1. Kibila mbi bankaka bammuenanga phasi kusamuna? (Tala mvandi foto.)

 MU KUBA dikabu di Yave, befu tunsamunanga kuidi bankaka mu kibila ki luzolo tuidi kuidi Tat’itu yi diyilu ayi tuntomba kusadisa bal’itu muingi banzaba. Minsamuni miwombo badi mayangi mu kisalu akiokio. Vayi bankaka bamvanganga mangolo muingi kubaka mayangi. Kibila mbi? Kibila bawombo bammonanga zitsoni ayi basiko beni kibakala. Bankaka bazolanga ko kukuenda mu zinzo zi batu boti basa batumisa ko. Bankaka banyindulanga ti bankuiza bakukisa. Ayi bankaka baba longa ti ba kuvanga mawu, balenda bakasana mambu na bankaka. Kheti banzolanga Yave, zikhomba aziozio, bammonanga phasi kufikama batu bakhambu zaba muingi kuba samuna zitsangu zimboti. Kheti bobo, bawu bazebi nkinza wu kisalu akiokio. Diawu bambasikilanga beni mu kisalu ki kusamuna. Yave wunkuangalalanga mu mawu!

2. Kibila mbi wulendi vongila ko boti wummonanga phasi kubaka mayangi mu kisalu ki kusamuna?

² Ngie mvaku mana mona phasi kubasika mu kisalu ki kusamuna mu kibila ki mambu amomo? Boti ngete, buna bika kuvonga. Kuba mabanza amomo, mammonisa ti ngie wu kikululanga, mengi kuyizitisa ayi mammonisa ti ngie wisintomba ko kubakana mambu na bankaka. Ayi mvandi, wisintomba ko ba kumanga, bulutidi, kibila batu beni bawu ngie wuntomba kusadisa. Zaba ti Tat’aku yi diyilu wummona bikaku widi mu kuviokila ayi wuntomba kuvana lusalusu luntombulu. (Yesa. 41:13) Mu dilongi adidi, tunkuiza tubila mambu matanu malenda  ku tusadisa kuzaba buidi bu kunungina mayindu amomo ayi kubuela baka mayangi mu kisalu ki kusamuna.

BIKA DIAMBU DI NZAMBI DI KUKINDISA

3. Mbi bisadisa mbikudi Yelemia kusamuna kuidi bankaka?

³ Tona thama, Diambu di Nzambi dinkindisanga bisadi biandi muingi badukisa biyeku nandi ka kuba vananga. Dedi, mbikudi Yelemia wumona phasi, bo Yave kamvana kiyeku ki kusamuna. Nandi wutuba: ‘Minu yisa zaba ko kukoluka. Minu yikhidi muana ditoko.’ (Yele. 1:6) Buidi nandi kanungina boma abobo? Nandi wubaka khindusulu mu Diambu di Nzambi bo katuba: ‘Diambu diaku ‘diyiza ba buka mbazu mu ntim’ami ayi mu mimvesi miama, ayi minu yisa bue nunga ko kusueka diawu.’ (Yele. 20:​8, 9) Mvandi, kheti Yelemia waba samunina mu kizunga kiba beni phasi, zitsangu bamvana muingi kasamuna, zimvana mangolo kaba tomba muingi kuvanga kisalu beni.

4. Mbi bimmonikanga befu kutanga Diambu di Nzambi ayi kuyindula mu mambu tuntanga? (Kolosai 1:​9, 10)

⁴ Baklistu bambakanga mangolo mu zitsangu zidi mu Diambu di Nzambi. Mu nkanda kasonikina kuidi Baklistu ku Kolosai, mvuala Polo wutuba ti, ‘nzailu yikiedika matedi luzolo lu Nzambi’, yawu yala sadisa zikhomba ziandi ‘kudiatila mu phila yisulama va mesu ma Yave’ ayi ‘kutatamana kuvana mimbutu mu mavanga moso mamboti’. (Tanga Kolosai 1:​9, 10.) Mavanga mamboti bantubila mu lutangu beni, mansundula mvandi kulonga zitsangu zimboti. Vayi, befu kutanga Diambu di Nzambi ayi kuyindula mu mambu tuntanga, kiminu kitu mu Yave kinluta kindamanga ayi tunluta visanga nkinza wu kusamuna Kintinu ki Nzambi.

5. Buidi tulenda luta bakila ndandu bo tuntanga ayi tunlonguka Kibibila?

⁵ Muingi tuluta baka ndandu mu Diambu di Nzambi, tufueti bika kutanga, kulonguka ayi kuyindula mambu tuntanga mu thinu. Vayi botula thangu yifuana. Ngie kumanga kuvisa buboti lutangu lumueka, bika kusombuka luawu. Vayi, fiongunina mu Índice das Publicações da Torre de Vigia, voti mu Buku yi Zimbangi zi Yave yi Kutombila Bilongulu muingi wubakula tsudukusu yi lutangu beni. Ngie kubotula thangu yifuana bo wunlonguka, ngie wala kindisa lufiatu luaku mu kiedika kidi mu Diambu di Nzambi. (1 Tesa. 5:21) Ngie kuluta ba lufiatu mu mambu wunlonguka, wala luta ba  mayangi muingi kuzabikisa mawu kuidi bankaka.

KUBAMANGA BUBOTI AVA KUKUENDA MU KISALU KI KUSAMUNA

6. Kibila mbi tufueti kubiminanga buboti ava kubasika mu kisalu ki kusamuna?

⁶ Ngie kukubamanga buboti ava kukuenda mu kisalu ki kusamuna, ngie wala luta ba wuvumbama bo wunkoluka na batu. Yesu wukubika minlandikini miandi bakubama ava kuba fila mu kisalu ki kusamuna. (Luka 10:​1-11) Bo bawu basadila mambu Yesu kaba longa, bawu bamona beni nyenzi mu mambu bawu banunga kuvanga.—Luka 10:17.

7. Buidi tulenda kubimina ava kubasika mu kisalu ki kusamuna? (Tala mvandi foto.)

⁷ Buidi tulenda kubimina ava kubasika mu kisalu ki kusamuna? Befu tufueti yindula buidi tunkuiza longila batu kiedika ki Yave mu phila yimboti, mu kusadila bikuma bitu veka. Mawu mvandi malenda tusadisa kufika yindula mambu malenda monika va kizunga kitu ayi mbi tunkuiza vanga ma kumonika. Ayi bo tunkoluka na batu, tumvanganga mangolo muingi kuba bavumbama, kuseva ayi kukoluka buboti.

8. Mu phila mbi Baklistu badidi buka bibasa Polo katubila mu kifuani kiandi?

⁸ Mvuala Polo wufuanikisa kiyeku kitu ki kusamuna, bo katuba: “Befu tuidi kiuka akiki kidi mu bibasa.” (2 Koli. 4:7) Kiuka mbi kaba tubila? Kiuka beni kidi, zitsangu zi Kintinu zio tunsamunanga muingi kuvukisa batu. (2 Koli. 4:1) Buabu, mbi bibasa binsundula? Bibasa binsundula bisadi bi Nzambi, banlonganga zitsangu zimboti kuidi bankaka. Mu bilumbu bi Polo, batu baba vanganga lungosu, baba sadilanga bibasa bivangulu mu tuphandu muingi kunatina muna biuma babe sumbisanga, dedi bidia, vinu ayi zimbongo. Bobuawu mvandi, Yave wu tuvana zitsangu zi Kintinu zidi beni luvalu. Mu lusalusu luandi, befu tulenda baka mangolo mantombulu muingi kulonga zitsangu beni kuidi bankaka.

DINDANGA KIBAKALA KUIDI YAVE

9. Buidi tulenda nungina boma bu batu? (Tala mvandi foto.)

⁹ Khumbu zinkaka, tulenda ba boma bu batu. Buidi tulenda nungina kikaku akiokio? Bo bakamba bapostolo babika kubue samuna, bawu basa vonga ko. Bawu basambila kuidi Yave ayi bandinda kaba sadisa “batatamana  kulonga diambu diandi mu kibakala kioso.” Yave wutambudila nsambu’awu mu nsualu. (Mava. 4:​18, 29, 31) Boti befu tumbanga beni boma bu batu, tufueti dinda lusalusu lu Yave mu nsambu. Dinda ka kusadisa kununga boma bu batu mu kibila ki luzolo widi mu bawu.

10. Mu ziphila mbi Yave ka tusadisilanga kudukisa kiyeku kitu ki kusamuna? (Yesaya 43:​10-12)

¹⁰ Yave wutu sola muingi tuba Zimbangi ziandi ayi nandi wukanikisa kutu sadisa kuba kibakala. (Tanga Yesaya 43:​10-12.) Mu ziphila mbi nandi kamvangilanga mawu? Ndoko tumona ziphila zinna. Theti, Yesu wumbanga yitu, kadika thangu tunsamuna zitsangu zimboti. (Matai 28:​18-20) Dimmuadi, Yave wubieka zimbasi muingi ba tusadisa mu kisalu beni. (Nzai. 14:6) Dintatu, Yave wu tuvananga phevi yinlongo, yi tusadisanga kutebuka monyo mambu tunlongukanga. (Yoa. 14:​25, 26) Dinna, Yave wu tuvananga zikhomba bambasikanga yitu mu kisalu ki kusamuna. Mu lusalusu lu Yave ayi lu zikhomba zitu zi luzolo, befu tuidi mamoso mantombulu muingi tubaka mayangi mu kisalu ki kusamuna.

BA MAYINDU MAFUANA

11. Mbi fueti vanga muingi wudengana beni batu mu zinzo? (Tala mvandi foto.)

¹¹ Wumbanga mu kiunda, ngie kukhambu dengana batu mu zinzo? Boti buawu, buboti kuyikuvusa: ‘Kuma mbi batu bankalanga va kizunga kiama babe kuenda?’ (Mava. 16:13) ‘Babe kuenda ku kisalu voti ku zandu?’ Boti buawu, buna wulenda luta baka ndandu mu kuvana kimbangi mu zinzila? Khomba mueka bantedilanga Joshua wutuba: “Minu yimana baka luaku luwombo lu kusamuna bo yinkuenda mu mazandu voti mu bibuangu binkaka bimbanga beni batu.” Nandi ayi nkazi’andi Brigit, banluta dengananga batu mu zinzo va masika builu voti kilumingu va masika.—Efe. 5:​15, 16.

12. Buidi wulenda bakudila mambu batu bankikininanga voti mambu ma kuba tatisa?

¹² Boti batu basimvua ko beni nkinza zitsangu tunlonga, meka kuzaba mambu mbi bawu bankikininanga ayi mambu mbi ma kuba tatisanga. Joshua ayi Brigit bansadilanga biuvu bidi mu mua minkanda muingi kutona masolo. Dedi, mu kusadila mua nkanda, Buidi  Wuntadilanga Kibibila? Bawu bantubanga: “Batu bankaka bantubanga ti Kibibila buku yi Nzambi, vayi bankaka ndamba. Buidi ngie wummuena? Mu kutonina masolo mu phila ayoyo, bawu bambakanga ndandu yiwombo.

13. Kibila mbi tulenda tubila ti tumbakanga ndandu mu kisalu ki kusamuna kheti batu basimvua ko nkinza mambu tunlonga? (Zingana 27:11)

¹³ Kheti batu basi tukuwa ko bo tunsamuna, masinsundula ko ti tuisimbaka ko ndandu. Kibila mbi? Kibila bo tunsamunanga zitsangu zimboti, befu tumvanganga mambu Yave ayi Yesu bantomba befu tuvanga—kuvana kimbangi. (Mava. 10:42) Kheti tuisindengana ko ni mutu wunkoluka yitu voti batu bamengi ku tukuwa, tulenda ba mu mayangi kibila tuzebi ti Tat’itu ku diyilu, ke beni nyenzi mu mambu tumvanga.—Tanga Zingana 27:11.

14. Kibila mbi tulenda bela mu mayangi bo nsamuni wunkaka kandengana mutu wumvua nkinza?

¹⁴ Mvandi, befu tulenda ba mu mayangi mu thangu nsamuni wunkaka kandengana mutu wumvua nkinza. Kibanga ki Nsungi kimana dedikisa kisalu ki kusamuna buka dingumba di batu bantomba muana bezimbala. Batu bawombo bankuiza vanga kisalu ki kutomba muana beni mu bibuangu biviakana. Bo bandengana muana beni, baboso bambanga mu mayangi, bika to mutu—be kumbakula. Bobuawu mvandi, vantombulu lusalusu lu baboso muingi tununga kusamuna mu bizunga tuntambula ayi baboso bambanga mayangi ba kumona ti mutu wumona makuiza mu lukutukunu.

TSIKIKA THALU MU LUZOLO WIDI KUIDI YAVE AYI KUIDI BATU

15. Buidi mambu madi mu Matai 22:​37-39 malenda tusadisila kubuela mayangi mu kisalu ki kusamuna? (Tala mvandi va thonono levista.)

¹⁵ Befu tulenda buela mayangi mitu mu kisalu ki kusamuna mu kutsikika thalu mu luzolo luitu kuidi Yave ayi kuidi batu. (Tanga Matai 22:​37-39.) Yindula mayangi Yave kambanga bo ka tumona kuvanga kisalu ki kusamuna ayi nyenzi batu bankuiza mona mu kulonguka kiedika ki Kibibila! Yindula mvandi matedi phila wunkuiza sadisila batu kuvuka ba kukikinina zitsangu ngie wu kuba longa.—Yoa. 6:40; 1 Timo. 4:16.

16. Buidi tulenda bakila mayangi mu kisalu ki kusamuna kheti tuisiko bu kubasikila ku nzo? Vana kifuani.

¹⁶ Ngie wisi ko bu kubasikila ku nzo’aku?  Boti buawu, mbi wulenda vanga muingi wumonisa luzolo luaku kuidi Yave ayi kuidi batu bankaka? Mu thangu COVID-19, Samuel ayi nkazi’andi Dania basa baka ko bu kubasikila ku nzo. Mu thangu ayoyo yiphasi, baba sadilanga telefoni muingi kuvana kimbangi, baba sonikanga minkanda ayi baba tuadisanga ndongukulu yi Kibibila mu zoom. Samuel wuvana kimbangi kuidi batu baba sadilanga ku nzo mbuku yaba kunsadisanga mu mbela yi câncer kaba. Nandi wutuba: “Ziphasi tumviokilanga, zilenda tuvongisa mu nyitu, mu mayindu ayi mu kiphevi. Diawu vantombuluanga tubaka mayangi mu kisalu ki Yave.” Mu thangu beni, nkazi’andi Dania wubua ayi wuviokisa zingonda zitatu va kika. Bosi, vaba tombulu kadiatila mu mvelu wu bikata mu zingonda zisambanu. Nandi wutuba: “Yivanga mamoso minu yinunga. Yiba luaku lu kusamuna kuidi mimfelemi miaba kuiza kuthalanga ayi kuidi batu baba kuiza bikanga biuma ku nzo’itu. Mvandi, yiba masolo mamboti mu telefoni, na mutu wumueka wunsadilanga ku nzo mbuku baba kumbukila.” Mambu Samuel ayi Dania baviokila, maba tula beni nkaku mu kisalu kiawu kuidi Yave, vayi bawu bavanga mamoso banunga ayi babaka beni ndandu mu kuvanga mawu.

17. Buidi wulenda luta bakila ndandu mu mambu tuma tubila mu dilongi adidi?

¹⁷ Ngie wulenda luta baka ndandu mu mambu tuma longuka mu dilongi adidi, ngie kusadila mamoso mu yoyawu thangu. Kadika diambu tuma tubila mu dilongi adidi, didi buka biuma bantula mu bidia muingi biawu biluta ba lueki. Ngie kusadila mamoso va kimueka, wunkuiza luta baka ndandu. Ayi ngie kusadila mambu beni, wala luta ba wukubama muingi kununga mayindu mambi ayi kuluta baka mayangi mu kisalu ki kusamuna.