kaba vana yi kuntambula mu kimvuka, bawu bamonisa ti baba “tumukinanga mu mambu moso.” (2 Ko. 2:9) Tsembolo katambula yinnata kanyongina masumu mandi. Mu kibila akiokio, vasa tombulu ko bakulutu ba kimvuka kuviokisa thangu yiwombo muingi kumvutula mu kimvuka ki Yave.
YINDULA MU BUSONGA AYI NLEMVU WU YAVE
14-15. Mbi tulenda longuka matedi phila bazonzila diambu ditedi dibakala, wuvola disumu dingolo ku Kolintu? (2 Pet. 3:9) (Tala mvandi fikula.)
14 Yave wutuma basonika ayi bakieba mambu mamonika ku Kolintu, muingi “kutu longa.” (Lom. 15:4) Phila bazonzila mambu ku Kolintu yi tulonga ti, Yave katadilanga ko bobo masumu mangolo mu khati dikabu diandi. Nandi kamonanga ko “kiadi” batu bakhambu nyongina masumu mawu, mu kuba bika batatamana kuba kithuadi na bisadi biandi bikuikama. Yave widi nkua nlemvu, vayi nandi kabikilanga ko kadika mutu kavangila mambu mu phil’andi; ayi kabalulanga ko minsiku miandi muingi kukuangidika batu. (Yud. 4) Na kubika bankaka bavangila mambu mu phila bantombila, yisinkuiza ba ko mbonosono yi kiadi ayi mawu malenda tula batu bankaka va kingiela mu kimvuka.—Zinga. 13:20; 1 Ko. 15:33.
15 Kheti bobo, befu tuzebi ti Yave kasintomba ko ni mutu kabungu. Nandi wutomba kuvukisa batu boso kalenda nunga. Nandi wummonanga kiadi batu bambalulanga mintima miawu ayi bantomba kuba yandi kikundi kimboti. (Yehe. 33:11; Tanga 2 Petelo 3:9.) Diawu, bo dibakala ku Kolintu kanyongina masumu mandi ayi kabika kubue vanga mawu, Yave wusadila Polo kasudikisa kimvuka ti, baboso bafueti kunlemvukila ayi kubue ntambula mu kimvuka.
Mu kulandakana kifuani ki nlemvu ayi luzolo lu Yave, kimvuka, batambula mu luzolo mutu wunyongina disumu diandi ayi wuvutuka mu kimvuka (Tala lutangu 14-15)
16. Buidi ngie bemuena, matedi kulonguka phila bazonzila diambu ditedi dibakala wuvola disumu dingolo ku Kolintu?
16 Kufiongunina buidi bazonzila diambu adiodio, matusadisa kumona phila Yave kammonisanga luzolo ayi busonga buandi. (Minku. 33:5) Mawu mabe tubuela phuila yi kuzitisa Yave. Ayi buboti kutebuka monyo ti befu boso tuidi bankua masumu ayi tuntomba nlemvu’andi. Befu boso tufueti vutulanga matondo kuidi Yave, bo katuvana khudulu, kibila yawu yinsadisanga tutambula nlemvu wu masumu. Nyenzi beni kuzaba ti Yave wunzolanga dikabu diandi mu bukiedika ayi wuntomba mamboti mitu.
17. Biuvu mbi tuala baka mimvutu mu manlongi manlanda?
17 Buabu, buidi banzonzilanga mambu matedi batu bamvolanga masumu mangolo bubu? Buidi bakulutu ba kimvuka balenda landikinina kifuani ki Yave ki kusadisa mutu bevola disumu dingolo ayi benyongina diawu? Mbi zikhomba bafueti vanga, bo bakulutu ba kimvuka bambaka makani ma kubotula voti kuvutula mutu mu kimvuka? Tuala baka mimvutu mi biuvu abiobio mu malongi manlanda.
NKUNGA 109 Tuzolasananga mu Ntima Woso
