DILONGI 15
Landakana Kifwani ki Yesu Ayi Tatamana Kuba mu Ndembama
‘Ndembama yi Nzambi, yoyi yivyokidi dyela dyoso, yela kyeba mintima minu.’—FILIPI 4:7.
NKUNGA 113 Tuala ba Ndembama
MAMBU TWANLONGUKA *
1-2. Kibila mbi Yesu kaba kwazukila?
MU KILUMBU kyandi kitsuka va ntoto, Yesu waba kwazuka beni. Bila nandi wuzaba ti thangu yilwelu yaba khambu mwingi katovuka ayi kafwa mu myoko mi batu bankwa mambi. Vayi Yesu kabasa kwazuka ko to mu kibila ki lufwa lwandi lwaba fikama. Nandi waba zolanga beni Tat’andi ayi waba tomba kunkwangidika. Yesu wuzaba ti na kutatamana wukwikama mu mambu moso maphasi kala monikina, nandi wunkwiza sadisa kuzitisa dizina di Yave. Yesu mvandi wuzola batu ayi wuzaba ti mwingi tubaka lwaku lu kuzinga mvu ka mvu nandi kafweti tatamana wukwikama kwidi Yave nate mu lufwa lwandi.
2 Kheti Yesu waba kwazuka beni, nandi wuba mu ndembama. Nandi wukamba bapostolo bandi: “Yiluveni ndembam’ami.’ (Yoane 14:27) Nandi wuba ‘ndembama yi Nzambi,’ yawu yinkwizilanga mu kikundi kimboti mutu kadi na Yave. Ndembama beni yisadisa Yesu kubika kwazuka beni.—Filipi 4:6, 7.
3. Mbi twentubila mu dilongi adidi?
3 Ni mutu mu befu wala vyokila mu ziphasi Yesu kavyokila, vayi baboso banlandakananga Yesu bala vyokila mu ziphasi. (Matai 16:24, 25; Yoane 15:20) Buka Yesu, befu mvitu khumbu zinkaka tunkwazukanga. Mbi tulenda vanga mwingi tubika kwazuka beni ayi ziphasi zi luzingu zibika kutubotula ndembama mu ntima? Twentubila mambu matatu Yesu kavanga mu thangu kaba samuna va ntoto ayi twemmona bwidi tulenda landikinina kifwani kyandi bo tumvyokila mu ziphasi.
YESU WUTATAMANA KUSAMBILA
Nsambu wutusadisanga kutatamana mu ndembama (Tala bitini bi matangu 4-7)
4. Mu kulandakana madi mu 1 Tesalonika 5:17, vana bifwani bimmonisa ti Yesu wusambila beni mu kilumbu kitsuka kazingila va ntoto.
4 Tanga 1 Tesalonika 5:17. Yesu wusambila beni mu kilumbu kyandi kitsuka va ntoto. Bo kamonisa minlandikini myandi bwidi bu kuvangila mbambukulu moyo lufwa lwandi, nandi wuvanga nsambu wu dipha ayi wu vinu. (1 Kolinto 11:23-25) Ava kubika kibwangu bakembila Pasika, nandi wusambila na minlonguki myandi. (Yoane 17:1-26) Bo Yesu ayi minlandikini myandi batuka ku Mongo Minti mi Olive mu bwilu beni, nandi wusambila khumbu ziwombo. (Matai 26:36-39, 42, 44) Ayi mambu matsuka Yesu katuba, nandi wutubila mawu mu nsambu. (Luka 23:46) Mu nsambu, Yesu wuzabikisa kwidi Yave mambu moso kaba monikina mu kilumbu kyandi kitsuka va ntoto.
5. Kibila mbi kibakala ki bapostolo kilebakana?
5 Yesu waba fyatilanga Tat’andi ayi wumonisa mawu mu kusambila beni kwidi nandi. Akyoki kidi kibila kimweka kisadisa Yesu kukindama mu ziphasi kavyokila. Vayi va bwilu beni, bapostolo basa tatamana ko kusambila. Mu kibila akyoki, kibakala kiawu kilebakana bo bavyokila mu zithotolo. (Matai 26:40, 41, 43, 45, 56) Bo tumvyokila mu zithotolo, twala tatamana to bakwikama befu landakana kifwani ki Yesu ayi ‘kutatamana kusambila.’ Mambu mbi tulenda lomba mu nsambu?
6. Bwidi kiminu kyala tusadisila kutatamana mu ndembama?
6 Befu tulenda sambila mwingi Yave ‘katubwela kiminu.’ (Luka 17:5; Yoane 14:1) Tuntombila kiminu kibila Satana wala thota baboso banlandakananga Yesu. (Luka 22:31) Bwidi kiminu kyala tusadisila kheti bo tumvyokila mu ziphasi ziwombo? Befu kuvanga mamoso tunnunga, vayi kheti bobo ziphazi zisimmana ko, kiminu twidi ti Yave yala tusadisa kyala tuvanga tubika kwazuka beni kibila tuzabizi ti mu thangu yifwana nandi wala manisa ziawu. Befu twidi ndembama mu ntima, kibila twidi lufyatu ti phila Yave kavangilanga mambu yawu yilutidi.—1 Petelo 5:6, 7.
7. Mbi belonguka mu mambu Robert katuba?
7 Lusambulu lutusadisanga kubaka ndembama mu ntima kheti bo tumvyokila mu mambu maphasi. Tala kifwani ki Robert, nkulutu mweka wu kimvuka wukwikama weka 80 di mimvu. Nandi wutuba: “Dilongi didi mu Filipi 4:6, 7 dikutsadisanga kununga zithotolo yimvyokilanga mu luzingu lwama. Khumbu zinkaka yabasa bakanga ko zimbongo. Mu mwa thangu yibika kubwe sala banga nkulutu wu kimvuka.” Mbi binsadisanga Robert kubaka ndembama mu ntima? Nandi wutuba: “Bo yimbanga mu kyunda, minu yinsambilanga. Yizebi ti yinluta bakanga ndembama bo yintatamana kusambila.”
YESU WUTATAMANA KUSAMUNA MU KIFUZA
Kisalu ki kusamuna kitusadisanga kutatamana mu ndembama (Tala bitini bi matangu 8-10)
8. Dedi buntubila Yoane 8:29, kibila mbi kinkaka kyaba sadisanga Yesu kuba ndembama mu ntima?
8 Tanga Yoane 8:29. Kheti bo kaba vyokila mu ziphasi, Yesu wuba ndembama mu ntima kibila wuzaba ti waba kwangidika Tat’andi. Nandi wutatamana kutumukina, kheti khumbu zinkaka diba dyambu diphasi di kuvanga. Nandi waba zolanga beni Tat’andi ayi wuvana luzingu lwandi loso mwingi kunsadila. Ava kukwiza va ntoto, nandi wuba ‘nsadisi wu bivangu bi Yave.’ (Zingana 8:30) Ayi bo kaba va ntoto, mu kifuza nandi wulonga bankaka matedi Tat’andi. (Matai 6:9; Yoane 5:17) Yesu wuyangalala beni mu kuvanga kisalu akyoki.—Yoane 4:34-36.
9. Kibila mbi tumbakilanga ndembama mu ntima bo tukivana mu kisalu ki kusamuna?
9 Befu tulenda landakana kifwani ki Yesu mu kutumukina Yave ayi ‘mu kusadila Mfumu mu zithangu zioso.’ (1 Kolinto 15:58) Befu ‘kukivana’ mu kisalu ki kusamuna, tulenda tadila ziphasi zitu mu phila yifwana. (Mavanga 18:5) Buka, batu tundengananga mu kisalu ki kusamuna bamvyokilanga mu mambu maphasi malutidi na mambu befu tumvyokilanga. Vayi bo banlonguka kuzola Yave ayi bansadila malongi mandi, luzingu luawu lumbalukanga ayi bankwiza bakanga mayangi. Kadika thangu tummonanga mambu beni kumonika, befu tunluta banga lufyatu ti Yave wala tukyeba. Ayi lufyatu beni lutusadisanga kutatamana kubaka ndembama mu ntima. Khomba mweka yinkyeto waba kukimonanga buka mutu wukhambulu luvalu ayi waba banga beni mu kyunda, wubakula ti kuvyokisa beni thangu mu kisalu ki kusamuna kutusadisanga kubaka ndembama mu ntima. Nandi wutuba: “Bo yikivananga mu kisalu ki kusamuna, minu yinluta yalanga mabanza mami ayi yinluta bakanga mayangi. Mawu mammonikanga bila bo yidi mu kisalu ki kusamuna, minu yinluta fikamanga Yave.”
10. Mbi ngye belonguka mu kifwani ki Brenda?
10 Tala mvandi kifwani ki khomba wumweka bantedilanga Brenda. Nandi ayi mwan’andi badi kimbevo kingolo. Brenda wundyatilanga mu kikundu ki batu babela malu kibila kasi ko beni mangolo mu nyitu. Khumbu zinkaka nandi wunsamunanga nzo ka nzo, vayi phila kanluta samuninanga yidi mu kusonikanga minkanda. Nandi wutuba: “Bo yivisa ayi yikikinina ti yilendi beluka ko mu nza ayiyi, minu yiluta nunga kutsikika mayindu mama mu kisalu ki kusamuna. Bukyedika, kusamuna ku kutsadisanga kubika yindulanga ziphasi zyama. Minu yinsikikanga mayindu mami mu phila yilenda sadisila batu yindengana mu kisalu ki kusamuna. Ayi kisalu ki kusamuna ki kunsadisanga mvandi kutebuka moyo kivuvu yidi mu bilumbu binkwiza kuntwala.”
YESU WUKIKININA LUSALUSU LU BAKUNDI BANDI
Bakundi bamboti batusadisanga kutatamana mu ndembama (Tala bitini bi matangu 11-15)
11-13. (a) Bwidi bapostolo ayi batu bankaka bamonisina ti baba bakundi bakyedika kwidi Yesu? (b) Kheti Yesu wuba wuvedila, bwidi kamwena lusalusu bakundi bandi bamvana?
11 Kisalu ki kusamuna Yesu kavanga va ntoto kiba beni phasi, vayi nandi wuba bakundi bakyedika baba kunsadisanga: Bapostolo bandi bakwikama. Bawu baba bakundi bamboti bantubila mu buku yi Zingana 18:24, yintuba: ‘Vadi na nkundi wulutidi kwikama kuvyoka khomba wubutuka yitu.’ Yesu waba vwanga beni nkinza bakundi bandi. Mu thangu kaba samunanga va ntoto, ni khomba mweka wubutuka yandi wuba kiminu mu nandi. (Yoane 7:3-5) Khumbu mweka basi dikanda dyandi batuba ti nandi mavunzuka ntu. (Malako 3:21) Vayi bapostolo diswasana baba. Mu bwilu butsuka ava nandi kafwa, Yesu wukamba bapostolo bandi bakwikama: ‘Beno, lwidi batu babedi yama bakwikama mu zithotolo zyami.’—Luka 22:28.
12 Bukyedika ti khumbu zinkaka bapostolo baba nyongisanga Yesu. Vayi nandi kasa tsikika ko mayindu mandi mu zinzimbala ziawu, kibila wuzaba ti bapostolo baba kiminu mu nandi. (Matai 26:40; Malako 10:13, 14; Yoane 6:66-69) Va bwilu butsuka ava kafwa, Yesu wukamba bapostolo bandi bakwikama: ‘Yilutedila bakundi bila yi kulukambanga mambu mamo yiyuwa kwidi Tat’ami.’ (Yoane 15:15) Bukyedika, Yesu waba bakanga beni khindusulu bo kaba banga va kimweka na bakundi bandi. Nandi wuyangalala beni mu lusalusu bamvana mwingi kuvanga kisalu ki kusamuna.—Luka 10:17, 21.
13 Kubotula kwandi bapostolo, Yesu wuba mvandi bakundi bankaka. Babakala ayi bakyeto bawombo bansadisa mu kisalu ki kusamuna ayi bansadisa mvandi mu ziphila zinkaka. Bankaka baba tumisanga Yesu mu zinzo ziawu mwingi badya. (Luka 10:38-42; Yoane 12:1, 2) Bankaka baba kwendanga yandi mwingi kwe samuna ayi baba kunkabilanga byuma biawu. (Luka 8:3) Yesu wuba bakundi bamboti kibila nandi wuba nkundi wumboti kwidi bawu. Nandi waba vangilanga bakundi bandi mambu mamboti, ayi kabasa vingilanga ko mwingi bawu bavanga mambu balendi nunga ko kuvanga. Kheti nandi wuba wuvedila, Yesu waba vutulanga matondo mambu moso bakundi bandi baba kumvangilanga. Bukyedika, bakundi bandi bansadisa kubaka ndembama mu ntima.
14-15. Phila mbi yilutidi tulenda bakila bakundi bamboti, ayi bwidi bawu balenda tusadisila?
14 Bankundi bamboti bala tusadisa kutatamana bakwikama kwidi Yave. Phila yimboti tulenda bakila bakundi bamboti yidi mu kuba nkundi wumboti. (Matai 7:12) Buka, Kibibila kitukindisa kuvana thangu’itu ayi mangolo mitu mwingi kusadisa bankaka, vayi kuluta vangila mawu kwidi “basukama.” (Efeso 4:28) Mu kimvuka kyaku mwidi mutu ngye wulenda sadisa? Boti vadi khomba wukhambu nunga kubasika ku nzo, ngye wulenda kukivana mwingi kukwenda kuzandu kwensumbila byuma? Voti wulenda kabila bidya kwidi dikanda dimvyokila mu ziphasi mu kibila ki kukhambu ku zimbongo? Boti wuzebi kusadila khond’itu mayo jw.org® ayi aplicativo JW Library®, wulenda sadisa khomba wuntomba lusalusu mwingi kusadila biawu? Sadila lwaku loso widi mwingi kusadisa bankaka. Mawu mala kusadisa kubwela baka mayangi.—Mavanga 20:35.
15 Bakundi bitu bala tusadisa kubaka ndembama mu ntima bo tumvyokila mu ziphasi. Mu thangu Yobi kaba tubila ziphasi kaba vyokila, Elihu wuyuwa mu mvibudulu. Bakundi bitu mvandi bala vanga mawu mu thangu twala tomba kubakamba mambu maphasi tumvyokila. (Yobi 32:4) Befu tulendi telimina ko bakundi bitu ba tubakila makani. Vayi ba kutuvana malongi mamfumina mu Kibibila, buboti beni kukuwa. (Zingana 15:22) Tulendi monisa ko lungundayi boti bakundi bitu batuvana lusalusu bo tumvyokila mu ziphasi. Vayi tufweti landakana kifwani ki Ntinu Davidi. Nandi wuyikulula ayi wukikinina lusalusu lu bakundi bandi. (2 Samueli 17:27-29) Bukyedika, bakundi ba phila ayoyi badi nkhayilu wu Yave.—Yakobi 1:17.
TATAMANA KUBA MU NDEMBAMA
16. Dedi buntubila Filipi 4:6, 7, phila mbi tulenda bakila ndembama mu ntima? Sudikisa.
16 Tanga Filipi 4:6, 7. Lutangu alolo luntuba ti Yave wala tuvana ndembam’andi ‘mu nzila Yesu Klisto.’ Kibila mbi? Kibila kuba kiminu mu Yesu ayi kuvisa nkinza kadi mu lukanu lu Yave, yawu to phila tulenda bakila ndembama mu ntima. Buka, mu nzila khudulu Yesu, Yave kalenda lemvukila masumu mitu. (1 Yoane 2:12) Kuzaba mawu kutuvananga luvovomu! Mvandi, Yesu widi Ntinu wu Kintinu ki Nzambi ayi nandi wala manisa ziphazi zyoso Satana ayi nza kanyadila batutwadisanga. (Yesaya 65:17; 1 Yoane 3:8; Nzaikusu 21:3, 4) Kuzaba mawu kutusadisa kuba kivuvu mu bilumbu binkwiza! Kheti Yesu wutuvana kiyeku kingolo, nandi wukanikisa kutusadisa mu bilumbu abibi bitsuka. (Matai 28:19, 20) Kuzaba mawu kutusadisanga kuba kibakala! Luvovomu, kivuvu ayi kibakala—zidi zikhadulu zinkinza tufweti kuna mwingi tuba ndembama mu ntima.
17. (a) Mbi tufweti vanga mwingi tutatamana kubaka ndembama mu ntima? (b) Dedi buntubila Yoane 16:33, mbi twala nunga kuvanga?
17 Mbi wulenda vanga mwingi wutatamana kubaka ndembama mu ntima kheti bo wumvyokila mu ziphasi? Vanga mambu Yesu kavanga. Ditheti, sambila, ayi tatamana kusambila. Dimwadi, tumukina Yave ayi samuna mu kifuza kheti phasi wummona kuvanga mawu. Ayi dintatu, kikinina lusadusu lu bakundi baku bo wumvyokila mu ziphasi. Ngye kuvanga mawu, ndembama yi Nzambi yela keba mayindu ayi ntim’aku. Dedi Yesu, ngye mvaku wala nunga zithotolo zyoso wumvyokila.—Tanga Yoane 16:33.
NKUNGA 41 Lemvuka, Yuwa Nsambu’ami
^ Lut. 5 Befu boso tumvyokilanga mu mambu malenda kutubotula ndembama. Mu dilongi adidi tunkwiza tubila mambu matatu Yesu kavanga ayi befu mvitu tulenda vanga mwingi tutatamana kubaka ndembama kheti bo tumvyokila mu mambu mawombo ma phasi.
