DILONGI 17
“Minu Yiku Lutedila Bakundi”
“Minu yiku lutedila bakundi, kibila yilukembi mambu moso yiyuwa kuidi Tat’ami.”—YOANE 15:15.
NKUNGA 13 Klisto, Ntungulu’itu
MAMBU TUANLONGUKA *
1. Mbi bimvanganga tuba kikundi kifikama na mutu wunkaka?
MUINGI kuba kikundi kifikama na mutu wunkaka, vadi mambu mantombulu muingi kuvanga. Ditheti fueti viokisanga thangu na mutu beni. Mufueti solulanga ayi kubuelasana mayindu mu mambu kadika mutu kamviokila mu luzingu. Mu phila ayoyi, munkuiza ba kikundi kifikama. Vayi khumbu zinkaka tulenda yindula ti phasi beni kuba kikundi kifika na Yesu. Mambu mbi malenda tutula nkaku?
2. Diambu mbi ditheti dilenda tula nkaku mu kuba kikundi na Yesu?
2 Diambu ditheti dilenda tula nkaku, befu tumonanga ko Yesu. Baklisto bawombo mu sekulu yitheti mvawu baviokila mu diambu adiodio. Diawu mvuala Petelo kasonikina: “Yesu, mutu lukhambu monanga vayi lueti kunzola, ayi kheti lummuenia ko, vayi luidi kiminu mu nandi.” (1 Petelo 1:8) Mawu mammonisa ti kheti befu tumonanga ko Yesu, tulenda ba kikundi kifikama ayi nandi.
3. Diambu mbi dimuadi dilenda tula nkaku mu kuba kikundi na Yesu?
3 Diambu dimuadi, befu tuyolukanga ko na Yesu. Mu thangu tunsambila, befu tunkolulanga na Yave. Kheti befu tumvangilanga wawu mu nzila yi muan’andi Yesu, vayi naveka Yave wunkolulanga yitu. Ayi Yesu kasintomba ko tunsambila. Kibila mbi? Kibila minsambu mitu yidi phila yi kubuongimina Yave, ayi nandi to fueni mu kutambula mbuongimin’itu. (Matai 4:10) Vayi kheti buawu, befu tulenda monisa luzolo tuidi mu Yesu.
4. Diambu mbi dintatu dilenda tula nkaku mu kuba kikundi na Yesu, ayi mbi tunkuiza tubila mu dilongi adidi?
4 Diambu dintatu, Yesu ku diyilu kankalanga, ayi tuisi ko bu kukadila yandi va kimueka kadika kilumbu. Vayi kheti bobo tulenda zaba mambu mawombo matedi nandi. Mu dilongi adidi tunkuiza tubila mambu manna tulenda vanga muingi kukindisa kikundi kitu na Yesu. Vayi tuentubila theti kibila mbi didi diambu dinkinza kadika mutu mu befu kuba kikundi kifikama na Yesu.
KIBILA MBI DIDI DIAMBU DINKINZA KUBA KIKUNDI KIFIKAMA NA YESU?
5. Kibila mbi tufueti bela bakundi ba Yesu? (Tala zitsielu zintuba “ Kuba Kikundi Kifikama na Yesu, Kimvanganga Tuba Bakundi ba Yave” ayi “ Tadila Yesu mu Phila Yifuana.”)
5 Befu kuba kikundi kifikama na Yesu, mawu mankuiza tusadisa muingi tuba kikundi kimboti na Yave. Mu kibila mbi? Mu bibila biodi. Kibila kitheti, Yesu wukamba kuidi minlandikini miandi: ‘Tata weta kuluzola; kibila beno luidi luzolo mu minu.’ (Yoane 16:27) Nandi mvandi wutuba: ‘Ni mutu kalendi kuenda ko kuidi Tata boti kasimviokila ko vadi minu.’ (Yoane 14:6) Mutu kalendi kota ko ku khati kibanga mu khambu viokila va muelo. Bobuawu mvandi, tulendi ba ko bakundi ba Yave, befu kukhambu vanga theti kikundi kifikama na Yesu. Mawu Yesu kaba tomba kutuba mu thangu ka kifuanikisa banga “muelo wu phaka yi mamemi.” (Yoane 10:7) Kibila kimuadi, Yesu wulandakana buboti kifuani ki Tat’andi. Nandi wukamba minlandikini miandi: ‘Woso mutu wumbueni, mueni Tata.’ (Yoane 14:9) Diawu, phila yilutidi tulenda zabila Yave, yidi mu kulonguka matedi luzingu lu Yesu. Bo tunluta longuka matedi Yesu, buawu luzolo luitu mu nandi lunkuiza buelimina. Ayi bo tunluta zola Yesu, buawu mvandi tunkuiza luta zodila Tat’andi.
6. Kibila mbi kinkaka tufueti bela kikundi kifikama na Yesu? Sudikisa.
6 Kibila kinkaka tufueti bela kikundi kifikama na Yesu kidi, muingi Yave katambudila minsambu mitu. Tufueti visa buidi Yave kansadilanga Yesu muingi kutambudila minsambu mitu, kubika kuandi to mu kutubanga mu minsambu mitu: “Mu dizina di Yesu”. Yesu wukamba bapostolo bandi: “Mamo luela lomba mu dizina diama, ndiela mavanga.” (Yoane 14:13) Tuzebi ti Yave nandi wunkuwanga ayi wuntambudilanga minsambu mitu. Vayi bo Yave kambaka makani ma kutambudila nsambu’itu, nandi wumvananga nsua kuidi Yesu muingi katu tambudila. (Matai 28:18) Ava Nzambi katambudila minsambu mitu, Nandi wummonanga boti tuidi mu kulandakana dilongi Yesu kavana. Dedi, Yesu wutuba: ‘Enati lunlemvukila batu mu zinzimbala ziawu, buna Tat’inu widi ku diyilu wela kululemvukila. Vayi enati lumengi lemvukila batu, buna Tat’inu kalendi kululemvukila ko.’ (Matai 6:14, 15) Diawu nkinza beni kulemvukilanga bankaka dedi bo Yave ayi Yesu batulemvukilanga!
7. Banani bala tambula lusakumunu mu khudulu yi Yesu?
7 Batu badi kikundi kifikama na Yesu, bawu to bala tambula lusakumunu mu khudulu yi Yesu. Buidi tuzabidi mawu? Tuzabidi mawu kibila Yesu wutuba ti ‘wumvana luzingu luandi mu kibila ki bakundi bandi.’ (Yoane 15:13) Kheti bisadi bikuikama bi Yave bazinga ava Yesu kiza va ntoto, dedi Abalahami, Sala, Mose, ayi Laabi muingi batambula lusakumunu mu khudulu yi Yesu, bala longuka theti matedi Yesu muingi kukuna kikundi ayi luzolo luawu mu nandi. —Yoane 17:3; Mavanga 24:15; Ebeleo 11:8-12, 24-26, 31.
8-9. Dedi bummonisina Yoane 15:4, 5, mbi tufueti vanga muingi tununga kuvanga kisalu ki kusamuna ayi kulonga?
8 Befu tuidi mayangi ma kusala na Yesu mu kisalu ki kusamuna ayi kulonga zitsangu zimboti zi Kintinu. Bo Yesu kaba va ntoto, nandi wuba nlongisi, vayi tona kavutuka ku diyilu, nandi widi ntu wu kimvuka ayi wuntatamana kutuadisa kisalu ki kusamuna ayi ki kulonga. Nandi wummonanga ayi wumvuanga nkinza mangolo tumvanga muingi kusadisa batu bawombo banzaba ayi bazaba Tat’andi. Bukiedika befu tunnunginanga kuvanga kisalu akioki ki kusamuna mu lusalusu lu Yave ayi Yesu.—Tanga Yoane 15:4, 5.
9 Diambu di Nzambi dinsudikisa ti muingi tuyangidika Yave, tufueti zola Yesu ayi kukieba muingi luzolo beni lubika dekuka. Diawu, tuentubila mambu manna tulenda vanga muingi tuba kikundi kifikama na Yesu.
BUIDI TULENDA BELA BAKUNDI BA YESU?
Ngie wulenda ba kikundi na Yesu mu (1) kunzaba buboti, (2) kuyindula ayi kuvanga mambu mu phila Yesu kavangila, (3) kubuela mioko zikhomba zi Klisto, ayi (4) kubuela mioko mu makani kimvuka ki Yave bambaka (Tala lutangu 10-14) *
10. Diambu mbi ditheti tufueti vanga muingi tuba kikundi na Yesu, ayi buidi tulenda vangila mawu?
10 (1) Kuzaba buboti Yesu. Tulenda vangila mawu mu kutanga zibuku zintubila luzingu luandi dedi Matai, Malako, Luka, ayi Yoane. Mu thangu tunyindula mambu tuntanga mu zibuku aziozio, buawu tuidi mu kulongukila kuzola Yesu. Nandi wuba mutu wu buphombo kuidi bankaka. Kheti Yesu wuba Mfumu wu minlandikini miandi, nandi kasa batadilanga ko banga mimvika. Vayi waba kuba zabikisanga mabanza ayi mayindu ma tsi ntim’andi. (Yoane 15:15) Yesu wuba monanga kiunda ayi wuba dilanga na minlandikini miandi. (Yoane 11:32-36) Zimbeni ziandi bazaba ti Yesu wuba nkundi wu baboso baba kuwanga zitsangu ziandi. (Matai 11:19) Befu kulandakana phila Yesu kaba zingilanga na minlandikini miandi, kithuadi kitu na zikhomba kiala luta kinda, tuala luta ba mayangi ayi luzolo luitu mu Yesu mvandi luala buelama.
11. Diambu mbi dimuadi tufueti vanga muingi kuba kikundi na Yesu, ayi mu phila mbi tulenda vangila mawu?
11 (2) Kuyindula ayi kuvanga mambu mu phila Yesu kavangila. Befu kuzaba buboti ayi kulandakana phila Yesu kaba yindudilanga, kikundi kitu mu nandi kiala buelama. (1 Kolinto 2:16) Tala phila yimueka tulenda vangila mawu. Yesu wuba tombanga theti kusadisa bankaka kubika kuandi naveka. (Matai 20:28; Loma 15:1-3) Mu kuyindudila phila ayoyi, mawu mansadisa kutula zitsatu zi bankaka va theti ayi kuba lemvukila. Mvandi, Yesu kabasa fuemanga ko mu thinu mu mambu mambi batu baba kuntubidila. (Yoane 1:46, 47) Nandi wuba lufiatu ti batu baba vanganga zinzimbala balenda balula mavanga mawu. (1 Timoteo 1:12-14) Yesu wutuba : “Baboso bala zaba ti luidi minlandikini miami—benu kuzolasana.” (Yoane 13:35) Diawu buboti kuyikuvusa: “Bukiedika ti yidi mu kulandakana kifuani ki Yesu muingi kuzingila mu kithuadi na zikhomba zinkaka mu kimvuka?”
12. Diambu mbi dintatu tufueti vanga muingi kuba kikundi na Yesu? Sudikisa.
12 (3) Kubuela mioko zikhomba zi Yesu. Kuidi Yesu, mamoso tumvanga muingi kubuela mioko baklisto basolua, buka kuidi nandi tuidi mu kuvangila mawu. (Matai 25:34-40) Yesu wuvana baklisto basolua kiyeku ki kusamuna ayi kukitula batu minlandikini miandi. Bo tumbasika mu kisalu ki kusamuna, befu tuidi mu kubuela mioko zikhomba zi Yesu. (Matai 28:19, 20; Mavanga 10:42) Baklisto basolua balendi nunga ko baveka kuvanga kisalu ki kusamuna mu nza yoso, diawu vantombuluanga lusadusu lu “mamemi mankaka”. (Yoane 10:16) Boti ngiewu widi wumueka mu mamemi mankaka, tebuka moyo ti kadika khumbu wukue samuna, ngie wummonisanga luzolo luaku mu baklisto basolua ayi mu Yesu.
13. Buidi tulenda sadila dilongi di Yesu didi mu Luka 16:9?
13 Phila yinkaka yi kubuedila mioko zikhomba zi Klisto, yidi mu kuvana zimbongo zitu muingi kubuela mioko kisalu Yave ayi Yesu badi mu kutuadisa. (Tanga Luka 16:9.) Kibila zimbongo beni, ziawu bansadilanga mu kimvuka ki Yave muingi kubuela mioko kisalu ki kusamuna zitsangu zimboti mu bibuangu bidi beni kinanu, muingi kutunga ayi kuludika zinzo zi Kintinu, ayi kusadisa zikhomba zitu bamviokila mu bivuka. Mvandi tulenda tula zimbongo mu kasu yi zitsatu zi kimvuka voti kusadisa khomba widi mu tsatu. (Zingana 19:17) Bo tuidi mu kuvanga mambu amomo befu tuidi mu kubuela kindisa kikundi kitu na Yesu ayi Yave.
14. Dedi bummonisina Efeso 4:15, 16, diambu mbi dinna tufueti vanga muingi kuba kikundi na Yesu?
14 (4) Buela mioko mu makani kimvuka ki Yave bambaka. Yesu ntu wu kimvuka ki baklisto, wusola bakulutu ba kimvuka muingi ba tutuadisa. Mu thangu tuku batumukina, buawu tuidi mu kukindisila kikundi kitu na Yesu. (Tanga Efeso 4:15, 16.) Dedi, mu thangu ayiyi muingi kusadila buboti zinzo zi Kintinu, badi mu kuvasa bimvuka biwombo ayi bizunga bansamuninanga muingi kuba fubikisa na kimvuka kinkaka kifikama na nzo Kintinu. Bukiedika vantombuluanga zikhomba zinkaka kubika bakundi bawu ayi kukolama mu kimvuka kimona, vayi mawu madi mu kusadisa kukona zimbongo muingi kuvangila bisalu binkaka. Ayi mayangi kumona ti minsamuni mioso badi mu kumonisa lukuikumunu luawu mu kubuela mioko mu makani beni!
BAKUNDI BA YESU MVU KA MVU
15. Buidi kikundi kitu na Yesu kiala luta buelimina?
15 Baklisto basolua mu phevi yinlongo badi kivuvu ki kuyala na Yesu mvu ka mvu mu Kintinu ki Diyilu. Bukiedika bawu bala kala va kimueka na Klisto—bala kummona, bala yolukanga yandi, ayi bala viokisanga yandi thangu va kimueka. (Yoane 14:2, 3) Batu badi kivuvu ki kuzingila va ntoto, mvawu bala baka ndandu mu luzolo ayi lukiebu lu Yesu. Bukiedika ti balasa mona ko Yesu dedi bo Baklisto basolua bala kummuena, vayi kikundi kiawu na Yesu kiala luta buelama bo bela ba mu mayangi ku paladizu yo Yave ayi Yesu bala tuvana.—Yesaya 9:6, 7.
16. Lusakumunu mbi tuntambulanga mu kuba bakundi ba Yesu?
16 Yesu wututumisa muingi tuba bakundi bandi. Befu tuntambulanga beni lusakumunu mu kukikinina kuba kikundi kifikama na Yesu. Dedi bubu, nandi wutumonisanga luzolo, wutuvananga lusadusu ayi kivuvu ki kuzinga mvu ka mvu. Mvandi kikundi kitu na Yesu, kitusadisanga kubaka kiuma kilutidi luvalu—kikundi kifikama na Yave. Bukiedika, mayangi beni tuidi mu kutedulu bakundi ba Yesu!
NKUNGA 17 “Yitidi”
^ Lut. 5 Bapostolo baviokisa mua mimvu na Yesu. Bawu baba solulanga ayi baba salanga va kimueka. Mawu mavanga bawu baba kikundi kingolo. Yesu mvandi wuntomba befu tuba bakundi bandi. Vayi vadi mambu malenda kutu tula nkaku. Dilongi adidi dinkuiza tubila mambu malenda kutu tula nkaku mu kuba kikundi na Yesu ayi mambu malenda kutu sadisa kuba kikundi kifikama ayi nandi.
^ Lut. 55 MAMBU MADI MU ZIFIKULA: (1) Mu mbuongimini yi dikanda tulenda longuka matedi luzingu ayi kisalu Yesu kavanga. (2) Mu kimvuka befu tulenda vanga mangolo muingi tutatamana kuzingila mu ndembama na zikhomba. (3) Mu thangu tukivana mu muel’itu woso mu kisalu ki kusamuna, tuidi mu kubuela mioko zikhomba zi Klisto. (4) Mu thangu bamfubikisa bimvuka, tulenda buela mioko mu kutumukina zithuadusulu bakulutu ba kimvuka bamvana.
