DILONGI 14
‘Landakana Buboti Zithambi zi Yesu’
‘Klisto wumona ziphasi mu kibila kinu ayi wulubikila kifuani muingi mulandakana zithambi ziandi mu phila yifuana.’—1 PETE. 2:21.
NKUNGA 13 Klisto, Ntungulu’itu
MAMBU TUANLONGUKA *
Yesu wubika zithambi muingi befu tulandakana mu phila yifuana (Tala matangu 1-2)
1-2. Mbi tufueti vanga muingi tulandakana kifuani ki Yesu? Vana kifuani.
YINDULABU ti ngie widi mu dingumba di batu babe zimbala ku kibuangu kidi beni zimina. Vayi muna thangu beni, mummona dibakala zebi kibuangu beni buboti ayi nandi wuntuama ntuala muingi ku mutuadisa. Bo kantuama ntuala, nandi wumbika zithambi ziandi mo kamviokila. Kheti beno luisi bue kummona ko, luisinkuiza ba ko mu boma, kibila munkuiza tatamana kulandakana zithambi ziandi buboti nati mumbasika va kibuangu kidi nsika!
2 Befu baklisto bakiedika, tuidi buka dingumba adiodio babe tubila mu kifuani. Tuidi mu kudiata mu nza ayiyi yi Satana yidi buka kibuangu kidi beni zimina. Vayi tuidi beni mayangi, kibila Yave wu tuvana Muan’andi Yesu Klisto muingi tulandakana zithambi ziandi. (1 Pete. 2:21) Mu matangu amama, mvuala Petelo wumfuanikisa Yesu banga ntuadisi. Dedi bo ntuadisi tube tubila mu kifuani kabikila zithambi muingi bo badi ku mbus’andi balandakana, Yesu Klisto mvandi wubika zithambi muingi befu tulandakana. Buabu tuembaka mimvutu mi biuvu abibi bitatu—mbi binsundula kulandakana zithambi zi Yesu? Kibila mbi tufueti landikinina zithambi beni? Ayi buidi tulenda landikinina ziawu?
MBI BINSUNDULA KULANDAKANA ZITHAMBI ZI YESU?
3. Mbi binsundula kulandakana zithambi zi mutu?
3 Mbi binsundula kulandakana zithambi zi mutu? Mu Kibibila bikuma “kudiata” ayi “bitambi”, khumbu zinkaka binsundula nzingulu yi mutu. (Ngene. 6:9; Zinga. 4:26) Kifuani mutu kammonisa mu luzingu luandi, ba kidedikisa banga zithambi kambika bo kandiata. Diawu, kulandakana zithambi zi mutu kunsundula kulandakana kifuani kiandi.
4. Mbi binsundula kulandakana zithambi zi Yesu?
4 Mbi binsundula kulandakana zithambi zi Yesu? Kunsundula kulandakana kifuani kiandi. Mu matangu mabongulu dilongi adidi, mvuala Petelo wutubila matedi kifuani kimboti Yesu kavana, bo katatamana wukuikama kheti mu ziphasi kaviokila. Vayi tulenda landakana kifuani ki Yesu mu ziphila ziwombo. (1 Pete. 2:18-25) Diawu, phila Yesu kanatina luzingu luandi, mamoso katuba ayi kavanga, kidi kifuani ka tubikila muingi tulandakana.
5. Bukiedika ti tulenda landakana kifuani ki Yesu kheti mu kuba batu ba masumu? Sudikisa.
5 Bukiedika ti tulenda landakana kifuani ki Yesu kheti mu kuba batu ba masumu? Ngete, tulenda. Tebuka moyo mambu mvuala Polo katuba ti ‘tufueti landakana zithambi zi [Yesu] mu phila yifuana’—vayi kubika mu phila yivedila. Diawu, kheti bo tuidi batu ba masumu, befu kuvanga mamoso tunnunga muingi kulandakana zithambi zi Yesu, tuala landakana dilongi di mvuala Yoane wutuba: ‘Tatamananu kudiatila dedi bo nandi [Yesu] kadiatila.’—1 Yoane 2:6.
KIBILA MBI TUFUETI LANDIKININA ZITHAMBI ZI YESU?
6-7. Kibila mbi tulenda tubila ti befu kulandakana zithambi zi Yesu tuala fikama Yave?
6 Kulandakana zithambi zi Yesu zilenda kutu fikika kuidi Yave. Kibila mbi tulenda tubila mawu? Theti, kibila Yesu wuvana kifuani kimboti mu matedi buidi tulenda zingila muingi kukuangidika Nzambi. (Yoane 8:29) Diawu tuntondilanga Yave bo ka tuvana luaku lu kulandakana zithambi zi Yesu. Ayi tulenda ba lufiatu ti Tat’itu yi diyilu, wela fikama baboso bamvanganga mangolo ma kumfikama muingi baba bakundi bandi.—Yako. 4:8.
7 Kimuadi, Yesu wulandakana kifuani ki Tat’andi mu phila yivedila. Diawu katubila: “Woso mutu mbueni, mueni Tata.” (Yoane 14:9) Befu kulandakana zikhadulu zi Yesu ayi phila kaba zingilanga na bankaka—dedi, kiadi kamonisa kuidi dibakala diba buazi, kuidi nkieto wuba mbela yingolo ayi kuidi batu bafuilu—buna befu mvitu tuidi mu kulandakana kifuani ki Yave. (Malako 1:40, 41; 5:25-34; Yoane 11:33-35) Bo tunluta landakana kifuani ki Yave, buawu mvandi tunluta kumfikimina.
8. Buidi kulandakana zithambi zi Yesu kulenda kutu sadisila kununga nza yi Satana?
8 Kulandakana zithambi zi Yesu kulenda ku tusadisa kubika vuvuka mu mambu ma nza ayiyi. Va builu butsuka ava nandi kafua, Yesu wutuba: ‘Minu yima nunga nza.’ (Yoane 16:33) Nandi waba tomba kutuba ti, kasa bika ko mayindu ma batu voti mambu ma nza ayiyi matuadisa luzingu luandi. Yesu kasa zimbakana ko ti kusadila Yave, kiawu kibila kinkinza kayizila va ntoto. Abu befu, buidi tulenda vangila mawu? Mu nza ayiyi vadi biuma biwombo bilenda kutu vuvusa. Vayi, befu kulandakana kifuani ki Yesu ayi kutsikika mayindu mitu mu kuvanga luzolo lu Yave, befu mvitu tuala “nunga” nza ayiyi yi Satana.—1 Yoane 5:5.
9. Mbi tufueti vanga muingi tutatamana mu nzila yi luzingu lu mvu ka mvu?
9 Kulandakana zithambi zi Yesu kulenda kutu sadisa kubaka luzingu lu mvu ka mvu. Bo dibakala dimueka kayuvula mbi kafueti vanga muingi kabaka luzingu lu mvu ka mvu, Yesu wumvutudila: ‘Yiza ba nlandikini’ama.’ (Matai 19:16-21) Vaba basi Yuda bankaka baba manga kikininanga ti Yesu nandi Klisto. Vayi nandi wuba kamba: ‘Mamemi mama . . . ma kundandakananga. Minu yela kuba vana luzingu lu mvu ka mvu.’ (Yoane 10:24-29) Bo Nicodemi, wumueka mu zimfumu zi basi Yuda kavua nkinza malongi ma Yesu, nandi wunkamba: ‘Woso wu kundekila kiminu’ wala baka ‘luzingu lu mvu ka mvu.’ (Yoane 3:16) Tunlekilanga kiminu mu Yesu, bo tunsadila mambu kalonga ayi bo tunlandakana kifuani kiandi. Befu kuvanga mawu, tuala tatamana mu nzila luzingu lu mvu ka mvu.—Matai 7:14.
BUIDI TULENDA LANDIKININA ZITHAMBI ZI YESU MU PHILA YISULAMA?
10. Mbi binsundula “kuzaba” buboti Yesu? (John 17:3)
10 Muingi tununga kulandakana zithambi zi Yesu mu phila yisulama, theti tufueti kunzaba buboti. (Tanga Yoane 17:3.) ‘Kuzaba Yesu’ kunsundula, kutatamana kulonguka matedi zikhadulu ziandi, mayindu mandi ayi zithuadusulu ziandi. Kheti tueka mimvu miwombo voti ndamba tona tutona kusadila Yave, tufueti tatamana kulonguka matedi Yave ayi Muan’andi Yesu.
11. Mambu mbi tulenda longuka mu zibuku zinna zintubila matedi luzingu lu Yesu?
11 Muingi kutu sadisa kuzaba buboti Muan’andi, Yave wutuma basonika mu Kibibila zibuku zinna zintubila matedi luzingu lu Yesu. Zibuku aziozio, zintubila matedi kinongo ki Yesu. Matedi luzingu luandi ayi kisalu ki kusamuna kavanga va ntoto. Mvandi zintubila matedi mambu nandi katuba, kavanga ayi mabanza mandi. Zibuku beni zinna zintubila matedi luzingu lu Yesu, zilenda kutu sadisa kulandakana kifuani kiandi mu phila yisulama. (Ebe. 12:3) Ayi ziawu zimmonisa zithambi Yesu kabika bo kaba va ntoto. Diawu, befu kufiongunina buboti matedi zibuku aziozio zintubila matedi luzingu lu Yesu, tuala kunzaba buboti. Ayi tuala nunga kulandakana zithambi ziandi mu phila yifuana.
12. Buidi tulenda bakila ndandu mu zibuku zinna zintubila matedi luzingu lu Yesu?
12 Muingi tubaka ndandu mu zibuku zinna zintubila matedi luzingu lu Yesu, vasintombolu ko to kutanga ziawu. Vayi tufueti botula thangu muingi kulonguka ayi kuyindula mu mambu tuntanga. (Dedikisa na Yosua 1:8, nota.) Tuemmona ziphila ziwadi tulenda vangila mawu muingi kutu sadisa kuyindula ayi kusadila mambu tuanlonguka mu zibuku aziozio.
13. Buidi wulenda visila binongo bidi mu zibuku zinna zintubila matedi luzingu lu Yesu?
13 Ditheti, visa binongu bioso bidi mu zibuku zia zinna. Sadila mayindu maku muingi kuyindula, kumona ayi kukuwa mambu madi mu binongu beni. Muingi wununga kuvanga mawu, fiongunina mu bilongulu kimvuka ki Yave kimbasisanga bintubila matedi binongu beni. Fiongunina kinongu, mu kutanga matangu moso mantubila kinongu beni. Tomba mvandi bilongulu binsudikisa kinongu kioso. Dedi, wulenda dedikisa kinongu widi mu kutanga na kinongu kidi mu buku yinkaka kintubila momawu mambu. Ngie kuvanga mawu, wunkuiza bakula mambu mankaka.
14-15. Buidi tulenda sadila mu luzingu luitu mambu tunlonguka mu zibuku zinna zintubila matedi luzingu lu Yesu?
14 Dimuadi, sadila mu luzingu luaku mambu belonguka mu binongu beni. (Yoane 13:17) Bo wummana kulonguka binongu beni, wukiyuvusa: ‘Buidi yilenda sadila kinongu akiki muingi kusadisa mutu wunkaka? Yindula nani mu kimvuka wunkuiza sadisa mu mambu belonguka. Bosi mu luzolo, kamba mambu belonguka kuidi bankaka.
15 Tunkuiza mona kifuani kimueka kilenda kutu sadisa kulandakana mambu mamuadi amomo. Tunkuiza mona kinongu ki mfuizi wuba kiphumbulu wo Yesu kamona ku tempelo.
MFUIZI WUKHAMBU BA MBAKULU WIDI KU TEMPELO
16. Buidi wulenda vanina tsundu kinongu kidi mu Malako 12:41?
16 Vanga mangolo muingi kinongu kiba tsundu. (Tanga Malako 12:41.) Yindula mamoso madi mu kinongu. Kiba kilumbu 11 Ngonda Nisa, mvu 33 T.K.—bo vabe kambu sabala yimueka ava lufua lu Yesu. Mu kilumbu beni, Yesu wuviokisa thangu yiwombo muingi kulonga ku tempelo. Vayi zimfumu zi binganga baba tomba kuntula nkaku. Theti, bawu banyuvula mu lulendu lu nani kanlongilanga. Bosi bamvana biuvu bio bayindula ti kalendi nunga ko kuvana mimvutu. (Malako 11:27-33; 12:13-34) Buabu, Yesu makuenda ku khonzu yinkaka yi tempelo—bantedilanga Kibuangu ki Bakieto. Nandi wuntala ayi wumona zikasu baba tulanga zimbongo muviokila bibaka bi kibuangu beni. Nandi wuntala batu bamvana minkhayilu mu kasu. Ayi wummona bisina biwombo mvawu bamvana minkhayilu mu zikasu. Ayi ḿba nandi wuba beni wufikama bo kayuwa lusuku lu zimbongo ziaba doduka mu zikasu.
17. Mbi mfuizi wuba kiphumbulu bantubila mu Malako 12:42 kavanga?
17 Tanga Malako 12:42. Mu mua thangu, vamonika nkieto wumueka wuvanga Yesu kukuituka. Nandi wuba mfuizi. (Luka 21:2) Luzingu luandi luba beni phasi ayi kabasa bakanga ko zimbongo muingi kusumba biuma kaba tomba. Nandi wuyenda vantuala zikasu baba vaninanga mikhayilu ayi wudodula zimbongo ziwadi zi bisengu zikhambulu beni luvalu ayi zikhambu tulanga lusuku. Vayi kheti bobo, Yesu wuzaba thalu yi zimbongo kavana ayi wuzaba ti zisa ba ko beni luvalu mu thangu’awu. Ayi ziawu zisa ba ko zifuana muingi kusumba kheti dikuanga dimueka, zinuni zikhambu ba beni bukalu baba sumbisanga muingi kudia.
18. Dedi bummonisina Malako 12:43, 44, mambu mbi Yesu katuba matedi nkhayilu mfuizi kavana?
18 Tanga Malako 12:43, 44. Yesu wuyituka beni mambu mfuizi awowo kavanga. Diawu katedila minlonguki miandi ayi wuba kamba: ‘Bukiedika yilu kamba, mfuizi awowo wu kiphumbulu beluta vana zimbongo mu kilundulu ki zimbongo kena baboso.’ Bosi wusudikisa: ‘Bawu [bisina] babe tula zimbongo zio, bakhambu vua nkinza. Vayi nandi mu buphumbulu buandi, betula ziazioso zibedi yandi, zio kafueti zingila.’ Bo mfuizi kavana zimbongo zioso kaba, nandi wuba lufiatu ti Yave wunkuiza kieba zitsatu ziandi.—Minku. 26:3.
Landakana kifuani ki Yesu, mu kutondanga bankaka mu kisalu kiawu kikuikama kuidi Yave (Tala matangu 19-20) *
19. Mambu mbi mankinza tulenda longuka mu mambu Yesu katuba matedi mfuizi?
19 Sadila mambu betanga mu kinongu mu luzingu luaku. Wukiyuvusa: ‘Mbi yilenda longuka mu mambu Yesu katuba matedi mfuizi?’ Buabu, yindula mu mfuizi. Ḿba makani mandi maba, kuvana Yave biuma biwombo. Vayi nandi wuvanga mamoso kanunga. Wuvana biabioso kaba mu luzingu luandi kuidi Yave. Ayi Yesu wuzaba ti nkhayilu awowo wuba beni luvalu va meso ma Tat’andi. Avava tuma longuka diambu dimueka dinkinza beni: Yave wunkuangalalanga mu thangu tu kunkabila mu ntim’itu woso ayi mu muel’itu woso. (Matai 22:37; Kolo. 3:23) Yave wunkuangalalanga mu thangu kammona mangolo tumvanganga muingi kubasika mu kisalu ki kusamuna, kulandakana zikhutukunu ayi mambu mankaka ma kiphevi.
20. Buidi tulenda sadila mambu madi mu kinongu ki mfuizi wukhambulu mbakulu? Vana kifuani.
20 Buidi wulenda sadila mambu belongukila mu kinongu ki mfuizi? Yindula mu batu zebi balenda baka khindusulu ngie kuba tebula moyo ti Yave wunkuangalalanga mu mamoso bawu balenda nunga kuvanga kuidi nandi. Dedi, ngie zebi khomba yinkieto weka kiboba vayi wunyindulanga ti kasi ko tsadulu kibila kasiedi ko mangolo voti buvinya muingi kuvanga mambu kaba vanganga mu kisalu ki kusamuna? Voti yindula mu khomba yi dibakala widi kimbevo kingolo ayi wumbanga mu kiunda kibila kalendi ba ko mu Nzo yi Kintinu muingi kulandakana lukutukunu. Sadisa zikhomba aziozio mu kuba kamba mambu ‘malenda kuba kindisa.’ (Efe. 4:29) Wuba kamba mambu belonguka mu kinongu ki mfuizi. Mawu mankuiza basadisa kumona ti Yave wumvuanga nkinza mamoso bamvanganga. (Zinga. 15:23; 1 Tesa. 5:11) Ngie kuba tonda mu mambu bannunganga kuvanga mu kisalu ki Yave, kheti madi maluelo, ngie wala landakana zithambi zi Yesu mu phila yifuana.
21. Mambu mbi tufueti ba bakubama muingi kuvanga?
21 Befu tumvutulanga beni matondo kuidi Yave, bo katuma batula mu Kibibila zibuku zinna zintubila matedi luzingu lu Yesu! Ayi zibuku beni, zi tusadisanga kulandakana kifuani ki Yesu voti zithambi ziandi mu phila yisulama. Boti kuba, wulenda vanga ndongukulu’aku voti va dikanda muingi wulonguka matedi zibuku aziozio zinna zintubila matedi luzingu lu Yesu. Muingi kubaka ndandu mu binongu bi Kibibila, nkinza beni kuvisanga tsundu yi kinongu kioso ayi kutomba ziphila zi kusadila mambu beni mu luzingu luitu. Diawu muingi tununga kuvanga mawu, tufueti ba bakubama muingi kulandakana mambu Yesu kavanga ayi kukuwa mambu Yesu katuba. Mu dilongi dinkuiza, tuala mona mbi tulenda longuka mu mambu matsuka Yesu katuba bo kaba va ntoto.
NKUNGA 15 Zitisa Muana Yave!
^ Lut. 5 Befu baklisto bakiedika, tufueti landakana buboti zithambi zi Yesu. Zithambi mbi Yesu ka tubikila muingi tulandakana? Dilongi adidi dinkuiza vana mvutu wu kiuvu akiokio. Mvandi, dinkuiza tubila kibila mbi tufueti landikinina zithambi beni ayi buidi tulenda vangila mawu.
^ Lut. 60 MAMBU MADI MU ZIFIKULA: Bo kamana kuyindula mu mambu Yesu katuba mu matedi mfuizi wukhambu mbakulu, khomba yimueka yinkieto wunkindisa khomba yinkaka weka kiboba, mu kisalu kiandi kikuikama.
