1-2. (a) Kifuani mbi kimmonisa ti batu badi tsatu yi kubaka mbombolo ayi bazebi mvandi kubomba bankaka? (b) Ziphasi mbi bana bankaka bamviokilanga?

BATU boso bambutukanga na tsatu yi kubaka mbombolo, vayi bazebi mvandi kubomba bankaka. Yindula kifuani akiki: Muana kilezi widi mu kusakana ayi wumbua va tsi ayi wunluala va dikuma voti dikungulu. Ḿba nandi wuntona kudila ayi wunduma kuidi mam’andi voti tat’andi. Matata balendi belusa ko mbesa beni, vayi balenda bomba muan’awu. Ḿba balenda kunkuvula mambu mbi mabe monika ayi kumfiona matsuela. Bawu ba kumbumbakana mu luzolo ayi balenda kunkamba: “Bika kudila. Mankuiza vioka kuandi.” Ḿba balenda kuntula vana bilongu. Mua thangu yimvioka, muana beni wunlembo kudila ayi wumvutuka kubue sakana. Bo bumviokila thangu, benza beni yinkuiza beluka.

² Kiadi ayi kuinda kuzaba ti khumbu zinkaka bana balezi bamviokilanga mu mambu malutidi phasi kena kuluala va dikuma voti dikungulu. Bankaka mu bawu ba kubakuikanga kubundana nyitu. Kheti mammonika khumbu yimueka voti khumbu ziwombo, kifu akioki kilenda lueka ntima wu muana ayi kuntuadisa ziphasi mu mimvu miwombo. Khumbu zinkaka bambakulanga mutu vengi mambu beni ayi ba kumfundisanga mu mawu. Vayi khumbu zinkaka, valenda monika buka ti mutu beni kasintambula ko lufundusu mu mambu kavanga. Kheti mutu beni ba kumfundisa mu mambu kavengi, muana kilezi kalenda tatamana kutovuka mu mambu beni nate mu bukulutu buandi.

3. Dedi buntubila 2 Kolinto 1:3, 4, mbi Yave kantomba? Ayi buivu mbi tunkuiza baka mimvutu?

³ Boti khomba bakuika kubundana nyitu bo kaba muana kilezi ayi wukhidi tovuka mu kibila ki mambu beni. Mbi bilenda kunsadisa  kununga kiunda beni? (Tanga 2 Kolinto 1:3, 4.) Buku ayiyi yimmonisa ti Yave wuntomba kadika dimemi diandi ditambula luzolo ayi mbombolo. Diawu dilongi adidi dinkuiza vana mimvutu mi buivu bitatu: (1) Kibila mbi batu bakuika kubundana nyitu bo baba bana balezi bantombila mbombolo? (2) Banani balenda kuba vana mbombolo beni? (3) Ayi mu ziphila mbi tulenda vangila mawu?

4-5. (a) Kibila mbi tufueti visila disuasana didi mu bana ayi bakulutu? (b) Mambu mbi malenda monikina muana bakuika kubundana nyitu?

⁴ Bakulutu bankaka bakuika kubundana nyitu bo baba balezi, balenda tomba mbombolo kheti mimvu miwombo mima vioka tona baba vangila mambu beni. Kibila mbi? Ditheti, tufueti visa ti bakulutu disuasana badi na bana balezi. Phila nkulutu kantovukilanga bo bakumvangila mambu mambi disuasana yidi na phila muana kilezi bakuika kubundana nyitu kantovukilanga. Tala bifuani.

⁵ Muana kilezi kafueti ba lufiatu mu batu ba kunkiebanga. Lufiatu alolo lunsadisanga muana kuba nsika ayi kulonguka kufiatila batu ba kummonisanga luzolo. (Minkunga 22:9) Kiadi ayi kiunda kuzaba ti khumbu zinkaka mutu wunkuikanga muana kilezi kubundana nyitu widi muisi dikanda voti nkundi wu dikanda. Boti mutu wunkuika muana kilezi kubundana nyitu widi mutu kamfiatilanga, dilenda ba diambu diphasi nandi kubue fiatila batu bankaka.

6. Kibila mbi kukuika muana kilezi kubundana nyitu kidi kifu kimbi?

⁶ Bana balezi basa zaba ko kukikakidila baveka. Muana kilezi kasi ko nyitu yikubama muingi kubundana nyitu ayi kasi ko luzabu mu matedi kubundana nyitu. Kunkuika kuvanga mawu ava nandi kuba wukubama kulenda kuntuadisa ziphasi ziwombo mu luzingu. Kifu akioki kilenda vanga muana kilezi kuba mayindu makhambu fuana matedi kubundana nyitu, matedi naveka voti woso mutu wunkaka wuntomba kumfikama.

7. (a) Kibila mbi mutu wunkuikanga bana balezi kubundana nyitu kakhambu muenanga phasi kubavuna? Mambu mbi ma luvunu balenda kunkamba? (b) Mayindu mbi mambi malenda konzuka na muana mu kibila ki luvunu alolo?

⁷ Bana balezi basa zaba ko kuyindula mu phila yisulama, kubaka makani voti kuzaba mbi bilenda kuntuadisa ziphasi ayi kutina mawu. (1 Kolinto 13:11) Diawu bakulutu badi kifu ki kukuika bana balezi kubundana nyitu, banunginanga kuba vuna. Bawu baku bakambanga mambu maluvunu dedi: Bana beni badi fotu mu mambu bakubavangila, balendi zabikisa ko mawu kuidi mutu wunkaka, na kutuba ni mutu wala kunkikinina voti kunsadisa ayi muana kilezi na kubundana nyitu na nkulutu yidi phila yi kumonisina luzolo badi. Mimvu miwombo milenda vioka muingi muana kilezi kavisa ti mambu beni madi ma luvunu. Muana kalenda konzuka ayi mayindu mambi, dedi kuyindula ti kasi ko luvalu ayi kasa fuana ko kutambula luzolo ayi mbombolo yi batu bankaka.

8. Kibila mbi tulenda ba lufiatu ti Yave wulenda bomba batu baviokila mu ziphasi?

⁸ Kuzaba mambu amomo kutusadisa kuvisa kibila mbi batu bamviokilanga mu mambu beni bantovukilanga mu mimvu miwombo. Bukiedika, kifu akioki kidi kimbi beni! Kuzaba ti kidi kifu kitembakana mu nza yimvimba, kidi kivisa kimmonisa ti tuidi mu kuzingila mu ‘bilumbu bitsuka’, thangu yidi beni ‘batu bakhambulu luzolo’ ayi ‘batu bambi ayi bankua luvunu bela luta vanga mambu mambi.’ (2 Timoteo 3:1-5, 13) Mintambu mi Satana midi mimbi, ayi kiunda beni kumona batu kuvanga mambu ma kunkuangidika. Yave lutidi mangolo na Satana ayi batu kamvukumunanga, Nandi zebi mintambu mioso  mi Satana. Tulenda ba lufiatu ti Yave wummonanga mambu ma phasi tumviokila, ayi nandi wulenda tuvana mbonbolo tuntomba. Luaku lunneni beni kusadila ‘Nzambi yi mbombolo yoso, wukutubombanga mu ziphasi zitu zioso, muingi mu mbombolo befu tuntambula kuidi Nandi, tubaka bu kubombila bankaka mu ziosokua ziphasi bammona.’ (2 Kolinto 1:3, 4) Vayi, banani Yave kansadilanga muingi kuvana mbombolo beni?

9. Mu kulandakana mambu Davidi katuba mu Minkunga 27:10, mbi Yave kela vangila batu batovula kuidi basi dikandi diandi?

⁹ Batu bankaka bammonanga ti matata mawu basa bakieba ko mu batu badi kifu ki kukuikanga bana balezi kubundana nyitu, ayi bankaka ba kuba bundulanga nyitu kuidi batu badi yawu kikundi. Batu baviokila mu mawu, mbombolo bantomba. Ntinu Davidi wuzaba ti Yave, nandi tho yilutidi tulenda bakila mbombolo. (Tanga Minkunga 27:10.) Davidi wuba lufiatu ti Yave wunyambanga mu luzolo batu boso bantovulanga kuidi basi dikanda diawu. Buidi Yave kamvangilanga mawu? Nandi wunsadilanga batu badi bakuikama mu nandi: zikhomba zitu zi babakala ayi zi bakieto badi kiminu kimueka na befu. Yesu wumona mvandi mawu. Nandi wutuba ti batu baba buongimina Yave baba buka zikhomba ziandi zi babakala, zi bakieto ayi zingudi kuidi nandi.—Matai 12:48-50.

10. Mbi Polo katuba mu matedi kisalu kiandi buka nkulutu wu kimvuka?

¹⁰ Tala kifuani kimmonisa ti kimvuka kidi buka dikanda. Mvuala Polo wuba nkulutu wu kimvuka wukuikama ayi waba sadisanga beni kimvuka. Nandi wutuadusu mu pheve yinlongo yi Nzambi muingi kutuba ti bankaka bafueti landakana kifuani kiandi, dedi bo nandi kaba landikininanga kifuani ki Klisto. (1 Kolinto 11:1) Tala mbi Polo katuba matedi kisalu kiandi buka nkulutu wu kimvuka: ‘Befu tuyiza ba batu ba buphombu va khat’inu, buka ngudi wunkuemika ayi wunkieba buboti bana bandi.’ (1 Tesalonika 2:7) Mu kulandakana kifuani ki Polo, bo bakulutu ba kimvuka bambomba khomba, bawu balenda sadila Kibibila ayi kukolukila mu luzolo.

11. Mbi bimmonisa ti bakulutu ba kimvuka basi ko to bawu balenda vana bankaka mbombolo?

 ¹¹ Bukiedika ti bakulutu ba kimvuka bawu to bafueti bomba batu bakuika kubundana nyitu? Ndamba. Befu boso tuidi kiyeku ki ‘kuyibombasana befu na befu.’ (1 Tesalonika 4:18) Boti khomba yinkieto mu kimvuka wuntomba mbombolo, zikhomba zinkaka zi bakieto bayonzuka mu kipheve balenda kunsadisa. Buboti beni kuzaba ti Yave wuyifuanikisa buka ngudi wumbomba muan’andi. (Yesaya 66:13) Kibibila kintubila bakieto bawombo babomba batu bankaka baviokila mu ziphasi. (Yobi 42:11) Yave wunkuangalalanga beni kumona bakieto mu kimvuka kubomba zikhomba zi bakieto bamviokila mu ziphasi! Khumbu zinkaka, nkulutu wumueka wu kimvuka voti babuadi balenda kuvula khomba yinkieto wuyonzuka mu kipheve boti nandi kalenda kukivana muingi kubomba khomba yinkaka yinkieto mu kimvuka. *

12. Mbi tufueti bika tomba kuvanga bo tunsadisa khomba mu kimvuka?

¹² Bo tunsadisa khomba mu kimvuka, tubika tombanga kuzaba mambu nandi kakhambu tia kuzabikisa bankaka. (1 Tesalonika 4:11) Diawu, mbi tulenda vanga muingi kusadisa ayi kubomba zikhomba zitu? Tuemmona mu Kibibila ziphila zinna tulenda bombila bankaka.

13. Dedi buntubila 1 Mintinu 19:5-8, mbi mbasi yi Yave kavangila Elia? Buidi tulenda landikinina kifuani kiandi?

¹³ Vanga dioso diambu dilenda sadisa mutu widi mu kutovuka. Khumbu yimueka, mbikudi Elia wutina muingi babika kumvonda. Nandi wuba kiunda kingolo diawu kaba tombila kufua. Muingi kukindisa Elia, Yave wufila mbasi’andi muingi kuentala. Mbasi beni wusadisa Elia mu biuma kaba tomba mu thangu beni: Nandi wunkubikila bidia ayi wunkindisa muingi kadia. (Tanga 1 Mintinu 19:5-8.) Nongu ayiyi yitulonga diambu dimueka dinkinza: Khumbu zinkaka diambu diluelu tumvangila mu luzolo dilenda sadisa beni bankaka. Biuma dedi bidia, kuvana mua nkhayilu voti kusonika nkanda kulenda sadisa khomba widi mu kiunda kumona ti tukunzolanga ayi tukumvuanga nkinza. Bankaka mu befu tuzolanga ko kukuwa mutu wu kutukamba mambu maphasi kamviokila mu luzingu luandi. Kheti bobo, tulenda kuba monisa ti tuba vuanga nkiza mu kuvanga dioso diambu muingi kuba sadisa.

14. Dilongi mbi dinkaka tulenda longuka mu nongu yi Elia?

¹⁴ Sadisa mutu widi ntima wulueka kubaka nsika ayi kazaba ti ni mutu wala kumvanga mambi. Nongu yi Elia yitulonga diambu dinkaka dinkinza. Mu mangitukulu Yave wuvana mbikudi’andi biabioso kaba tomba muingi kununga kudiata nate ku Mongo Holebi. Ḿba Elia wuba nsika, kibila kibuangu beni kiba beni kinanu ki batu baba tomba kumvonda ayi kuawu Yave kavangila luwawanu na basi Isaeli mimvu miwombo kumbusa. Mbi tulenda longuka mu mambu amomo? Boti tutidi kubomba mutu bakuika kubundana nyitu, tufueti kunsadisa theti kuba nsika. Buboti beni bakulutu ba kimvuka kutebukanga moyo mambu amama mu thangu bansadisa khomba yinkieto widi mu kiunda. Ḿba nandi kalenda luta ba nsika kukolukila mambu mandi ku nzo’andi bika kuandi ku Nzo yi Kintinu. Vayi khomba wunkaka kalenda sola kukoluka mambu mandi ku Nzo yi Kintinu.

15-16. Mbi binsundula kukuwa buboti?

¹⁵ Yuwa buboti. Kibibila kintuba: ‘Benu boso mufueti ba batu bakubama mu kukuwa, vayi kubika fika kolukanga.’ (Yakobi 1:19) Bukiedika ti tuzebi kukuwa buboti? Ḿba tulenda yindula ti kukuwa buboti kunsundula kuba to sui, kutala mutu wunkoluka ayi kubika tuba ni diambu. Vayi buisi ko buawu. Buka, bo Elia kazabikisa Yave mambu moso maphasi kaba viokila, nandi  wunyuwa. Nandi wuvisa ti Elia boma kaba, waba kuyimona buka ti widi naveka ayi waba yindula ti kisalu kioso kavanga kiba kiphamba. Mu luzolo Yave wusadisa Elia kununga mabanza moso kaba. Yave wumonisa mu bukiedika ti wuyuwa Elia.—1 Mintinu 19:9-11, 15-18.

¹⁶ Bo khomba kankoluka, buidi tulenda monisina kiadi ayi luzolo? Khumbu zinkaka, kuyindula buboti mambu tuntuba ayi kutubila mawu mu luzolo kulenda sadisa mutu kuvisa mabanza mitu. Buka, ngie wulenda tuba: “Kiunda beni kuzaba ti mambu amomo ma kumonikina. Ni muana kilezi kasa fuana ko kuviokila mu mambu amomo!” Ḿba ngie wulenda vanga biuvu biodi voti kimueka muingi kumonisa ti widi mu kuvisa mambu mutu widi mu kiunda kantuba. Ngie wulenda kunkuvula, “Ngie wulenda kutsadisa kuvisa buboti mambu wuntomba kutuba?” voti “Mu mambu makhamba, yimavisa ti . . . Mawu kuandi?” Mambu amomo ma luzolo mammonisanga kuidi mutu widi mu kiunda ti ngie widi mu kunkuwa ayi widi mu kuvanga mangolo muingi kuvisa mabanza mandi.—1 Kolinto 13:4, 7.

17. Kibila mbi tufueti monisina mvibudulu ayi ‘kubika fika kolukanga’ bo tunsadisa mutu widi mu kiunda?

¹⁷ Tebukanga moyo ‘kubika fika kolukanga.’ Mu thangu mutu kankoluka, bika kunzenga mambu kantuba muingi kumvana malongi voti kuludika phila kanyindudila. Ayi ba mvibudulu! Bo Elia kazibula ntim’andi kuidi Yave, nandi wuba beni mu kiunda ayi wusadila bikuma bingolo. Kheti bo Yave kakindisa kiminu ki Elia, nandi wubue zibula ntim’andi mu kusadila biobiawu bikuma. (1 Mintinu 19:9, 10, 13, 14) Mbi tube longuka mu mawu? Khumbu zinkaka mutu widi mu kiunda kalenda tukamba mabanza mandi khumbu ziwombo. Dedi Yave, befu mvitu tufueti kunkuwa mu mvibudulu. Tubika ba kifu ki kutomba kuludika mambu kamviokila, bulutidi buboti kumonisa ti tukumvua nkinza ayi tukunzolanga.—1 Petelo 3:8.

18. Kibila mbi minsambu mitu milenda mbomba mutu widi kutovuka?

¹⁸ Sambila ayi mutu widi mu kutovuka. Khumbu zinkaka mutu wubanga beni mu kiunda kanunganga ko kusambila. Ḿba nandi wunyindulanga  ti kasi ko wufuana muingi kukoluka na Yave. Boti tutidi kumbomba mutu beni, tulenda kukivana muingi kusambila yandi ayi kutanguna dizina diandi mu nsambu. Tulenda kamba Yave ti befu ayi kimvuka tunzolanga beni mutu widi mu kiunda. Mvandi tulenda dinda Yave kavana ndembama ayi mbombolo kuidi dimeme adiodi didi luvalu va meso mandi. Phila minsambu amiomi milenda bomba mutu widi mu kutovuka.—Yakobi 5:16.

19. Mbi biala tusadisa kukoluka bikuma bifuana muingi kubomba bankaka?

¹⁹ Sola bikuma bimbelusanga ayi bimbombanga. Yindula ava kukoluka. Kukhambu sola buboti bikuma kulenda lueka, vayi bikuma bimboti voti bi luzolo bidi mbukulu. (Zingana 12:18) Diawu, dinda kuidi Yave kakusadisa kukoluka bikuma bimboti, bimbombanga ayi binkindisanga. Ayi bika kuzimbakana ti bikuma binluta mbombanga bimfumina kuidi naveka Yave ayi nandi wubitula mu Kibibila.—Ebeleo 4:12.

20. Mambu mbi batu bakuika kubundana nyitu balenda kikinina? Ayi mbi tufueti kuba tebulanga moyo?

²⁰ Batu bakuika kubundana nyitu balenda kikinina ti basi ko luvalu ayi baba zolanga ko. Mambu amomo madi ma luvunu! Diawu sadila kibibila muingi kuba tebula moyo ti luvalu badi va meso ma Yave. (Tala quadro yintuba “ Mbombolo Yimfumina mu Kibibila.”) Bo mbikudi Danieli kaba wulebakana ayi mu kiunda, mbasi yi Yave wuyisa muingi kunkindisa. Yave waba tomba Danieli kazaba ti luvalu kaba va meso mandi. (Danieli 10:2, 11, 19) Bobuawu mvandi, kadika khomb’itu widi mu kiunda luvalu kadi va meso ma Yave!

21. Mambu mbi batu bakhambu nyonganga masumu mawu bala monikina? Vayi mbi befu boso tufueti vanga mu thangu tumvingila lufundusu lu Yave?

²¹ Bo tumbomba bankaka, tufueti kuba tebula moyo ti Yave, widi Nzambi yi luzolo. Ayi tulendi zimbakana ko mvandi ti nandi widi Nzambi yi busonga. Yave zebi matedi batu boso bakuika kubundana nyitu, kheti ni mutu wunkaka kasa zaba. Yave wummonanga mamoso ayi kasimbika ko ni mutu wukhambu nyonga masumu mandi kukhambu fundusu. (Zintalu 14:18) Bo tukhidi vingila mawu, tufueti vanga mangolo muingi kumonisa luzolo kuidi batu bakuika kubundana nyitu. Buboti beni kuzati ti thangu yiluelu yisiedi, Yave wala belusa batu boso bantovukanga mu kibila ki Satana ayi nza kanyadila! Ayi tulenda ba lufiatu ti mu nza yimona, mambu moso mambi tumviokila bubu, mala zimbala mu bilunzi bitu ayi mu mintima mitu.—Yesaya 65:17.