DILONGI 23
NKUNGA 28 Nani Wulenda ba Nkundi Yave
Yave wu Tutumisa Muingi Tuba Zinzenza Ziandi
‘Tend’ami yala ba yawu ayi minu yala ba Nzambi’awu.’—YEHE. 37:27.
MAMBU TUANLONGUKA
Muingi kubuela vua nkinza thumusunu yi Yave, yi kuba zinzenza mu tend’andi ayi phila ka kutukebilanga mu kiyeku kadi ki kututumisa.
1-2. Thumusunu mbi Yave kamvananga kuidi bisadi biandi bikuikama?
MUTU na ku kukuvula nani Nzambi mu ngiewu, mvutu mbi wunkuiza mvana? Ḿba wulenda vana mvutu awuwu: Yave ke Tat’ami, Nzambi’ami ayi Nkundi’ami. Aziozio, zike zithangununu tulenda tedila Yave. Vayi bukiedika ti wulenda tadila Yave banga mutu wukutumisa ku nzo’andi?
2 Ntinu Davidi wudedikisa kikundi kiandi na Yave, dedi kithuadi nzenza kambanga na mutu bentumisa. Nandi wuyuvula: Ah Yave nani kalenda ba nzenza mu tend’aku? Nani kalenda zingila ku mongu’aku wunlongo?’ (Minku. 15:1) Mambu amomo, ma tulonga ti tulenda ba zinzenza zi Yave voti—kuba bakundi bandi mu thumusunu yinneni katuvana.
YAVE WUNTOMBA BEFU TUBA ZINZENZA ZIANDI
3. Nani nzenza yitheti yi Yave ayi buidi baba buadi babela?
3 Ava Yave kavanga kioso kiuma, nandi wuba theti naveka. Vayi buviokila thangu, nandi wuvanga Muan’andi wutheti. Yave wumona beni nyenzi mu kutambula nzenza ayoyo mu tend’andi. Kibibila kintuba ti Yave waba ‘luta monanga mayangi mu Muan’andi.’ Nzenz’andi yitheti mvandi ‘waba kuangalalanga va ntualandi mu thangu zioso.’—Zinga. 8:30.
4. Buidi Yave kabuedila batu mu tend’andi?
4 Bosi Yave wuvanga bivangu binkaka bi kiphevi ayi wuba tumisa mvandi baba zinzenza ziandi. Zimbasi ziandi baku batedilanga ‘bana ba Nzambi’ ayi Kibibila kintuba ti bawu bankuangalalanga mu kuba va kimueka na Yave. (Yobi 38:7; Dani. 7:10) Va thonono, bivangu bi kiphevi biawu to biba mu khati tenda yi Yave. Vayi buviokila thangu, nandi wuyiza tumisa bivangu binkaka va ntoto. Buviokila thangu batu bawombo bayiza ba zinzenza zi Yave, dedi: Enoki, Nowa, Abalahami ayi Yobi. Kibibila kintuba ti bisadi abiobio bi Nzambi, baba bakundi bandi ayi badiata ‘na Nzambi yikiedika.’—Ngene. 5:24; 6:9; Yobi 29:4; Yesa. 41:8.
5. Mbi tulenda longuka mu mbikudulu yike mu Yehezekeli 37:26, 27?
5 Buviokila thangu, Yave wutatamana kutumisa bakundi bandi muingi baba zinzenza ziandi. (Tanga Yehezekeli 37:26, 27.) Dedi mu mbikudulu yi Yehezekeli, befu tulonguka ti Nzambi wuntomba muingi bisadi biandi bikuikama baba yandi kikundi kifikama. Nandi wukanikisa kuvanga ‘luwawanu lu ndembama ayi bawu.’ Mbikudulu ayoyo, yintubila thangu baboso bake kivuvu ki kukuenda ku diyilu ayi bankaka bake kivuvu ki kuzinga va ntoto, bala ba va kimueka mu tenda yi Yave buka ‘nkangu mueka wu mamemi.’ (Yoa. 10:16) Mambu amomo, make mu kumonika mu thangu’itu!
KOSO KUA KUMA TULENDA BA NZAMBI WU TUKEBANGA
6. Buini mutu kalenda bela nzenza mu tenda yi Yave ayi kuini wulenda bakudila tenda beni?
6 Mu thangu yikhulu, zitenda biba bibuangu bi kuvundila ayi kusuamina muinya voti mvula. Zinzenza baba kotanga muawu, baba tambulanga lukebu lu mutu vuili tenda beni. Bo tukivana kuidi Yave, befu tunkuiza banga buka zinzenza mu tend’andi. (Minku. 61:4) Tuntambulanga bidia biwombo bi kiphevi ayi tumbanga kinkundi kimboti na bankaka bake mvandi zinzenza zi Yave. Tenda yi Yave yisi ko yisikama vama vamueka. Ḿba ngie mana kuenda ku tsi yinkaka ayi ḿba mana landakana lukutukunu lunneni kuna ayi kuzaba batu bankaka Yave kansakumunanga mu kuba mu tend’andi. Tenda beni yilenda ba koso kua kuke bisadi bi kuikama bi Yave.—Nzai. 21:3.
7. Kibila mbi tulenda tubila ti bisadi bi Yave bikuikama bamana fua, bake mvawu mu tenda yi Yave? (Tala mvandi foto.)
7 Buabu, abu bisadi bi Yave bikuikama bamana fua? Dike diambu dimboti kutuba ti bawu mvawu bakidi mu tenda yi Yave? Ngete! Kibila mbi? Kibila bawu bake bamonyo mu kilunzi ki Yave. Yesu wutuba: “Bafua bala vulubuka. Diawu Mose katubila mawu mu kinongo ki nti wu zitsendi, bo nandi katedila Yave, ‘Nzambi yi Abalahami, Nzambi yi Isaki ayi Nzambi yi Yakobi.’ Nandi widi Nzambi kubika kuandi ti yi bafua, vayi yi batu bamonyo, kibila kuidi nandi baboso badi bamonyo.”—Luka 20:37, 38.
Kheti bisadi bi Yave bafua, mvandi bake zinzenza mu tend’andi (Tala lutangu 7)
NDANDU TUMBAKANGA AYI MAMBU TUFUETI VANGA
8. Ndandu mbi zinzenza zi Yave bambakanga mu kuba mu tend’andi?
8 Dedi bo tenda voti muanzu wulenda bela kibuangu ki kuvundila ayi kubaka mvevu, tenda yi Yave yinsadisanga zinzenza ziandi kubaka lukiebu lu kiphevi ayi kivuvu mu bilumbu binkuiza. Befu kutatamana bafikama kuke Yave, vasi ko diambu dimbi Satana kalenda ku tuvangila diala kadidila. (Minku. 31:23; 1 Yoa. 3:8) Mu nza yimona, Yave wala tatamana kukeba bisadi biandi bikuikama kubika to mu mambu malenda kuba vanga bubi mu kiphevi, vayi mvandi wala manisa lufua.—Nzai. 21:4.
9. Mambu mbi Yave kantomba zinzenza ziandi bavanga?
9 Bukiedika, luke luaku lunneni kuba zinzenza mu tenda yi Yave, kibila mawu ma tusadisa kuba kikundi kifikama ayi nandi. Zikhadulu mbi tufueti ba muingi tutatamana kuba zinzenza ziandi? Ba kukutumisa ku nzo yi mutu, ngie wunkuiza zaba mambu mbi bawu bantomba ngie wuvanga. Dedi, ḿba bawu bankuiza tomba ngie wuvula zisapatu ava wukota ku nzo’awu ayi ngie wunkuiza vanga mawu. Bobuawu mvandi, befu tufueni zaba mbi Yave kantomba batu bankota mu tend’andi bafueti tatamana kuvanga. Luzolo luitu mu Yave lu tunatanga kuvanga mamoso mantombulu “muingi kunkuangidika mu mambu moso.” (Kolo. 1:10) Ayi kheti Yave ke nkund’itu, vayi tuzabizi mvandi ti widi Nzambi ayi Tata no befu boso tufueti kinzika. (Minku. 25:14) Kuzaba mambu amomo, ma tusadisa kubika zimbakana nani nandi kakeli. Befu kuba boma bu Yave, buawu buala tusadisa tubika kunyongisa. Bukiedika, befu tuntomba kudiata na Nzambi mu kuzaba ‘ndilu’itu.’—Mika 6:8.
YAVE KASA MONISA KO LUVASANU KUIDI BASI ISAELI
10-11. Buidi Yave kamonisina ti kasi ko luvasanu mu phila kakiebila basi Isaeli ku thandu yi Sinai?
10 Yave kamonisanga ko luvasanu kuidi bakundi bandi. (Loma 2:11) Tulenda mona buini nandi kavangila mawu, mu phila kakiebila basi Isaeli baba ku thandu yi Sinai.
11 Bo kakula dikabu diandi mu buvika ku Ngipiti, Yave wubieka bankaka zinganga Nzambi muingi basadilanga ku nzo yinlongo. Basi Levi batambula kiyeku ki kuba sadisa mu mambu mankaka matedi nzo yinlongo. Bukiedika ti batu baba sadilanga ku nzo yinlongo ayi bankaka baba bafikama, bawu baba luta banga kinkundi kifikama na Yave kena bankaka? Ndamba! Yave kasi ko luvasanu.
12. Tubila kifuani kimmonisa ti Yave kasa ba ko luvasanu mu phila kakebila dikabu di Isaeli. (Esodu 40:38) (Tala mvandi fikula.)
12 Baboso baba ku thandu, baba loluawu luaku lu kuba kikundi na Yave kuba kuandi bo baba biyeku binkinza voti basa ba ko babelama na nzo yinlongo. Dedi, bo Yave kasikimisa dituti ayi mbazu va yilu nzo yinlongo, nandi wuvangila mawu mu phila baboso mu dikabu di basi Isaeli banungina kumona mangitukulu amomo. (Tanga Esodu 40:38.) Dedi, bo dituti diaba kuendanga khonzu yinkaka, kheti batu baba beni batatuka na nzo yinlongo, baba nunganga kumona diawu ayi vaba tombuluanga bakupika biuma biawu ayi kulandakana yoyawu nzila na dikabu dioso. (Zinta. 9:15-23) Mvandi, bo baba sikanga ziphungi mu phila ziviakana, baboso baba visanga ti bafueti kuenda kuma kunkaka. (Zinta. 10:2) Bukiedika, kukala va ndeku nzo yinlongo, kisa ba ko kivisa ti mutu viokizi kikundi kifikama na Yave. Vayi baboso mu dikabu di Yave, baba luaku lu kuba zinzenza ziandi ayi kutambula thuadusulu ayi lukebu luandi. Bobuawu mvandi bubu, koso kua kuma tunkalanga, tulenda tambula luzolo lu Yave ayi lukebu luandi.
Nzo yinlongo yiba va khati dikabu di Isaeli, yiba mbonosono ti Yave kasi ko luvasanu (Tala lutangu 12)
BIFUANI BI BILUMBU BITU BIMMONISA TI YAVE KASI KO LUVASANU
13. Buini Yave kammonisinanga ti kasi ko luvasanu mu bilumbu bitu?
13 Bankaka mu dikabu di Nzambi, banzingilanga mu bibuangu bi fikama ku kikulutu kitu, voti mu Zifiliali zi Zimbangi zi yave. Bankaka bambuelanga mioku mu mambu mawombu mamvangamanga mu bibuangu abiobio ayi bansalanga va kimueka na zikhomba bantuama ntuala mu kimvuka ki Yave. Vake mvandi bankaka bake minkengididi mi bimvuka, voti mu ziphila zinkaka zi kisalu ki thangu ka thangu. Boti ngie wisi ko dedi zikhomba aziozio, ba lufiatu ti Yave wunzolanga baboso nandi kantadilanga zinzenza ziandi. Ayi nandi wunkebanga kadika mutu mu bawu. (1 Pete. 5:7) Baboso mu dikabu di Yave, bantambulanga biobiawu bidia bi kiphevi, yoyawu thuadusulu ayi loluawu lukebu.
14. Kifuani mbi kinkaka kimmonisa ti Yave kasi koluvasanu?
14 Kifuani kinkaka ki phila Yave kammonisinanga kukambu ku luvasanu kitedi, batu balenda tambula Kibibila mu nza yimvimba. Masonoko Manlongo masonimina mu zimbembu zitatu: Kiebeleo, Alamaiku ayi Kingeleko. Bukiedika ti batu bannunganga kutanga zimbembu aziozio bawu balutidi kikundi kifikama na Yave kena bo bakhambu zaba kutanga ziawu? Ndamba, bakana buawu ko.—Matai 11:25.
15. Mbi bituvana lufiatu ti Yave kasi ko luvasanu? (Tala mvandi foto.)
15 Muingi mutu katambula lunungu lu Yave, vasintombulu ko kutala theti boti nandi wulonguka beni ove zimbembu zikua kazebi kutuba. Vayi Yave wumvananga ndueng’andi kuidi baboso mu nza yimvimba, kuba kuandi balonguka voti ndamba. Diambu diandi Kibibila, dike mu kusekulu mu zimbembu ziwombu. Mu phila ayoyo, batu mu nza yimvimba balenda baka ndandu mu malongi ma Kibibila ayi kulonguka buidi bu kubela bakundi ba Yave.—2 Timo. 3:16, 17.
Phila bansekudila Kibibila mu zimbembu ziwombu, kummonisa kukhambu ku luvasanu lu Yave (Tala lutangu 15)
TATAMANA KUBA NZENZA YI YAVE
16. Dedi bummonisina Mavanga 10:34, 35, mbi tufueti vanga muingi tutatamana kutambula lunungu lu Yave?
16 Luke luaku lunneni kukota mu tenda yi Yave ayi kuba zinzenza ziandi. Nandi ke mutu wulutidi mamboti, luzolo ayi zabizi kuyamba zinzenza. Mvandi kasi ko luvasanu, wuntambulanga baboso mu kukhambu tadila kuini bankalanga, kikhulu, mvila, phunga, boti balonguka beni voti ndamba. Vayi batu banlandakananga zithumu ziandi, bawu to nandi kankikininanga muingi baba zinzenza ziandi.—Tanga Mavanga 10:34, 35.
17. Mbi tuala longuka mu dilongi dinlanda?
17 Dedi bummonisina Minkunga 15:1, Davidi wuyuvula biuvu abibi: ‘Ah Yave, nani kalenda ba nzenza mu tend’aku? Nani kalenda zingila ku mongo’aku wunlongo?’ Nsoniki wu Minkunga, wutuadusu muingi kutambudila biuvu abiobio. Mu dilongi dinlanda, tuala tubila mua mambu malenda tusadisa muingi tutatamana kubaka lunungu va mesu ma Yave.
NKUNGA 32 Ba ku Khonzo Yave
