Ngie Zebi?
Kibila mbi Ntinu Davidi kavitikila batu bakhambu ba basi Isaeli, baba mu nkangu masodi mandi?
Mu khati masodi ma Davidi muba mvandi batu ba zitsi zinkaka, dedi Zeleki wuba musi Amoni, Ulia wuba musi Yitita ayi Yitema wuba musi Moabe. a (1 Lusa. 11:39, 41, 46) Mu masodi ma Davidi muba mvandi basi “Keleti, basi Peleti ayi basi Ngati.” (2 Samu. 15:18) Bivisa bimmonisa ti basi Keleti ayi basi Peleti bafumina mu nkunu wu basi Filisteia. (Yehe. 25:16) Basi Ngati bayizila mu nkuna wu basi Filisteia baba ku divula di Ngati.—Yosua 13:2, 3; 1 Samu. 6:17, 18.
Kibila mbi Davidi kakikinina baba masodi mandi? Nandi wuba lufiatu ti batu abobo, baba kumfiatilanga ayi dilutidi nkinza baba bakuikama kuidi Yave. Dedi, mu matedi basi Keleti ayi basi Peleti, O Novo Dicionário Intérprete da Bíblia yituba: “Mu luyalu lu Davidi bawu baba bakuikama kuidi nandi, kheti mu thangu ziphasi.” Buidi bavangila mawu? Bo babakala boso ba “Isaeli” babika kulandakana Ntinu Davidi ayi batona kulandakana “nkua mambu baba tedilanga Seba,” basi Keleti ayi basi Peleti batatamana ku khonzu Davidi ayi bansadisa kununga Seba ayi batu baba ku khonzu’andi. (2 Samu. 20:1, 2, 7) Khumbu yinkaka, muana wu Ntinu Davidi Adonia waba tomba kuvokuna luyalu lu tat’andi. Vayi, basi Keleti ayi basi Peleti batatamana bakuikama kuidi Davidi ayi basadisa Salomo, mutu Yave kasola kaba ntinu va mvingi tat’andi.—1 Minti. 1:24-27, 38, 39.
Mutu wunkaka wubutukila mu nkuna wunkaka wumonisa lukuikumunu kuidi Davidi, wuba Itai musi Ngati. Itai ayi 600 di masodi mandi babuela mioko Ntinu Davidi bo muan’andi Absaloni kambalukila ayi kavukumuna batu bawombo mu basi Isaeli, babalukila Davidi. Va thonono, Davidi wukamba Itai kavutuka kibila nandi wuba musi mvila wunkaka. Vayi Itai wutuba: “Yinleva phesi mu dizina di Yave ayi mu dizina di ngie mfumu’ami Ntinu, ti koso kuandi mfumu wumba, kuawu minu mvama yala ba, koso kuandi mfumu wunkuenda kheti muingi kue fua voti muingi kuzinga minu kisadi kiaku yala banga yaku!”—2 Samu. 15:6, 18-21.
Itai wuba wukuikama kuidi Davidi, ntinu Yave kasola
Kheti basi Keleti, basi Peleti ayi basi Ngati baba zinzenza, vayi bawu bazaba ti Yave nandi Nzambi yi kiedika ayi bazaba ti Davidi, nandi mutu Yave kasola. Bukiedika, Davidi wuvutula beni matondo mu kuba babakala abobo ku konzu’andi!
a Nsua wu Nzambi widi mu Deutelonomi 23:3-6 wukandimina basi Amonita ayi basi Moabi babika kukota mu kimvuka ki Yave. Vayi, nsua awowo, wabasa kandiminanga ko mimvila amiomio babika kala va kimueka na dikabu di Nzambi. Tala buku Estudo Perspicaz das Escrituras, Volume 1, tsielu. 114.
