DILONGI 26
NKUNGA 8 Yave Kisuamunu Kitu
Tadila Yave, Dimanya Diaku Dinneni
‘Vasi ko dimanya dinneni, dilutidi mangolo kena Nzamb’itu.’ — 1 SAMU. 2:2.
MAMBU TUANLONGUKA
Tuemmona kibila mbi Kibibila kintedila Yave dimanya dinneni ayi buidi tulenda landikinina zikhadulu ziandi.
1. Dedi bummonisina Minkunga 18:46, buidi Davidi kadedikisila Yave?
MU NZA tunzingila, mambu maphasi malenda monika yoso kuandi thangu. Ayi thangu zinkaka, mawu malenda balula luzingu luitu! Tumvutulanga beni matondo mu kuzaba ti tulenda fiatila mu lusalusu lu Yave Nzambi. Mu dilongi dibedi, ba tutebudi monyo ti Yave widi Nzambi yimonyo ayi nandi wumbanga wukubama muingi kutu sadisa. Bo tuntambulanga lusalusu luandi, befu tumbuelanga lufiatu ti ‘Yave widi Nzambi yimonyo!’ (Tanga Minkunga 18:46.) Vayi bo kamana kutuba mambu amomo, Davidi wutedila Yave, ‘Dimanya diama Dinneni.’ Kibila mbi nandi kadedikisila Yave, Nzambi yimonyo na dimanya dinneni—kiuma kikhambulu monyo?
2. Mbi tunkuiza longuka mu dilongi adidi?
2 Mu dilongi adidi, tuemmona kibila mbi Kibibila kindedikisila Yave banga dimanya dinneni ayi mbi befu tulenda longuka mu kifuani akiokio. Tunkuiza longuka mvandi, buidi tulenda tadila Yave, Dimanya ditu Dinneni. Kutsuka, tunkuiza tubila ziphila befu tulenda landikinina zikhadulu ziandi.
MU PHILA MBI YAVE KADIDI BUKA DIMANYA DINNENI?
3. Tubila bifuani bi Kibibila bansadila kikuma ‘dimanya dinneni. (Tala mvandi fikula yidi va thonono levista.)
3 Kibibila kinsadila kikuma ‘dimanya dinneni’ muingi ku tusadisa kuvisa zikhadulu Yave kadi. Khumbu ziwombo baba sadilanga kikuma akiokio muingi kutubila zikhadulu zi Yave zi kukuitukila. Khumbu yitheti bandedikisila Yave buka ‘Dimanya Dinneni’ yidi mu Deutelonomi 32:4. Mu Nsambu, Ana wutuba ti ‘vasi ko dimanya dinneni dindedakana na Nzamb’itu.’ (1 Samu. 2:2) Habakuki wutedila Yave ‘Dimaya diama Dinneni.’ (Haba. 1:12) Nsoniki wu Minkunga 73 wutedila Nzambi ‘dimanya dinneni di ntim’ama.’ (Minku. 73:26) Naveka Yave mvandi wuyifuanikisa banga dimanya dinneni. (Yesa. 44:8) Ndoko tumona zikhadulu zitatu zi Yave zidi buka dimanya dinneni ayi buidi tulenda kuntadila ‘Dimanya ditu Dinneni.’—Deute. 32:31.
Dikabu di Nzambi bantadilanga Yave, Dimanya Dinneni (Tala lutangu 3)
4. Mu phila mbi Yave kadidi kisuamunu? (Minkunga 94:22)
4 Yave widi kisuamunu. Dedi bo dimanya dinneni dilenda kiebila mutu mu kivuka kinneni, Yave Nzambi wu tukiebanga bo tumviokila mu mambu maphasi ma luzingu. (Tanga Minkunga 94:22) Nandi wutu sadisanga kukieba kikundi kitu ayi wutu vananga lufiatu ti mambu tumviokilanga bubu, malasa kadidila ko. Nandi wukanikisa mvandi kumanisa mamoso malenda tubotula ndembama ayi nsika. —Yehe. 34:25, 26.
5. Buidi Yave kalenda bela dimanya ditu dinneni di kusuamina?
5 Phila yimueka tulenda tadila Yave Kisuamunu, yidi mu kusambilanga kuidi nandi. Bo tunsambila, tuntambulanga ‘ndembama yi Nzambi’ yinkiebanga mintima mitu ayi mayindu mitu. (Fili. 4:6, 7) Tala kifuani ki khomba mueka batula mu buloku mu kibila ki kiminu kiandi, bantedilanga Artem. Bo kaba mu buloku, baba kumvananga biuvu khumbu ziwombo, baba kuntovulanga mu kumvanga phasi ayi baba vanga mangolo muingi kuntula boma. Nandi wutuba: “Yaba kuazukanga beni thangu zioso baba kuphananga biuvu . . . Diawu yaba sambilanga kuidi Yave ayi yaba kundindanga muingi kaphana nduenga ayi ndembama mu ntima. Kheti mu mambu moso mapolisi baba kuedikanga kuvanga, basa nunga ko . . . Mu lusalusu lu Yave, yiba buka minu yisuamina kumbusa dimanya dinneni.”
6. Kibila mbi tufueti fiatilanga mu Yave thangu zioso? (Yesaya 26:3, 4)
6 Yave widi mutu wu lufiatu. Dedi bo dimanya dinneni dikhambu nyikukinanga, Yave mvandi wumbanga wukubama thangu zioso muingi ku tusadisa. Tulenda kumfiatila kibila nandi widi ‘Dimanya Dinneni dinkadidila.’ (Tanga Yesaya 26:3, 4.) Mu kuba Nzambi yinzinganga mvu ka mvu, nandi wala tatamana kudukisa zikhanu ziandi, kukuwa minsambu mitu ayi ku tuvana lusalusu tuntomba. Tulenda fiatila Yave kibila nandi wumbanga wukuikama kuidi baboso ba kunsadilanga mu lukuikumunu. (2 Samu. 22:26) Nandi kazimbakananga ko mambu tumvanganga ayi wala tatamana kutu sakumuna.—Ebe. 6:10; 11:6.
7. Mambu mbi mala tumonikina befu kufiatila Yave? (Tala mvandi foto.)
7 Befu tuntadilanga Yave dimanya dinneni, bo tu kumfiatila mu ntima woso. Befu tuidi lufiatu ti tunkuiza baka ndandu bo tuntumukina Yave kheti mu thangu ziphasi. (Yesa. 48:17, 18) Bo tummonanga phila Yave ka tusadisilanga, lufiatu luitu mu nandi lumbuelamanga. Mu phila ayoyo, befu tunluta banga bakubama muingi kukindama mu mambu mo Yave to kalenda nunga ku tusadisa. Bo tumviokila mu mambu tummuena ti vasi ko mutu wulenda ku tusadisa, befu tuzebi ti Yave widi mutu wu lufiatu ayi wumbanga wukubama muingi ku tusadisa. Yaya Vladimir wutuba: “Thangu yiviokisa mu buloku, yawu thangu yiluta fikimina Yave, kubuela kumfiatila, kibila yiba minu veka ayi Yave nandi to mutu wuba wufuana muingi kutsadisa.”
Tuntadilanga Yave dimanya ditu dinneni bo tu kumfiatila mu ntima woso (Tala lutangu 7)
8. (a) Kibila mbi tulenda tubila ti Yave kabalukanga ko? (b) Ndandu mbi tumbakanga mu kubaka Nzambi yidi buka Dimanya Dinneni? (Minkunga 62:6, 7)
8 Yave kabalukanga ko. Dedi bo dimanya dinneni dikadila disikama, Yave mvandi kabalukanga ko. Kimutu kiandi ayi zikhadulu ziandi zibalukanga ko. (Mala. 3:6) Bo Adami ayi Eva bambalukila, Yave kasa balula ko lukanu luandi mu batu va ntoto. Mvuala Polo wutuba ti Yave “kalendi vanga ko mambu mambalukila kimutu kiandi.” (2 Timo. 2:13) Moso kuandi mambu malenda monika voti batu balenda vanga, Yave kalasa balula ko zikhadulu ziandi, lukanu luandi ayi zithuadusulu ziandi. Mu kuzaba ti Nzamb’itu kabalukanga ko, befu tulenda kumfiatila muingi ka tuvukisa ayi kuba lufiatu ti nandi wala tusadisa mu thangu ziphasi.—Tanga Minkunga 62:6, 7.
9. Mbi tulenda longuka mu kifuani ki Tatiana?
9 Befu tulenda tadila Yave Dimanya ditu Dinneni, mu kutsikika mayindu mitu mu phila mutu nandi kadi ayi kutatamana kuyindula mu zikhanu ziandi zitedi bilumbu binkuiza. Kuvanga mawu, kuala tusadisa kuba basikama mu mayindu, bo tuala viokila mu mambu maphasi. (Minku. 16:8) Mawu mamonikina khomba mueka bantedilanga Tatiana, batula mu buloku mu kibila ki kiminu kiandi. Nandi wutuba: “Mu kinsuni minu yiba minu veka. Va thonono diba diambu diphasi ayi maba kuthuadisanga beni kiunda.” Vayi bo nandi kayindula phila Yave kaba tadila mambu kaba viokila ayi kayindula mu zikhanu ziandi, nandi wubaka mangolo muingi kukindama mu mambu beni. Nandi wubue tuba: “Kuvisa kibila mbi mambu amomo maba kumbonikina, kutsadisa kubuela fiatila mu Yave. Ayi matsadisa kubika to kuyindula mu minu veka.”
10. Buidi Yave kalenda bela dimanya ditu dinneni bubu?
10 Mu bilumbu binkuiza, befu tuala viokila mu mambu maphasi mala luta tombulu tufiatila mu Yave mu ntima woso. Ayiyi yawu thangu yifueni muingi tuluta kindisa lufiatu luitu ti Yave, wala tuvana biabioso bintombulu muingi tutatamana bakuikama kuidi nandi. Buidi tulenda vangila mawu? Mu kutanganga binongo bi Kibibila ayi bi zikhomba zitu mu bilumbu bitu. Bo wuntanga biawu, yindula buidi Yave kamonisina zikhadulu buka dimanya dinneni muingi kusadisa bisadi biandi. Yindulanga buboti mu binongo abiobio. Mu phila ayoyo, ngie wala tadila Yave Dimanya diaku Dinneni.
LANDAKANA ZIKHADULU ZI YAVE
11. Kibila mbi tuntombila kulandakana zikhadulu zi Yave buka dimanya dinneni? (Tala Quadro, “box “ Makani Kuidi Zikhomba Badi Matoko.”)
11 Tuma mona buidi Yave kammonisinanga zikhadulu dedi dimanya dinneni. Buabu tuemmona buidi tulenda landikinina zikhadulu ziandi. Bo tumbuela vanga mawu, befu tuala luta ba bakubama muingi kukindisa zikhomba mu kimvuka. Dedi, Yesu wuvana Simoni dizina di Cefa (basekudila “Petelo”) dinsundula “Kitini ki Dimanya.” (Yoa. 1:42) Mansundula ti nandi wutambula kiyeku ki kubomba ayi kusikimisa zikhomba mu kimvuka. Kibibila kintedila bakulutu ba kimvuka banga ‘mvemvu wu dimanya dinneni didi ku thandu.’ Mawu mansundula ti bawu bafueti kieba zikhomba mu kimvuka. (Yesa. 32:2) Bukiedika, befu boso tumbankanga beni ndandu mu lusalusu lu bakulutu ba kimvuka, kuba kuandi boti tuidi babakala ove bakietu. Ayi mawu ma tusadisanga kulandakana zikhadulu zi Yave zidi buka dimanya dinneni.—Efe. 5:1.
12. Tubila ziphila tulenda bela kisuamunu kuidi bankaka.
12 Ba kisuamunu kuidi bankaka. Khumbu zinkaka, ḿba befu tulenda baka bu kusadisila zikhomba zitu, ba kumonikina bivuka voti mimvita. Mu ‘bilumbu abibi bitsuka’ tuidi mu kuzingila, mambu maphasi mala buelama ayi tuala luta baka luaku lu kuyisadisa befu na befu. (2 Timo. 3:1) Mvandi, tulenda vana mbombolo kuidi zikhomba zitu ayi kuba monisa luzolo. Phila yimueka tulenda vangila mawu, yidi mu kukoluka yawu mu zikhutukunu ayi kuba bomba. Befu tuntomba bawu batadila kimvuka, kibuangu balenda bakila khindusulu. Mu nza tunzingila, batu bamana wala lukasu ayi bavuanga ko nkinza bankaka. Vayi bo zikhomba zitu bankuiza mu zikhutukunu, befu tuntomba bawu bamona ti ba kuba zolanga, batambula khindusulu ayi lukiebu.
13. Mu phila mbi bakulutu ba kimvuka balenda bela kisuamunu kuidi bankaka? (Tala mvandi foto.)
13 Bakulutu ba kimvuka bambanga kisuamunu kuidi zikhomba bamviokila mu mambu maphasi dedi bivuka. Bo kivuka kimmonika voti bo khomba kambela, bakulutu ba kimvuka bantuamanga ntuala muingi kuvana lusalusu. Mvandi bamvananga lusalusu lu kiphevi. Boti nkulutu wu kimvuka wuzabakana banga mutu wunkolukanga buboti na bankaka, wukitulanga va kibuangu ki bankaka, widi wukubama muingi kukuwa, zikhomba balasa mona ko phasi kumfikama. Zikhadulu aziozio ziala sadisa zikhomba kumona ti badi mu kutambula lukiebu ayi balasa mona ko phasi kusadila malongi bakulutu ba kimvuka ba kuba vana mabongulu mu Kibibila.—1 Tesa. 2:7, 8, 11.
Bo zikhomba bamviokila mu moso kuandi mambu maphasi madi buka kivuka, bakulutu ba kimvuka bambanga kisuamunu kiawu (Tala lutangu 13) a
14. Buidi tulenda monisina ti tuidi batu ba lufiatu?
14 Ba mutu wu lufiatu. Befu tuntomba batu bankaka ba tufiatila, bulutidi bo bamviokila mu ziphasi. (Zinga. 17:17) Buidi tulenda bela batu ba lufiatu? Tulenda vangila mawu mu kuvanga mangolo muingi kumonisa zikhadulu dedi, kudukisa mambu tunkanikisa ayi kuvangilanga mambu mu thangu. (Matai 5:37) Mvandi, befu kuzaba ti vadi mutu wuntomba lusalusu, tulenda kukivana muingi kusadisa. Mvandi, tufueti vanganga mangolo muingi kulandakana zithuadusulu zitedi biyeku tuntambula.
15. Ndandu mbi kimvuka kimbakanga, bakulutu ba kimvuka ba kuba batu ba lufiatu?
15 Bakulutu ba kimvuka ba kuba batu ba lufiatu, kimvuka kioso kimbakanga ndandu. Buidi? Bo zikhomba bammona ti balenda tela bakulutu ba kimvuka ba kutomba lusalusu, mawu mala basadisa muingi babika kuazuka beni. Ayi bo bakulutu ba kimvuka bambongila malongi mawu mu Kibibila ayi mu bilongulu bi nnanga wukuikama, kubika kuandi mu mayindu mawu veka, zikhomba bala luta bafiatila. Nkulutu wu kimvuka na kuzaba kusueka mambu ba kunkamba ayi kuvanga mambu kankanikisa, zikhomba bala luta kumfiatila.
16. Befu kuba basikama, ndandu mbi tuala tuadisa kuidi befu veka ayi kuidi bankaka?
16 Ba mutu wusikama. Befu kutumukinanga Yave mu mambu moso ayi kubaka makani mabongulu mu minsua mi Kibibila, tuala ba kifuani kimboti kuidi batu bankaka. Befu kulongukanga Diambu di Nzambi ayi kukindisa kiminu kitu mu Yave, tuala ba bakuikama kuidi nandi ayi mu zithumu ziandi. Befu kuvanga mawu, tualasa ba ko divuda ayi tualasa vunuka ko mu malongi ma luvunu ayi mu mayindu ma nza ayiyi. (Efe. 4:14; Tia. 1:6-8) Kiminu kitu mu Yave ayi mu zikhanu ziandi, kiala tusadisa tuba basikama kheti bo tuala tambula zitsangu zimbi. (Minku. 112:7, 8) Ayi mu phila ayoyo, tuala ba mvandi bakubama muingi kusadisa bankaka bamviokila mvandi mu ziphasi.—1 Tesa. 3:2, 3.
17. Mbi bilenda sadisa bakulutu ba kimvuka baba kifuani kimboti kuidi bankaka?
17 Bakulutu ba kimvuka, bafueti ba zikhadulu zimboti ayi bafueti ba batu bakhambu tombanga bankaka bavangila mambu mu phil’awu. Bawu bansadisanga bankaka kuba batu basikama ayi bankindisanga kimvuka mu kuba ‘bakuikama mu Diambu di Nzambi.’ (Titu 1:9; 1 Timo. 3:1-3) Mu nzila kifuani kiawu ayi mu kusunga zikhomba, bakulutu ba kimvuka bansadisanga minsamuni kutatamana kukuendanga mu zikhutukunu, kubasikanga mu kisalu ki kusamuna ayi kuvanganga ndongukulu’awu yi Kibibila. Bo zikhomba bamviokila mu mambu maphasi, bakulutu ba kimvuka balenda kuba kindisa batsikika thalu’awu mu Yave ayi mu mambu kankanikisa.
18. Kibila mbi tuntombila kuzitisila Yave ayi kumfikama? (Tala mvandi quadro “ Phila Yimueka yi Kubuela Fikimina Yave.”)
18 Bo tuma mana kufiongunina zikhadulu zi Yave zi kukuitukila, dedi ntinu Davidi, befu mvitu tulenda tuba: ‘Bika Yave, Dimanya diama Dinneni kazitusu.’ (Minku. 144:1) Yave wala tatamana kuba mutu wu lufiatu. Mu luzingu luitu loso, kheti mu bununu, befu tuidi bibila muingi kutuba: ‘Nandi widi Dimanya diama Dinneni,’ mu lufiatu ti Yave wala tusadisanga thangu zioso muingi tuba bakindama mu kiphevi.—Minku. 92:14, 15.
NKUNGA 150 Tomba Yave Muingi Wuvuka
a FIKULA YIDI VA THONONO LEVISTA: Dikabu di Nzambi bantadilanga Yave, dimanya dinneni. Tsielu 28: Khomba yinkietu widi ku nzo yi Kintinu, kasimmona ko phasi kukoluka na bakulutu buadi ba kimvuka.
