DILONGI 15
NKUNGA 124 Tatamana Kumonisa Lukuikumu
Kindisa Lufiatu Luaku mu Kimvuka ki Yave
“Tatamananu kutebukilanga moyo batu ba kulutuadisa, ayi ba kululonganga diambu di Nzambi.”—EBE. 13:7.
MAMBU TUANLONGUKA
Buidi tulenda tatiminina kukindisa lufiatu luitu ayi kuvua nkinza kimvuka ki Yave?
1. Buidi dikabu di Yave dibela dilulama mu sekulu yitheti?
BO YAVE kamvananga kiyeku kuidi dikabu diandi, nandi wuntombanga bawu bavangilanga kiawu mu phila yifuana. (1 Koli. 14:33) Dedi, Nzambi kantomba zitsangu zimboti zisamunu mu Nza yimvimba. (Matai 24:14) Yave wubieka Yesu muingi katuama ntuala mu kisalu akiokio. Ayi Yesu mvandi wumvanganga mamoso muingi kisalu akiokio kivangimina mu phila yisulama. Mu sekulu yitheti bo baba sikikanga bimvuka mu bibuangu biwombo, baba biekanga mvandi bakulutu ba kimvuka muingi kutuama ntuala. (Mava. 14:23) Ku Yelusalemi kuba dingumba di bakulutu ayi mu dingumba beni, muba mvandi bapostolo ayi bakulutu ba kimvuka, baba bakanga makani bimvuka bioso baba landakananga. (Mava. 15:2; 16:4) Bo Baklistu baba tumukinanga zithuadusulu baba tambulanga, “bimvuka biaba kindusu mu kiminu ayi biaba konzuka.”—Mava. 16:5.
2. Tona mu mvu 1919, buidi Yave kamvaninanga thuadusulu ayi bidia bi kiphevi kuidi bisadi biandi?
2 Yave wuntatamananga kutuadisa dikabu diandi mu bilumbu bitu. Tona mu mvu 1919, Yesu wunsadilanga dingumba dimueka di babakala basolu muingi batuama ntuala mu kisalu ki kusamuna ayi kuvana bidia bi kiphevi kuidi minlandikini miandi. a (Luka 12:42) Ayi tuidi lufiatu ti Yave wunsakumunanga kisalu ki dingumba adiodio.—Yesa. 60:22; 65:13, 14.
3-4. (a) Vana kifuani matedi ndandu tumbakanga mu kuba thuadusulu yimboti. (b) Mbi tunkuiza tubila mu dilongi adidi?
3 Boti befu tuisi ko thuadusulu yimboti khanu tununganga ko kuvanga kiksalu Yesu katuvana. (Matai 28:19, 20) Yindula boti batuvananga ko bizunga bi kusamunina ayi woso mutu kuesamuna koso kantomba, khanu mambu mbi malenda monika? Khanu tunsamunanga to mu kizunga kimueka ayi bizunga binkaka kubela to bobo. Ndandu mbi yinkaka tumbakanga mu kuba thuadusulu yimboti?
4 Mambu Yesu kavanga bo kaba vantoto, matuvana ntungulu wu kuba thuadusulu yimboti mu bilumbu bitu. Mu dilongi adidi, tuemmona kifuani Yesu katubikila ayi buidi kimvuka ki Yave kinlandikininanga kifuani kiandi. Tunkuiza tubila mvandi buidi tulenda monisina ti tumfiatilanga kimvuka ki Yave.
KIMVUKA KI YAVE KINLANDAKANANGA KIFUANI KI YESU
5. Mu phila mbi befu tunlandikininanga kifuani ki Yesu? Yoane 8:28
5 Yesu wulonguka kuidi Tat’andi yi diyilu mambu kafueti vanga ayi kafueti tuba. Bo kimvuka ki Yave kimbaka makani matedi zithumu zisonga ayi zithuadusulu, kiawu kimvangilanga mawu mu kusadila Diambu di Nzambi. (Tanga Yoane 8:28; 2 Timo. 3:16, 17) Mu zithuadusulu tuntambulanga mu kimvuka ki Yave, ba tutebulanga monyo muingi tutanganga ayi tusadila Diambu di Nzambi. Ndandu mbi tumbakanga mu kulandakana zithuadusulu aziozio?
6. Ndandu mbi tumbakanga mu kulonguka Kibibila?
6 Befu tumbakanga ndandu yiwombo bo tunlonguka Kibibila ayi bilongulu bitu. Dedi, befu tuidi luaku lu kudedikisa malongi ma Kibibila ayi zithuadusulu tuntambulanga mu nzila kimvuka. Bo tummona ti thuadusulu tuma tambula yibongulu mu Kibibila, lufiatu luitu mu kimvuka ki Yave lumbuelamanga.—Loma 12:2.
7. Tsangu mbi Yesu kasamuna ayi buidi kimvuka ki Yave kinlandikinanga kifuani kiandi?
7 Yesu wusamuna “zitsangu zimboti zi Kintinu ki Nzambi.” (Luka 4:43, 44) Mvandi, Yesu wukamba minlandikini miandi balonga matedi Kintinu beni. (Luka 9:1, 2; 10:8, 9) Bubu, baboso badi kithuadi na kimvuka ki Yave, bansamunanga zitsangu zi Kintinu kheti voso kua banzingilanga voti kioso kua kiyeku bantambula.
8. Luaku mbi lunneni batuvana?
8 Kuidi befu, luidi luaku lunneni kusamuna kiedika ki Kintinu ki Nzambi kuidi bankaka. Bakana ko batu boso badi luaku alolo. Dedi, bo Yesu kaba vantoto nandi kasa bika ko ziphevi zimbi bavana kimbangi matedi nandi. (Luka 4:41) Bubu mvandi, ava mutu kabasika mu kisalu ki kusamuna va kimueka na dikabu di Yave, nandi kafueti dukisa zikhadulu zintombulu muingi kutambula luaku beni. Befu tummonisanga ti tumvuanga beni nkinza luaku batuvana lu kusamuna, mu kuvana kimbangi vosu kua vama tuidi ayi yoso kuandi thangu. Dedi Yesu, makani mitu madi, kukuna kiedika ki Kintinu mu mintima mi batu.—Matai 13:3, 23; 1 Koli. 3:6.
9. Buidi kimvuka ki Yave kinzabikisilanga dizina di Nzambi?
9 Yesu wuzabikisa dizina di Nzambi. Mu nsambu kavanga kuidi Tat’andi, nandi wutuba: “Minu yima zabikisa dizina diaku.” (Yoa. 17:26) Mu kulandakana kifuani ki Yesu, kimvuka ki Yave kimvanganga mamoso balenda nunga muingi kuzabikisa bankaka dizina di Nzambi. Tsekudulu yi Nza Yimona yi Kibibila Kinlongo, kidi Kibibila kimboti beni kibila kiawu kivutula dizina di Nzambi mu bibuangu bioso difueti ba. Tsekudulu ayoyo yilenda tangu mu kitini voti yimvimba kuvioka 270 di zimbembu. Mu Apêndice A4 ayi A5 yi tsekudulu ayoyo, ngie wunkuiza mona mambu mbi bavanga muingi kubue vutula dizina di Nzambi mu Kibibila. Apêndice C yidi mu Kibibila ki kulongukila, yimmonisa kibila mbi dizina di Yave difueti monikina 237 di zikhumbu mu Masonoko ma Kingeleko.
10. Mbi ngie belonguka mu mambu nkietu musi Mianmar katuba?
10 Dedi Yesu, befu tuntomba kuzabikisa baboso tulenda nunga bazaba dizina di Nzambi. Bo nkietu mueka widi 67 di mimvu, wunzingilanga ku Mianmar kalonguka dizina di Nzambi, nandi wutuba: Ayiyi yawu khumbu yitheti yima zaba ti dizina di Nzambi Yave. . . . Benu muma kundonga diambu dilutidi mfunu mutu kalenda zaba. Mambu amomo mammonisa ti kulonga dizina di Nzambi, kulenda nyikuna mintima mi batu bantomba kulonguka kiedika.
TATAMANA KUVUA NKINZA KIMVUKA KI YAVE
11. Buidi bakulutu ba kimvuka balenda monisina ti bamvuanga nkinza kimvuka ki Yave? (Tala mvandi foto.)
11 Mu phila mbi bakulutu ba kinvuka, balenda monisina ti bamvuanga nkinza kimvuka ki Yave? Bo bantambula zithuadusulu, bafueti tanga ziawu buboti ayi kusadila ziawu mu phila balenda nungina. Dedi, bawu bantambulanga zithuadusulu kubika to buidi bu kuvangila biyeku mu zikhutukunu, vayi mvandi buidi bu kuvangila minsambu ayi phila yi kukebila mamemi ma Klistu. Bo bakulutu ba kimvuka banlandakana zithuadulu azioso zi kimvuka ki Yave, zikhomba bammonanga ti Yave wu bazolanga ayi wuba kebanga.
Bakulutu ba kimvuka batusadisanga kukindisa lufiatu luitu mu zithuadusulu kimvuka ki Yave ki tuvananga (Tala lutangu 11) b
12. (a) Kibila mbi tufueti sadila mu kithuadi na zikhomba bantuama ntuala? (Ebeleo 13:7, 17) (b) Kibila mbi tufueti sikikila thalu mu zikhadulu zimboti zi zikhomba bantuama ntuala?
12 Bo tuntambula zithuadusulu zimfumina kuidi bakulutu ba kimvuka, tufueti sadila ziawu mu nsualu. Befu kuvanga mawu tualasa bakoyisa ko ntu ayi bawu bala vanga kisalu kiawu buboti. Kibibila kitukindisa tutumukinanga batu bantuamanga ntuala. (Tanga Ebeleo 13:7, 17.) Vayi Khumbu zinkaka dilenda ba diambu diphasi kuvanga mawu. Kibila mbi? Kibila bakulutu ba kimvuka badi batu ba masumu. Vayi befu kusikika thalu mu zikhadulu ziawu zimbi kubika kuandi mu zikhadulu ziawu zimboti, befu tuala yangidika zimbeni zitu. Kibila mbi? Kibila befu kuvanga mawu, tuala dekula lufiatu luitu mu kimvuka ki Yave ayi mawu zimbeni zitu bantomba. Buabu, mbi befu tulenda vanga muingi kubakula ayi kutina luvunu zimbeni zitu bantuadisanga?
KAWUBIKA BANKAKA BADEKULA LUFIATU LUAKU MU KIMVUKA KI YAVE
13. Mbi zimbeni zi Nzambi bantubanga matedi kuvaikisa mutu?
13 Zimbeni zi Yave bamvanganga mamoso muingi kutu vanga kudekula lufiatu luitu mu kimvuka ki Yave. Dedi, befu tumana longuka mu Kibibila ti Yave wuntomba bisadi biandi baba badiodila mu nyitu, mu mayindu ayi mu kiphevi. Ayi boti vadi kisadi kiandi wukhambu ba wudiodila mu ziphila aziozio ayi wukhambu nyongina masumu mandi, nandi kafueti vaikusu mu kimvuka. (1 Koli. 5:11-13; 6:9, 10) Befu tunlandakananga lutumu alolo lu kibibila. Vayi zimbeni zitu bantubanga ti kuvanga mawu, befu tummonisanga ti tuisi ko kiadi, tumfundisanga bankaka ayi tuisi ko luzolo.
14. Nani tho yi mambu ma luvunu bantubanga matedi kimvuka ki Yave?
14 Zaba nani tho yi mambu ma luvunu. Satana nkadi’ampemba, nandi tho yi mambu moso ma luvunu. Nandi widi “tata yi luvunu.” (Yoa. 8:44; Ngene. 3:1-5) Diawu tulenda ba lufiatu ti nandi wunsadilanga batu ba kumbuelanga mioko muingi batiamuna mambu ma luvunu matedi kimvuka ki Yave. Mawu mamonika mu sekulu yitheti.
15. Mbi zifumu zi binganga bavangila Yesu ayi minlandikini miandi?
15 Mu sekulu yitheti, batu baba buelanga mioko satana batuba luvunu luwombo matedi Muana Nzambi, kheti nandi wuba wuvedila ayi waba vanganga mangitukulu mawombo. Dedi, zifumu zi binganga bakamba batu ti Yesu waba kukisilanga ziphevi zimbi mu lusalusu lu “mfumu ziphevi zi mbi.” (Malako 3:22) Bo baba fundisa Yesu, zifumu zi bingana bamvunina mambu ti nandi waba vueza Nzambi. Ayi bavukumuna batu muingi badinda lufua lu Yesu. (Matai 27:20) Kuntuala bo minlandikini mi Yesu baba samuna zitsangu zimboti, batu baba balukila, “bavukumuna nkangu wu batu” muingi baba vanga phasi. (Mava. 14:2, 19) Mu matedi lutangu lu Mavanga 14:2, Kibanga ki nsungi ki 1 Ngonda Kumi Wadi, mvu 1998, kisudikisa ti: “Basi Yuda bawombo bamanga kukuwa zitsangu baba longa, basa kuangalala ko to mu kumanga. Vayi mvandi bavukumuna bankaka bakhambu ba basi Yuda muingi babalukila Baklistu.”
16. Mbi tufueti tebuka moyo befu kukuwa mambu ma luvunu?
16 Satana kasa tuadisa ko to luvunu mu sekulu yitheti. Bubu mvandi, nandi wukidi tatamana “kuvukumuna ntoto woso.” (Nzai. 12:9) Ngie kukuwa mambu ma luvunu matedi kimvuka ki Yave voti zikhomba bantuama ntuala, tebuka moyo ti mawu mvandi Satana kavangila Yesu ayi minlandikini miandi mu sekulu yitheti. Bubu dikabu di Yave bamviokilanga mu mambu mawombu ma phasi ayi ba kuba vuninanga mambu dedi bo Kibibila kibikudila. (Matai 5:11, 12) Befu kuzaba tho yi binongo bi luvunu, tualasa bika ko mawu madekula lufiatu tuitu mu kimvuka ki Yave. Buabu mbi tufueti vanga befu kukuwa binongo beni?
17. Mbi tufueti vanga muingi tubika vukumuka mu binongo bi luvunu? (2 Timoti 1:13) (Tala mvandi Quadro yintuba “ Mbi Tufueti Vanga Befu Kukuwa Binongo bi Luvunu.”)
17 Tina binongo bi luvunu. Mvuala Polo wuvana zithuadusulu matedi mbi Timoti kafueti vanga na kukuwa zitsangu zi luvunu. Nandi wukamba Timoti kaba vana zithuadusulu “muingi babika kuteka matu mu binongo bi luvunu.” Ayi ‘batatuka binongo bi luvunu bimbundulanga mambu manlongo.’ (1 Timo. 1:3, 4; 4:7) Muana kilezi kalenda bonga kioso kua kiuma ayi kutula mu munu, vayi mutu ma konzuka kalendi vanga ko mawu. Bobuawu mvandi, befu tufueti tina binongo bi luvunu kibila tuzebi tho yi binongo beni. Vayi befu tunkuwanga to “mambu mamboti”.—Tanga 2 Timoti 1:13.
18. Buidi tulenda monisina ti tumvuanga nkinza kimvuka ki Yave?
18 Befu tuma tubila ziphila zitatu kimvuka ki Yave kinlandikininanga kifuani ki Yesu. Bo wunlonguka Kibibila tomba kumona ziphila zinkaka kimvuka ki Yave kinlandikininanga kifuani ki Yesu. Sadisa bankaka mu kimvuka kiaku babuela lufiatu mu kimvuka ki Yave. Ayi tatamana kumonisa ti wunkindisanga lufiatu luaku mu kimvuka ki Yave, mu kusadila Yave mu lukuikumunu ayi kutatamana wukuikama mu kimvuka nandi kansadila. (Minku. 37:28) Bika befu boso tutatamana kuba mu khati kimvuka ki Yave kidi luzolo ayi batu bakuikama.
MVUTU MBI WULENDA VANA?
-
Buidi dikabu di Yave banlandikininanga kifuani ki Yesu?
-
Buidi tulenda tatiminina kumonisa ti tumvuanga nkinza kimvuka ki Yave?
-
Mbi tufueti vanga befu kukuwa binongo bi luvunu?
NKUNGA 103 Bakulutu ba Kimvuka —Nkhayilu wu Yave
a Tala quadro “Kibila mbi mvu 1919?” mu buku A Adoração Pura de Jeová É Restaurada! tsielu 102-103.
b MAMBU MADI MU FIKULA: Bo dingumba di bakulutu bambaka makani matedi kisalu ki kuvana kimbangi, ntuadisi wu dingumba wumvana zithuadusulu matedi buidi minsamuni balenda samunina mu kusadila dikalu di bilongulu. Nandi wunsudikisa vama mbi bafueti samunina.
