DILONGI 31
NKUNGA 12 Yave, Nzambi Yilutidi Zangama
Yave, Nzambi Yilutidi Zangama
“Nzambi wuzola batu mu nza, diawu kavanina Muan’andi wumueka to.”—YOA. 3:16.
MAMBU TUANLONGUKA
Tuammona buidi Yave ka tusadisilanga kunuana nzingu wu masumu ayi kunkuangidika. Tunkuiza mona mvandi, mbi kavanga muingi ka tuvana luaku lu kuzinga mvu ka mvu mu khambu masumu.
1-2. (a) Mbi binsundula disumu ayi buidi tulenda nungina diawu? (Tala mvandi “Tsudukusu yi bikuma.”) (b) Mbi tunkuiza tubila mu dilongi adidi ayi mu malongi mankaka mu Kibanga ki Nsungi akiki? (“Kuidi Mutu Wuntanga Kilongulu Akiki.”)
WUNTOMBA kuzaba nate kitesu mbi Yave ka kuzodilanga? Muingi wuzaba mvutu, longuka mambu kavanga muingi ka kukula mu disumu ayi lufua. Disumu a didi mbeni ngie wulendi nunga ko ngie veka. Befu boso tunsumukanga kadika kilumbu. Diawu tumfuilanga mu kibila ki disumu. (Lom. 5:12) Vayi vadi tsangu yimboti. Yave wu tuvukisa mu disumu ayi lufua!
2 Kuvioka 6.000 di mimvu kumbusa, Yave Nzambi wunsadisanga batu ba masumu kunuana nzingu na masumu beni. Kibila mbi? Kibila nandi wutu zolanga beni. Nandi wummonisanga luzolo alolo, tona kaba vanga. Diawu kamvangilanga mamoso muingi kuba sadisa kunuana nzingu beni. Nandi zebi ti disumu, dinnatanga ku lufua ayi kasintomba ko tufua. Vayi kantomba tuzinga mvu ka mvu. (Lom. 6:23) Ayi mawu nandi kantomba mu kadika mutu mu befu. Mu dilongi adidi, tunkuiza tubila biuvu bitatu: (1) Kivuvu mbi Yave kavana kuidi batu ba masumu? (2) Buidi batu mu thangu yikhulu babakila lunungu lu Yave? (3) Mbi Yesu kavanga muingi kukula batu va kivika ki disumu ayi lufua?
KIVUVU MBI YAVE KAVANA KUIDI BATU BA MASUMU?
3. Buidi Adami ayi Eva bayiza bela batu ba masumu?
3 Bo Yave kavanga Adami ayi Eva, nandi waba tomba bawu bazingila mu mayangi. Nandi wuba vana kibuangu kimboti, nkhailu wu dikuela ayi kiyeku kinkinza, ki kubuta bana muingi kuwesa ntoto ayi kukitula wawu paladizu. Yave wuba vana nsiku wumueka wukhambu phasi. Nandi wuba kamba ti ba kubayisa wawu, bankuiza fua. Befu tuzebi mambu mbi mayiza monika. Mbasi yimueka wukhambu ba luzolo mu Nzambi ayi mu bawu, wuba vukumuna muingi bavanga diambu Nzambi kaba kandimina. Adami ayi Eva, basa fiatila ko mu tat’awu wu luzolo. Bawu bambayisa ayi bavanga mambu Satana kaba kamba. Diawu basumukina. Dedi bo tuzabidi, mambu Yave katuba, masalama. Mu kibila akiokio, bawu bayiza nuna ayi bafua.—Ngene. 1:28, 29; 2:8, 9, 16-18; 3:1-6, 17-19, 24; 5:5.
4. Kibila mbi Yave kanlendilanga disumu ayi buidi ka tusadisilanga kumfikama? (Loma 8:20, 21)
4 Yave wutuba basonika mambu beni mu kibila kitu. Mawu ma tusadisa kuvisa kibila mbi kanlendilanga disumu. Nandi wunlendanga disumu kibila, diawu di tutatulanga kuidi nandi ayi di tunatanga ku lufua. (Yesa. 59:2) Satana wunzolanga disumu ayi wuntuadisanga diawu. Diawu bo Adami ayi Eva basumuka, ḿba nandi wuyindula ti wuvunzikisa lukanu lu Yave mu batu. Vayi nandi kasa visa ko ti Yave widi luzolo luwombo. Yave kasa balula ko lukanu luandi matedi nkuna wu Adami ayi Eva. Nandi wunzolanga beni batu, diawu mu nsualu, nandi wuba vana kivuvu. (Tanga Loma 8:20, 21.) Yave wuzaba ti bawombo mu nkuna wu Adami, bala sola kunzola ayi kuntumukina. Diawu kaba vanina luaku muingi kuba kula mu disumu ayi lufua. Mbi Yave kavanga muingi kudukisa lukanu alolo?
5. Thangu mbi Yave kavanina kivuvu kuidi batu mu khumbu yitheti? Sudikisa. (Ngenesi 3:15)
5 Tanga Ngenesi 3:15. Yave wuvana kivuvu kuidi batu mu khumbu yitheti, mu thangu katuba mambu mbi mankuiza monikina Satana. Nzambi wubikula ti vala ba mutu wumueka wala vukisa batu. Nandi wala kosikisa Satana ayi kumanisa mambu moso mambi mamonika ku lumbu lu edeni. (1 Yoa. 3:8) Vayi theti, Satana wala vanga mamoso muingi bavonda wumueka mu nkunu awowo. Mawu matuadisa beni ziphasi kuidi Yave vayi nandi wuba wukubama muingi kuvukisa batu.
BUIDI BATU MU THANGU YIKHULU BABAKILA LUNUNGU LU YAVE?
6. Mbi Abeli, Nowa ayi batu bankaka ba kiminu bavanga muingi kufikama Yave?
6 Tona mu thangu beni, Yave malembi malembi, wunsudikisanga buidi batu ba masumu balenda kumfikimina. Bo mambu maphasi mayiza monika ku Edeni, Abeli muana wummuadi wu Adami ayi Eva, nandi mutu wutheti wuyiza kuna kiminu mu Yave. Nandi waba zolanga Yave, waba tomba kunkuangidika ayi kumfikama. Diawu kamvanina nkhailu. Mu kuba nsungi wu mamemi, nandi wubonga mua bana ba mamemi, wuvonda ayi wuvana nkhailu kuidi Yave. Buidi Yave kamuena mawu? Nandi ‘wukikinina nkhailu wu Abeli.’ (Ngene. 4:4) Yave mvandi wukikinina minkhailu mi batu bankaka baba kunzolanga ayi baba kumfiatilanga dedi Nowa. (Ngene. 8:20, 21) Mu kukikinina minkhailu beni, Yave wumonisa ti batu ba masumu balenda baka lunungu luandi ayi kumfikama. b
7. Bo Abalahami kabina vana muan’andi banga nkhailu, mbi mawu ma tutebula monyo?
7 Yave wudinda Abalahami muingi kavanga diambu diphasi. Kuvana muan’andi Isaki banga nkhailu. Abalahami wuba beni mu kiunda mu kibila ki mambu amomo, vayi nandi wuba wukubama muingi kutumukina Yave. Vayi, bo kabina vonda muan’andi, Yave wuntula nkaku. Mawu ma tutebula monyo diambu dimueka Yave kayiza vanga kuntuala—kuvana muan’andi wu luzolo banga nkhailu. Bukiedika, Yave wunzolanga beni batu.—Ngene. 22:1-18.
8. Mbi minkhailu baba vananga mu Nsiku wu Mose miaba monisa? (Levitiku 4:27-29; 17:11)
8 Mu nsiku wu Mose, Yave wuvana nsiku kuidi basi Isaeli, bavananga minkhailu mi bibulu muingi babaka nlemvu wu masumu. (Tanga Levitiku 4:27-29; 17:11.) Minkhailu amiomio miba mbonosono yi nkhailu wulutidi Yave kayiza vana muingi kuvukisa batu mu masumu. Mu nzila mimbikudi miandi, Nzambi wusudikisa ti mutu bakanikisa voti Muan’andi wu luzolo, wunkuiza tovuka ayi kufua. (Yesa. 53:1-12) Yindulabu, Yave wubika Muan’andi wu luzolo kafua muingi kukula batu boso kubunda mvandi ngiewu mu disumu ayi lufua.
MBI YESU KAVANGA MUINGI KUKULA BATU?
9. Bo Yoane Mbotiki kamona Yesu, mbi katuba? (Ebeleo 9:22; 10:1-4, 12)
9 Mu sekulu yitheti T.K., bo Yoane Mbotiki kamona Yesu, nandi wutuba: “Talanu, awowo widi Muana Dimemi di Nzambi, no wunkuiza botula masumu mu nza.” (Yoa. 1:29) Mambu amomo katuba, mammonisa ti Yesu nandi mvukisi bakanikisa. No wuyiza vana luzingu luandi muingi kuvukisa batu. Mu phila ayoyo, Yave wubuela bivisa muingi batu baba kivuvu ti disumu diala mana.—Tanga Ebeleo 9:22; 10:1-4, 12.
10. Buidi tuzabidi ti Yesu wuyiza muingi “kutela” minsumuki?
10 Yesu wuluta sikika thalu kuidi batu baba banga kiunda kiwombo mu kuba batu ba masumu; diawu kaba tumisina muingi baba minlandikini miandi. Nandi wuzaba ti disumu diawu dituadisa ziphasi zioso tummonanga bubu. Diawu kasadisila batu babe tovukanga mu kibila akiokio. Yesu wusadila kifuani mu kutuba: “Batu badi buvinya batombuluanga ko mimfelimi, vayi zimbevu bawu bantombuluanga mimfelimi.” Ayi wubue tuba: “Minu yisa kuiza ko muingi kutela batu basonga, vayi minsumuki.” (Mat. 9:12, 13) Yesu wusadila mambu ka tuba. Bo nkietu wumueka kabondika malu ma Yesu mu matsuela mandi, Yesu wuyolukila yandi mu luzolo ayi wulemvukila masumu mandi. (Luk. 7:37-50) Yesu wulonga kiedika kinkinza kuidi nkietu musi Samalia waba teka nlangu, kheti wuzaba ti nkietu beni waba natanga luzingu lu kitsuza. (Yoa. 4:7, 17-19, 25, 26) Nzambi wuvana lulendu kuidi Yesu muingi kumanisa disumu ayi lufua. Buidi? Yesu wuvulubusa babakala ayi bakietu bana balezi ayi bakulutu.—Mat. 11:5.
11. Kibila mbi batu ba masumu babasa monanga ko phasi kufikama Yesu?
11 Batu baba bazabakana banga bankua masumu, babasa monanga ko phasi kufikama Yesu. Kibila nandi waba kuyitulanga va kibuangu kiawu ayi waba kuba monanga kiadi. Yesu wuba nyunga ayi wuba sakumuna. (Luk. 15:1, 2) Yesu wulandakana kifuani kivedila ki Tat’andi mu matedi kumonisa kiadi. (Luk. 19:1-10; Yoa. 14:9) Mu mavanga ayi mu thubulu, Yesu wumonisa ti Tat’andi nkua kiadi, nkua mlemvu, wunzolanga batu ayi wuntomba kusadisa kadika mutu mu bawu kununga kunuana nzingu na masumu. Yesu wusadisa batu baba mintima mikubama kubalula nzingulu’awu ayi kuba minlandikini miandi.—Luk. 5:27, 28.
12. Mbi Yesu kalonga matedi lufua luandi?
12 Yesu wuzaba ti kafueti vana luzingu luandi banga nkhailu. Diawu khumbu ziwombo kakambila minlandikini miandi ti bala kumvakula ayi bala mbanda mu dikunzi. (Mat. 17:22; 20:18, 19) Nandi wuzaba ti khudulu’andi yala manisa masumu mu nza, dedi bo Yoane ayi mimbikudi batubila. Nandi mvandi wulonga ti lufua luandi, luala sadisa “mintindu mioso mi batu” kufikama kuidi nandi. (Yoa. 12:32) Baboso banlekilanga kiminu mu Yesu ayi bantumukinanga zithumu ziandi bawu bala kuangidika Yave. Ba kuvanga mawu bala kulu “va kivika ki masumu.” (Lom. 6:14, 18, 22; Yoa. 8:32) Mu kibakala, Yesu wuba wukubama muingi kufua lufua luphasi.—Yoa. 10:17, 18.
13. Buidi Yesu kafuila ayi kibila mbi Yave kabikila mawu mamonika? (Tala mvandi fikula.)
13 Yesu bamvakula, bankanga, bamfinga, bamvunina mambu ayi bantovula. Masodi ma basi Loma bannata nati va kibuangu kio bambandila va dikunzi. Yave Nzambi wuba beni mu kiunda mu kibila akiokio. Yave wuba lulendu ayi luaku muingi kumanisa ziphasi zi Muan’andi, vayi kasa mavanga ko. Yave wunzolanga Muan’andi. Vayi kibila mbi kabikila muingi katovuka ayi kufua? Kibila nandi wu tuzolanga. Yesu wutuba: “Nzambi wuzola batu mu nza, diawu kavanina Muan’andi wumueka to, muingi batu boso ba kunlekila kiminu, babika kubungu, vayi babaka luzingu lu mvu ka mvu.”—Yoa. 3:16.
Bo kabika Muan’andi kufua, Yave wuviokila mu ziphasi muingi kutukula mu disumu ayi mu lufua (Tala lutangu 13)
14. Mbi khudulu yi Yesu yimmonia kuidi ngiewu?
14 Khudulu yi Yesu, yidi mbonosono yi luzolo Yave kadi kuidi nkunu wu Adami ayi Eva. Yawu yimmonisa ti Yave wu kuzolanga beni. Nandi wutovuka beni kumona Muan’andi wu luzolo kufua muingi kutukula mu disumu ayi lufua. (1 Yoa. 4:9, 10) Bukiedika, nandi wuntomba kusadisa kadika mutu mu befu, kunuana nzingu wu kubika bua mu disumu ayi tununga kuvanga mawu.
15. Mbi tufueti vanga boti tuntomba kunuana nzingu na disumu ayi kufikama Nzambi?
15 Khudulu yi Yesu, yi tuvana luaku lu kubaka nlemvu wu masumu mitu. Vayi muingi tutambula mlemvu wu Nzambi, tufueti vanga diambu dimueka. Diambu mbi? Yoane Mbotiki ayi naveka Yesu bavana mvutu bo batuba: “Balulanu mavanga minu, kibila Kintinu ki Nzambi kima fikama.” (Mat. 3:1, 2; 4:17) Diawu, boti tuntomba kunuana nzingu na disumu ayi kufikama Tat’itu yi luzolo, tufueti nyongina masumu mitu mu bukiedika. Vayi mbi binsundula kunyongina masumu ayi buidi mawu ma tusadisilanga kukuangidika Yave, kheti mu kuba batu ba masumu? Tunkuiza baka mvutu mu dilongi dinlanda.
NKUNGA 18 Vutula Matondo mu Khudulu
a TSUDUKUSU YI BIKUMA: Mu Kibibila, kikuma “disumu” kilenda sundula mavanga mambi voti kuvanga diambu dikhambu nguizani na zithumu zi Yave. Dilenda sundula mvandi kimutu kitu ki masumu voti disumu tutambakana kuidi Adami. Disumu tutambakana, diawu di tunatanga ku lufua.
