DILONGI 14
NKUNGA 56 Vanga Kiedika Nzingulu’aku
‘Yonzuka mu Kiphevi’
“Tufueti tatamana kukonzuka mu kiphevi”—EBE. 6:1.
MAMBU TUANLONGUKA
Tuenlonguka buidi mutu wuyonzuka mu kiphevi kafueti yindudilanga, buidi mavanga mandi mafueti bela nguizani na luzolo lu Nzambi ayi buidi kalenda bakila makani mu nduenga.
1. Mbi Yave kantomba mu befu?
VASI ko diambu dinluta tuadisanga mayangi kuidi matata kena mbutukulu yi muana widi buvinya bumboti. Kheti matata banzolanga muan’awu, vayi bawu basinkuiza yangalala ko na kutatama kuba muana tsombi. Ayi balenda kuazuka boti nandi kasinkonzuka ko. Bobuawu mvandi, Yave wumbanga mu mayangi bo tumbaka makani ma kuba minlandikini mi Yesu Klistu. Vayi nandi kasintomba ko tutatamana kuba bana balezi mu kiphevi. (1 Koli. 3:1) Vayi nandi kantomba tuba “bakulutu mu phisulu.”—1 Koli. 14:20.
2. Mbi tunkuiza tubila mu dilongi adidi?
2 Mbi binsundula kuba mutu wuyonzuka mu phisulu? Buidi tulenda bela Baklistu bayonzuka? Buidi bidia bingolo bitusadisilanga kukonzuka mu kiphevi? Ayi kibila mbi tufueti bika kuyifiatilanga beni? Mu dilongi adidi, tunkuiza baka mimvutu mi biuvu abiobio.
MBI BINSUNDULA KUBA MUTU WUYONZUKA MU KIPHEVI?
3. Mbi binsudula kuba mutu wuyonzuka mu kiphevi?
3 Mu Kibibila, kikuma ki Kingeleko basekula “wuyonzuka,” kilenda sundula “wuyela,” “wululama,” ayi “wuduka.” a (1 Koli. 2:6) Dedi bo muana tsombi kankonzukilanga ayi wunkuiza banga nkulutu, bobuawu mvandi befu tuntatamananga kukonzuka mu kiphevi mu kutatamana kukindisa kikundi kitu na Yave. Mu phila ayoyo, tunkuiza banga Baklistu bayonzuka mu kiphevi. Kheti tumana konzuka mu kiphevi, tufueti tatamana kukindisa kikundi kitu na Yave. (1 Timo. 4:15) Befu boso, kubunda mvandi matoku tulenda ba Baklistu bayonzuka mu kiphevi. Vayi mbi bilenda monisa ti mutu widi wuyonzuka mu kiphevi?
4. Mbi bimmonisa ti mutu widi wuyonzuka mu kiphevi?
4 Mutu wuyonzuka mu kiphevi, wumvanganga mambu Nzambi kantomba, bika mo naveka kantomba. Bukiedika mu kuba batu ba masumu bawu bamvanganga zinzimbala. Kheti bobo bawu bammonisanga mu phila banzingilanga kadika kilumbu, ti banyindudilanga mu phila Nzambi kanyindudilanga. Bawu bamana vuata kimutu kimona ayi bantatamananga kuyindudila mu phila Nzambi kanyindudilanga. (Efe. 4:22-24) Bawu bankubamanga muingi kubaka makani mu nduenga, mabongulu mu minsua ayi minsiku mi Nzambi. Mawu masinsundula ko kuba vana zithumu ziwombo zi mambu bafueti vanga. Ba kubaka makani, bawu bamvanganga mangolo ma kulandakana makani beni.—1 Koli. 9:26, 27.
5. Mambu mbi malenda monikina mutu wukhambu wuyonzuka mu kiphevi? (Efeso 4:14, 15)
5 Mvandi mutu wukhambu wuyonzuka mu kiphevi, kalenda fika vunuka mu “diela di batu” ayi mu “mintambu miawu mi luvunu” voti kuvukumuka mu malongi ma batu babalukila kimvuka ki Yave. b (Tanga Efeso 4:14, 15.) Nandi kalenda fika bua mu ntambu wu kiphala, nsoki, kufika bakasananga mambu na bankaka, kufika fuemanga voti kubua mu zithotolo.—1 Koli. 3:3.
6. Kibila mbi tulenda fuanikisila ndionzukulu yi kiphevi na ndionzukulu yi muana? (Tala mvandi foto.)
6 Dedi bo tube tubila va thonono, Kibibila kindedikisa ndionzukulu yi kiphevi na ndionzukulu yi mutu. Bana balezi, basi ko phisulu; diawu vantombuluanga bakulutu baba kieba ayi baba tuadisa. Muingi kufuanikisa, mama kalenda dinda muan’andi kasimba koko kuandi bo bantaba nzila. Vayi bo muan’andi kankonzuka, nandi kalenda kumbika muingi naveka kataba nzila. Kheti bobo, nandi wala tatamana kukambanga muan’andi muingi katatamana kutalanga mu zikhonzo zia ziwadi ava kutaba nzila. Bo muana kankonzuka, nandi wunkuiza banga keba keba muingi kabika kumoniknina diambu dimbi. Dedi bo muana kantombilanga thuadusulu yi nkulutu muingi kutaba nzila, mutu wukhambu wuyonzuka mu kiphevi, wuntombanga thangu zioso muingi Baklistu bayonzuka bansadisa kuzaba mamboti ayi mambi ayi bambakila makani. Vayi bo mutu wuyonzuka mu kiphevi kambaka makani, nandi wunfionguninanga minsua mi Kibibila muingi kabaka bu kuyindudila mu phila Yave kantombila ayi kabaka makani mamboti.
Baklistu bakhambu konzuka mu kiphevi, bafueti longuka buidi bu kubakila makani mabongulu mu minsua mi Kibibila (Tala lutangu 6)
7. Baklistu bayonzuka mu kiphevi, batombanga ko lusalusu lu bankaka?
7 Bukiedika ti mutu wuyonzuka mu kiphevi, katombanga ko lusalusu lu bankaka? Ndamba. Baklistu bayonzuka, mvandi balenda tomba lusalusu thangu zinkaka. Vayi, mutu wukhambu konzuka mu kiphevi, wunteminanga bankaka bambakila makani, voti bankamba mbi kafueti vanga mu mambu mo naveka kafueti bakila makani. Vayi bo mutu wuyonzuka mu kiphevi kandinda lusalusu lu bankaka, nandi kamvangilanga mawu muingi kabaka nduenga ayi phisulu muingi kunsadisa kubaka makani mamboti. Ayi nandi zebi ti Yave wuntomba “kanata kizitu kiandi veka.”—Ngala. 6:5.
8. Mu phila mbi Baklistu bayonzuka mu kiphevi balenda bela disuasana?
8 Dedi bo batu buadi bayonzuka balenda bela disuasana mu nyitu, Baklistu bayonzuka mvandi balenda ba disuasana mu zikhadulu zi kiphevi dedi nduenga, kibakala, kifu ki kukaba ayi phila bammonisina kiadi. Mvandi, bo batu buadi bayonzuka mu kiphevi bammonikina diambu dimueka, bawu balenda baka makani mamboti mabongulu mu Kibibila vayi malenda ba disuasana. Mawu mammonikinanga mu kutadila kilunzi ki kadika mutu. Bo banzaba mawu, bawu ba kifundisanga ko, vayi bamvanganga mangolo ma kutatamana kuba kithuadi.—Loma 14:10; 1 Koli. 1:10.
BUIDI BU KUBELA BAKLISTU BAYONZUKA MU KIPHEVI?
9. Bukiedika ti tunkonzukilanga mu kiphevi mu kinzimbukulu? Sudikisa.
9 Bumviokila thangu, batu bankonzukanga mu kinsuni; vayi buisi ko buawu bummonikinanga mu kiphevi. Tala kifuani ki zikhomba ku Kolintu. Bawu batambula zitsangu zimboti, babotama, batambula phevi yinlongo ayi babaka ndandu mu malongi Polo kaba vana. (Mava. 18:8-11) Vayi bo vavioka mua mimvu tona bawu babotama, bawombo mu bawu, batatamana kuba batu bakhambu konzuka mu kiphevi. (1 Koli. 3:2) Buidi tulenda monisina ti tuisimvutula ko mbusa ndionzukulu’itu yi kiphevi?
10. Mbi tufueti vanga muingi tuyonzuka mu kiphevi? (Yuda 20)
10 Muingi tuba bayonzuka mu kiphevi, theti tufueti ba phuila yi kukonzuka mu kiphevi. Batu ‘bakhambulu diela,’ banzolanga kuba bana ba bilezi mu kiphevi ayi balendi kuenda ko ntuala. (Zinga. 1:22) Tuisintomba ko kuba buka batu bankaka bayonzuka mu kinsuni, vayi kadika thangu bantombanga matata mawu, baba bakila makani. Befu, tuntomba kuvanga mangolo, muingi tuba batu bayonzuka mu kiphevi. (Tanga Yuda 20.) Boti ngie widi mu kuvanga mangolo muingi wuyonzuka mu kiphevi, sambila kuidi Yave ka kuvana ‘phuila ayi mangolo ma kuvangila mambu.’—Fili. 2:13.
11. Lusalusu mbi Yave ka tuvana muingi tuyonzuka mu kiphevi? (Efeso 4:11-13)
11 Yave kasintomba ko tuyonzuka mu kiphevi mu mangolo mitu veka. Batu nandi kavana kiyeku ki kusunga ayi kulonga mu kimvuka, bake bakubama muingi kutusadisa kuba ‘bayonzuka’ mu kiphevi. (Tanga Efeso 4:11-13.) Mvandi, Yave wutu vananga phevi’andi yinlongo yi tusadisanga kuba “mayindu ma Klistu.” (1 Koli. 2:14-16) Mvandi, Yave wutuadisa muingi basonika zibuku zinna zintubila luzingu lu Yesu, muingi kutu monisa, buidi Yesu kaba yindudilanga, kaba tubilanga ayi mambu kaba vanganga bo kaba va ntoto. Ngie kulandakana phila Yesu kaba yindudilanga ayi kaba vangilanga mambu, ngie wulenda ba mutu wuyonzuka mu kiphevi.
DIANGA BIDIA BINGOLO
12. Mbi binsundula “malongi matheti matedi Klistu”?
12 Muingi mutu kayonzuka mu kiphevi, kafueti bika to kulongukanga “malongi matheti matedi Klistu”, voti mambu matheti mutu kanlongukanga bo kantona kulonguka Kibibila. Mambu beni bantubila malenda ba, kubalula mavanga, kiminu, kubotama ayi luvulubukusu. (Ebe. 6:1, 2) Malongi amomo, mawu malongi matheti Baklistu boso bankikininanga. Mu kibila akiokio, mvuala Petelo wutubila mawu bo kalonga mu Pentekoti. (Mava. 2:32-35, 38) Befu tufueti kikinina malongi amomo matheti, muingi tuba minlandikini mi Yesu. Dedi, Polo wulubula ti woso mutu wummanga kukikinina mu luvulubukusu, kasi ko nlandikini wukiedika wu Klistu. (1 Koli. 15:12-14) Vayi, tulendi kuangalalanga ko to mu kuzaba malongi amomo matheti.
13. Mbi tufueti vanga muingi tubaka ndandu mu bidia bingolo bantubila mu Ebeleo 5:14? (Tala mvandi foto.)
13 Vayi bidia bingolo, bisi ko abobo. Buabu, mbi bidia bingolo? Bidia bingolo, bisinsundula ko to, minsiku mi Yave, vayi mvandi minsua miandi, mi tusadisanga kuvisa phila nandi kanyindudilanga. Muingi tubaka ndandu mu bidia abiobio, befu tufueti longukanga Diambu di Nzambi, kuyindula mambu tunlonguka ayi kusadila mawu. Befu kuvanga mawu, tuala ba batu bakubama muingi kubaka makani mankuangidika Yave. c—Tanga Ebeleo 5:14.
Bidia bingolo bi kiphevi, bi tulongisanga buidi bu kubakila makani malenda kuangidika Yave (Tala lutangu 13) d
14. Buidi Polo kasadisila basi Kolintu kukonzuka mu kiphevi?
14 Baklistu bakhambulu bayonzuka mu kiphevi, bammonanga beni phasi kubaka makani mu diambu dintombulu kuyindula minsua mi Kibibila ayi kusadila miawu. Boti vasi ko nsiku wu Kibibila wuntubila diambu beni, bawu balenda yindula ti balenda vanga moso kua bantomba. Bankaka balenda dinda baba sadisa kubakula nsiku wuntubila mambu beni, kheti vasi ko ni nsiku. Ayi ḿba mawu basi Kolinto bavanga. Ḿba bawu bakamba Polo kaba monisa nsiku waba tuba boti balenda dia bidia bakabila kuidi bitumba. Vayi Polo kasa vanga ko mawu. Mbi nandi kavanga? Nandi wuzaba ti nkinza kadika mutu kusadila kilunzi kiandi, kibila kadika mutu widi “luaku lu kusola.” Nandi wuba sadisa kuyindula mu minsua mi Kibibila milenda sadisa mutu kuba mu ndembama mu makani kambaka ayi kubika kuvanga bankaka kusumuka. (1 Koli. 8:4, 7-9) Mu phila ayoyo, Polo wusadisa basi Kolintu kukonzuka mu kiphevi muingi baveka basadila mayindu mawu kubika ti, bankaka baba sudikisa mambu bafueti vanga voti kutomba minsiku.
15. Buidi Polo kasadisila Baklistu ku Ebeleo kukonzuka mu kiphevi?
15 Tulenda longuka dilongi dinkinza mu mambu mvuala Polo kasonikina Baklistu ku Ebeleo. Bankaka basa tatamana ko kukonzuka mu kiphevi, vayi ba “bue vutuka kunuanga leta kubika kuandi bidia bingolo.” (Ebe. 5:12) Bawu basa nunga ko kutatamana mu kiedika, kio Yave kaba kuba sudikisanga mu nzila kimvuka kiandi. (Zinga. 4:18) Dedi, bawombo mu basi Yuda, batatamana kulandakana nsiku wu Mose kheti bo vavioka 30 ma mimvu, tona nsiku beni wumana mu nzila khudulu yi Yesu. (Loma 10:4; Titu 1:10) Bukiedika, Polo kasa sabisa ko bo kadinda basi Yuda baludika phil’awu yi kuyindudila, kheti vavioka 30 di mimvu, tona bayiza ba Baklistu! Woso mutu wuntanga nkanda Polo kasonikina basi Ebeleo, kalenda mona ti muawu muidi bidia bingolo bi kiphevi. Ayi mawu Baklistu abobo baba tomba, muingi kukindisa kiminu mu phila Yave kamvangilanga mambu mu kimvuka kiandi. Ayi muingi baba kibakala kiaba tombulu muingi batatamana kusamuna kheti mu zithotolo badengana.—Ebe. 10:19-23.
BIKA KUKIFIATILA BENI
16. Kubika kuandi to kukonzuka mu kiphevi, mbi diaka tufueti vanga?
16 Kheti tuma konzuka mu kiphevi, tufueti tatamana kuvanga mangolo muingi tutatamana mu phila ayoyo. Ayi muingi tununga mawu, tulendi kukifiatila ko befu veka. (1 Koli. 10:12) Tufueti “tatamananu kuyifiongunina” befu veka muingi tumona boti tuidi mu kutatamana kukonzuka mu kiphevi.—2 Koli. 13:5.
17. Buidi nkanda wu Polo kuidi basi Kolosai wummonisina nkinza wu kutatamana kuba bayonzuka mu kiphevi?
17 Mu nkanda Polo kasonikina kuidi basi Kolosai, nandi wutubila diaka nkinza wu kutatamana kuba bayonzuka mu kiphevi. Kheti bawu baba bayonzuka, Polo wuba lubula muingi bawu babika kutona kuyindula dedi basi nza. (Kolo. 2:6-10) Ayi Epafala wuzaba buboti zikhomba ku Kolosai, waba sambilanga beni muingi bawu baba “bakindama” voti bayonzuka. (Kolo. 4:12) Mbi mawu ma tulonga? Ma tulonga ti Polo ayi Epafala bavisa ti muingi tutatamana kuba bayonzuka mu kiphevi, tufueti vanga mangolo ayi kudindanga lusalusu lu Yave. Bawu baba tomba basi Kolosai batatamana bayonzuka mu kiphevi, kheti mu mambu maphasi baba viokila.
18. Mbi bilenda monikina mutu wuyonzuka mu kiphevi? (Tala mvandi foto.)
18 Polo wulubula basi Ebeleo ti, kheti mutu wuyonzuka mu kiphevi kalenda zimbisa lunungu lu Nzambi. Wuba tebula monyo ti mutu wuyonzuka mu kiphevi, na kumanga kuba keba keba ayi kubika bue kuwila Yave, nandi kasinkuiza nyongina ko masumu mandi ayi kubaka nlemvu wu Nzambi. Nyenzi beni kuzaba ti basi Ebeleo basa bua ko mu ntambu awowo. (Ebe. 6:4-9) Mbi tulenda tuba matedi batu bamvaikusuanga mu kimvuka voti bavonga mu kiphevi, vayi kuntuala banyonginanga masumu mawu? Mu kunyongina masumu mawu, bawu bammonisanga ti ba kikululanga ayi badi disuasana na batu Polo katubila. Vayi, ba kuvutuka mu mioko mi Yave, bawu bafueti tambula lusalusu luandi. (Yehe. 34:15, 16) Bakulutu ba kimvuka balenda dinda khomba wuyonzuka mu kiphevi muingi kaba sadisa bavutuka kubue ba bakindama mu kiphevi.
Yave wumvanganga mamoso muingi kusadisa batu bantomba kubue baka mangolo mu kiphevi (Tala lutangu 18)
19. Makani mbi befu boso tufueti baka?
19 Boti ngie widi mu kuvanga mangolo muingi kukonzuka mu kiphevi, ngie wulenda nunga kudukisa makani amomo! Tatamana kudia bidia bingolo bi kiphevi ayi vanga mangolo muingi wuyindula mu phila Yave kanyindudilanga. Ayi boti ngie widi mutu wuyonzuka mu kiphevi, vanga mangolo muingi wutatamana.
MVUTU MBI WULENDA VANA?
-
Mbi binsundula kuba mutu wuyonzuka mu kiphevi?
-
Buidi tulenda bela Baklistu bayonzuka mu kiphevi?
-
Kibila mbi tulendi kukifiatila ko beni?
NKUNGA 65 Tutatamana Kuenda Kuntuala
a Kheti bikuma “kukonzuka mu kiphevi” voti “kukhambu konzuka mu kiphevi” bimonikanga ko beni mu matangu ma Kiebeleo, vayi tulenda mona muawu tsudukusu yi mambu amomo. Dedi, mu buku yi Zingana yintubila disuasana na mutu widi ditoko, wukhambulu nduenga na mutu widi nduenga ayi phisulu.—Zinga. 1:4, 5.
b Tala ntu diambu wuntuba “Wukikieba mu Zitsangu zi Luvunu” mu kikhuku kintuba “Mambu Mankaka” kidi mu jw.org ayi mu JW Library.®
c Tala mu kilonguku akiki, “Mambu Wulenda Longuka”.
d MAMBU MADI MU FOTO: Khomba mueka wunsadila minsua kabe longuka mu Diambu di Nzambi bo kansola mambu kamviokisila thangu.
