Kibila mbi Yesu ava kafua kavutukila mambu Davidi katuba mu Minkunga 22:1?

▪ Ava Yesu kafua, nandi wutuba mambu madi mu Matai 27:46: ‘Nzambi’ama, Nzambi’ama kibila mbi be khuekudila?’ Yesu mu kutuba mambu amomo, nandi waba monisa ti mbikudulu Davidi kasonica mu Minkunga 22:1, yiyiza salama. (Malako15:34) Disi ko diambu dimboti kuyindula ti Yesu kayolukila mambu amomo kibila wunyongina Yave, voti kiminu kiandi mu Nzambi kidekuka mu mua thangu. Yesu wuvisa kibila mbi vabe tombolu nandi kufua ayi wuba wukubama muingi kuvanga mawu. (Matai 16:21; 20:28) Nandi mvandi wuzaba ti mu thangu yi lufua luandi, Yave wala botula ‘lukiebu luandi’ mu mua thangu. (Yobi 1:10) Yave kavangila mawu, muingi Yesu kamonisa lukuikumunu luandi kuidi Nandi, kheti mu ziphasi zingolo kamonikina mu lufua luandi.—Malako 14:35, 36. 

Buabu kibila mbi Yesu katubila mambu amomo madi mu Minkunga? Kheti tuisa zaba ko bibila bioso, vayi tuentubila mua bibila binnata kutuba mawu. *

Bo Yesu katuba mambu amomo, bukiedika ti nandi wabe tomba kutuba ti Yave kasinkuiza vanga ko ni diambu muingi kunkula mu lufua? Ndamba! Kibila vabe tombolu kufuta nkhayilu yi khudulu mu khambu ku lusadusu lu Yave. Diawu bo Yesu kaba nyitu yi kinsuni, vabe tombolu nandi ‘kufua mu kibila ki batu boso.’—Ebe. 2:9.

Bo Yesu katuba mambu amomo madi mu minkunga, bukiedika ti nandi kabe tomba muingi  batu bayindula mu kapu yoso yidi mu lutangu beni? Kiba kikhulu ki basi Yuda kulundanga matangu mawombo va kilunzi. Bo baba kuba tebulanga moyo lutangu lumueka lu minkunga, bawu baba bambukanga moyo matangu ma kapu yoso. Boti mawu mayindu Yesu kaba, buna nandi wusadisa minlonguki miandi kutebuka moyo zimbikudulu ziwombo zidi mu minkunga, ziba tubila matedi lufua luandi. (Minku. 22:7, 8, 15, 16, 18, 24) Mvandi matangu matsuka ma kapu ayoyi yi Minkunga manzitisa Yave. Ayi mawu mantedila Yave Ntinu wu Nza Yimvimba.—Minku. 22:27-31.

Bo Yesu kavutukila mambu Davidi katuba, nandi waba tomba kutuba ti kasa ba ko foto mu mambu kaba monikina? Ava bamvonda, nzo yi lufundusu yilutidi, bamfundisa kibila bamvunina ti nandi wuba mvuezi. (Matai 26:65, 66) Ayi lufundusu beni luvangama mu thinu muna builu beni ayi luisa ba ko kithuadi na minsiku mi tsi mintubila phila yifuana yi kufundisila mutu. (Matai 26:59; Malako 14:56-59) Bo Yesu kavana kiuvu akiki, Nzambi’ami, Nzambi’ami kibila mbi bekhuekudila, nandi waba tomba kutuba ti kasa vanga ko ni diambu dimbi muingi bamvonda.

Yesu wuba tebula batu moyo ti Davidi, nsoniki wu minkunga mvandi wuviokila mu ziphasi, vayi mawu maba sundula ti nandi kasa ba ko lunungu va meso ma Yave? Kiuvu Davidi kavanga kiabasa monisa ko kukhambu ku kiminu. Kibila bo kavanga kiuvu akiokio, nandi wutuba ti wuba lufiatu ti Yave kalenda vukisa dikabu diandi. Ayi Yave wutatamana kunsakumuna. (Minku. 22:23, 24, 27) Bobuawu mvandi, kheti Yesu muana wu Davidi wabe viokila mu ziphasi va dikunzi, mawu mabasa monisa ko ti nandi kasa ba ko lunungu va meso ma Yave.—Matai 21:9.

Yesu wuba monisa kiunda kingolo kaba bo Yave kabotula lukiebu luandi mu mua thangu muingi kamonisa lukuikumunu kaba mu Nandi? Tona muna tona, Yave kasa ba ko makani muingi Muan’andi katovuka ayi kafua. Vayi mawu mayiza baluka bo Adami ayi Eva balevula minsiku miandi. Yesu kasa vanga ko ni diambu dimueka dimbi. Vayi vabe tombolu nandi kutovuka ayi kufua muingi kuvana mvutu kuidi Satana ayi kufuta khudulu muingi kuvukisa batu mu masumu ayi mu lufua. (Malako 8:31; 1 Pete. 2:21-24) Diawu vabe tombulu Yave kubotula lukiebu luandi khumbu yitheti mu mua thangu kuidi Yesu, muingi mambu moso amomo mavangama.

Bukiedika ti Yesu wabe tomba kusadisa minlonguki miandi kuyindula kibila Yave kabikila nandi kafuila mu phila ayoyo? * Yesu wuzaba ti kufuila va dikunzi banga mvuezi, kulenda lueka ayi nyongisa mintima mi bankaka. (1 Koli. 1:23) Boti minlandikini miandi bavisa kibila kikiedika nandi kafuila, bawu khanu bavisa tsundu yi lufua luandi. (Ngala. 3:13, 14) Mawu maba sadisa kuvisa ti Yesu kasa fuila ko mu kuba mvuezi, vayi muingi kukula batu.

Kioso kuandi kibila kinata Yesu kutuba mambu amomo, nandi wuzaba ti kufuila va dikunzi, kunsundula kuvanga luzolo lu Yave. Bo kamana kutuba mambu amomo madi mu minkunga, nandi wubue tuba: “Mamoso masundukidi!” (Yoane 19:30; Luka 22:37) Bo Yave kabika kusadisa Yesu mu mua thangu, Nandi wumvana luaku muingi kuvanga mamoso kantuma muingi kavanga va mbata ntoto. Mvandi wumvana luaku muingi kudukisa mamoso masonimina mu kibila kiandi ‘mu Minsiku mi Mose, kuidi Mimbikudi ayi mu Minkunga.’—Luka 24:44.