1-2. Mbi binsundula khudulu, ayi kibila mbi tuntombila yawu?

MU THANGU Adami kasumuka, nandi wuzimbisa luaku lu kuzinga mvu ka mvu kuidi naveka, vayi mvandi kuidi baboso babutukila mu nkun’andi. Vasa ba ko nlemvu mu disumu nandi kavola, kibila mu lutia luandi kavangila mawu. Buabu, mbi tulenda tuba mu matedi nkun’andi? Tuzebi ti bawu basa vanga ko ni diambu dimueka dimbi ayi basa sindikisa ko Adami muingi kavola disumu beni. (Loma 5:12, 14) Mu kibila ki disumu kavola, Adami wuba kibila muingi kufua. Vayi Yave wuvanga diosokua diambu muingi kukula nkuna wu Adami ayi kuba vana luaku lu kuzinga mvu ka mvu! Diawu bo Adami kasumuka, Yave malembi malembi wuzabikisa mambu kankuiza vanga muingi kuvukisa bivevi bi batu bankuiza butukila mu nkuna wu Adami mu lusingu lu disumua ayi lufua. (Ngene. 3:15) Mu thangu yifuana, Yave wufila Muan’andi muingi ‘kuvana luzingu luandi banga khudulu va mvingi batu bawombo.’—Malako 10:45; Yoane 6:51.

² Mbi binsundula khudulu? Mu matangu ma Kingeleku, khudulu yinsundula thalu Yesu kafuta muingi kukula luzingu Adami kazimbisa. (1 Koli. 15:22) Kibila mbi tuntombila khudulu? Muingi kudedikisa busonga bu Yave, dedi bo katubila mu minsiku kavana kuidi Mose mu matedi kuvana luzingu mu luzingu lunkaka. (Esodu 21:23, 24) Diawu bo Adami kazimbisa luzingu lukhambulu masumu, vabe tombulu Yesu kavana luzingu luandi lu kinsuni lukhambulu masumu, muingi kudedikisa busonga bu Yave. (Loma 5:17) Diawu Yesu kadidi “Tata yi Mvu ka Mvu” kuidi baboso badi kiminu mu khudulu.—Yesa. 9:6; Loma 3:23, 24.

3. Dedi bummonisina Yoane 14:31 ayi 15:13, kibila mbi Yesu kabela wukubama muingi kuvana luzingu luandi lusonga banga khudulu?

³ Yesu wuba wukubama muingi kuvana luzingu luandi banga  khudulu, mu kibila ki luzolo kaba kuidi Tat’andi ayi mu befu. (Tanga Yoane 14:31; 15:13.) Mawu masadisa muingi lukanu Yave kadi mu batu ayi ntoto lusalama. Kibila mbi Yave kabikila Muan’andi Yesu katovuka beni ayi kafua? Mu dilongi adidi tunkuiza tubila bibila beni. Mvandi tunkuiza mona kifuani ki nsoniki wu Kibibila wumonisa luvalu mu nkhayilu yi khudulu. Bosi tunkuiza mona buidi tulenda monisina luvalu mu nkhayilu yi khudulu ayi buidi tulenda vutudila matondo kuidi Yave ayi Yesu mu mambu ba tuvangila

4. Sudikisa buidi Yesu kafuila.

⁴ Yundula buidi bubela kilumbu kitsuka ki luzingu lu Yesu va ntoto. Kheti wuba lulendu lu kutumisa bivevi na bivevi bi zimbasi muingi kunkieba, nandi wukiyekula mu mioko mi masodi ma basi Loma muingi bambula ayi bamvonda. (Matai 26:52-54; Yoane 18:3; 19:1) Masodi beni, basadila kikoti kiba zitsendi muingi kubula Yesu ayi kiawu kimana kunlueka nyitu yoso. Bosi bamvana nti wunneni widi beni kizitu kaba natina va mavangiti. Yesu waba meka kukokumuna wawu, vayi kabasa nunga ko kibila wuba beni wuvonga. Diawu masodi ma basi Loma batombila mutu wunkaka muingi kansadisa kunata nti beni. (Matai 27:32) Bo Yesu katula va kibuangu kafuila, masodi ma basi Loma bambanda zitsiesi mu mioko ayi malu mandi va dikunzi. Ayi mu kibila ki kizitu ki nyitu’andi, bo bambanda zitsiesi, zimbeza zitona kukhakuka. Bakundi bandi ayi mam’andi, badila beni vayi zimfumu zi luyalu zi basi Yuda, kuvueza baba vueza Yesu. (Luka 23:32-38; Yoane 19:25) Yesu wutovuka mu zithangu ziwombo. Dedi, bo ntim’andi wutona kusala beni thinu, nandi wabe mona phasi kuvumuka. Ayi bo kavumuka khumbu yitsuka, nandi wuvanga nsambu, wuyinika kizizi kiandi ayi wumana moyo. (Malako 15:37; Luka 23:46; Yoane 10:17, 18; 19:30) Bukiedika luba lufua lu zitsoni Yesu kafua!

5. Diambu mbi diluta tuadisa Yesu ziphasi?

⁵ Kuidi Yesu, bakana ko lufua kafua luawu luba kuntula kiunda. Vayi nandi kabela beni mu kiunda, mu kibila ki mambu bamvunina bo banzengila nkanu wu lufua. Bawu bamvunina ti nani wuba mvuezi, kasa ba ko lukinzu mu Nzambi ayi mu dizina diandi. (Matai 26:64-66) Mambu amomo matuadisa beni ziphasi kuidi Yesu, diawu kaba tombila muingi Tat’andi kankula mu mambu amomo matsoni. (Matai 26:38, 39, 42) Tuemmona bibila bitatu bivanga Yave kabikila Muan’andi wu luzolo katovuka ayi kafua.

6. Kibila mbi vabe tombulu Yesu kubandu va dikunzi?

⁶ Theti, vabe tombulu Yesu kubandu va dikunzi, muingi kukula basi Yuda mu tsingulu batambula. (Ngala. 3:10, 13.) Bawu bakikinina kutumamana minsiku Yave kabavana ayi luwawunu bawu bavanga na Nzambi. Vayi mua thangu to yivioka, bawu babayisa minsiku beni. Mu kibibila akiokio, bawu ba yituadisa ziphasi ziwombo, kibila kubotula kuandi tsingulu batambula mu kibila ki disumu di Adami ayi Eva, bawu babue yituadisa tsingulu yinkaka yilutidi bo babayisa minsiku mi Yave mu luwawanu bawu bavanga ayi nandi. (Loma 5:12) Mu minsiku Nzambi kavana bana ba Isaeli, vaba nsiku wuba tubanga ti, mutu na kuvanga disumu diaba tombulu kufua, mutu beni bafueti kumvonda, bosi nyitu’andi bafueti kuyibanda va dikunzi. * (Deute. 21:22, 23; 27:26.) Diawu mu kubandu va dikunzi, Yesu wuvana luaku dikabu dioso di bana ba Isaeli, muingi bakulu mu tsingulu yi disumu bawu bavanga.

7. Kibila mbi kimuadi Nzambi kabikila Muan’andi katovuka?

 ⁷ Tala kibila kimuadi Nzambi kabikila muan’andi katovuka. Nandi waba kubika Yesu mu kiyeku ki kuba Mfumu yi Zinganga Nzambi. Yesu wumona ziphasi zitedi kutumukina Nzambi bo kaviokila mu mambu maphasi. Diawu kadindila lusadusu mu nsambu mu kutenduka na matsuela mu meso. Bukiedika, mu ziphasi zioso aziozio Yesu kaviokila, nandi widi luaku lu kuvisa zitsatu zitu ayi widi wukubama muingi kutu sadisa mu thangu tumviokila mu zithotolo. Tumvutudila Yave matondo mu kubieka Yesu Mfumu yi Zinganga Nzambi yi kiadi ayi wulenda visa mabanza mitu ayi kulebakana kuitu!—Ebe. 2:17, 18; 4:14-16; 5:7-10.

8. Kibila mbi kintatu, Nzambi kabikila Muan’andi katovuka beni?

⁸ Kibila kintatu, Nzambi kabikila Muan’andi katovuka beni, muingi kuvana mvutu mu diambu dinkinza Satana katuba. Nandi wutuba ti bisadi bioso bi Yave bidi va ntoto, ba kuviokila mu mambu manthota kiminu kiawu, balasa kuikama ko. Nandi wubue tuba ti, bisadi bioso bi Yave bansadilanga ko mu luzolo. Ayi badi dedi mueka na Adami wubayisa Yave bo kaviokila mu thotolo. (Yobi 1:9-11; 2:4, 5) Yave bo kaba lufiatu mu lukuikumunu lu Muan’andi, diawu kabikila muingi Yesu kathotu nati mu kiteso kio ni mutu kaviokidiabu ko. Vayi kheti bobo, Yesu wutatamana wukuikama ayi wumonisa ti Satana widi nkua luvunu.

9. Kifuani mbi kimboti mvuala Yoane ka tubikila?

⁹ Kiminu ki baklisto bawombo mu thangu yikhulu kikindusu bo balonguka matedi khudulu. Diawu bawu batatiminina kusamuna nate mu bununu buawu kheti mu ziphasi ayi zinzomono ziwombo baviokila. Tala kifuani ki mvuala Yoane. Mu lukuikumunu nandi wusamuna matedi Yesu ayi khudulu ḿba kuvioka 60 di mimvu. Bo kadukisa 90 di mimvu, ḿba basi Loma batona kuntadila buka mbeni ayi bawu bantula mu buloku ku kiseki ki Patimosi. Buabu kibila mbi bantudila mu buloku? Kibila nandi wuvana “kimbangi matedi Nzambi ayi Yesu Klisto.” (Nzai. 1:9.) Bukiedika, mvuala Yoane widi kifuani kimboti mu matedi kumonisa kiminu ayi lukuikumunu!

10. Buidi tuzabidi ti mvuala Yoane wuba vuanga nkinza nkhayilu yi khudulu?

¹⁰ Mu zibuku mvuala Yoane kasonika, nandi wumonisa luzolo kadi mu Yesu ayi luvalu kadi mu nkhayilu yi khudulu. Mu zibuku beni, muidi kuvioka 100 di zikhumbu nandi katubila matedi khudulu ayi ndandu yawu yituadisa kuidi batu boso. Dedi, mvuala Yoane wusonika: “Boti mutu bevola disumu, buna tuidi nsadisi va kimueka na Tata, Yesu Klisto mutu wusonga.” (1 Yoane 2:1, 2) Mambu mvuala Yoane kasonika, mammonisa mvandi “nkinza wu kuta kimbangi mu matedi Yesu.” (Nzai. 19:10) Bukiedika, mvuala Yoane wumonisa nkinza wu nkhayilu yi khudulu. Buidi befu mvitu tulenda monisina ti tumvuanga nkiza nkhayilu yi khudulu?

11. Mbi bilenda kutu sadisa kukindama mu zithotolo?

¹¹ Bika kuvukumuka mu masumu. Boti befu tumvananga luvalu nkhayilu yi khudulu, tualasa yindudila ko phila ayiyi: ‘Bika kuama yivanga disumu kibila yinkuiza dinda nlemvu.’ Vayi mu thangu ba tuthota muingi kuvanga diambu dimbi, tufueti tuba: ‘Ndamba! Mu kuyindula mamoso Yave ayi Yesu baphangila, yilendi vanga ko diambu adidi dimbi.’ Bosi tufueti dinda mangolo kuidi Yave mu kunkamba: ‘A Yave, phana mangolo muingi yibika bua mu thotolo ayiyi.’—Matai 6:13.

12. Buidi tulenda sadila dilongi didi mu 1 Yoane 3:16-18?

 ¹² Zola zikhomba zioso mu kimvuka. Mu thangu tummonisa luzolo kuidi zikhomba, tuidi mu kumonisa mvandi ti tumvananga luvalu nkhayilu yi khudulu. Mu kibila mbi? Kibila Yesu kasa vana ko to moyo’andi mu kibila kitu vayi mvandi mu kibila ki zikhomba zitu zioso. Boti nandi wuba wukubama muingi kufuila mu kibila kiawu, mawu mammonisa ti bawu nkinza beni badi va meso mandi. (Tanga 1 Yoane 3:16-18.) Tummonisanga luzolo tuidi mu zikhomba zitu mu phila tunzingilanga yawu. (Efe. 4:29, 31–5:2) Dedi, tufueti kuba sadisa mu thangu badi mu kubela, mu thangu bamviokila mu mambu manthota kiminu kiawu ayi mvandi mu thangu babe monikina kivuka. Vayi mbi tufueti vanga boti khomba bevanga voti betuba diambu dibe tulueka ntima?

13. Kibila mbi tufueti lemvukilanga bankaka?

¹³ Ngie widi kifu ki kukangilanga nganzi khomba be kulueka ntima? (Levi. 19:18) Boti buawu, buna dilongi adidi di Kibibila dilenda kusadisa: ‘Lutatamana kuvibidila beno na beno ayi luzaba lemvukila badi yinu kheti vadi mutu widi diambu na mutu wunkaka. Dedi bo Yave kalulemvukila, buna bika benu mvinu luvanga bobuawu.’ (Kolo. 3:13) Khumbu zioso wunlemvukila nzimbala yi khomba be kuvangila diambu dimbi, ngie widi mu kumonisa kivisa kuidi Tat’itu Yave ti wumvananga luvalu nkhayilu yi khudulu. Buidi tulenda buedila kuvana luvalu mu nkhayilu awowo Nzambi katuvana?

14. Mu phila mbi wulenda vutudila matondo kuidi Yave mu nkhayilu yi khudulu?

¹⁴ Tonda Yave mu nkhayilu yi khudulu. “Khomba yinkieto bantedilanga Joana, widi 83 di mimvu ayi wunkalanga ku India wutuba: “Mu mbuenu’ama nkinza beni kutangunanga nkhayilu yi khudulu kadika kilumbu mu minsambu miami ayi kutonda Yave mu nkhayilu beni. Mu minsambu miaku yindula mu zinzimbala bevanga kilumbu kioso, bosi dinda Yave nlemvu mu nzila khudulu. Vayi fueti tebuka moyo ti boti disumu dingolo bevanga, fueti dinda mvandi lusadisu kuidi bakulutu ba kimvuka. Bawu bankuiza kuyuwa ayi bankuiza kuvana malongi mamboti mabongulu mu Diambu di Nzambi. Mvandi bankuiza vanga yaku nsambu ayi bankuiza dinda kuidi Yave muingi katatamana kusadila nkhayilu yi khudulu yi Yesu, muingi ngie wubaka nlemvu wu masumu ayi wubue vutuka kuba kikundi kimboti ayi Nandi.”—Yako. 5:14-16.

15. Kibila mbi tufueti botudila thangu muigi kulonguka matedi nkhayilu yi khudulu?

 ¹⁵ Yindula mu nkhayilu yi khudulu. Khomba mueka yinkieto bantedilanga Rajamani widi 73 di mimvu, wutuba: “Bo minu yintanganga matedi ziphasi Yesu kaviokila, meso mama manwalanga matsuela.” Ḿba ngie mvaku wumbanga beni mu kiunda ngie kuyindula ziphasi zingolo Yesu kaviokila. Vayi ngie kutatamana kuyindula mu nkhayilu Yesu kavana, luzolo luaku mu nandi ayi mu Yave luala buelama. Muingi wuluta zaba mambu Yesu ka kuvangila, botula thangu muingi wulonguka matedi khudulu mu ndongukulu yi ngie veka.

16. Ndandu mbi tulenda baka bo tunlonga bankaka matedi khudulu? (Tala foto yidi va busu bu Levista.)

¹⁶ Longa bankaka matedi nkhayilu yi khudulu. Kibila kadika khumbu wunlonga bankaka matedi khudulu, buawu wunkuiza buedila kuvana luvalu nkhayilu beni. Tuidi bilongulu biwombo muingi kulonga bankaka matedi kibila mbi Yesu kafuila. Dedi mu dilongi di 4 didi mu mua buku Zitsangu Ziaku Zimboti Zifumini Kuidi Nzambi! Dilongi adiodio didi ntu diambu: “Nani Yesu Klisto?” Mvandi tulenda sadila kapu yi 5 yidi mu buku Mbi Kibibila Kilenda Kutu Longa? Kapu ayoyo yidi ntu diambu “Khudulu—Khayilu yi Lutidi Nzambi Kavana.” Ayi kadika mvu tumvutulanga matondo mu nkhayilu beni, bo tunlandakana lukutukunu lu mbambukulu moyo lufua lu Yesu ayi bo tuntumisa bankaka muingi baba yitu. Bukiedika, luidi luaku lunneni Yave katu vana muingi kulonga bankaka matedi Muan’andi!

17. Kibila mbi khudulu yididi nkhayilu yilutidi Yave katuvana?

¹⁷ Bukiedika, tuidi bibila biwombo muingi kuvutula matondo ayi kutatamana kuvana luvalu nkhayilu yi khudulu. Mu kibila ki nkhayilu awowo, befu tuidi luaku lu kuba kikundi na Yave kheti bo tuidi batu ba masumu. Mvandi mu kibila ki khudulu, mambu moso mambi Satana kantuadisanga mala bungu. (1 Yoane 3:8) Ayi lukanu Yave kadi mu matedi ntoto kuba paladizu luala salama. Baboso bala zinga yaku, bala zola Yave ayi bala kunsadila. Diawu kadika kilumbu tufueti tomba ziphila ziwombo muingi kuvutula matondo ayi kuvana luvalu nkhayilu yi khudulu—yo Yave katuvana!