DILONGI 18
‘Tatamana Kuduma Nate Kuna Tsuka’
‘Yinunga kuduma nate kuna tsuka.’—2 TIMOTEO 4:7.
NKUNGA 129 Tufueti Kuikamanu
MAMBU TUANLONGUKA *
1. Mbi befu boso tufueti vanga?
DILENDA ba diambu di phasi kuduma zithinu boti ngie widi mu kubela voti widi wuvonga. Buisi ko buawu? Vayi mvuala Polo wutuba ti baklisto boso bakiedika badi mu kuduma zithinu. (Ebeleo 12:1) Ayi befu boso kheti tuidi ditoko voti nkulutu, tuidi mangolo ove balebakana, tufueti kuikama nate kuna tsuka boti tutidi kutambula mfutu Yave ka tukanikisa.— Matai 24:13.
2. Dedi bummonisina 2 Timoteo 4:7, 8, kibila mbi Polo kadidi wufuana mu kuvana dilongi adiodio?
2 Polo widi mutu wufuana muingi kuvana dilongi ditedi kuduma mu lukuikumunu, kibila nandi wununga ‘kuduma nate kutsuka’. (Tanga 2 Timoteo 4:7, 8.) Vayi zithinu mbi Polo katubila baklisto badi mu kuduma?
MBI BINSUNDULA KUDUMA?
3. Buidi mvuala Polo kadekidisila baklisto, ayi thangu mbi tuntoninanga kuduma?
3 Polo waba sadilanga bifuani bi batu baba vanganga bisavu bi kuduma ku tsi yi Grécia muingi kulonga malongi mankinza. (1 Kolinto 9:25-27; 2 Timoteo 2:5) Khumbu ziwombo nandi wudedikisa baklisto banga batu bandumanga zithinu. (1 Kolinto 9:24; Ngalatia 2:2; Filipi 2:16) Bo tukivana kuidi Yave ayi kubotama, buawu tuntoninanga ‘kuduma’. (1 Petelo 3:21) Ayi Yave wala tuvana mfutu wu luzingu lu mvu ka mvu befu kuduma nate kuna tsuka.— Matai 25:31-34, 46; 2 Timoteo 4:8.
4. Mambu mbi tunkuiza tubila mu dilongi adidi?
4 Kibila mbi mvuala Polo kadedikisila baklisto banga batu badi mu kuduma zithinu? Mu kibila ki mambu mawombo madi kithuadi. Vayi mu dilongi adidi tunkuiza tubila mambu matatu: Ditheti, tufueti dumina mu nzila yifuana, dimuadi, tufueti tsikika thalu’itu mu mfutu, ayi dintatu, tufueti vanga mangolo muingi kununga zithotolo tundengana mu nzila yi luzingu.
DUMA MU NZILA YIFUANA
Befu boso tufueti zingila mu zithuadusulu zi Yave (Tala lutangu 5-7) *
5. Mbi tufueti vanga muingi tutambula mfutu ayi kibila mbi?
5 Batu bandumanga muingi batambula mfutu, bafueti landakana zithuadusulu baba vana ayi kuvitila mu ndilu babe tsikika. Bobuawu mvandi, muingi tutambula mfutu wu luzingu lu mvu ka mvu, tufueti zingila mu zithuadusulu zi Yave. (Mavanga 20:24; 1 Petelo 2:21) Vayi Satana ayi ziphevi zimbi, bantomba ‘tutatamana kuduma mu nzil’awu’. (1 Petelo 4:4) Bawu ba tusevanga kibila befu tusola kuzingila mu zithuadusulu zi Yave ayi bawu bantubilanga ti nzil’awu yawu yilutidi. Vayi tuzebi ti mambu ma luvunu bawu bantubanga.—2 Petelo 2:19.
6. Mbi ngie belonguka mu kifuani ki Brian?
6 Woso kua mutu wunduma na batu Satana kantuadisanga, wumfika bakulanga ti nzila kandumina yisi ko kiphuanza kikiedika, vayi yidi nzila yi kitombi voti yi buvika. (Loma 6:16) Tala kifuani ki khomba Brian. Matata mandi bansadisa kuzingila mu zithuadusulu zi Yave. Vayi bo kayiza ba ditoko nandi wuyiza ba divuda boti kalenda baka mayangi makiedika na tatamana kusadila Yave. Diawu kabakila makani ma kuzingila mu zithuadusulu zi Satana muingi kabaka kiphuanza kikiedika. Vayi nandi wuntuba:“Minu yabasa yindulanga ko ti kiphuanza yaba tombanga kilenda kukhitula mvika, kibila buviokila thangu yitona kunua zitsunga zingolo, malavu ayi kunata luzingu lu kitsuza.” Brian kuntuala, wuyiza baka makani ma kuzingila mu zithuadusulu zi Yave. Nandi wubalula nzingulu’andi ayi wubotama mu mvu 2001. Bubu Brian widi mayangi makiedika mu kuzingila mu zithuadusulu zi Yave. *
7. Dedi bummonisina Matai 7:13, 14, zinzila zikua zidi?
7 Kifuani akiokio, kimmonisa nkinza wu kudiatila mu nzila yifuana! Kibila Satana wuntomba befu boso tubika duma mu nzila yifietakana “yinnata ku luzingu” vayi tuduma mu nzila yinneni yinkuendila batu bawombo voti nzila ‘yinnatanga ku mbungulu’. (Tanga Matai 7:13, 14.) Boti tutidi kutatamana mu nzila yifuana, tufueti fiatila Yave ayi kuzingila mu zithudusulu ziandi.
TSIKIKA THALU’AKU AYI BA KEBA KEBA MUINGI WUBIKA BUA
Tufueti tsikika mayindu mitu mu mfutu ayi kubika buisa bankaka mu masumu (Tala lutangu 8-12) *
8. Mbi mutu wunduma kafueti fika vanga na kubua?
8 Mutu wunduma zithinu, wuntsikikanga beni thalu’andi kuntuala muingi kabika bumina thutu. Kheti bobo, khumbu zinkaka malenda kummonikina voti mutu wunkaka kalenda kumbuisa. Vayi na kubua, kafueti fika telama ayi kutatamana kuduma. Kibila nandi wunluta tsikikanga thalu’andi bika kuandi mu biuma bi kumbuisa, vayi mu mfutu.
9. Mbi wufueti vanga ngie kubua?
9 Bo tuidi mu kuduma mu nzila yi luzingu, khumbu ziwombo tulenda bua, mu kibila ki mambu tunkoluka voti tumvanga. Khumbu zinkaka batu banduma yitu, mvawu balenda tuba voti vanga diambu di tulueka ntima. Tulendi kuituka ko mambu amomo ma kumonika, kibila tuidi bankua masumu ayi befu boso tuidi mu kuduma va kimueka mu nzila yifietakana yinnata ku luzingu. Mvuala Polo wuvisa ti khumbu zinkaka ‘tulenda nyongisa’ zikhomba. (Kolosai 3:13) Ngie kubua, bika kutsikika mayindu maku mu biuma bibe kubuisa, vayi tsikika mayindu mu mfutu. Bila ngie kubika nganzi ayi manyongi ma kuvanga wubika kutelama, walasa nunga ko kutatamana kuduma ayi kutambula mfutu. Mvandi ngie wulenda buisa bankaka badi mu kuvanga mangolo ma kuduma mu nzila yi luzingu. Diawu, telama ayi tatamana kuduma.
10. Mbi tufueti vanga muingi tubika buisa bankaka mu masumu?
10 Diambu dinkaka tufueti vanga muingi tubika buisa mu masumu zikhomba banduma yitu didi, kubika kuba kuika batadila mambu mu phil’itu. (Loma 14:13, 19-21; 1 Kolinto 8:9, 13) Befu tunduma mu nzila yi luzingu, disuasana tuidi na batu bandumanga mu bisavu bi nza. Kibila bawu bandumanga muingi kununga bankaka ayi kadika mutu wumvanganga mangolo muingi katambula mfutu naveka. Bankaka bannungunanga badi yawu muingi bavioka kuntuala. Vayi befu tuisintomba ko kununga zikhomba zitu. (Ngalatia 5:26; 6:4) Vayi tuntomba bawombo batuka nate kutsuka ayi batambula mfutu wu luzingu. Kiawu kibila tumvangilanga mangolo muingi kusadila dilongi Polo katuvana dintuba: ‘Kadika mutu kabika tomba mamboti ma naveka vayi ma batu bankaka.’—Filipi 2:4.
11. Mu mambu mbi batu banduma bantsikikanga mayindu ayi kibila mbi?
11 Batu bandumanga, batsikikanga ko to mayindu mawu kuntuala, vayi mvandi va ndilu. Kheti batukidia ko va ndilu, bawu bakiyindulanga buka ti bama tuka ayi badi mu kutambula mfutu’awu. Kuyindula mambu amomo, kuba sadisanga batatamana kuba mayangi mu thangu bakhidi duma.
12. Mbi Yave kankanikisa kutuvana?
12 Mu kibila ki mamboti mandi, Yave wunkanikisa kuvana luzingu lu mvu ka mvu ku diyilu voti ku paladizu va ntoto kuidi bisadi biandi bioso bela tatamana bakuikama nate kuna tsuka. Kibibila kitukamba mambu mawombo mu matedi mfutu beni ayi mawu matusadisa kuyindula buidi luzingu luitu luela bela lumboti ku paladizu. Befu tatamana kutsikika mayindu mu kivuvu tuidi, tualasa bika ko ni kiuma ki tubuisa.
TATAMANA KUDUMA KHETI BO WUMVIOKILA MU ZITHOTOLO
Tutidi kutatamana kuduma mu nzila luzingu kheti mu ziphasi tulenda viokila (Tala lutangu 13-20) *
13. Kibila mbi befu tunluta bakilanga ndandu na batu bandumanga mu bisavu bi nza?
13 Batu baba dumanga mu bisavu ku divula di Grécia, baba viokilanga mu ziphasi ziwombo dedi phokongo ayi nyitu kutanta. Diawu bawu baba fiatilanga mu khubumunu baba tambulanga ayi mu mangolo mawu. Befu mvitu tuntambulanga khubumunu muingi tutatamana mu nzila yi luzingu. Vayi befu tunluta bakanga ndandu, kibila tuidi tho yi mangolo yikhambu sukanga. Ayi befu kufiatila kuidi Yave, nandi wunkanikisa ti wala kutukubika ayi wala kutuvana mangolo.—1 Petelo 5:10.
14. Buidi 2 Kolinto 12:9, 10 wulenda tusadisila kununga ziphasi ayi zithotolo?
14 Polo mvandi wuviokila mu ziphasi ziwombo. Kubika kuandi zithotolo ayi zinzomono zioso kaviokila, khumbu zinkaka mvandi waba banga wulebakana ayi waba nuananga nzingu mu ziphasi naveka katedila “nsongo mu nsuni.” (2 Kolinto 12:7) Vayi Polo kabasa tadilanga ko ziphasi aziozi buka kibila muingi kuvonga. Nandi waba tadilanga ziawu buka luaku lu kufiatila mu Yave. (Tanga 2 Kolinto 12:9, 10.) Kutadila mambu beni mu phila ayoyi, kuvanga Polo katambula lusadusu lu Yave muingi kakindama mu ziphasi beni.
15. Ndandu mbi tuala baka befu landakana kifuani ki Polo?
15 Befu mvitu balenda tuthota mu ziphila ziwombo. Ayi khumbu zinkaka tulenda ba balebakana mu kibila ki kimbevu. Vayi befu kulandakana kifuani ki Polo mu kutadila ziphasi aziozio buka luaku lu kufiatila mu Yave, tuala mona ti Yave wutuzolanga ayi widi va khonzu’itu muingi kutusadisa.
16. Kheti wisi ko buvinya bumboti, mbi wulenda vanga?
16 Vadi zikhomba ziwombo badi kimbevu kingolo, bankaka bamana bela malu ayi bankaka bamana fua meso. Enati mawu widi mu kuviokila, bukiedika ti wulenda nunga kuduma mu nzila yi luzingu na matoko bakhidi buvinya? Ngete wulenda nunga! Kibila zikhomba ziwombo bamana bela ayi beka biboba bamvanganga mawu. Vayi bawu bazebi ti bavangilanga ko mawu mu mangolo mawu veka, vayi bamfiatilanga mu mangolo Yave kaba vananga. Kheti mu ziphasi bamviokila, zikhomba aziozi banlandakananga zikhutukunu mu telefoni voti mu video. Ayi badi kifuza mu kusamuna mu thangu bamvana kimbangi kuidi mimfelimi, basi dikanda, mu kusonika minkanda voti kuvana kimbangi mu telefoni.
17. Buidi Yave kantadilanga batu badi buvinya bulebakana?
17 Kawubika kiunda voti kimbevu bi kuvanga kuyindula ti wulendi nunga ko kuduma mu nzila luzingu. Yave wukuzolanga mu kibila ki kiminu ayi lukuikumunu luaku. Nandi kalasa kukuekula ko ngie tatamana kutomba lusadusu luandi, vayi wala luta kufikama. (Minkunga 9:10) Tala mambu khomba mueka yinkieto widi buvinya bulebakana katuba: “Mu kibila ki bimbevu bi phila mu phila bi kuthatisanga, yibakanga ko beni luaku lu kusamuna. Vayi yizebi ti kheti nkadu mangolo yimvanganga, mankuangidikanga Yave ayi minu mvama yinkuangalalanga.” Mu thangu widi mu kiunda, tebukanga moyo ti wisi ko ngie veka. Yindulanga kifuani ki mvuala Polo ayi mambu katuba: ‘Mayangi yeti mona mu lebakana, . . . Bila mu thangu yidi wulebakana yawu thangu yidi mangolo.’—2 Kolinto 12:10.
18. Ziphasi mbi bankaka badi mu kuviokila?
18 Bankaka badi mu kuduma mu nzila yi luzingu, bamviokilanga mu mambu maphasi maviakana. Mambu beni, bankaka balendi mamona ko ayi balendi mavisa ko. Dedi, bankaka badi kimbevu ki kuba kiunda kingolo ayi kukuazuka beni. Kibila mbi tulenda tubila ti mambu zikhomba aziozi bamviokila madi beni maphasi? Kibila, bo mutu kambokuka koku voti kambela malu, batu boso bannunganga kumona ziphasi ziandi ayi kusandisa. Vayi mutu widi kimbevu ki kuba kiunda kingolo, kafika bakanga ko lusadusu lu bankaka kibila batu bafika visanga ko ziphasi kammona.
19. Mbi tulenda longuka mu kifuani ki Mefibozeti?
19 Eneti kimbevu kidi yaku ayi ngie widi mu kumona ti bankaka basimvisa ko ziphasi ziaku, buna kifuani ki Mefibozeti kilenda kukindisa. (2 Samueli 4:4) Kubotula kuandi kimbevu kaba mu malu, ntinu Davidi kasa fundisa ko Mefibozeti mu phila yisonga. Nandi kasa vanga ko ni diambu dimbi muingi kaviokila mu ziphasi beni. Kheti bobo, Mefibozeti kasa bika ko mayindu mambi mantula kiunda, vayi wutsikika mayindu mandi mu mambu mamboti kaviokila mu luzingu. Mefibozeti wuba tebukilanga moyo mamboti Davidi kamvangila kumbusa. (2 Samueli 9:6-10) Diawu bo Davidi kakhambu kumfundisa mu busonga, Mefibozeti wuvisa mamoso maba monika. Nandi kasa bika ko nzimbala yi Davidi yimvanga kazingila mu kiunda, ayi kasa vana ko Davidi fotu mu mambu kaba monikina. Nandi wutsikika mayindu mandi mu mambu kaba luaku lu kuvanga muingi kabuela mioko ntinu Yave kasola. (2 Samueli 16:1-4; 19:24-30) Yave wusonika kifuani ki Mefibozeti mu Kibibila muingi tubaka ndandu.—Loma 15:4.
20. Ziphasi mbi bankaka bamviokilanga mu kibila ki kiunda kingolo badi, vayi lufiatu mbi balenda ba?
20 Zikhomba zinkaka badi kimbevu ki kuba kiunda kingolo, bazolanga ko beni kuba bafikama na batu bankaka. Bawu bammonanga beni phasi kuba vama vadi batu bawombo. Kheti bobo, bankuendanga mu zikhutukunu zi kimvuka ayi zi mavula. Bawu mvawu bammonanga phasi kukoluka na batu bakhambu zaba, vayi bannunganga kukokula na batu mu kisalu ki kusamuna. Boti mawu wumviokila, zaba ti wisi ko ngie veka. Bawombo badi mu kuviokila mu phila mambu amomo. Tebukanga moyo ti Yave widi beni mayangi mu kumona mangolo wumvanga. Ayi kuzaba ti wukhidi vibidila, yidi mbonosono ti Yave widi mu kusakumuna ayi widi mu kuvana mangolo wuntomba. * (Filipi 4:6, 7; 1 Petelo 5:7) Enati widi mu kusadila Yave kheti mu buvinya bulebakana voti mu kimbevu ki kuba kiunda kingolo, wulenda ba lufiatu ti Yave widi beni mayangi mu mamoso wumvanga.
21. Mbi tuala nunga kuvanga mu lusadusu lu Yave?
21 Mayangi beni kuzaba ti vadi disuasana mu matedi zithinu Polo katubila baklisto banduma ayi bisavu bi kuduma batu bantanga mu nza. Mu bisavu bi kuduma batu baba vanganga mu thangu yikhulu, mutu mueka to waba tambulanga mfutu. Vayi, mu nzila luzingu, baboso bala kindama nate kuna tsuka bala tambula moyo wu mvu ka mvu. (Yoane 3:16) Mu bisavu bi kuduma, baboso bafueti ba buvinya bumboti, khanu balendi baka ko luaku lu kununga. Vayi, basi ko baboso banduma mu nzila luzingu badi buvinya bumboti, kheti bobo, tuidi mu kuvibidila. (2 Kolinto 4:16) Ayi mu lusadusu lu Yave, tuala nunga kutatamana nate kuna tsuka.
NKUNGA 144 Tadidila mu Mfutu!
^ Lut. 5 Bisadi biwombo bi Yave bubu badi mu kutovuka mu kibila ki ziphasi zi bununu, kimbevu ayi khumbu zinkaka befu boso tumbanga bavonga. Diawu, dilenda ba diambu diphasi kuduma zithinu mu nzila yi luzingu. Mu dilongi adidi, tunkuiza mona buidi befu boso tulenda nungina kuduma mu lukuikumunu ayi kutambula mfutu wu luzingu mvuala Polo katubila.
^ Lut. 6 Tala dilongi dintuba “Kibibila Kimbalulanga Luzingu lu Batu” mu Kibanga ki Nsungi yi Ngonda Yitheti yi mvu 2013.
^ Lut. 20 Mu jw.org®. Tomba vadi BILONGULU > JW BROADCASTING, mu Ngonda Yintanu mvu 2019 yimbuela vana malongi matedi buidi bu kunungina kimbevu ki kuba kiunda kingolo, ayi yimmonisa mvandi bifuani bikiedika bi zikhomba badi mu kununga mawu.
^ Lut. 63 MAMBU MADI MU ZIFIKULA: Khomba awuwu weka kiboba, wunnunga kutatamana mu nzila yi luzingu, kibila wukivananga mu kisalu ki kusamuna.
^ Lut. 65 MAMBU MADI MU ZIFIKULA: Phila yimueka tulenda vangila bankaka kubua mu masumu, yidi mu kuba kuika banua beni malavu voti befu manga kengidila phila tunnuina mawu.
^ Lut. 67 MAMBU MADI MU ZIFIKULA: Kheti bo kadi ku nzo mbuku, khomba mueka wu dibakala wuntatamana mu nzila luzingu mu kuvana kimbangi kuidi mfelimi wu kunkieba.
