DILONGI 17
NKUNGA 111 Mambu ma Tuvananga Mayangi
Ka Wubika Paladizu yi Kiphevi
‘Yangalalanu ayi monanu nyenzi mvu ka mvu mu kibila ki mambu yidi mukuvanga.’—YESA. 65:18.
MAMBU TUANLONGUKA
Tuemmona ndandu mbi tumbakanga mu paladizu yi kiphevi ayi buidi tulenda sadisila bankaka kukota muawu.
1. Mbi bio paladizu yi kiphevi ayi makani mbi tufueti baka?
VADI paladizu yimboti beni va ntoto mu bilumbu bitu ayi muawu muidi mu kumonika mambu mawombu. Bumviokila thangu, bivevi na bivevi bi batu bankotanga muawu bambakanga ndembama yikiedika. Batu bamana kota mu paladizu beni, badi makani ma kutatamana kukala muawu. Bawu mvandi bantomba kutumisa batu boso balenda nunga muingi bakota muawu. Paladizu mbi tuntubila? Paladizu yi kiphevi! a
2. Mambu mbi ma kukuitukila matedi paladizu yi kiphevi?
2 Diambu di kukuitukila kumona ti Yave wuntuadisanga ndembama ayi kithuadi mu batu, kheti mu nza ayiyi yimana wala mambi ayi yintuadisanga beni boma kuidi batu. (1 Yoa. 5:19; Nzai. 12:12) Tat’itu yi luzolo, wummonanga mambu maphasi mammonikanga mu nza ayiyi yi Satana ayi nandi wutusadisanga kuba mu nsika muingi tuyonzuka buboti mu kiphevi. Kibibila kintuba ti paladizu yi kiphevi, yidi buka ‘kisuamunu’ ayi buka ‘lumbu banlembilanga nlangu’. (Yesa. 4:6; 58:11) Mu lusakumunu lu Yave, batu bankotanga mu paladizu beni bambakanga mayangi ayi nsika kheti mu bilumbu abibi biphasi.—Yesa. 54:14; 2 Timo. 3:1.
3. Buidi mambu madi mu Yesaya kapu 65 masalimina mu thangu yi khulu?
3 Mu nzila mbikudi Yesaya, Yave wusudikiksa buidi paladizu yi kiphevi yala bela kuidi batu bala zingila muawu. Ngie wulenda mona mambu Yesaya katuba mu kapu 65 ayi mawu matona kusalama mu mvu 537 A.T.K. Mu thangu beni basi Yuda banyongina masumu mawu, babasika mu buvika ku Babiloni ayi bavutuka ku ntoto’awu. Yave wusakumuna dikabu diandi ayi wu basadisa kubue vutula Yelusalemi kibuangu kimboti ki kuzingila ayi kubue tunga tempelo, kibuangu ki mbuongimini yikiedika mu thangu beni.—Yesa. 51:11; Zaka. 8:3.
4. Buidi matangu ma Yesaya 65 mansaliminanga mu bilumbu bitu?
4 Mbikudulu ayoyo yisalama mu phila yimmuadi mu mvu 1919 T.K, bo bisadi bi Yave mu thangu’itu babasika mu kivika ki Babiloni Yinneni. Bosi paladizu yikiphevi yitona kutembakana malembi malembi. Mu kifuza minsamuni mi Kintinu bazibula bimvuka ayi batona kuvana mimbutu miwombo. Babakala ayi bakietu baba zikhadulu zimbi dedi bibulu “bavuata kimutu kimona kio kidi kithuadi na luzolo lu Nzambi”. (Efe. 4:24) Bukiedika, mambu mawombo Yesaya kabikula mu nza yimona to mala salimina. Vayi kheti bobo vadi ndandu yiwombo befu tuidi mu kubaka tona bubu. Ndoko tumona ndandu mbi paladizu yi kiphevi yitutuadisanga ayi kibila mbi tulendi basikila ko muawu.
ZIKHADULU ZI BATU BAKE MU PALADIZU YI KIPHEVI
5. Dedi bummonisina Yesaya 65:13, mbi befu tuntambulanga mu paladizu yi kiphevi?
5 Bandianga buboti mu kiphevi. Mbikudulu yi Yesaya yimmonisa disuasana didi mu phila batu bake mu paladisu yi kiphevi ayi batu bakhambulu muawu. (Tanga Yesaya 65:13.) Yave wundukisanga zitsatu zi kiphevi zi bisadi biandi. Befu tuidi phevi yinlongo, Kibibila ayi bidia biwombo bi kiphevi bio tulenda ‘dia, . . . . kunua ayi kukuangalala.’ (Dedikisa mawu na Nzaikusu 22:17.) Vayi batu bakhambulu mu paladizu yi kiphevi ‘bamfuanga nzala, phuila nlangu ayi bamfuanga zitsoni.’ Bawu badukisanga ko zitsatu ziawu zi kiphevi.—Amo. 8:11.
6. Buidi matangu ma Yoeli 2:21-24 mantubila phila Yave katudikilanga ayi ndandu mbi tumbakanga?
6 Mbikudi Yoeli wusadila biuma buka zitheti zi kudia, vinu ayi nzeta yi olive muingi kufuanikisa phila Yave kandikilanga bisadi biandi mu kuba vana biuma bantomba kubunda mvandi bidia bi kiphevi. (Yoeli 2:21-24) Nandi mvangilanga mawu mu nzila Kibibila, bilongulu bi bongulu mu Kibibila, mu khond’itu mayo, zikhutukunu zi kimvuka, zi divula ayi zi mavula. Befu tunkuiza baka buvinya bumboti bu kiphevi, befu kuvanga mangolo muingi kubakanga ndandu mu bidia abiobio bi kiphevi kadika kilumbu.
7. Mbi bitusadisanga kuba ‘buvinya bu ntima’? (Yesaya 65:14)
7 Bambanga mayangi. Dikabu di Nzambi balenda ‘tenduka mu mayangi’ mu kuvutula matondo kuidi Yave. (Tanga Yesaya 65:14.) Bukiedika, Kibibila ki tukindisanga ayi mbombolo tuntambulanga mu Diambu di Nzambi, yituvananga kivuvu mu nzila khudulu yi Yesu Klistu ayi mawu matusadisanga kuba ‘buvinya bu ntima.’ Kutubila matedi mambu amomo na zikhomba zitu kutu tuadisanga mayangi makiedika!—Minku. 34:8; 133:1-3.
8. Mambu mbi muadi malutidi mu paladizu yi kiphevi?
8 Mambu muadi malutidi nkinza mu paladizu yi kiphevi madi, luzolo ayi kithuadi kidi mu dikabu di Yave. “Kithuadi” akiokio kitu vanga kuyindula buidi buala bela nza yimona bo bisadi bi Yave bala zolasana bawu na bawu ayi bala ba kithuadi kilutidi kena bubu. (Kolo. 3:14) Khomba mueka yinkietu wutuba buidi kamuena bo kazaba Zimbangi zi Yave. Nandi wutuba: “Minu yisa zaba ko buidi bu kubakila mayangi ni kheti va dikanda diama. Vayi bo yimona Zimbangi zi Yave, minu yiyiza bakula buidi bu kumonisina luzolo lukiedika mu mavanga. Baboso bantomba kubaka mayangi makiedika bafueti kota mu paladizu yi kiphevi. Boso kua batu mu nza ayiyi balenda tadila bisadi bi Yave, befu tuidi bazabakana mu phila yilutidi mu kuba mu dikanda di Yave.—Yesa. 65:15.
9. Mbi Yesaya 65:16, 17 yinkanikisa matedi ziphasi tumviokilanga bubu?
9 Bambanga bavumbama. Yesaya 65:14 Yintuba ti batu bammanganga kukota mu paladizu yi kiphevi ‘bala kuana mu kibila ki khienzu mu ntima ayi bala dila mu kibila ki kiunda kingolo.’ Vayi mbi tulenda tuba mu matedi mambu mantuadisanga kiunda kuidi bisadi bi Yave? Kibibila kintuba ti mambu amomo mala zimbala [ayi] ‘mala ba masuama va meso ma [Nzambi].’ (Tanga Yesaya 65:16, 17.) Yave wala manisa ziphasi zioso tumviokilanga ayi wala tusadisa tubika kubue tebukilanga monyo mambu beni.
10. Kibila mbi ngie wunyindudilanga ti luidi lusakumunu kuba na zikhomba zitu zi kiphevi? (Tala mvandi foto.)
10 Tumbanga bavumbama mu zikhutukunu ayi tunzimbakananga mambu moso ma tutatisanga mu nza ayiyi. Befu tunsadisanga kutuadisa luvovomu mu paladizu yi kiphevi bo tummonisanga luzolo, mayangi, ndembama, mamboti ayi bo tumbanga bavumbama. Mambu amomo madi mu mbutu wu phevi yinlongo. (Ngala. 5:22, 23) Bukiedika, luidi luaku lunneni kuba mu kimvuka ki Yave! Batu badi mu paladizu yi kiphevi bala mona phila zikhanu zioso zi Yave ziala salimina, mu phila yiduka ku “diyilu dimona ayi ntoto wumona.”
Lusakumunu lunneni beni kuba mu paladizu yi kiphevi, na dikanda di Yave (Tala lutangu 10) c
11. Dedi buntubila Yesaya 65:18, 19, ndandu mbi tumbakanga mu paladizu yi kiphevi?
11 Bantondanga ayi bambanga mu mayangi. Mbikudi Yesaya wutatamana kutuba kibila mbi befu tumbelanga mu mayangi mu paladizu yi kiphevi. Yave nandi wuntuadisanga paladizu beni. (Tanga Yesaya 65:18, 19.) Bukiedika, nandi wu tusadilanga muingi tusadisa batu kubotuka mu binganga bi luvunu bi khambu kuba longanga kiedika matedi Nzambi ayi kuba sadisa kukota mu paladizu yi kipehvi. Befu tumbanga beni mu mayangi kumona lusakumunu tuntambulanga mu kuba mu kinganga kikiedika ayi tumbanga phuila yi kukamba mawu kuidi bankaka.—Yele. 31:12.
12. Bo wunyindula Yesaya 65:20-24 mabanza mbi wumbanga ayi kibila mbi?
12 Mvandi, tumvutulanga beni matondo mu kibila ki kivuvu tuidi mu kuba mu paladizu yi kiphevi. Yindula mambu mawombo tuala vanga mu nza yi mona. Kibibila ki kanikisa: ‘Kualasa bue ba ko ni bana bala zinga bilumbu biluelu. . . Kualasa bue ba ko ni kibobo kiala zinga bilumbu biluelu.’ Befu ‘tuala tunga zinzo ayi ‘tuala kala muawu, tuala vata zitsola ayi tuala dia mimbutu.’ Befu ‘tualasa sala ko mu phamba’ kibila Yave wala ‘tusakumuna’. Nandi wukanikisa kutuvana luzingu lu nsika ayi lu mayangi. Kibibila kibue tuba: ‘Ava bawu badinda’, minu yala zaba mbi bantomba ayi ‘yala dukisa zisatu zi biuma bioso bike bimonyo.’—Yesa. 65:20-24; Minku. 145:16.
13. Dedi buntubila Yesaya 65:25 mambu mbi mambalukanga mu luzingu lu batu, ba kutona kusadila Yave?
13 Ndembama ayi nsika. Mu lusadusu lu phevi yi Yave, bawombo baba zikhadulu zimbi dedi bibulu babalula luzingu luawu. (Tanga Yesaya 65:25.) Bawu babika zikhadulu zioso zimbi. (Loma 12:2; Efe. 4:22-24) Bukiedika, batu badi mu dikabu di Yave bakidi basumuka ayi tuala tatamana kuvanga zinzimbala, vayi Yave wubundisa “mintindu mioso mi batu” mu kibila ki luzolo luwombo ayi ndembama. (Titu 2:11) Amomo madi to mangitukulu Nzambi nkua ngolo zioso kalenda vanga!
14. Buidi lutangu lu Yesaya 65:25 lusalimina mu khomba mueka?
14 Bukiedika ti batu balenda balula kimutu kiawu? Tala kifuani kimueka. Ditoko dimueka waba kotanga buloko khumbu ziwombo bo kaba 20 di mimvu, waba natanga luzingu lu kitsuza ayi wuba beni makhesi. Khumbu ziwombo bantula mu buloko mu kibila ki kukuiba makalu ayi biuma binkaka. Waba zolanga kunuana ayi woso kua mutu. Bo kayuwa kiedika ki Kibibila khumbu yitheti ayi katona kulandakana zikhutukunu zi Zimbangi zi Yave, nandi wuyiza bakula kibuangu kimueka kimboti beni—paladizu yi kiphevi. Bo kayiza ba Mbangi yi Yave, nandi waba yindulanga beni phila matangu ma Yesaya 65:25 mansadisila. Kheti nandi wuba makhesi buka khosi, vayi wuyiza ba mutu wu ndembama buka muana dimemi.
15. Kibila mbi tuntombila bankaka bakota mu paladizu yi kiphevi ayi buidi tulenda vangila mawu?
15 Lutangu lu Yesaya 65:13 luntonina mu kutuba: ‘Buakabu butubidi Yave Mfumu Wulutidi Zangama.’ Ayi lutangu 25 lummanina abubu: ‘Butubidi Yave.’ Mambu Yave kantubanga mansalamanga thangu zioso. (Yesa. 55:10, 11) Tuidi mu kuzinga mu paladizu yi kiphevi. Yave wu tubundisanga mu kikhomba kitu mu nza yimvimba kidi luzolo lukiedika. Mu khati dikabu di Nzambi muidi ndembama ayi mayangi, kheti nza yimana wala buphunya. (Minku. 72:7) Mu kibila akiokio befu tuntomba kusadisa batu boso tulenda nunga, muingi babundana yitu mu mbuongimini yikiedika. Tulenda vangila mawu mu kukivana mu kisalu ki kuvanga minlonguki.—Matai 28:19, 20.
BUIDI TULENDA SADISILA BANKAKA KUKOTA MU PALADIZU YI KIPHEVI?
16. Buidi batu bankotilanga mu paladizu yi kiphevi?
16 Kadika mutu mu befu widi kiyeku kinneni ki kusadisa bankaka kukota mu paladizu yi kiphevi. Befu tulenda dukisa makani amomo mu kulandakana kifuani ki Yave. Nandi kakuikanga ko ni mutu kakota mu kimvuka kiandi vayi mu luzolo wu kuba tumisanga kuidi nandi. (Yoa. 6:44; Yele. 31:3) Batu bake mintima mimboti ayi bantomba kulonguka zikhadulu zimboti zi Yave ayi phila mutu nandi kadi, bantombanga kumfikama. Buidi tulenda sadisila batu kukota mu paladizu yi kiphevi mu nzila zikhadulu zitu?
17. Buini tulenda sadisila batu kukota mu paladizu yi kiphevi?
17 Phila yimueka tulenda sadisila bankaka kukota mu paladizu yi kiphevi, yidi mu kumonisa luzolo ayi mamboti ke zikhomba zitu. Bo batu bamona banlandakananga zikhutukunu zitu, tuntomba bawu batuba momawu mambu batu bawombu batuba ku Kolintu: “Bukiedika, Nzambi widi yinu.” (1 Koli. 14:24, 25; Zaka. 8:23) Mu kibila akiokio, befu tuntomba kutatamana kulandakana dilongi di Kibibila dintuba “lufueti zingila mu ndembama benu na benu.”—1 Tesa. 5:13.
18. Mbi bilenda vanga batu kukota mu paladizu yi kiphevi?
18 Tufueti vanga mangolo muingi kutadila zikhomba zitu zi kiphevi mu phila Yave kaba tadilanga. Befu tumvanganga mawu, mu kusikika thalu’itu mu zikhadulu ziawu zimboti kubika kuandi mu zinzimbala ziawu, kibila tuzebi ti ziawu, ziala mana. Mambu ma kumonika, tulenda dedikisa mawu mu kumonisa “mamboti ayi kiadi . . . mu kuba lemvukilanga mu ntima woso.” (Efe. 4:32) Bo batu bakhambu buongiminanga Yave bammona zikhadulu aziozio mu befu, bawu mvawu bankuiza ba phuila yi kukota mu paladizu yi kiphevi, muingi baba monisa zikhadulu beni. b
TATAMANA KUBA MU KHATI PALADIZU YI KIPHEVI
19. (a) Dedi bummonisina quadro “ Bawu Babasika ayi Bavutuka,” mbi batu bankaka batuba bo bavutuka mu paladizu yi kiphevi? (b) Makani mbi tufueti baka? (Tala mvandi fikula.)
19 Tumvutulanga beni matondo mu luaku lunneni lu kuba mu paladizu yi kiphevi! Bumviokila thangu, yawu yike mu kuluta ba kitoko ayi batu banzingila muawu, badi mu kuluta vana nzitusu ke Yave. Bika befu boso tuvutulanga matondo, mu paladizu yi kiphevi Yave ka tuvana. Nosu mutu wuntomba kuba mayangi, ndembama ayi mu nsika, kafueti kota mu paladizu yi kiphevi ayi kubika basika muawu! Ba keba keba, muingi Satana kabika ku kubotula mu paladizu yi kiphevi. (1 Pete. 5:8; Nzai. 12:9) Diawu, ndokanu tuvanga mangolo muingi paladizu yi kiphevi yitatamana kuba kitoku, yidiodila ayi ndembama.
Batu bala tatamana kuba mu paladizu yi kiphevi, bala zingila mu mayangi ku paladizu yala ba va ntoto (Tala lutangu 19)
MVUTU MBI WULENDA VANA?
-
Mbi binsundula paladizu yikiphevi?
-
Lusakumunu mbi tuntambulanga mu kuba mu paladizu yi kiphevi?
-
Buini tulenda sadisila bankaka kukota mu paladizu yi kiphevi?
NKUNGA 144 Tadidila mu Mfutu!
a TSUDUKUSU YI BIKUMA: Kikuma “paladizu yi kiphevi” kintubila phila yimboti bisadi bi Nzambi bambuongiminanga Yave. Mu paladizu beni, befu tumbakanga mayangi, tunzingilanga mu ndembama na Yave ayi bankaka.
b Tala mu jw.org video yintuba Como Eles Estão Agora? Alena Žitníková: Meu Sonho se Realizou! Ayi tala lusakumunu khomba mueka yinkietu katambula mu kuba mu paladizu yi kiphevi.
c MAMBU MADI MU FOTO: Zikhomba ziwombo badi mu mayangi mu kuba va kimueka mu lukutukunu, vayi khomba yinkaka ke kuandi va naveka.
