DILONGI 24
NKUNGA 24 Yiza ku Mongo wu Yave
Tatamana Kuba Nzenza yi Yave Mvu Ka Mvu!
‘Ah Yave, nani kalenda ba nzenza mu tend’aku?’—MINKU. 15:1.
MAMBU TUANLONGUKA
Tuenfiongunina mbi tufueti vanga muingi tutatamana kuba bakundi ba Yave ayi tuemmona mbi nandi kantomba mu bakundi bandi.
1. Ndandu mbi tulenda baka mu kufiongunina mambu madi mu Minkunga 15:1-5?
MU DILONGI dibedi, tulongukizi ti bisadi bikuikama bi Yave, balenda ba zinzenza mu tend’andi ayi kukuna kikundi kifikama ayi nandi. Vayi mbi tufueti vanga muingi tuba phila kikundi akiokio ayi nandi? Minkunga 15 yimvana mvutu wu kiuvu akiokio. (Tanga Minkunga 15: 1-5.) Nkunga awowo, wuntubila malongi mankinza malenda kutusadisa kufikama Nzambi.
2. Mbi binata Davidi kutubila matedi tenda yi Yave?
2 Buku yi Minkunga kapu 15 yintonina abubu: ‘Ah Yave, nani kalenda ba nzenza mu tend’aku?’ Nani kalenda zingila ku mongu’aku wunlongo? (Minku. 15:1) Bo Davidi kaba tubila matedi tenda mu buku yi minkunga, ḿba waba yindula nzo yinlongo yiba ku divula di Ngibioni mu mua thangu. Davidi mvandi wutubila ‘mongo wunlongo’ ḿba mongo wu Sioni ku Yelusalemi. Ku Ngibioni, kuawu Davidi katungila tenda batula kasu yi luwawanu, nate bayiza tunga kibuangu muingi kutula yawu.—2 Samu. 6:17.
3. Kibila mbi tufueti vuila nkinza Minkunga 15? (Tala mvandi foto.)
3 Bakana ko basi Isaeli boso baba luaku lu kusadila ku nzo yinlongo. Ayi mua batu to baba luaku lu kukota ku nzo yinlongo, kuba kasu yi luwawanu. Vayi bisadi bioso bi Nzambi balenda ba zinzenza ku tend’andi ayi kutatamana kuba bakundi bandi. Mawu befu boso tuntomba. Mu Minkunga kapu 15, yintubila zikhadulu tufueti kuna ayi kumonisa, muingi tutatamana kuba bakundi ba Yave.
Basi Isaeli mu bilumbu bi Davidi, baba luaku lu kuyindula kuba zinzenza mu tenda yi Yave (Tala lutangu 3)
BA WUKUIKAMA AYI VANGANGA MAMBU MAMBOTI
4. Buidi tuzabidi ti kubotama masi ko to mawu Yave kantomba mu befu? Sudikisa. (Yesaya 48:1)
4 Minkunga 15:2, yintuba ti ‘bakundi ba Nzambi badi bakuikama ayi bamvanganga mambu mamboti.’ Tufueti tatamana kuvanga mambu amomo. Buidi tulenda bela batu bakuikama? Bukiedika, vasi ko mutu wuvedila va ntoto. Vayi, befu kuvanga mangolo muingi kutumukina Nzambi, nandi wala tutadila batu bakuikama. Bo befu tukivana ayi tubotama, buka befu tutona kudiata ayi Nzambi. Mu thangu yikhulu, kubutukila mu dikabu di Isaeli mabasa sundulanga ko ti mutu widi wufuana muingi kuba nzenza yi Yave. Kibila bankaka baba buongiminanga Nzambi yi Isaeli vayi bakana ko ‘mu ntima woso.’ (Tanga Yesaya 48:1.) Basi Isaeli bakuikama balonguka zithuadusulu zi Yave ayi kutumukina ziawu. Bobuawu mvandi muingi kubaka lunungu lu Yave, masinsundula ko to kubotama ayi kukuendanga mu zikhutukunu. Vayi tufueti tatamana ‘kuvanga mambu mamboti.’ Mbi mawu mansundula?
5. Mbi binsundula kutumukina Yave mu mambu moso?
5 Va meso ma Nzambi, ‘kuba wukuikama’ ayi ‘kuvanganga mamboti,’ masinsundula ko to, kukuendanga mu zikhutukunu. (1 Samu. 15:22) Befu tufueti vanga mangolo muingi kutumukina Nzambi mu mambu moso ma luzingu, kheti bo tuidi va befu veka. (Zinga. 3:6; Mpovi 12:13, 14) Didi diambu dinkinza beni kutumukina Yave kheti mu mambu maluelu. Kuvanga mawu, mankuiza monisa ti befu tukunzolanga ayi nandi wunkuiza luta kutu zola.—Yoa. 14:23; 1 Yoa. 5:3.
6. Dedi bummonisina Ebeleo 6:10-12, mbi bilutidi nkinza kena mambu moso tuvanga kumbusa?
6 Yave wumvuanga nkinza mambu befu tuvanga kumbusa. Vayi mambu tuvanga kumbusa, masi ko mawu matuvanga kutatamana kuba zinzenza mu tenda yi Yave. Mawu mammonisa Ebeleo 6:10-12. (Tanga.) Yave kazimbakananga ko mambu befu tuvanga kumbusa. Vayi nandi wuntomba, tumbuongimina mu ntima woso “nati kutsuka.” “Befu khambu vonga” nandi wala tusakumuna mu kuba bakundi bandi mvu ka mvu.—Ngala. 6:9.
TUBANGA KIEDIKA MU NTIMA
7. Mbi binsundula kutubanga kiedika mu ntima?
7 Mutu tidi kuba mu khati tenda yi Yave, kafueti ‘tubanga kiedika mu ntima.’ (Minku. 15:2) Mawu masinsundula ko to kubika luvunu. Yave wuntomba tutubanga kiedika mu mambu tuntuba ayi tumvanga. (Ebe. 13:18) Mambu amomo nkinza madi, ‘kibila Yave wunlendanga bankua luvunu vayi wumbanga kikundi kifikama na batu bamvanganga mambu masulama.’—Zinga. 3:32.
8. Zikhadulu mbi tufueti bika?
8 Baboso ‘bantubanga kiedika mu ntima,’ bavunanga ko kutumukina Nzambi vantuala batu, ayi kulevula minsiku miandi ku kinsueki. (Yesa. 29:13) Bawu banlendanga mambu ma luvunu. Mutu wu luvunu kalenda bayisa zithumu zisonga zi Yave. (Tia. 1:5-8) Nandi kalenda manga kutumukina Yave, mu mambu mo nandi kammona ti madi maluelu. Na kumona ti kasimmonikina ko ziphasi mu mambu kamvanga, nandi wunkuiza luta levula minsiku mi Yave mu mambu mankaka. Mu phila ayoyo mbuongimini’andi ka Yave yala ba yi luvunu. (Mpovi 8:11) Befu tufueti tubanga kiedika mu mambu moso.
9. Mbi tulenda longuka bo Yesu kadengana Natanayeli mu khumbu yitheti? (Tala mvandi fikula.)
9 Befu tulenda longuka nkinza wu kutubanga kiedika, mu mambu mamonika mu khumbu yitheti Yesu kadengana Natanayeli. Bo Filipi kanata nkundi’andi Natanayeli badengana ayi Yesu, vamonika diambu dimueka dimboti beni. Kheti yawu khumbu yitheti Yesu badengana ayi Natanayeli, nandi wutuba: “Awowo, widi musi Isaeli wukiedika, no wukhambu vunanga.” (Yoa. 1:47) Bukiedika Yesu wuzaba ti bapostolo bandi, baba tubanga kiedika. Vayi wuluta mona khadulu ayoyo kuidi Natanayeli. Natanayeli wuba mutu wu masumu dedi befu, vayi nandi kasa ba ko mutu wu luvunu ayi waba tubanga kiedika mu mamoso. Yesu wuyituka ayi wutonda Natanayeli mu khadulu ayoyo. Bukiedika, buawu befu tuntomba Yesu ka tutadila!
Filipi widi mu kumonisa Yesu nkundi’andi Natanayeli no khambu tubanga luvunu. Buawu mvitu balenda tutadila? (Tala lutangu 9)
10. Kibila mbi tufueti bela keba keba mu mambu tuntuba? (Tiagu 1:26)
10 Mambu banluta tubila mu Minkunga 15, mantubila phila tuntadilanga bankaka. Minkunga 15:3 yintuba ti mutu widi mu tenda yi Yave, ‘kavuezanga ko bankaka, kavanganga ko ni diambu dimbi kuidi wadi yandi ayi katubilanga ko bubi bakundi bandi.’ Befu kusadila bubi nkhailu wu kutuba, tulenda tuadisa ziphasi kuidi bankaka ayi kuzimbisa luaku lu kuba zinzenza, mu tenda yi Yave.—Tanga Tiagu 1: 26.
11. Mbi binsundula kuvueza ayi mambu mbi malenda monikina mutu wukhambu nyongina kifu akiokio?
11 Nsoniki wu minkunga wusadila kikuma kuvueza. Vayi mbi binsundula kuvueza? Kuvueza zidi zithubulu zi luvunu zilenda tuadisa ziphasi kuidi bankaka. Mutu wukhambu nyongina kifu ki kuvuezanga bankaka, kalenda vayikusu mu kimvuka.—Yele. 17:10.
12-13. Befu khambu ba keba keba, mu mambu mbi tulenda tubila bubi bakundi bitu? (Tala mvandi foto.)
12 Minkunga 15:3 yi tutebula moyo ti zinzenza mu tenda yi Yave, batubilanga ko luvunu kuidi batu bankaka, bavangila ko badi yawu mambu mambi ayi batubilanga ko bubi bakundi bawu. Mbi mawu mansundula?
13 Befu khambu ba keba keba, tulenda tiamuna zitsangu zi luvunu zitedi bankaka. Dedi: (1) khomba yinkieto kasiedi ko mu kisalu ki thangu ka thangu, (2) bakuela basi bue sadilanga ko ku Beteli (3) khomba kasiedi ko nkulutu wu kimvuka voti nsadisi wu bakulutu ba kimvuka. Bukiedika ti didi diambu dimboti kutomba kuzaba, kibila mbi mambu beni mamonikizi ayi kuzabikisa mawu kuidi bankaka? Ḿba vadi bibila babaludizi mambu amomo bio ngie khambu zaba. Nzenza mu tenda yi Yave, ‘kavanganga ko ni diambu di mbi kuidi wadi yandi ayi katubilanga ko bubi bakundi bandi.’
Befu khambu ba keba keba, tulenda tiamuna zitsangu zi luvunu matedi batu bankaka ayi kuba vueza (Tala lutangu 12-13)
KINZIKA BABOSO BADI BOMA BU YAVE
14. Sudikisa buidi zinzenza mu tenda yi Yave banlendilanga ‘bankua mambi.’
14 Buku yi Minkunga 15:4 yintuba ti nkundi wu Yave ‘wunlendanga nkua mambi.’ Buidi tulenda vangila mawu? Mu kuba batu ba masumu, tuisi ko bafuana muingi kufundisa batu. Kibila mbi? Kibila mu kuba batu ba masumu, tulenda zola batu bo befu tulenda muena ti basi ko phasi muingi kuzinga yawu. Vayi tulenda bika kuzola batu bankaka kibila batufuemisanga. Diawu tufueti tatuka to batu Yave “kanlendanga.” (1 Koli. 5:11) Mawu mansundula baboso bakhambu nyongina mavanga mawu mambi, bakhambu vuanga nkinza mambu befu tunkikininanga, voti bamtomba kutulula kikundi kitu na Yave.—Zinga. 13:20.
15. Phila mbi tulenda kinzikila ‘baboso badi boma bu Yave’?
15 Buku yi Minkunga 15:4 yitukindisa muingi tukinzikanga ‘bo badi boma bu Yave.’ Mu phila ayoyo, tunkuiza tomba ziphila zi kumonisina mamboti ayi kukinzika bakundi ba Yave. (Loma 12:10) Buidi? Phila yimueka yidi mu Minkunga 15:4 luntuba ti, nzenza mu tenda yi Yave ‘wundukisanga mambu kankanikisa kheti wundengana bikaku.’ Kubika dukisa mambu tunkanikisa malenda tuadisa ziphasi kuidi bankaka. (Matai 5:37) Dedi, Yave wuntomba zinzenza ziandi bazingila mu luwawanu bavanga lu dikuela. Nandi mvandi, wunkuangalalanga bo kammona matata kudukisa mambu bankanikisa kuidi bana. Luzolo luitu mu Yave ayi kuidi badi yitu, luala tusadisa kudukisa zikhanu zitu.
16. Phila mbi yinkaka tunkinzikilanga bakundi ba Yave?
16 Phila yimueka tulenda kinzikila bakundi ba Nzambi, yidi mu kuba yambanga ayi kuba kabilanga biuma tuidi. (Loma 12:13) Bo tumviokisa thangu na zikhomba zitu ma tusadisanga kukindisa kikundi kitu na bawu ayi ka Yave. Bo tummonisa khadulu yi kuyamba, befu tunlandakananga kifuani ki Yave.
BIKA KUZODILA NGOLO ZIMBONGO
17. Kibila mbi nsoniki wu Minkunga 15 katubila matedi zimbongo?
17 Befu tuma mona ti nzenza mu tenda yi Yave, ‘katombanga ko ndandu va yilu zimbongo kandevisa, katambulanga ko zimbongo muingi kubedisa mutu khambulu fotu.’ (Minku. 15:5) Kibila mbi nsoniki wu minkunga katubila matedi zimbongo? Kibila kutadila zimbongo mu phila yikhambu fuana, kulenda tuadisa ziphasi kuidi bankaka ayi kutulula kikundi kitu na Nzambi. (1 Timo. 6:10) Mu thangu yikhulu, bankaka baba tombanga ndandu va yilu zimbongo baba devisanga zikhomba ziawu. Mvandi mimfundisi baba tambulanga zimbongo ku kinsueki, muingi kubedisa mutu khambulu fotu. Yave wunlendanga batu ba phila ayoyo.—Yehe. 22:12.
18. Biuvu mbi bilenda kutusadisa kufiongunina matedi phila tuntadilanga zimbongo? (Ebeleo 13:5)
18 Buboti kufiongunina phila tuntadilanga zimbongo. Wukiyuvusa: ‘Khumbu ziwombo yinyindulanga matedi zimbongo ayi biuma yilenda sumba? Bo yindeva zimbongo, yinkalanga nkulu muingi kufuta, voti yinyindulanga ti mutu beni kasintomba ko zimbongo beni? Kuba zimbongo, ma kuphanganga kuyimona ti yilutidi nkinza kena bankaka ayi dimbanga diambu diphasi kumonisa khadulu yi kukaba? Minu kumona zikhomba badi zimbongo, yinyindulanga ti bawu banluta zolanga zimbongo kena Yave? Yimvanganga kikundi kuidi batu badi mbakulu ayi yivuanga ko beni nkinza batu bakhambulu mbakulu?’ Befu tutambula luaku lunneni mu kuba zinzenza mu tenda yi Yave. Diawu tufueti keba luaku alolo mu kubika zola zimbongo. Befu kuvanga mawu, Yave kalasa tukuekula ko!—Tanga Ebeleo 13:5.
YAVE WUNZOLANGA BAKUNDI BANDI
19. Kibila mbi Yave kantombila, tutumukina mambu moso madi mu Minkunga 15?
19 Buku yi Minkunga 15 yimmanina mu lukanu alulu luntuba: ‘Noso wumvanga mambu amomo kalasa monikina ko ziphasi.’ (Minku. 15: 5) Nsoniki wu minkunga, wunsudikisa kibila mbi Yave kantombila tutumukina mambu moso bantubila mu nkunga awowo. Nandi wuntomba tuba mu mayangi. Diawu ka tuvaninanga zithuadusulu ziala tuvana lusakumunu ayi lukebu.—Yesa. 48:17.
20. Mbi zinzenza zi Yave bantemina?
20 Zinzenza badi lunungu lu Yave, badi kivuvu ki mayangi mu bilumbu binkuiza. Baklistu basolu, bala baka ‘bibuangu’ Yesu kaba kubikila ku diyilu, mu bilumbu binkuiza. (Yoa. 14:2) Bo badi kivuvu ki kuzinga va ntoto, bamvingila mu mayangi mambu buku yi Nzaikusu 21:3 yinkanikisa. Luidi luaku lunneni Yave kutu tumisa muingi tuba zinzenza mu tend’andi mvu ka mvu!
NKUNGA 39 Tuvanga Dizina Dimboti va Meso ma Yave
