Kiadi ayi kiunda kuzaba ti bo yiba kikhupa, kikundi kiama kifikama na Yave kiyiza dekuka. Batu baba kotanga yama kikola baba monika ti baba kiphuanza ki kuvanga dioso kuandi diambu batidi ayi mawu minu mvama yaba tomba. Minu yitona kumona ti minsiku mi matata mama ayi zithuadusulu zi Yave ziba beni phasi. Ayi minu yiyindula ti kusadila Yave kiba kisalu kingolo beni. Kheti minu yizaba ti Yave widi, vayi minu yisa bue ba ko kinkundi kifikama ayi Nandi.

Minu yisa bika ko kisalu ki kusamuna, vayi yidekula kifuza kiama mu kisalu ki Yave. Ayi ava kukuenda mu kisalu ki kusamuna, yabasa kubamanga ko. Diawu yabasa bakilanga ko mutu wu kuvutukila voti minlonguki mi Kibibila. Ayi mawu mabuela kudekula kifuza kiama mu kisalu ki kusamuna. Diawu minu yikiyuvusa: ‘Buidi bankaka bannunginanga kuvanga kisalu ki kusamuna kadika sabala ayi kadika ngonda?’

Bo yidukisa 17 di mimvu, minu yaba tomba kubaka kiphuanza ki kuvanga mamoso yitidi. Diawu yikubikila zimala ziama, yibasika ku nzo ayi yiyenda kue zingila ku Austrália. Diba diambu diphasi kuidi matata mama, kibila bawu baba kuazuka  beni. Vayi bawu baba yindula ti minu yinkuiza tatamana kusadila Yave.

Vayi ku Austrália, kiminu kiama kiluta dekuka. Kibila yabasa bue kuendanga ko mu zikhutukunu zioso. Minu yivanga kikundi na matoko mankaka mu kimvuka baba bavonga mu kiphevi. Vayi mambu maba moninganga, bo tuaba kuendanga mu zikhutunu va builu, mu kilumbu kinlanda tuaba kuendanga mu minkungi muingi kunua malavu ayi kukina. Bo yinyindulanga luzingu yima nata ku mbusa, minu yaba muenanga ti yaba sadilanga Yave mu bukiedika, vayi kuvuna yiba kuyivunanga, kibila yaba vanganga mambu mawombo mambi.

Bo vavioka mimvu miodi, minu yizaba khomba yimueka yinkieto ayi nandi mu khambu zaba, wutsadisa kuyindula mu phila yaba natina luzingu luama. Minu yaba kalanga na zikhomba zitanu zi bakieto bakhambu kuela. Ayi tutumisa Nkengididi wu bimvuka ayi nkazi’andi muingi bakala ku nzo’itu mu sabala yi kinzenza. Minu yizola beni, kibila nandi wuba mutu wu ndembama ayi wu mayangi. Yiyituka beni kumona mutu widi kiphevi kimboti vayi mvandi wuba beni wusakadala.

Tamara wuba mutu wu mayangi, luzolo luandi mu kiedika ayi mu kisalu ki kusamuna, luaba kindisanga bankaka. Nandi wuba beni mu mayangi kibila waba kukivana mu kisalu ki Yave. Vayi minu, yabasa vanganga ko mawu. Mvandi zikhadulu ziandi zimboti ayi mayangi mandi makiedika, matsadisa beni. Ayi kifuani kiandi kithebula moyo mambu makiedika madi mu Kibibila. Yave wuntomba muingi befu boso tunsadila ‘mu mayangi’ ayi ‘mu minkunga mi mayangi.’—Minku. 100:2.

Minu yaba tomba kubaka mayangi Tamara kaba. Vayi muingi kubaka mawu vaba tombolu kubalula mua mambu mu luzingu luama. Ayi malembe malembe, minu yinunga kuvanga mawu. Yitona kukubama ava kukuenda mu kisalu ki kusamuna ayi mu mua zikhumbu yaba salanga banga nsadisi wu mintuami ntuala. Mawu matsadisa kununga boma ayi kubuela ba lufiatu. Mvandi bo yaba sadila beni Kibibila mu kisalu ki kusamuna, yitona kumona mayangi makiedika mu luzingu  luama. Diawu yibakila makani ma kuba nsadisi wu mintuami ntuala mu zingonda zioso.

Yitona kuvanga bukundi na zikhomba baba kiphevi kimboti ayi baba zolanga beni kukivana mu kisalu ki Yave. Kifuani kiawu kimboti, kitsadisa kufiongunina mambu malutidi nkinza yifueti tula va theti mu luzingu luama. Buviokila thangu, yiluta kubue zola kisalu ki kusamuna ayi yikota mu kisalu ki ntuami ntuala. Mu kutala mu mimvu mima vioka, bosi yima bue vutuka kumona mayangi ma kuba mu kimvuka ki Yave.

Bo vavioka mvu mueka, yizaba Alex wuba mutu wu mayangi, waba zolanga Yave ayi kisalu ki kusamuna. Nandi wuba nsadisi wu bakulutu ba Kimvuka ayi mu mimvu misambanu kasadila kisalu ki ntuami ntuala. Alex mvandi wusadila mu mua mimvu ku kibuamgu kiba beni tsatu ku tsi yi Malawi. Kuawu kazabila zikhomba baba mu kisalu ki misioni bansadisa ayi bankindisa kutatamana kutula Kintinu ki Yave va theti mu luzingu luandi.

Mu mvu 2003, minu ayi Alex tukuelana ayi tutatamana mu kisalu ki thangu ka thangu. Tulonguka malongi mawombo mamboti ayi Yave wu tusakumuna mu ziphila ziwombo.

Mu mvu 2009, ba tutumisa mu kisalu ki misioni ku Timor-Leste, tsi yidi ku khonzo Indonésia. Befu tuyituka, tuyangalala ayi mvandi tuba nkadu boma muna thangu beni. Bo vavioka zingonda zitanu, befu tuvitila ku capital yi Timor-Leste bantedilanga, Dili.

Luzingu tunata ku divula di Dili, luba beni disuasana na lo tuba ku kibuangu kinkaka. Kibila vaba tombolu kukolama kikhulu kimona, mbembo, bidia ayi phila yimona yi kuzingila. Mu kisalu ki kusamuna, tuaba dengananga batu badi biphumbulu, bakhambu kota kikola, badi beni biluasi mu nyitu mu kibila ki mvita ayi buphunya buwombo buba ku divula beni. *

 Kisalu ki kusamuna kiba beni kimboti! Dedi, tuzaba muana mueka wunkieto wuba 13, di mimvu bantedilanga Malia. * Nandi wuba banga beni mu kiunda, kibila mam’andi wufua ayi kabasa monananga ko beni na tat’andi. Dedi bana bankaka, Malia kasa baka ko thuadusulu yi matata mandi. Yintebuka moyo kilumbu kinkaka kaba dila ayi kaba kukhamba mabanza mandi. Vayi bo yikhambu zaba buboti mbembu’andi, yisa visa ko mbi kaba tomba kukhamba. Diawu yisambila kuidi Yave muingi katsadisa yi zaba bu kunkindisila. Bosi yitona kuntangila matangu ma Kibibila. Buviokila thangu, kiedika kibalula mavanga, kimutu ayi luzingu lu Malia. Nandi wubotama ayi bubu wuntuadisanga ndongukulu yi Kibibila kuidi batu bankaka. Bubu, Malia widi dikanda dinneni di kiphevi di kunkindisanga ayi di kumbombanga.

Bukiedika, Yave wunsakumuna kisalu kitu tuvanga ku Timor-Leste. Kheti bawombo mu minsamuni badukisidiabu ko 10 di mimvu tona babotama, vayi bawombo mu bawu beka mintuami ntuala, bankaka minsadisi mi bakulutu ayi bankaka bakulutu ba kimvuka. Minsamuni minkaka badi mu kusadila ku kibuangu bansekudilanga bilongulu, muingi kukubika bidia bi kiphevi mu zimbembo babutukila. Yinkuangalalanga beni mu thangu bawu bankuimbila mu zikhutukunu, kumona mayangi mu bizizi biawu ayi mvandi ndionzukulu’awu mu kiphevi.

Kiyeku tuba ku Timor-Leste, disuana beni kiba na luzingu tuaba natanga ku Austrália. Vayi tuisi ko bu kudedikisila mayangi mawombo tubaka mu kisalu beni. Khumbu zinkaka, befu tuaba makanga mu makalu maba beni mawala batu, baba natinanga masambu ayi biuma binkaka baba natanga muingi kue sumbisa mu mazandu. Ayi khumbu zinkaka, befu tuaba vangilanga ndongukulu yi Kibibila mu zinzo ziba beni ziluelu, ziba beni mbazu ayi vovawu tuaba tuadisilanga ndongukulu yi Kibibila, zitsusu mvawu baba tulanga biyoko. Vayi kheti mu mambu moso amomo maphasi, khumbu ziwombo yaba yindulanga: ‘Vasi ko luzingu lunkaka lulutidi lulenda kuthuadisa mayangi!’

Mu kutala bilumbu bi mavioka kumbusa, yidi beni mu mayangi ayi yintondanga matata mama mu kundonga zithumu zi Yave ayi mu kukhindisa, kheti bo yiviokila mu mambu maphasi mu butoko buama. Bukiedika, mambu madi mu Zingana 22:6 masalama mu luzingu luama. Matata mama, bankuangalalanga mu minu ayi nnuni’ama Alex. Bawu badi beni mu mayangi bo ba tumonanga kusadila luzingu luitu mu kisalu ki Yave. Tona mu mvu 2016, tuidi mu kisalu ki kukengidila bimvuka ku kizunga kidi mu thuadusulu yi Filiali yi Australásia.

Ma kukuitukila kuzaba ti mu mimvu mima vioka, yabasa zolanga ko kisalu ki kusamuna. Vayi bubu yimana kukizola beni! Yivisa ti moso kuandi mambu tulenda viokila mu luzingu, mayangi makiedika mankuizilanga to mu kusadila Yave mu ntima woso. Diawu mu 18 di mimvu minu ayi Alex tusadila Yave; miawu mimvu tuluta bakila mayangi mu luzingu luitu. Bubu yimana visa mambu Davidi kakamba Yave: ‘Vayi baboso bansuamina kuidi ngiewu bala yangalala; bala tatamana kukuimbila mu mayangi. . . . Ayi banzolanga dizina, diaku bala kuangalala mu ngiewu.’—Minku. 5:11.