1. Ndubu mbi mvuala Polo kavana kuidi Baklisto basolo?

 ‘LUBIKA.’ Ayiyi yawu ndubu mvuala Polo kavana Baklisto mu sekulu yitheti. Vayi kubika mbi? ‘Kubika balula mayindu mu mambu ma nza ayiyi.’ (Loma 12:2) Baklisto kayuwa malongi amomo baba batu bayivana mu Nzambi ayi basolo mu pheve yinlongo. Vayi kibila mbi Polo kavanina ndubu beni?—Loma 1:7.

2-3. Mbi Satana kantombanga kuvanga muingi kutu tatula kuidi Yave? (b) Buidi tulenda nungina mayindu madi buka bibaka bingolo?

² Polo wuba bibila bi nkinza muingi kukuazuka. Ḿba Baklisto bankaka baba vukumuka mu mayindu ayi diela di nza yi Satana. (Efeso 4:17-19) Mambu amomo malenda monika mvandi kuidi wosokua mutu mu befu. Satana, nzambi yi nza ayiyi, widi mu mu kuvanga mamoso muingi kutu tatula kuidi Yave ayi nandi kalenda sadila mintambu miwombo. Buka, boti tutidi kuba batu bankinza voti kuba bazabakana, nkandi’ampemba wala sadila luaku alolo muingi kutu tatula kuidi Yave. Satana kalenda mvandi sadila mambu tuma viokila mu luzingu, kikhulu ayi kikola kitu muingi kutu vanga kuyindula phila nandi kanyindudilanga.

³ Mayindu mankaka malenda ba phasi muingi kubalula voti kubika. Vayi kheti mayindu amomo madi buka ‘bibaka bingolo’, mawu malenda tuluka. Buidi? (2 Kolinto 10:4) Polo wutuba: ‘Kibila tuidi mu kutulula mayindi ayi biuma bioso bilenda  kakidila nzayilu yi Nzambi, ayi tunnatanga mayindu moso ku buvika, muingi matumukina Klisto.’(2 Kolinto 10:5) Ngete, mu lusalusu lu Yave, tulenda nunga kuyala mayindu mitu. Ayi Diambu di Nzambi, Kibibila, wawu mbuku wulenda tusadisa kununga mayindu makhambu fuana ma nza yi Satana.

4. Mambu mbi befu bawombo tubika kuvanga muingi kusadila Nzambi?

⁴ Tebuka moyo thangu ngie wulongukila kiedika. Muingi kusadila Nzambi, vabatombula ngie kubalula mavanga. Ayi kuidi befu bawombo kubalula mavanga kunsundula kubika kuvanga mambu madi mambi va meso ma Yave. (1 Kolinto 6:9-11) Vayi Yave wutusadisa kubika mambu amomo kumbusa, befu tumvutulanga beni matondo mu mawu.

5. Mambu muadi mbi tufueti vanga dedi bummonisina Loma 12:2?

⁵ Bika kuyindula ti wulendi balula ko mavanga. Tufueti tatamana kuvanga mangolo, khanu tulenda bue vutuka kuvanga masumu mangolo tuaba vanganga ava kubotama. Mbi bilenda kutusadisa mu mvita awowo? Polo wutuba: ‘Lubika balula mayindu minu mu mambu ma nza ayiyi, vayi bika lukituka bamona mu kubalula mayindu minu.’ (Loma 12:2) Dedi bummonisina lutangu tufueti vanga mambu muadi. Ditheti, tufueti ‘bika balula mayindu minu mu mambu ma nza ayiyi,’ voti kubika vitika nza ayiyi yi tutuadisa. Dimuadi, ‘kukituka bamona’.

6. Kiedika mbi kidi mu mambu Yesu katuba mu Matai 12:43-45?

⁶ Polo kabasa tubila ko mambu matedi kubalula kizizi muingi kiba kimboti. Mawu mansundula kubalula kimutu kitu ki khati. (Tala quadro “Widi mu Kubaluka Voti Wukhidi Dedi bo Wubela?”) Kubalula mayindu mitu kunsudula kubalula zikhadula zitu, mayindu ayi zinzinunu zitu. Diawu tufueti kuyikuvusa: ‘Mambu yidi mu kubalula muingi kuba  Mbangi yi Yave, madi to muingi kumonika vantuala batu? Voti mu khati ntim’ami yidi mu kubaluka mu bukiedika?’ Buboti beni kuzaba disuasana adiodio. Mu Matai 12:43-45, Yesu wutukamba mbi tufueti vanga. (Tanga.) Tulenda bakula kiedika kinneni mu mambu Yesu katuba: vasintombulu ko to kutulula mayindu mambi. Vayi tufueti vingisa mu mawu mayindu mamboti mankuangidikanga Nzambi.

7. Buidi tulenda nungina kubalula kimutu kitu ki khati?

⁷ Vayi bukiedika ti tulenda nunga kubalula kimutu kitu ki khati? Kibibila kintuba: ‘Lutatamana kukituka bamona mu phila munyindudila ayi vuat’anu bumutu bumona, buvangulu boso buididi luzolo lu Nzambi, mu busonga bukiedika ayi lukuikumunu.’ (Efeso 4:23, 24) Ngete, tulenda balula kimutu kitu ki khati, vayi disi ko diambu diluelo. Tufueti vanga mangolo muingi kununga zinzinunu zimbi ayi kubika kuvanga mambu Yave kanlendanga. Tufueti ‘vuata bumutu bumona.’ Mawu mansundula ti tufueti balula zinzinunu zitu, zitsatu ayi mabanza mitu. Kubaluka mu phila ayoyo kuntombulu befu kutatamana kuvanga mangolo.

8-9. Buidi kifuani ki khomba mueka kimmonisina nkinza widi mu kubalula kimutu tuidi mu khati?

⁸ Tala kifuani ki khomba wumueka. Ava kuzaba kiedika, nandi wuba beni buphunya ayi waba nuanga beni. Bo katona kulonguka Kibibila nandi wubalula nzingulu’andi ayi wubotama. Kiba kimbangi kinneni kuidi batu baba kalanga yandi va nsengi. Vayi mu builu bumueka, mua bilumbu kuntuala bo kabotama, nandi wuviokila mu mambu mathota kiminu kiandi. Dibakala dimueka wuba wukolo wumfiesa muingi banuana. Va thononu nandi kasa kumvuvukila ko. Vayi bo dibala beni katona kutubila bubi Yave, khomba beni kasa bue nunga ko kukiyala. Nandi wubasika ku khati nzo ayi wututa khuba dibakala beni. Kibila mbi kavangila mawu? Ndongukulu yi Kibibila yilonga khomba kuyala nganzi’andi. Vayi nandi kasa balula ko mayindu mandi. Mu bikuma binkaka tulenda tuba ti, mu khati ntim’andi nandi wutatamana kuba momawu mayindu kaba ava kabotama.

⁹ Vayi khomb’itu kasa vonga ko. (Zingana 24:16) Mu lusadusu lu bakulutu ba kimvuka, nandi wutatamana kukonzuka ayi kuntuala wuyiza ba nkulutu wu kimvuka. Builu bumueka ku nganda Nzo yi Kintinu, nandi wubue monikina momawu mambu kaviokila. Dibakala dimueka wuba wukolo waba tomba kubula wumueka mu bakulutu ba kimvuka. Mambu mbi khomb’itu kavanga? Mu malembe ayi mu kikulula, nandi wuyoluka na dibakala beni, wununga kumvubika ayi wunsadisa kutuka ku nzo. Kibila mbi mu khumbu ayiyi nandi kakhambu nuanina? Kibila khomb’itu wununga kubalula phila kanyindudilanga. Mu khati ntim’andi, nandi wuyiza ba mutu wu kikululanga ayi nkua ndembama. Bukiedika, mawu matuala nzitusu kuidi Yave!

10. Mbi bintombulu muingi tubalula kimutu tuidi mu khati?

¹⁰ Bukiedika ti thangu yintombulu muingi kubalula phila tunyindudilanga. Ḿba tufueti vanga mangolo moso tunnunga mu mimvu miwombo. (2 Petelo 1:5 ) Mambu amomo masimbaluka ko kibila befu tunsadilanga Yave mu mimvu miwombo. Tufueti tatamana kuvanga mamoso tunnunga muingi tubalula kimutu tuidi mu khat’itu. Vayi buidi tulenda nungina mawu? Ndoko tutubila mambu tulenda vanga malenda kutu sadisa.

11. Buidi nsambu wutu sadisilanga kubalula phila yi kuyindudila?

¹¹ Kusambila, diawu diambu ditheti dinkinza tufueti vanga. Tufueti sambila dedi Davidi: “Vanga mu minu ntima wuvedila, a Nzambi ayi buela kitula mu minu pheve yimona ayi yikinda.” (Minkunga 51:10) Buboti beni kukikinina ti tufueti balula phila tunyindudila ayi kudinda lusalu lu Yave. Bukiedika ti nandi wala tusadisa kubalula mayindu mitu? Ngete, wala tusadisa! Dedi, bo basi Isaeli baba zingila mu thangu mbikudi Yehezekeli baba kithemu, Yave wuba kanikisa: “Minu yala bavana ntima wu kithuadi ayi yala tula mu bawu pheve yimona, yala botula mu nyitu’awu ntima wu dimanya ayi yala kuba vana ntima wu nsuni, [voti, ntima wunkikinina zithuadusulu zi Nzambi].” (Yehezekeli 11:19; matangu madi va wanda mu nwt-TPO.) Yave waba tomba beni kusadisa basi Isaeli kubaluka, ayi nandi wuntomba mvandi bubu kusadisa kadika mutu mu befu.

12-13. (a) Dedi buntubila Minkunga 119:59, mu mambu mbi tufueti yindula? (b) Biuvu mbi ngie wufueti kuyikuvusa?

¹² Kuyindula mu mambu wuntanga didi diambu dimuadi dilendi khambu ko. Bo wumvanga matangu maku ma Kibibila, botula thangu muingi wuyindula mu mambu mbi wufueti badudila mayindu ayi mabanza maku. (Tanga Minkunga 119:59; Ebeleo 4:12; Yakobi 1:25) Tomba kuzaba boti mayindu maku ayi ntim’aku wuba tona kuvukumuka mu mambu maphamba ma nza ayiyi. Kikinina ti widi nzinzimbala ayi vanga mangolo muingi kununga ziawu.

¹³ Dedi, wukiyuvusa: ‘Bukiedika ti yidi nkadu nsoki mu ntim’ami? (1 Petelo 2:1) ‘Yimmuena ti yilutidi na bankaka mu kibila ki mvila yifumina, mu kibila ki kikola kiami voti biuma yidi?’ (Zingana 16:5) ‘Minu yikumuena buka ti yilutidi na batu bakhambulu biuma minu yidi voti badi nkanda nyitu wunkaka?’ (Yakobi 2:2-4) ‘Minu yinzolanga biuma bidi mu nza yi Satana?’ (1 Yoane 2:15-17) ‘Minu yinzolanga kuviokisa thangu mu bisavu bimmonisa mambu ma buphunya ayi ma kitsuza?’ (Minkunga 97:10; 101:3; Amosi 5:15) Mimvutu miaku milenda monisa mu mambu mbi wufueti vanga mangolo muingi wubaluka. Bukiedika ti kubalula mambu amomo mu ntima kulenda luta ba phasi beni dedi kutulula ‘bibaka bingolo.’ Vayi befu kuvanga mangolo, tuala kuangidika Tat’itu, Yave.—Minkunga 19:14.

14. Kibila mbi didi diambu dinkinza kusola buboti bakundi?

¹⁴ Kusola buboti bakundi didi diambu dintatu dinkinza. Khumbu zinkaka tumonanga ko, vayi bakundi bitu bawu banluta kutu vukumuna. (Zingana 13:20) Ku kisalu voti mu kikola, ḿba tuidi bazungalala na batu balendi ko tusadisa kuyindula mu phila yinkuangidika Nzambi. Vayi mu zikhutukunu tulenda baka bakundi bamboti balenda kutu ‘kindisa mu luzolo ayi mu mavanga mamboti.’—Ebeleo 10:24, 25.

15-16. Buidi Satana kantombilanga kubifisila mayindu mitu?

¹⁵ Bika zimbakana ti Satana widi wukubama muingi kuvukumuna mayindu mitu. Nandi wunsadilanga mayindu mawombo muingi kutu vanga kuba divuda mu kiedika kidi mu Diambu di Nzambi.

¹⁶ Satana wukhidi vanga kiokiawu kiuvu kavanga Eva ku lumbu lu Edeni: ‘Mawu kuandi Nzambi katuba . . . ?’ (Ngenesi 3:1) Mu nza ayiyi yidi mu lutumu lu Satana, khumbu zinkaka tunkuwanga biuvu bilenda tula divuda mu mayindu mitu. Buka tulenda kuwa  batu kutukuvula: ‘Bukiedika kuandi ti Nzambi wunkandimina dibakala na dibakala ayi nkieto na nkieto kukuelasana? Bukiedika kuandi ti Nzambi kasintomba ko ti ngie wukemba kilumbu Yesu kabutuka ayi kilumbu kiaku wubutuka? Bukiedika kuandi ti Nzambi’aku kasintomba ko ti ngie wuvutula menga mu nyitu? Boti Nzambi widi luzolo, bukiedika kuandi ti nandi wutomba ti ngie wubika koluka na muisi dikanda voti nkundi bavayikisa mu kimvuka?’

17. Mbi tufueti vanga boti bantomba kutu tula divula? Dedi buntubila Kolosai 2:6, 7, mambu mbi mala monika?

¹⁷ Tufueti ba lufiatu mu mambu tunkikininanga. Biuvu tukhambu zaba mimvutu bilenda tutuadisa divuda diwombo. Biuvu bilenda bivisa phila tunyindudilanga ayi kutulula kiminu kitu. Mbi tufueti vanga? Kibibila kintuba ti tufueti balula mayindu mitu muingi tuvisa befu veka ‘mambu mamboti, mafuana ayi luzolo lusonga lu Nzambi.’ (Loma 12:2) Ndongokulou yi Kibibila yi befu veka yilenda tusadisa kuvisa ti mambu tunlonguka mu Kibibila madi makiedika. Yawu yala tusadisa kukikinina ti zithumu zi Yave ziawu zilutidi. Bosi, tuala ba buka nti widi zinganzi zikinda, befu tuala ba ‘bakuikama mu kiminu.’—Tanga Kolosai 2:6, 7.

18. Mbi biala kutu sadisa kukikieba mu mayindu mambi ma nza yi Satana?

¹⁸ Kuba bakuikama mu kiminu, didi diambu mutu wunkaka kalendi vangila ko va mving’itu. Diawu tatamana kukituka wumona mu phila wunyindudila. Sambila kadika thangu; dinda mu kifuza pheve yinlongo yi Yave. Yindula buboti mu mambu wuntanga; tatamana kufiongunina mayindu ayi mavanga maku. Baka bakundi bamboti; ba nkangulu na batu balenda kusadisa kubalula mu phila yimboti mayindu maku. Ngie kuvanga mawu, wala nunga kukikieba mu mayindu mambi ma Satana ayi wala ‘tulula mayindu ayi biuma bioso bilenda kakidila nzayilu yi Nzambi.’—2 Kolinto 10:5.